Иж тымет

Википедиысь материал
Иж тымет
Aerial photographs of Izhevsk-38.jpg
Тылэн морфометриез
Пасьталаез но кузьдалаез12,5 × 2,5 км
Площадез24 км²
Быдӟалаез0,0763 км³
Тужгес мур интыез12 м
Шоро-куспо мурдалаез3,5 м
Тодметлыкез
Вуэн тырмытон арез1760 
Ӵыпетлэн ӝуждалаез10[1] м
Ву люкан бассейнэз
Усись шуръёсИж, Пазелинка, Подборенка, Шабердейка, Люк, Чур
Потӥсь шурИж
Интыяськемез
Кодэз ГВР-ын: 10010101211499000000010
Завьяловский район Удмуртии
Точка
Иж тымет
ИжевскВоткинскГлазовМожгаСарапулАлнашский районБалезинский районВавожский районВоткинский районГлазовский районГраховский районДебёсский районЗавьяловский районИгринский районКамбарский районКаракулинский районКезский районКизнерский районКиясовский районКрасногорский районМалопургинский районМожгинский районСарапульский районСелтинский районСюмсинский районУвинский районШарканский районЮкаменский районЯкшур-Бодьинский районЯрский районУдмуртия
Описание изображения
Точка
Иж тымет
Логотип РУВИКИ.Медиа Медиафайлъёс РувикиМедиа пушкын

Иж тымет[2][3] (Ижысь водохранилище[4][5][6]) — 1760-тӥ арын Удмуртилэн шоркараз, Ижын, юромо гудэм но ӵыпем ву.

Тымет Иж шурез ӵыпыса лэсьтэмын. Та шур сяна, тыметэ Малиновка[7][8], Пазелинка, Подборенка, Шабердейка[2][7] но Пионерский[9] шуръёс усё.

Кылдэм историез

Озьы ик учке: Ижысь пыӵалтӥрлык поттон заводлэн ӵыпетэз

Пыӵалтӥрлык поттон заводлэн 1764-тӥ арысь схема вылаз возьматэм тымет
Иж тымет, адӟисько ӵыпет, пыӵалтӥрлык поттон но андан ӵыжатон заводъёс, Иж завод (Ижкарлэн историысь кылдэм нимыз), 20-тӥ даурлэн кутсконысьтыз открытка
Ижысь пыӵалтӥрлык поттон заводлэн ӵыпетэз, 1900-тӥ аръёс

Тымет 1760-тӥ арын 10-тӥ оштолэзе Иж шур вылын Ижысь корт ӵыжатон заводлэсь (али Ижсталь но «Калашников» нимо огазеяськон) двигательёссэ ужатон вылысь ӵыпемын вал. Матысь гуртъёсысь Иж завод (Ижкар) борды юнматэм кӧня ке сю крепостной крестьянъёс азьвыл ик пусъем гожъёсъя 4 траншеяос гудӥзы, мурдалаез но пасьталаез сажень быдӟа луиз (2,16 метр). Ӵыпетлэсь каркассэ пужым но тыпы коръёслэсь ӝутӥзы, соосты корт юдэсъёсын, болтъёсын но паськыт кульчоосын юнматӥзы, висъёсаз горд сюй тып-тып тыризы. Ӵыпет нырысь-валысь горд сюйлэсь лэсьтэм фундамент вылэ ӝутэм музъем кесэг выллем адскылӥз. Куинь гужем ӵоже крестьянъёс Иж шур доры 13 159 кубической сажень горд сюй вуттӥзы, со 60 сюрс тонналэсь ичи уз луы. Ярдуръёссэ ог-огзы борды дэмӟись сваяослэсь юнматӥзы, медаз куашкалэ шуыса, музъем валлин коръёсын радэн-радэн котыртӥзы на[10][11]. Вуэз лэзьыны луонлык кылдытон вылысь ӵыпетэз одӥг интыетӥз пасяса вандӥзы, ӵапак отысен ву заводъёсысь цехъёслэн бергась колёсаосазы усьылӥз. Со сяна, эшшо одӥг интыетӥз пичигес вандӥзы на, татысен ву нюлэс дасянэ кошкылӥз. Нош тулыс ӧръяськись тудвулы, пырон инты мед сюроз шуыса, эшшо пасьёс лэсьтылӥзы на. 1763-тӥ арын тыметэз вуэн нырысьсэ тырмытӥзы, вань ворсэтъёссэ нырысьсэ ӝутӥзы.

