Луппов, Владимир Васильевич

Владимир Васильевич Луппов
Владимир Васильевич Луппов
Вордӥськем дырыз	17-тӥ пӧсьтолэзе 1897
Вордӥськем интыез	Люк гурт, Ватка губерния, Росси империя али Удмуртия
Кулэм дырыз	5-тӥ толшоре 1944 (46 арес)
Кулэм интыез	Бердичев кар дорын, Житомир улос, УССР, СССР
Кунмуртлыкез	Росси империя→
Кыӵе войскоез	танковой войскоос
Служить карон аръёсыз	1915 — 1944
Званиез	(кулэмез бере)
Частез	Граждан ож,; Хасан ожмаськонъёс (1938),; Быдӟым Атыкай ож
Командовать кариз	3-тӥ гвардейской танковой армилэн; 9-тӥ механизированной корпусэзлэн; 71-тӥ механизированной бригадаеныз
Ожмаськонъёс/ожъёс	Быдӟым Атыкай ож;
	Медиафайлъёс РувикиМедиа пушкын

Владимир Васильевич Луппов^[1] (1897—1944) — совето военачальник, 71-тӥ механизированной бригадалэн командирез, генерал-майор (кулэмез бере). Совето Союзлэн Героез (кулэмез бере).

Улон сюресэз

Вордӥськиз 1897-тӥ арын 17-тӥ пӧсьтолэзе^[2] Удмуртиысь Балезино ёросын Люк гуртын ӟуч семьяын. 1915-тӥ арын, Глаз гимназиысь 6 классэз йылпумъямез бере, юнкерской училищее ускоренной курсъёсы дышетскыны пыриз. Нырысетӥ дунне ожын подпоручик чинын ожмаськиз. 1918-тӥ арын гудырикошконэ Горд Армие гожтӥськиз но Граждан оже пыриськиз^[3]. Вятские Поляны карысен кутскыса, Омскозь ож сюресэз ортчиз, батальонэн командовать кариз. Собере Шундыпуксёнпал фронтын ожмаськиз. 1920-тӥ арын Горд Знамялэн орденэныз пусъемын^[4]. 1928-тӥ арын Фрунзе нимо Военной академия улсын кылдытэм курсъёсты ортчиз, 1931-тӥ арын — командной составез умоятонъя курсъёсты. Хасан ты дурын ортчем ожмаськонъёсы пыриськиз^[4].

1938-тӥ арын Лупповез Рабоче-Крестьянской Горд Армиысь куштӥзы но ӝоген со бӧрсьы пытсэтазы, 100 нунал смертникъёслэн камераязы возизы. Берло, мозмытэм бере, званиез берентэмын^[4]. 1939-тӥ арысен Фрунзе нимо академиын дышетӥз.

Быдӟым Атыкай ож

1941-тӥ арын пӧсьтолэзьысен Быдӟым Атыкай оже пыриськиз. Шундыпуксёнпал, Брянск, Лымшор-Шундыпуксёнпал, Воронеж но 1-тӥ Украин фронтъёсын ожмаськиз. Кык пол сӧсырмыны шедьылӥз. 1942-тӥ арын большевикъёслэн коммунист партиязы пыриз (ВКП(б).

1943-тӥ арын Горд Кизили орденэн данъетамын. Гудырикошкон толэзьысен — Воронеж фронтын, 7-тӥ гвардейской танковой корпуслэн гвардейской мотострелковой бригадаезлэн командирез ^[3].

Куарусёнэ бригадалэн частьёсыз кык но ӝыны уй-нунал куспын 200 иськемез ортчизы. Великий Букрин котырын Днепр шурез выжизы но пичияк плацдармез киултӥзы. Командной пунктлэн азьпал радын интыяськемез огласянь частьёсын кивалтыны ӟеч луонлык сётӥз, нош мукет ласянь - бадӟым кышкытлык кылдытӥз. 29-тӥ куарусёнэ тушмон асьме частьёс вылэ ожалскиз. Лупповлэн бригадаез кыксэ атаказэ пазьгыны быгатӥз. Та ожын Лупов Горд Знамялэн кыкетӥ орденэныз данъетамын вал^[3].

Коньывуон толэзе полковник Лупповез 3-тӥ гвардейской танковой армилэн 9-тӥ механизированной корпусэзлэн 71-тӥ механизированной танковой бригадаеныз кивалтыны юнматӥзы. Соберегес ик бригадаез, рейдъёс ортчытъян понна, Киев-Фастов котыре, тушмон мышкы выжтӥзы. Коростышевской тушмон группировкаез азинлыкго пазьгемзы бере^[4], лымшор пала азинскыса, бригада Фастов карез но Попельня чугун сюрес станциез мозмытӥз. Собере шундыпуксён палан тушмонэз ӝыны толэзь пала котретын возиз^[3].

