Ф. А. Пушина нимо медициная элькун колледж

Ф. А. Пушина нимо медициная элькун колледж
Ужъюртлэн типез	ужъюрт[d]
Кивалтӥсьёсыз
директор	Барабанщикова Нина Анатольевна
Кылдэмез
Кылдон дырыз	1923
Сайтэз	rmkur.ru

Совето Союзысь Герой Ф. А. Пушина нимо медициная элькун колледж (вакч. АПОУ УР «РМК МЗ УР»; ӟуч: Республиканский медицинский колледж имени Ф. А. Пушиной — Удмурт Элькунысь Тазалыкез утёнъя министерстволэн шоро-куспо профессиослы дышетонъя ужъюртэз. Ижкарын интыяськемын.

Историез

1923-тӥ арын 15-тӥ южтолэзе Ижын усьтӥськизы эмсузэръёсты дасянъя куать толэзьем курсъёс (ӟуч: Курсы сестёр милосердия). Курсъёсты радъяз анатомилы дышетӥсь А. А. Осипова. 1923-тӥ арын коньывуонысен дышетскон вакыт кык ар кыстӥськылӥз. Нырысетӥ люкаме 55 мурт сюриз, таос пӧлысь 40-эз дышетсконзэс пумозяз вуттӥзы.

1925-тӥ арын РСФСР-ысь Югдытонъя калык комиcсариатлэн приказэныз Курсъёсты Ижысь акушер техникум каризы. Со аре ик усьтӥськиз акушерствоя ёзэт.

1938-тӥ арын техникумлэсь нимзэ воштӥзы, со луиз Ижысь фельдшер-акушер школа. Татын санитаръёсты, акушеръёсты, лаборантъёсты, пинь эмъясь техникъёсты, дезинфекторъёсты но эмсузэръёсты дасяллязы.

Быдӟым Атыкай ож вакытэ эм ужъюртысь 400-лэсь ятыр дышетскисьёс но 14 дышетӥсьёс фронтэ кошкизы. 72 мурт быриз. Соос пӧлын — фельдшер-акушер школаын дышетскем нылмурт, Совето Союзлэн Героез Феодора Пушина. 1973-тӥ арын солэсь нимзэ дышетон ужъюртлы сётӥзы. Бӧрысь отын калык музей усьтӥзы.

1954-тӥ арысен дышетон ужъюртэз Ижысь медициная училище нималлязы, 1973-тӥ арысен — Совето Союзысь Герой Ф. А. Пушина нимо Ижысь медициная училище.

1990-тӥ арысен нимзэ воштӥзы, со луиз Совето Союзысь Герой Ф. А. Пушина нимо Ижысь медициная колледж.

2018-тӥ арын Удмурт Элькунысь Правительстволэн 117-р номеро распоряжениезъя огазеямын вал Совето Союзысь Герой Ф. А. Пушина нимо Ижысь медициная колледж, Можгаысь, Сарапулысь но Воткаысь медициная колледжъёс, Глазовысь медициная техникум. Озьы ик бордазы итэмын вал Удмурт Элькунысь Тазалыкез утёнъя министерстволэн бурд улаз ужась квалификациез будэтонъя но тазалыкез утён удысысь ӧнерчиослэсь тодон-валанзэс муромытонъя элькун центр. Огазеян ужрад ортчем бере Ижысь медколледж луиз Удмурт Элькунысь профессиослы дышетонъя «Совето Союзысь Герой Ф. А. Пушина нимо медициная элькун колледж» нимаз ужъюрт (АПОУ УР «РМК МЗ УР»).

Пӧртэм аръёсы колледжын Удмуртиысь дано эмчиос но эм наукаосъя тодосчиос дышетӥзы: хирургъёс Н. Ф. Рупасов но С. И. Ворончихин, кардиолог Л. А. Лещинский, педиатр А. И. Перевощикова но мукетъёсыз.

Дасян ӧръёс

2024-тӥ арын гудырикошконэ ивортонъёсъя, колледж сизьым удысъёсъя ӧнерчиосты дася:

• Эмсузэр уж;
• Эмъян уж;
• Акушер уж;
• Фармация;
• Эмъянъя но профилактикая уж;
• Пинь эмъян ортопедия;
• Лабораториын диагностика.

Ёзъёсыз

Колледжлэн 5 ёзъёсыз: Ижын, Воткаын, Глазовын, Можгаын но Сарапулын.

Кивалтӥсьёс

Пӧртэм аръёсы ужъюртэн кивалтӥзы: Б. Б. Быховский, Г. В. Головизнин, Л. М. Гуревич, С. Г. Шадрин, Ю. Л. Петров. 2018-тӥ арысен колледжлы директоре юнматӥзы медицина наукаосъя кандидатэз Н. В. Якимоваез. 2025-тӥ арын 29-тӥ гудырикошконысен кивалтӥсьлэсь ужзэ быдэсъя Н. А. Барабанщикова.

Данъетъёсыз но вормонъёсыз

• «Россиысь 100 устоосыз ССУЗъёс» конкурслэн лауреатэз, ӵошатсконлэн зарни медаленыз пусъемын (2006);
• «Россиысь Данъян книга» федерал реестре пыртэмын (2008);
• «Россиысь валтӥсьёсыз дышетон ужъюртъёс — 2009» йӧскалык реестре пыртэмын;
• «Росси Федерациысь устоосыз колледжъёс — 2014» калыккуспо конкурслэн лауреатэз; «Ӟечлыкъя йӧскалык пусэз» кутыны право басьтӥз.

Валэктонъёс

Чӧлсконъёс

• АПОУ УР «РМК МЗ УР» [ӟуч]

• Ижевскому медицинскому колледжу исполнилось 100 лет [ӟуч]