Данилов, Пётр Павлович
| Пётр Павлович Данилов | |
|---|---|
 | |
| Валтӥсь тодэтъёс | |
| Вордскем дырыз | 26-тӥ южтолэзе 1962 (64 года) |
| Вордскем интыез | |
| Кун | |
| Ужудысэз | политик, кивалтӥсь |
| Данъетъёсыз |
Удмурт Элькунысь искусство удысысь дано ужась Удмурт Элькунысь Кун премилэн лауреатэз |
Пётр Павлович Данилов (ворд. 26-тӥ южтолэзе 1962, Вуж Кушкет[d], Бигер Автономной Советской Социалистической Республика) — Кырӟанъя но эктонъя «Айкай» кун театрлэн директорез, Удмурт Элькунысь искусство удысысь дано ужась, Удмурт Элькунысь Кун премилэн лауреатэз, Удмуртиысь лулчеберетъя министрлэн воштӥсез (2014—2018)[1]. Кузебай Герд нимо йӧскалык премилэн лауреатэз.
Пётр Данилов текстилья суредась, сяме пырем но туала стилизованной костюмъёс лэсьтонъя усточи сямен тодмо луэ[2].
Улон сюресэз
Вордӥськиз 1962-тӥ арын 26-тӥ южтолэзе Бигер АССР-ысь Вуж Кушкет гуртын. Тямысэтӥ классэз йылпумъямез бере Дэбесысь педагогикая училищеысь суреданъя но графикая ёзэтэ пыриз. Драмая кружоке ветлӥз. Дышетсконзэ горд дипломен йылпумъяса, тодон-валанзэ муромытыны Удмурт кун университетысь суреданъя но графикая факультетэ пыриз[3].
Студент вакытаз профкомен кивалтӥз, озьы ик школаын лаборант, Удмурт кун филармониын суредась-оформитель, дышетсконо факультетаз секретарь-машинист луыса ужаны вуттӥз. Фольклоръя но этнографияя «Чипчирган» ансамбле мыло-кыдо пыриськиз, соин ӵош концертъёсын улосысь ёросъёсты котыръяз[4]. УдГУ-эз йылпумъямез бере, Дэри ёросысь Юбилейной шор ёзо школаын пиналъёсты дышетыкуз но, Пётр Данилов эшшо тямыс ар ӵоже ансамблен ӵош концертэн поталляз[3].
Школаын изобразительной искусствоен но черчениен дышетӥсь луыса ужаз. Солы нимаз кабинет висъямзы бере отчы куиськон станок пуктӥз, соин нылпиосты куиськыны дышетӥз. Даниловлэн верамезъя, та киужлы со пичи дыръяз дышиз[3].
1990-тӥ арын Ижкарын фольклор кырӟанъя «Айкай» удмурт кун театр кылдытэмын вал. Пётр Даниловлэн тодэ ваёнъёсызъя, со отын ужан сярысь уйбыртылӥз, но штат юнматэмын ни вал. 1994-тӥ арын театре со аслаз куэм арбериосыныз лыктӥз. «Айкайлэн» кивалтӥсьёсыз егит дышетӥсьлэсь быгатонлыкъёссэ дунъязы: Даниловез коллективе кутӥзы, со артист-вокалист но суредась-постановщик луиз[3], нош 2002-тӥ арын театрез валтыны ӧдъяз[5].
Пётр Данилов «Айкай» театрысь вань костюм коллекциосты кылдытӥз. Со удмурт дӥськутлэн аспӧртэмлыкезлы бадӟым саклык висъя[6].
2003-тӥ арын театрлэн коллективезлы вылӥ ӟечлыко сцена костюмъёс кылдытэмез понна Пётр Данилов Удмурт Элькунысь Кун премиен пусъемын[7].
2012-тӥ арын 14-тӥ коньывуонэ Удмурт Элькунысь Кун Кенеше депутатэ быръемын, Кун Кенешысь наукая, дышетонъя, лулчеберетъя но егитъёсын ужан политикая ялан ужась комиссиын ужаз[8].
2014-тӥ арын 25-тӥ тулыспалэ УР-ысь лулчеберетъя, печатья но ивор вӧлмытонъя министрлы воштӥсе юнматэмын, таин валче депутатысь дырызлэсь вазь кошкиз[5]. Та ужинтыяз со 2018-тӥ арозь тыршиз[2], отӥяз нош ик фольклор кырӟанъя «Айкай» кун театрез валтыны ӧдъяз[9].