1943-тӥ арын 9-тӥ толсуре фронтлэн штабаз 71-тӥ механизированной бригадалэн командирезлы полковниклы Владимир Лупповлы Совето Союзлэн Героез ним сётон вылысь, наградной материал вуиз^[3].

1944-тӥ арын толшор толэзьлэн кутсконаз Луппов сӧсырмыны шедиз^[5].

Берпуметӥ ожмаськонэз

Лупповлэн шайгуэз

5-тӥ толшоре выжон уе, командирлэн юн сӧсырмемез но урод куазь шоры учкытэк, 7 танклэсь но 3 мотострелковой батальонлэсь кылдытэм корпус рейдэ, фронт линия сьӧры вырӟиз. Лупповлэн косэмезъя, ожгарчиос Бердичев кар пала мынонзэс шуак воштӥзы но лымшор пала азьланьскизы, озьы тушмонэз шуге-леке вуттӥзы^[5].

Корпуслэн кык мукет бригадаосыз Пятка черкогуртэз киултэмзы бере, Луппов аслэсьтыз бригадазэ Чуднов-Бердичев сюрес кузя лымшор-шундыӝужан пала Малосёлка черкогурт доры поттӥз. Ӵапак татын тушмонлэн пехотной частез интыяськемын вал. Танковой группаен ӵош гурт дорозь вуыса, комбриг мотострелковой бригадаосты гуртэз котыр ласянь атаковать карыны косӥз^[5].

Танкъёс урмыса гуртэ пыризы но пегӟыны вуымтэ 200 пала немец солдатъёсты быдтӥзы, 3 тушмон танкез но 1 самоходкаез пушкытӥзы. Час куспын черкогурт нимец ки улысь быдэсак мозмытэмын вал.

Собере бригада Демчин черкогурт пала вырӟиз. Зоръёслэсь кизермем сюресъёс кузя ӝог мыныны туж секыт йӧтӥз: ожтӥрлык, машинаос но бронетранспортёръёс вылысьтыз вылаз тайылӥзы. Артиллеристъёслы но машинаослы пехота юрттоно луиз^[5].

Сюрес вылын час но ӝыны курадӟемзы бере, бригада Демчин чугун сюрес пала черкогурт доры потӥз. Отчы интыяськем тушмон гарнизонэз шуге-леке вуттӥз. Кык сю пала тушмон ротаез, 20 машиназэ но 50 пала повозкаоссэ пушкытӥз. Собере ӝегатскытэк чугун сюрес кузя Рачки станци дорозь вуиз. Татын 2 тушмон танкез но самоходкаез пушкытӥз, куинь рота пала пехотаез быдтӥз но горючийен но боеприпасъёсын эшелонъёсты киултӥз^[5].

Вакчи дыр куспын шуак воштэм маршрутъя тушмон мышкын ортчытэм рейдъёс немецез секыт югдуре вуттӥзы. Гитлеровецъёслэн одӥгаз бадӟым штабаз соос вылэ 50 пала совето танкъёс но быдэс стрелковой дивизия ожалскиз шуыса гожъязы^[5].

Рачков станциез басьтэмзы бере, ӟардыку, бригада кӧня ке ялкарыны дугдӥз. Тушмонлэн пунэмзэ берыктонэзлы кужым люкаса, уй вуэмен, азьлань — Райгородок пала сюрессэс азьланьтӥзы. Ӵапак отчы, тушмонлэсь Бердичевысь потон сюрессэ вандыса, 9-тӥ механизированной корпус потыны кулэ вал^[5].

5-тӥ толшоре бригадалэн корпусэн герӟетэз сӧриськиз — тушмон снаряд пырак валтӥсь радиостанцие кемдӥз. Комбриглэн интыяськемез сярысь тодэтъёсты келяны но юрттэт курыны быгатымтэеныз, асьме бригадалэсь лябӟемзэ шӧдыса, тушмон ӵукна 11 час котырын атакае ӝутскиз^[5].

Великие Коровинцы черкогурт сьӧрысь тэльысь 23 танк но быдэс полк тушмон пехота потӥз. Гуртлэн лымшор палысеныз но шундыӝужан палысеныз эшшо кык рота но ог дасо танкъёс вырӟизы. Лупповлэсь бригадазэ солэсь вить поллы кужмогес тушмон котыртӥз^[5].

Соку Луппов вить танкен но мотострелокъёслын контратакае ӝутскиз. Ачиз командир батальонлэн азьпал радаз ожмаськиз. Мырдэмен тушмонэз кӧнялы ке дугдытыны быгатӥзы^[5].

Югдур пумен секытгес луиз. Бригада лябӟиз. Тушмон я ог ласянь, я мукет ласянь Рачки гурт вылэ ожалскылӥз. Нуназе бере кык час котырын тужгес лек ожмаськон пуромиз: гуртэ лымшор-шундыпуксёнпал ласянь быдэс полк тушмон пехота но ог 20 танк ожалскиз. Со вакытэ гуртлэн уйпалаз асьме корпуслэн частьёсыз матэктӥзы^[5].