1773-тӥ арын академик Пётр Паллас  [ӟуч] (удм., Иж заводэ вуылыкуз, лэсьтэм ӵыпетлы вылӥ дунъет сётӥз[12]. 1774-тӥ арын 27-тӥ—28-тӥ инвожое Иж заводэз киултэм Е. Пугачёвлэн восстанияз пыриськисьёс ӵыпетэ тыл понӥзы: пулэсь лэсьтэм колёсаос но ларьёс ӝуазы, озьы ик ӵыпет котыре ӝутэм губка кадь небыт корт ӵыжатон фабрикаос но ву вукоос сутскизы. Ӵыпетэз выльысь рос-прос тупатъян понна 5 ар кулэ луиз[10].

Иж шур кузя пуосты, коръёсты тыметэ келяллязы. Завод котырысь Воложка палан плотъёс лэсьтылӥзы, отысен ни соосты завод доры ысъязы[13].

1807-тӥ арын городын пыӵалтӥрлык поттон завод лэсьтыны кутскемзы бере, тыметысь вуэз ӝутон но йылтон сярысь ужпум кылдӥз. Таин валче ӵыпетлэсь кузьдалазэ 303 саженёзь (646,6 метрозь) йылтӥзы, нош пасьталазэ 14 саженёзь (30 метрозь) будэтӥзы. Ӵыпетлэсь быдэс кузьдалазэ тымет ласянь сваяосын юнматӥзы, медаз куашкалэ шуыса, музъем валлин радэн-радэн коръёсын кыскизы[14]. 1834-тӥ арын ӵыпетлэн вылӥ сӥез юнматэмын вал, отӥяз тужгес ӝужыт интыетӥз из сюрес лэсьтӥзы, кема мед сылоз шуыса, ву кошкон интыоссэ но чаклазы, пыдын мынӥсь-ветлӥсьлы но сюрес вӧлдӥзы[15]. Тыметлэн ярдуръёсыз кузя ульчаос ӝутӥзы. Городын пуктӥськон ӧръяськиз, ульчаосты тыметлэн интыяськеменыз герӟаса пуктылӥзы[10].

1833-тӥ арын ӵыпетысь ву лэзён интыез сваяослэсь котыртэм пушкы иордань пуктэмын вал. 1885-тӥ арын выль иордань лэсьтэмын вал, нырысетӥеныз ӵошатыса, со шундыӝужан палагес пуксиз, нош 1886-тӥ арын вужез сэрттэмын-кесямын вал[16].

1875-тӥ арын заводэн кивалтӥсь П. А. Бильдерлинг  [ӟуч] (удм. тыметэз кыкетӥ ӵыпыны ӵектэ вал. Угось котькуд тол пумын тыметын ву заводлы рос-прос тырмемысь дугдылӥз, нош кыкетӥ ӵыпетэ люкаськем ву та югдурын зол юрттысал. Инты но быръемын ни вал. Выль пуктӥськонлэсь изъян бадӟым уз луы шуыса но эскеризы, угось Иж шур выллапалан, 25 верста кемын, нюр интыос сяна, сикъёс но, поселениос но ӧй вал. Но лэсьтӥськон ужъёс таки мытэмын ӧй вал[10][17].

1914-тӥ Нырысетӥез дунневыл ож кутскемен валче, Ижысь пыӵалтӥрлык поттон заводлэн кулэлыкез но улонын интыез шуак будэмен, тыметэз чаклан ужрадъёс эшшо золгес чурытатэмын вал. 1917-тӥ 18 часысен 6 часозь ӵыпет вылтӥ воксё но ветлыны алӥзы[10].

1919-тӥ арын 16-тӥ инвожое завод башняысь кортлэсь дурем кык йыро ӧрӟи тыметэ куштэмын вал, уно версиос пӧлысь огезъя со туннэ ке но ву пыдсын кылле[10].

