Яшина, Роза Ивановна

Роза Ивановна Яшина
Роза Ивановна Яшина
Нимтулыз	Роза Ивановна Лекомцева
Вордӥськем дырыз	1-тӥ толшоре 1933
Вордӥськем интыез	Кез ёрос, Удмурт Автономной Советской Социалистической Республика, СССР;
Кулэм дырыз	30-тӥ гудырикошконэ 2022 (89 лет)
Кулэм интыез	Иж, Россия;
Кун	СССР; Россия;
Тодос удысэз	лингвистика
Дышетскемез	Удмурт кун университет;
Учёной степенез	кылосбур наукаосъя кандидат (1965)
Учёной званиез	профессор

Роза Ивановна Яшина (нылдыр фамилиез Лекомцева; 1-тӥ толшоре 1933, Кез ёрос, Удмурт Автономной Советской Социалистической Республика — 30-тӥ гудырикошконэ 2022, Иж) — совето но росси кылчи, литературовед, литературая критик, кылбурчи, очеркист но удмурт кылэ берыктӥсь. Кылосбур наукаосъя кандидат (1965), профессор (2002). УАССР-ысь наука удысысь дано ужась (1983). Вань удмуртъёслэн «Удмурт Кенеш» ассоциацизылэн тӧроез (1993—1994)^[1].

Улон сюресэз

Дышетскемез

Вордӥськиз 1933-тӥ арын 1-тӥ толшоре Удмуртиысь Кез ёросысь Ӟуч Зязьгор гуртын дышетӥсьлэн семьяяз. Кык аресысеныз улӥз Дэбес ёросысь Аргуртын, татысь сизьым аръем школаын дышетскиз. 1947-тӥ арын Дэбесысь педагогикая училищее пыриз, сое 1951-тӥ арын отличиен йылпумъяз. 1951-тӥ арын Педагогикая Удмурт кун институтысь (али — Удмурт кун университет) филологияя факультетэ пыриз. Вузын литературно-творческой кружоке мыло-кыдо пыриськиз, удмурт хорын кырӟалляз. Институтын Даниил Яшинэн тодматскиз; диплом басьтэмез бере кузпалъяськизы но Глазове выжыяськизы, татысь школаын ӟуч кыллы но литературалы куинь ар дышетӥз^[2].

1959-тӥ арын картэныз ӵош Иже берытскизы. УГПИ-ысь аспирантурае пыриз. 1965-тӥ арын Тартуысь университетын [ӟуч] (удм. «Удмурт кылысь ӵошатон конструкциос» темая кандидат диссертацизэ утиз, та юрттӥз удмурт кыллэн синтаксисэзъя кылдэм правилоосы воштонъёс пыртыны, соосты практикае кутыны^[2].

Дышетон но наукая ужез

1962-тӥ арын Р. Яшина Удмурт пединститутын дышетыны ӧдъяз. Нырысетӥ аръёсаз ӟуч но удмурт кылъёсты дышетон методикая но синтаксисъя лекциос лыдӟылӥз, Глазовысь шор ёзо школаын басьтэм практиказэ студентъёслы пыӵатылӥз. Бератаз удмурт литературая но СССР-ысь калык литературая кафедраын лекциос лыдӟылӥз, литературоведениез но литератураез дышетон методикаез эскериз, солы сӥзем наукая ужъёс гожъяз^[3].

Роза Яшина — удмурт кыллэн синтаксисэзъя но морфологиезъя учебникъёслэн огез авторез. «Удмурт кыл. Синтаксис, стилистика: 6-8 классъёслы» нырысетӥ учебникез Августа Васильевна Конюховаен ӵош дасязы, «Удмурт кыл: 5-6 классъёслы» кыкетӥ учебникез Глафира Николаевна Никольскаяен, Аполлинария Александровна Поздееваен но Иван Васильевич Таракановен валче поттӥзы. Ваньмыз таос быдэн 6 пол печатламын вал. Яшина озьы ик туала удмурт кылъя «Удмурт кыл: 8-9 классъёслы» учебниклэн огез авторез луэ, сое 2003-тӥ арын Геннадий Афанасьевич Ушаковлэн огъя редакциез улсын поттӥзы^[3].