Куинь час котырын Владимир Лупповлэн танказ тушмон снаряд кемдӥз. Гусеницаез но огпал урдэскыз сӧриськиз, машина ӝуаны кутскиз, отысь сӧсырмем механик-водитель гинэ улэпен потыны быгатӥз. Юн сӧсырмем но йырсазьзэ ыштэм комбриг, ӝуась машинаысь поттэм бере 10 минут ортчыса, шокамысь дугдӥз. 9-тӥ механизированной корпуслэн юрттэменыз, уйин бригада котретысь потыны быгатӥз^[5].

Владимир Лупповез Бердичеве ватӥзы, берло солэн лы-сьӧмыз Москваысь Новодевичий шайвылэ выжтэмын вал.

СССР-ысь Вылӥ Кенешлэн Президиумезлэн 1944-тӥ арын 10-тӥ толшоре, боевой заданиосты ӟеч быдэсъямез, маневренной ожмаськонъёсын быгатыса командовать каремез но трос тушмон солдат-офицерез но техникаез быдтэмез понна, Владимир Луппов кулэмез бере Совето Союзлэн Героез нимын пусъемын^[5]^[6].

Калык комиссаръёслэн кенешсылэн 1944-тӥ арын 11-тӥ южтолэзе кутэм 274-тӥ номеро Пуктэтэзъя Владимир Васильевич Лупповлы кулэмез бере генерал-майор звание сётэмын^[5].

Валэктонъёс

↑ В Указе о награждении званием Героя Советского Союза — Лупов Владимир Васильевич
↑ Герои Отечества. Луппов Владимир Васильевич
↑ ¹ ² ³ ⁴ ⁵ Кулёмин И. Г. Героев наши имена. — Ижевск: Удмуртия, 1975. — С. 119—120. — 212 с.
↑ ¹ ² ³ ⁴ Кулёмин И. Г. , Сентемова Л. Ф. , Ислентьева Р. А. Герои Советского Союза, Герои Российской Федерации, полные кавалеры Ордена Славы — наши земляки. — Ижевск: Удмуртия, 1995. — С. 94. — 272 с. — ISBN 5-7659-0639-7.
↑ ¹ ² ³ ⁴ ⁵ ⁶ ⁷ ⁸ ⁹ ¹⁰ ¹¹ ¹² ¹³ ¹⁴ Владимир Васильевич Луппов [ӟуч] «Герои страны» сайт.
↑ Указ Президиума Верховного Совета СССР «О присвоении звания Героя Советского Союза генералам, офицерскому, сержантскому и рядовому составу Красной Армии» от 10 января 1944 года // Ведомости Верховного Совета Союза Советских Социалистических Республик : газета. — 1944. — 19 толшоре (№ 3 (263)). — С. 1.

Литература

Герои Советского Союза: Краткий биографический словарь / Пред. ред. коллегии И. Н. Шкадов. — М.: Воениздат, 1987. — Т. 1 /Абаев — Любичев/. — 911 с. — 100 000 экз. — ISBN отс., Рег. № в РКП 87-95382.

Чӧлсконъёс

Владимир Васильевич Луппов [ӟуч] «Герои страны» сайт. [Дата обращения: 9 толсуре 2012]

[1] В Указе о награждении званием Героя Советского Союза — Лупов Владимир Васильевич

[2] Герои Отечества. Луппов Владимир Васильевич

[Кулёмин_1975-3] ¹ ² ³ ⁴ ⁵ Кулёмин И. Г. Героев наши имена. — Ижевск: Удмуртия, 1975. — С. 119—120. — 212 с.

[Кулёмин_1995-4] ¹ ² ³ ⁴ Кулёмин И. Г. , Сентемова Л. Ф. , Ислентьева Р. А. Герои Советского Союза, Герои Российской Федерации, полные кавалеры Ордена Славы — наши земляки. — Ижевск: Удмуртия, 1995. — С. 94. — 272 с. — ISBN 5-7659-0639-7.

[wh-5] ¹ ² ³ ⁴ ⁵ ⁶ ⁷ ⁸ ⁹ ¹⁰ ¹¹ ¹² ¹³ ¹⁴ Владимир Васильевич Луппов [ӟуч] «Герои страны» сайт.

[6] Указ Президиума Верховного Совета СССР «О присвоении звания Героя Советского Союза генералам, офицерскому, сержантскому и рядовому составу Красной Армии» от 10 января 1944 года // Ведомости Верховного Совета Союза Советских Социалистических Республик : газета. — 1944. — 19 толшоре (№ 3 (263)). — С. 1.

[1]

[2]

[3]

[4]

[5]

[6]