Дэбесысь политехникум
| Дэбесысь политехникум | |
|---|---|
 | |
| Кылдон арез | 1930 |
| Директорез | Головизнина Татьяна Вячеславовна |
| Сайтэз | ciur.ru/dpt/default.aspx |
 |
|
Дэбесысь политехникум (ӟуч: Дебёсский политехникум) — Удмурт Элькунысь шоро-куспо дышетон ужъюрт. Дэбес черкогуртын интыяськемын. 1930-тӥ арын кылдытэмын.
Историез
1930-тӥ арын Дэбесысь кыкетӥ ступенё школа интые педтехникум усьтӥзы. Со аре ик экзаменъёстэк нырысетӥ дышетскисьёсты кутӥзы. Дэбес педтехникумлэн студентъёсыз луизы Дэбесысь кыкетӥ ступенё школаысь пиналъёс, озьы ик Глазовысь, Ижкарысь но Можгаысь педтехникумъёсысь татчы выжтэмъёс. Нырысетӥ аръёсаз дышетон РДК-лэн но КПСС-лэн райкомезлэн юртъёсаз радъяськылӥз: сузлэн аслаз юртэз ӧй вал. Сое 1933-тӥ арын гинэ пуктӥзы[1].
1932-тӥ арын техникумысь нырысетӥ дышетӥсьёс потӥзы. 1933-тӥ арын педтехникумез йылпумъямъёс пӧлын вал удмурт кылбурчи Степан Широбоков[2].
Отӥяз Дэбесысь педтехникуме сизьым аръем школаез быдтэмъёсты но покчи классъёсты визьноданы я удмурт кыллы дышетыны мылкыд карисьёсты кутылӥзы. Дышетон 3 ар кыстӥськылӥз. Нырысь-валысь дышетӥсьёс 15 кузя гинэ вал, соос пӧлысь уноез Мускоысь но Ленинградысь педагогикая вузъёсты йылпумъямъёс вал[1].
Утиськем ужкагазъёсъя, 158 дышетӥсьёс, студентъёс но Дэбес педтехникумез йылпумъямъёс Быдӟым Атыкай оже кошкизы, уноез ӧз берытске ни. Дэбесэ кылем дышетскисьёс но дышетӥсьёс колхозлы юрттылӥзы. Фронтлы мыло-кыдо юрттэмез понна педтехникум соку Иосиф Сталинлэсь кык вылӥ правительственной таукарон телеграммазэ басьтӥз[2].
1956-тӥ арын Дэбес педтехникумез быдтӥзы. Студентъёсты Сарапулысь школа азьын визьноданъя педучилищее выжтӥзы, нош ужасьёсты — сирота нылпиослы чаклам школа-интернатэ, сое училищелэн юртаз усьтӥзы[3]. Удмуртиысь со нырысетӥез школа-интернат вал.
1964-тӥ арын школа-интернатэз быдтӥзы, со интые Дэбес педучилище усьтӥзы. 1967-тӥ арын отын кылдӥз Совето Союзысь гурт училищеос пӧлын нырысетӥез суреданъя но графикая ёзэт[3].
1989-тӥ арын спорт но актовой залъёсын, дышетонъя аудиториосын но лаборантскойёсын, библиотекаен выль корпус ӝутэмын вал[2].
2000-тӥ арын ивортонъёсъя, педучилищеын 44 дышетӥсь (соос пӧлысь 19-эз — квалификацияя вылӥ категориен) но 396 студентъёс пусъемын. Дышетон куинь ӧръя нуиськиз: покчиосты дышетонын коррекцияя педагогика, ватсам ӧнеръёсъя покчи классъёс, ватсам «Калык киуж» ӧнеръя изобразительной искусство но черчение[3].
2007-тӥ арын училище реорганизация пыр потӥз, Дэбесысь политехникум нимаськыны кутскиз. 2014-тӥ арысен Удмуртиысь Кез каргуртын ёзэз ужа[4].