Совето вакытэ интыысь улӥсьёсты тыметысь куалялюльы бичанэ кыскизы, соослэсь бирды лэсьтылӥзы[18].

1933-тӥ арын 12-тӥ инвожое тымет вылын «Динамо» нимо ву станция усьтӥськиз, бератаз «Зенит» нимо кыкетӥез станция ӧсъёссэ вӧлъяз, таос ог 20 ар ӵоже ужазы. Станциосын бассейнъёсыз но вышкаосыз вал. 1950-тӥ аръёсы пулэсь лэсьтэм станциос куашказы но тылпулэсь быризы[19][20].

1950-тӥ аръёслэн шорозязы тымет котырын чорыг поттон заводлэн пичи флотилиез ужалляз. Чорыгасьёс кутэм чорыгзэс ларёке вузаллязы, со туала Электромеханикая заводлэн  [ӟуч] (удм. ярдурысь корпусъёсыз дӥньын интыяськылӥз[21][22].

1972-тӥ арысен тымет пыдсысь луоез пуктӥськонын кутон вылысь поттыны ӧдъязы[23].

Судоходстволэн историез

Валтӥсь статья: Ижысь теплоход  [ӟуч] (удм.

1892-тӥ арын Иж тымет кузя навигацилы кутскон сётэмын шуыса, чаклало. Ужкагазъёсын пусъемын: 1902-тӥ арысен Ижысь пыӵалтӥрлык поттон заводъёс Вотка заводын бичам-лэсьтэм кык пароходъёсын ужаллязы — адямиосты но арбериосты нуллӥсь «Иж» буксир пароход но адямиосты но арбериосты нуллӥсь «Шрапнель» пароход. Ижысь заводъёсын ӧжытсэ эшшо кык пароход бичамын на вал — «Ижевск» но «Мария» буксир баркасъёс[24][25].

Туала югдур

Ву объект Иж шур вылын ӵыпем Иж водохранилищелэн ву ресурсъёссэ чакласа быдэстоно валтӥсь положениосъя правилоосыз вылэ пыкиськыса уже кутӥське, юнматэмын со 1971-тӥ арын 7-тӥ коньывуонэ[26]. Иж шурлэн бассейнэзлэн площадез кутсконысеныз тымет ӵыпет дорозь — 1640 км²; тыметлэн синучкон кадь площадез — 24 км²; тужгес паськыт интыез — 2,5 км; шоро-куспо мурдалаез — 3,5 м; быдэс быдӟалаез — 76,3 млн м³[27]. Быдэс Ижкарлы чылкыт ву сётэ. Арлы быдэ Иж тыметысь юон вулы но промышленной производстволы шорлыдын 65—70 млн м³ ву кошке[26][28].

  • Тыметысь тужгес трос ву кутӥсьёс — Ижводоканал МУП, Ижсталь ОАО, ТЭЦ-1, Удмуртэнерго ОАО, Ижмаш ОАО.
  • Тыметэз тужгес зол кырсёмытӥсьёс: ТЭЦ-1 (тыметэ ӟырдам «промышленной» вуэз кисьтэмзэс но санэ басьтоно), Удмуртэнерго ОАО, Ижысь мотозавод ОАО

2003-тӥ арын тыметын лыз-вож водоросльёсыз йылэмен, юон ву пыкмем зыно луиз[29].

Тулысысен гужем пумозь Иж тымет кузя городын улӥсьёсты но куноосты теплоходъёсын уято. Пассажиръёслы чаклам флотилиын кык пумо теплоходъёс вань — «Москвич» но «Москва».

2012-тӥ арын куарусёнэ Удмурт кун университетысь экологъёс ивортӥзы, вуын будосъёсыз йылэмен, Иж тыметысь югдур уродмиз шуыса[30].

2013-тӥ арын, тыметлэсь пыдэссэ земснарядэн сузякузы, 12 метр мурдалаысь мамонтлэсь лысьӧмъёссэ шедьтӥзы, тужгес дуно луо пиньыз но лыэз. Озьы ик земснаряд ӵыпет лэсьтэмлэсь азьвыл изъёслэсь вӧлдэм вашкала сюресэз но шараяз[31].