Яшина лексикая но грамматикая люкам узыр материалэн но удмурт кылэз дышетонъя ӵектонъёсын гожтӥз «Удмурт кылъя внеклассной ужъёс» пособие, со элькунысь дышетӥсьёслы бадӟым юрттэт луиз. Р. Яшиналэн мукетыз бадӟым ужез — «Удмурт стилистикая очеркъёс», со удмурт кылтодосъя стилистикалы сӥземын. Ваньзэ-ӧвӧлзэ наукая 100 пала статьяослэн, студентъёслы но огъя шор ёзо школаосысь дышетӥсьёслы 14 нимаз книгаослэн но пособиослэн авторзы луэ.

Творчествоез

Р. Яшиналэн нырысетӥ кылбуръёсыз потӥзы студент вакытаз «Советской Удмуртия» газетын, «Молот» журналын, огъя кылбур бичетъёсын, финн-угор кылъёсы берыктэмын вал. «Тодӥськод на-а тон?» лирикая поэмазэ вылӥ дунъязы^[4].

2000-тӥ аръёслэн кутсконазы Яшина ӟуч литератураысь классикъёслэсь произведениоссэс удмурт кылэ берыктон борды басьтӥськиз: Сергей Есенинэз, Александр Пушкинэз, Николай Некрасовез [ӟуч] (удм. но мукетъёссэ. 2002-тӥ арын «Сергей Есенин» книгалы презентация ортчиз — со удмурт кылэ берыктэм поэтлэн кылбуръёсыныз нимысьтыз бичетэн поттэм нырысетӥ книга луиз. Нош 2010-тӥ арын печате потӥз удмурт кылэ кылбурен берыктэм «Евгений Онегин [ӟуч] (удм.» роман^[3].

Данъетъёсыз

Роза Яшина Правительстволэн уно пӧртэм данъетъёсыныз пусъемын:

«Удмурт АССР-ысь наука удысысь дано ужась» дано ним (1983);
«Ужысь ветеран» медаль;
«РСФСР-ысь калыкез югдытон удысысь отличник» пус;
Удмурт АССР-ысь Вылӥ Кенешысь Президиумлэн Данъян грамотаез;
Удмурт АССР-ысь Министръёслэн Кенешсылэн Данъян грамотаез;
Удмурт Элькунысь Правительстволэн Данъян грамотаез;
К. Герд нимо йӧскалык премилэн лауреатэз (1999);
Удмурт кун университетысь дано профессор^[3].

Валэктонъёс

↑ Удмуртская Республика: Энциклопедия / гл. ред. В. В. Туганаев. — Ижевск: Удмуртия, 2008. — С. 755. — 768 с. — 2200 экз. — ISBN 978-5-7659-0486-2.
↑ ¹ ² Яшина Роза [ӟуч] Воршуд. Эскеремын 26-10-2025 арын
↑ ¹ ² ³ ⁴ Яшина Роза Ивановна [ӟуч] // Ежегодник финно-угорских исследований. — 2012. — № 4. — С. 115—117. — ISSN 2224-9443.
↑ А. Н. Уваров. Писатели Удмуртии: Библиографический справочник. — Ижевск: Удмуртия, 1989. — С. 455—456. — 464 с. — 5000 экз. — ISBN 5-7659-0131-X.

Литература

Удмуртская Республика: Энциклопедия / гл. ред. В. В. Туганаев. — Ижевск: Удмуртия, 2008. — С. 755. — 768 с. — 2200 экз. — ISBN 978-5-7659-0486-2.
А. Н. Уваров. Писатели Удмуртии: Библиографический справочник. — Ижевск: Удмуртия, 1989. — С. 455—456. — 464 с. — 5000 экз. — ISBN 5-7659-0131-X.
Яшина Роза Ивановна [ӟуч] // Ежегодник финно-угорских исследований. — 2012. — № 4. — С. 115—117. — ISSN 2224-9443.

Чӧлсконъёс

Кто мы. Роза Яшина

[1] Удмуртская Республика: Энциклопедия / гл. ред. В. В. Туганаев. — Ижевск: Удмуртия, 2008. — С. 755. — 768 с. — 2200 экз. — ISBN 978-5-7659-0486-2.

[:Воршуд-2] ¹ ² Яшина Роза [ӟуч] Воршуд. Эскеремын 26-10-2025 арын

[:ЕЖ-3] ¹ ² ³ ⁴ Яшина Роза Ивановна [ӟуч] // Ежегодник финно-угорских исследований. — 2012. — № 4. — С. 115—117. — ISSN 2224-9443.

[4] А. Н. Уваров. Писатели Удмуртии: Библиографический справочник. — Ижевск: Удмуртия, 1989. — С. 455—456. — 464 с. — 5000 экз. — ISBN 5-7659-0131-X.

[1]

[2]

[3]

[4]