Солэн кивалтэмез улсын коллектив гастрольёсын Россиысь улосъёсы но кунгож сьӧры пота, пӧртэм программаосы но конкурсъёсы пыриське[10][11].
Ас улонэз
Пётр Данилов кышнояськемын, кык пиосыз. Ирина кузпалыныз университетын нырысетӥ курсысен тодматскиз[9]. Со но куиське, сцена вылэ потыны костюмъёс кылдытъяны юрттэ[12].
Пётр Данилов мерлыко уже мыло-кыдо итӥське: удмурт но финн-угор конференциосы, форумъёсы, ӧтчамъёсы пыриське. Вань удмуртъёслэн «Удмурт Кенеш» ассоциацизылэн исполкомезлэн ёзчиез луэ, 2020-тӥ арын калык огазеяськонлэн исполкомез сое йӧскалык премиосын данъянъя комиссилы тӧрое бырйиз[13][14][15].
Валэктонъёс
- ↑ Данилов Пётр Павлович [ӟуч] minkultura.udmurt.ru. Эскеремын 11.10.2025 арын
- ↑ 1 2 Многонациональная сценическая культура Удмуртии: энциклопедический справочник / А. Е. Загребин. — Ижевск: Удмурт. ин-т истории, языка и литературы, 2014. — С. 70. — 399 с. — 300 экз.
- ↑ 1 2 3 4 Зинаида Рябинина. Вуюись ворпо… [удм.] // Удмурт дунне. — 2004. — 26 шуркынмонэ. — С. 6, 11 6.
- ↑ Творческая встреча с заслуженным деятелем искусств УР П. П. Даниловым [ӟуч] Национальная библиотека Удмуртской Республики (01.04.2017). Эскеремын 11.10.2025 арын
- ↑ 1 2 Данилов Пётр Павлович [ӟуч] Государственный Совет Удмуртской Республики (14.10.2012). Эскеремын 11.10.2025 арын
- ↑ О театре [ӟуч] Театр «Айкай». Эскеремын 11.10.2025 арын
- ↑ А. А. Волков (20.10.2003) Указ № 219 [ӟуч] docs.cntd.ru. Эскеремын 11.10.2025 арын
- ↑ Петр Данилов назначен заместителем министра УР по культуре [ӟуч] МК в Ижевске (25.02.2014). Эскеремын 11.10.2025 арын
- ↑ 1 2 Улон сюресъёс. П. Данилов [удм.] ТРК «Моя Удмуртия» (25.12.2019). Эскеремын 11.10.2025 арын
- ↑ Татьяна Пунгина (10.03.2022) Театр «Айкай» из Удмуртии едет на гастроли в Кировскую область [ӟуч] udmurt.media. Эскеремын 11.10.2025 арын
- ↑ София Хохрякова (17.10.2023) Карелия и Вологодская область – Театр «Айкай» из Удмуртии отправляется на гастроли по России [ӟуч] udmurt.media. Эскеремын 11.10.2025 арын
- ↑ Анжелика Тихонова (29.03.2017) Пётр Данилов: университетэз йылпумъяку, кырӟаны уд — пиналъёсты дышетыны мынод шуизы [удм.] udmurt.media. Эскеремын 11.10.2025 арын
- ↑ Любовь Тихонова (07.09.2011) Тыпы выжыяськоз! [удм.] Удмурт дунне. Эскеремын 11.10.2025 арын
- ↑ «Удмурт Кенешлэн» исполкомез ортчиз [удм.] Всеудмуртская ассоциация «Удмурт Кенеш» (21.05.2020). Эскеремын 11.10.2025 арын
- ↑ Можгаысь Татьяна Кибардинаез но Ижкарысь Елена Ботниковаез пусъёзы Ашальчи Оки нимо йӧскалык премиен [удм.] ТРК «Моя Удмуртия» (21.03.2024). Эскеремын 11.10.2025 арын
Литература
- Многонациональная сценическая культура Удмуртии: энциклопедический справочник / А. Е. Загребин. — Ижевск: Удмурт. ин-т истории, языка и литературы, 2014. — С. 70. — 399 с. — 300 экз.
Чӧлсконъёс
- Данилов_Пётр_Павлович [удм.]
- Данилов Пётр Павлович [удм.]