2013-тӥ ар пумын Ижысь Киров нимо парк котырысь тыметлэсь ярдурзэ юнматыны чакламын вал[32], но 2017-тӥ арлы но ужъёс йылаз-пумаз вуттэмын ӧй вал на.

Иж тымет «Росси Федерациысь пуш ву сюресъёс — 2002» список пӧлы пыре.

2017-тӥ арын куартолэзе тымет ву вылэ лӧптӥз сюйёсын, будосъёсын, писпуосын пашмись йӧн-йӧн пичи шормуӵлы укшась лабаз, сое вулэн лазег интыяз кыскизы но ӵыпетэз утён вылысь отчы ик юнматӥзы[33][34].

Экология

Иж тыметэз кырсь вуосын валтӥсь уродмытӥсь предприятиос пӧлы пыро: «ИЭМЗ «Купол» ОАО (2006-тӥ арын пож ву кисьтамысь дугдо), «Ижводоканал» МУП (пож ву кисьтамысь дугдо), ТЭЦ-1, «Ижысь мотозавод «Аксион-Холдинг» ОАО (2013-тӥ арын пож ву кисьтамысь дугдо), тазалыкез юнматонъя но спортъя комплексъёс, лулсэрез эмъянъя интернат, ярдур котырысь пож вуосты утялтыны радъямтэ васькись кырсь вуос. Иж тыметэ усись пож вуослэн оглом быдӟалазы: 2005-тӥ арын — 5981 сюрс м³; 2017-тӥ арын — 2 429,8 сюрс м³. Тыметэз кырсёмытӥсь веществоосын васькись пож вуослэн быдӟалазы: 2005-тӥ арын — 6 027,9 тонна; 2017-тӥ арын — 3 512,5 тонна[35].

Галерея

  • Горький паркысен адӟон питыран вылысен тыметлэн тусыз

    Горький паркысен адӟон питыран вылысен тыметлэн тусыз

  • «Москва-181» теплоход «Ижкар» пристаньысен («Воложка» пристанёзь мынэ)

    «Москва-181» теплоход «Ижкар» пристаньысен («Воложка» пристанёзь мынэ)

  • Иж тымет толалтэ

    Иж тымет толалтэ

  • Иж тымет тулыс

    Иж тымет тулыс

  • Дудин зодчий нимо ярдур

    Дудин зодчий нимо ярдур

  • Ижысь тыметлэн тусыз пруд, паллян палаз «Калашников» нимо огазеяськонлэн, Ижстальлэн но ТЭЦ-1-лэн промплощадкаосы адӟисько

    Ижысь тыметлэн тусыз пруд, паллян палаз «Калашников» нимо огазеяськонлэн, Ижстальлэн но ТЭЦ-1-лэн промплощадкаосы адӟисько

  • Лымшор ярдураз сюйлэсь но сваяослэсь юнматэм муӵ

    Лымшор ярдураз сюйлэсь но сваяослэсь юнматэм муӵ

  • Иж тыметлэн тусыз

    Иж тыметлэн тусыз

Лышор палласянь Иж тыметлэн панорамаез
Лышор палласянь Иж тыметлэн панорамаез
Иж тыметлэн но Дудин зодчий нимо ярдурлэн панорамаоссы
Иж тыметлэн но Дудин зодчий нимо ярдурлэн панорамаоссы