Дасян ӧръёс
2025-тӥ арын куарусёнэ ивортонъёсъя, Дэбесысь политехникум таӵе удысъёсъя ӧнерчиосты дася:
- Школа азьын дышетон;
- Ватсаса тодон-валан сётонъя педагогика;
- Изобразительной искусство но черчение;
- Пуэн, паркетэн, пиялаен ужанъя мастер.
Дэбесысь политехникумлэн Кез каргуртысь ёзаз таӵе ӧръёсъя дышетон радъямын (2025-тӥ арын куарусёнэ ивортонъёсъя):
- Лэсьтӥськон но чеберъян ужъёсъя мастер;
- Вузчи, контролёр-кассир;
- Каменщик;
- Сиён-юонэн вузкарись[5].
Дано дышетскисьёсыз
- Широбоков С. П. — удмурт гожъяськись, драматург, Удмуртиысь калык кылбурчи;
- Яшина Р. И. — филология наукаосъя кандидат, «Удмурт кыл» учебникъёслэн огез авторез;
- Гаврилова-Решитько М. В. — радиоысь корреспондент, публицист, Россиысь Гожъяськисьёслэн огазеяськонзылэн ёзчиез, Россиысь Журналистъёслэн огазеяськонзылэн ёзчиез;
- Шкляев А. П. — «СНГ-ысь устоез журналист — 1991», драмая произведениослэн авторез, «Удмурт дунне» газетлэн 1994-тӥ—2010-тӥ аръёсы валтӥсь редакторез;
- Горбушин Ш. А. — педагогика наукаосъя кандидат, СССР-ысь калык дышетӥсь, куать книгаослэн авторез, соос пӧлын — «Азбука физики», Глазовысь политехникая колледжлэн директорез;
- Данилов П. П. — Фольклор кырӟанъя но эктонъя «Айкай» кун театрлэн директорез, Удмуртиысь лулчеберетъя министрлэн азьвыл воштӥсез;
- Ложкин Ю. В. — техника наукаосъя кандидат, ИжГТУ-ысь кортэз промышленной но чеберъян амалъёсъя выльдон кафедраен кивалтӥсь.
Кивалтӥсьёсыз
- Федотов Г. Ф. (1930—1933);
- Кушев И. В. (1933—1934);
- Наговицын С. Д. (1934—1935);
- Оленев И. С. (1935—1938);
- Луппов А. Н. (1938—1940);
- Корепанов М. М. (1940—1941);
- Князев Я. А. (1941, 1950—1956);
- Фёдоров И. В. (1941—1942);
- Иванова В. М. (1942—1947);
- Ворончихин И. Т. (1947—1959);
- Шкляев Д. Ф. (1964—1967);
- Бабайлов В. Г. (1967—1976);
- Яранцев В. К. (1977—1979);
- Кустов Б. П. (1979—1982);
- Аверкиев А. Н. (1982—1988);
- Рыков Н. Ф. (1988—1990);
- Чирков В. В. (1990—1995);
- Самойлов В. Н. (1996—2007);
- Ситников В. И. (2007—2014);
- Щепин А. Г. (2014—2017);
- Неганова И. Б. (2017—2018);
- Головизнина Т. В. (2018-тӥ арысен)[2].
Валэктонъёс
- ↑ 1 2 Историческая справка [ӟуч] ciur.ru. Эскеремын 18-10-2025 арын
- ↑ 1 2 3 4 Дебёсскому педучилищу-политехникуму 90 лет [ӟуч] Новый путь (22.10.2020). Эскеремын 18-10-2025 арын
- ↑ 1 2 3 Дебёсское педагогическое училище Министерства народного образования УР [ӟуч] Фондовый каталог УР. Эскеремын 18-10-2025 арын
- ↑ Структура и органы управления образовательной организацией [ӟуч] ciur.ru. Эскеремын 18-10-2025 арын
- ↑ Правила приёма в БПОУ УР «Дебёсский политехникум» на 2025-2026 учебный год [ӟуч] ciur.ru. Эскеремын 18-10-2025 арын
Литература
- Ситников В. И. и др. Дебёсскому политехникуму 80 лет / Кузовкова Е. А.. — Дебёсы: Издание ДП, 2010. — 58 с.
Чӧлсконъёс
- Дебёсский политехникум [ӟуч]
 |
|---|
