Борин, Сергей Николаевич
| Сергей Николаевич Борин | |
|---|---|
 | |
| Вордӥськем дырыз | 14-тӥ коньывуонэ 1973 |
| Вордӥськем интыез | Ижевск |
| Кулэм дырыз | 13-тӥ пӧсьтолэзе 1993 (19 арес) |
| Кунмуртлыкез |
 СССР →  Россия |
| Кыӵе войскоез | кунгожез чаклан |
| Служить карон аръёсыз | 1991—1993 |
| Званиез | рядовой |
| Ожмаськонъёс/ожъёс | Граждан ож Таджикистанын |
Сергей Николаевич Борин (1973—1993) — Таджикистанын интыяськем Россиысь пограничникъёслэн группаысьтызы Муско отрядысь 12-тӥ кунгож заставаысь пулемётчик, Россия Федерациысь Герой.
Улон сюресэз
Вордӥськиз 1973-тӥ арын 14-тӥ коньывуонэ Ижын ӟуч семьяын[1][2].
Ижысь 20 номеро шор ёзо школаысь 8 классэз, собере Ижысь 9 номеро ПТУ-ез йылпумъяз. Ижысь механикая заводын токарь луыса ужаз[1][2].
1991-тӥ арын толсуре армие басьтэмын. Нырысь пограничникъёслэн Байкал сьӧрысь округазы, нош собере Таджикистанын Россиысь пограничникъёслэн группаысьтызы Муско отрядаз служить кариз[1][2]. Со вакытэ элькунын граждан ож мынӥз, кунгож сьӧрысь Таджикистанысь исламистъёслы юрттон вылысь ялан душманъёс лыкто вал[2].
Подвигез
1993-тӥ арын 13-тӥ пӧсьтолэзе вазь ӵукна 12-тӥ кунгож заставаысь чакласьёс застава доры лушкем матэктӥсь боевикъёсты синйылтӥзы но соосын ожмаськыны кутскизы. Нырысетӥ ыбылӥськонъёссы бере ик вӧзысьтызы гурезьёсысь застава вылэ кужмо тыл усьтэмын вал. Тодмо луиз, заставаез 2 реактивной установкаосысь, 2 миномётысь, 12 бадӟым калибръем ДШК пулемётъёсысь но 30-лэсь уно гранатомётъёсысь ыбылӥзы шуыса. 250-лэсь трос душманъёс атакае пыриськизы. Соослы пумит ӝутскизы 42 пограничникъёс но 201-тӥ мотострелковой дивизиысь 3 ожгарчиос[1].
Сергей Борин пулемётчик кӧня ке атакаосты палэнтӥз. Куинь пол минаос но гранатаос пуштэмлэсь сӧсырмиз. Ож бере улэп кылемъёс веразы, гранаталэн пуштэмысьтыз со омыре ӝутскиз но берыктӥськиз шуыса, нош музъеме лэзькемез бере соку ик ыбылӥськонзэ азьланьтӥз. Мышкысеныз дораз матэктыса, душманъёс Боринэз, тыбыраз автоматэн ыбылыса, виизы[1].
Со ожын 25 ожгарчиос быризы, 17 пограничникъёс пумозяз ожмаськизы. Пленэ сётскемъёс ӧй вал. Душманъёс но бадӟым ыштонъёс адӟизы но, кунгожез пырпотытэк, афган музъем вылэ берытсконо луизы[1].
Росси Федерацилэн Героез нимын Сергей Николаевич Борин пусъемын 1993-тӥ арын 19-тӥ пӧсьтолэзе гожтэм 1050 номеро косэтъя[2].
Ватэмын Ижысь Александров шайвылысь Герой-интернационалистъёслэн аллеяязы[2].
Буре ваён
Ижкар администрацилэн 2002-тӥ арын 29-тӥ гудырикошконэ потэм 393 номеро пуктэтэзъя Ижысь Шунды посёлокысь Голубая ульчалы Сергей Борин пограничниклэн нимыз сётэмын вал[3].
2003-тӥ арын Геройлэсь нимзэ Ижысь механикая 9 номеро лицейлы сётӥзы. Солэн борддораз буре ваён пул шуккизы[4].
Озьы ик Геройлэсь нимзэ нуллэ Ижысь ватсаса тодон-валан сётонъя кадетъёслэн «Граница» пограничной центрзы.
Валэктонъёс
- ↑ 1 2 3 4 5 6 Борин Сергей Николаевич Герои страны
- ↑ 1 2 3 4 5 6 Борин Сергей Николаевич Герои Отечества
- ↑ Пограничника Сергея Борина ул. Улицы Ижевска. Эскеремын 2013-01-15 арын
- ↑ Наши выпускники Механический лицей № 9 имени Героя России С.Н.Борина. Эскеремын 2013-01-15 арын
Чӧлсконъёс
- Борин Сергей Николаевич 117 Московский краснознамённый пограничный отряд. Эскеремын 2013-01-15 арын
| Быдӟым Атыкай оже пыриськем муртъёс | |
|---|---|
| Уйпал Кавказысь боевой операциосы пыриськем муртъёс | |
| СВО-е пыриськем муртъёс | |