Валэктонъёс

  1. ↑ Охранное обязательство собственника объекта культурного наследия [ӟуч] Агентство по государственной охране объектов культурного наследия Удмуртской республики. Эскеремын 2019-06-04 арын
  2. ↑ 1 2 Лист карты O-39-119 Устинов. Масштаб: 1 : 100 000. Состояние местности на 1982 год. Издание 1987 г.
  3. ↑ Гл. ред. В. В. Туганаев. Удмуртская Республика: энциклопедия. — 2-е изд., испр. и доп.. — Ижевск: Удмуртия, 2008. — С. 26. — 767 с. — ISBN 978-5-7659-0486-2. Архивировано 19 тулыспалэ 2019 года.
  4. ↑ ИЖЕВСКИЙ ПРУД Информационно-аналитическое управление Администрации города Ижевска.
  5. ↑ ГТС Ижевского водохранилища на р. Иж Институт безопасности гидротехнических сооружений.
  6. ↑ Ижевское водохранилище увеличило сброс воды Коммерсантъ.
  7. ↑ 1 2 Лист карты O-39-119-A-c — ФГУП «ГОСГИСЦЕНТР»
  8. ↑ Лист карты O-39-119-A-d — ФГУП «ГОСГИСЦЕНТР»
  9. ↑ Лист карты O-39-119-A-a — ФГУП «ГОСГИСЦЕНТР»
  10. ↑ 1 2 3 4 5 6 Ижевский пруд [ӟуч] Центральная муниципальная библиотека имени М. Горького (Ижевск). Эскеремын 2013-01-03 арын
  11. ↑ Елена Кардопольцева 4 мифа Ижевского пруда [ӟуч] ООО «Радио - Инвест». Эскеремын 2018-11-22 арын
  12. ↑ Ижевский пруд [ӟуч] История Ижевска. Эскеремын 2013-01-03 арын
  13. ↑ Селивановский, 2015, с. 42.
  14. ↑ Перестройка плотины [ӟуч] История Ижевска. Эскеремын 2013-01-03 арын
  15. ↑ Благоустройство плотины [ӟуч] История Ижевска. Эскеремын 2013-01-03 арын
  16. ↑ Селивановский, 2015, с. 8.
  17. ↑ Селивановский, 2009, с. 123.
  18. ↑ Селивановский, 2015, с. 90.
  19. ↑ Селивановский, 2009, с. 127.
  20. ↑ Селивановский, 2015, с. 239—240.
  21. ↑ Селивановский, 2009, с. 126—127.
  22. ↑ Селивановский, 2015, с. 243.
  23. ↑ Селивановский, 2009, с. 129.
  24. ↑ Лапшин Р. В., Митюков Н. В. и др. Пароходы Ижевских заводов // Вестник Томского Государственного университета : Журнал. — 2012. — № 3. — С. 138—143. Архивировано 19 инвожое 2018 арын.
  25. ↑ Селивановский, 2009, с. 124—126.
  26. ↑ 1 2 Бухлова В. В. Ижевский пруд [ӟуч] Официальный сайт города Ижевск. Эскеремын 2013-01-03 арын
  27. ↑ Ижевский пруд // Удмуртская республика: Энциклопедия / гл. ред. В. В. Туганаев. — Ижевск: Удмуртия (издательство), 2000. — 800 с. — 20 000 экз. — ISBN 5-7659-0732-6.
  28. ↑ Селивановский, 2009, с. 124.
  29. ↑ Ижевский пруд: очистим жемчужину от грязи [ӟуч] Известия Удмуртской Республики. Эскеремын 2013-01-03 арын
  30. ↑ Камыши и другую растительность Ижевсского пруда будут скашивать [ӟуч] Известия Удмуртской Республики. Эскеремын 2013-01-03 арын
  31. ↑ В Ижевском пруду найден зуб мамонта [ӟуч] Моя Удмуртия. Эскеремын 2013-01-03 арын
  32. ↑ Алексей Иванов Экологи Ижевска: «Если не чистить пруд, город может лишиться воды» [ӟуч] Комсомольская правда. Эскеремын 2013-01-03 арын
  33. ↑ Евгения Иванова Откуда на Ижевском пруду появился «плавучий остров» и для чего его утилизировать? [ӟуч] ООО «Радио - Инвест».
  34. ↑ Мария Хафизова В Ижевске пока не будут утилизировать плавучий остров, который появился на пруду [ӟуч] ООО «Радио - Инвест».
  35. ↑ Доклад об экологической обстановке в городе Ижевске в 2017 году / Ковальчук А. Г.. — Ижевск: Управления природных ресурсов и охраны окружающей среды Администрации города Ижевска, 2018. — 98 с. Архивировано 5 тулыспалэ 2019 года.

Литература

Чӧлсконъёс

«https://udm.ruwiki.ru/w/index.php?title=Иж_тымет&oldid=507424»-ысь басьтэмын