Перевозное (Удмуртия)

Перевозное
	Черкогурт
Перевозное
	56°52′57″ с. ш. 53°55′26″ в. д.GЯO
Кун	Россия
Федерацилэн асмосэз	Удмуртия
Муниципал ёрос	Вотка ёрос
Гурт поселение	Перевозное гурт поселение
Историез но географиез
Часовой поясэз	UTC+4:00
Улӥсез
Улӥсез	▲1496 мурт (2021);
Официальной луись кыл	удмурт, ӟуч
Цифровой идентификаторъёс
Почта индекс	427412
Код ОКАТО	94208845001
Код ОКТМО	94508000366
ГКГН-ысь номерез	0518437
	Перевозное Москва Ижевск Перевозное
	Медиафайлъёс РувикиМедиа пушкын

Перевозное — Удмуртиысь Вотка ёросысь вашкалаез черкогурт, Приволжск федерал округ. Перевозной шур вылын сылэ.

Интыяськемез

Перевозное черкогурт Вотка ёрослэн лымшор но шундыпуксён палаз Кам но Сива шуръёслэн ярдур котыразы интыяськемын. «Перевозинское» гурт поселенилэн административной центрез яке шор усадьбаез луэ. Та поселенилэн быдӟалаез 11 008 гектар. Поселение куать гуртъёс пыро:

Историез

Черкогуртэз нырысь-валысь Переволока нималлязы. Отӥяз нимыз пумен Перевозное луиз^[2]. Талы валэктон но вань: выжъёс но сюресъёс ӧй вал на, нош Кам но Сива шур валлин ваем грузэз кысконо-нуоно, ӵемысь — коръёс вылэ поныса. 18-тӥ дауре Воткаын корт ӵыжатон завод кылдӥз, заводэз но Кам ярдурысь пристанез герӟась сюрес ӵапак Перевозное пыр потӥз.

19-тӥ даурлэн пумаз черкогуртлэн православной общинаез Ватка губернилэн губернаторезлы вазиськиз, гуртазы черк ӝутыны курыса. 1903-тӥ арын коньывуонэ та ужпум эскеремын вал. Приходысь 650 муртлы чакласа, дано зодчий И. А. Чарушин черк пуктыны проект лэсьтӥз. Черкез оскисьёслэн коньдонэнызы но Епархилэн юрттэменыз ӝутӥзы. 1910-тӥ арын черкез йылаз-пумаз вуттӥзы. Туннэ Кузё-Инмарлэн Ӝутӥськонэзлы сӥзем (Вознесенской) черк Перевозноелэн тужгес учкымон интыез но муниципал кылдытэтлэн данъяськонэз луэ. 2010-тӥ арын черк 100 аръем юбилейзэ пусйиз^[2].

Черкез улон жаляз: сое пытсан сярысь ужпум кӧня ке пол ӝутӥськылӥз ке но, сое ӧз куашкатэ. 1994-тӥ арын черклэн бурд улаз Дун-чылкыт Успенской нылкышно монастырь усьтӥськиз.

Удмуртиысь пӧртэм сэрегъёсысь оскисьёс черке вуыло, татысь вашкала обросъёслы вӧсясько. Со мудоръёсты татчы 1952-тӥ арын Паздеры часовняысь вайизы. Перевозноеысь вӧсьлыко интыосын тунсыкъяськисьёс йылэмен, Перевозное поселенилэн администрациез Вотка ёрос муниципал кылдытэтысь лулчеберетъя управлениысь но гуртысь культура удысысь ужасьёсын валче нимысьтыз турмаршрут малпазы но кылдытӥзы. 2010-тӥ арын турмаршрут «П. И. Чайковскийлэн вордскем палъёсысьтыз паймымон Перевозное черкогурт» ним улсын рос-прос ужаны ӧдъяз Туннэ котькуд мылкыд карись вӧсьлыко интыостӥ ортчыны быгатэ^[2].

Туннэ Перевозное черкогурт — со туала куронъёслы тупась гурт. Татын шор ёзо школа но нылпи сад ужа. Артысь гуртъёсысь но пиналъёс татын визь люкало, тодон-валанзэс муромыто, соосты Перевозное нимысьтыз автобусъёсын нулло.

Перевозноеысь школа ёросысь огез вашкалаез луэ. 2009-тӥ—2010-тӥ дышетскон аръёсы ёросысь устоез школа нимыз пусъемын. Урокъёсын визь люкам сяна, нылпиос пӧртэм секциосы но кружокъёсы ветло. Усто спортзалзы. 2009-тӥ арын усьтэмын туала стадион.

Черкогуртын эмъяськон амбулатория но ужа. Татын мугорез юнматонъя физиокабинетсы но, асьсэлэн пинь эмъясь врачсы но вань. 2010-тӥ арын аптека усьтӥськиз. Озьы ик администрация, почта, библиотека, магазинъёс, столовой, бар ужало. Лулчеберетъя центрын 17 кружокъёсын арлыдоос но егитъёс асьсэлэсь быгатонлыкъёссэс волято. Татын «Радуга» нылпи коллективен но ӟуч кырӟанъя «Вечора» калык ансамбленызы данъясько^[2].

Интыысь аскивалтон ёзэсъёслэн ужазы калыкез улон-вылонын утён ужпумъёсты сэрттон-пертчонын бадӟым юрттэт сёто поселениын кылдытэм инвалидъёслэн кенешъёссы, ветеранъёслэн кенешъёссы, нылкышно кенешъёс, урам комитетъёс, егитъёслэн кенешсы.

Улӥсез

2002-тӥ арын Россиын ортчытэм калыкез лыдъян-чотан возьматӥз, Перевозноеын 1105 адямиос уло, пӧлазы удмуртъёс но ӟучъёс но вань.

2025-тӥ арын 1-тӥ инвожолы шараям лыдпусъёсъя, черкогуртын 1116 улӥсез, соос пӧлын: 6 аресозь 111 пиналъёс, 7-сен 17 аресозь 132 кузя быдэ вуымтэос, 18-сен 29 аресозь 134 егитъёс, 30-сен 60 аресозь 480 бадӟымъёс, 60 арес сьӧры потэмъёс 243 кузя, нош 80 арессэс ортчемъёс — 16 мурт^[3].

Перевозное черкогуртын улӥсьёс пӧлысь вылӥ образование басьтэмъёс 21,7 процентэз луо, шоро-куспо профессиональной образование басьтэмъёс — 37 процентэз.

Черкогуртын улӥсьёс пӧлысь официально ужасьёсыз 665 кузя, со 59,6 процент луэ. Пенсионеръёс 324 кузя, со 29 процент. Ужтэк кылемъёс пӧлын 65 мурт пусъемын, со 5,8 процент^[3].

Учкымон интыосыз

Перевозное черкогуртэ туристъёсты арысь аре уногес кыскон вылысь татысь инфраструктураез ялан умоято, турмаршрутэз тунсыкогес каро. Кылсярысь, Воткалэн, Вотка заводлэн историяз но дано композиторлэн П. И. Чайковскийлэн семьяезлэн улон-вылоназ Перевозное черкогуртлэн аслаз интыез. Композиторлэн атаез Илья Петрович Чайковский Вотка заводэн кивалтон вакытэ Перевозноеын пичи горной школа ужалляз, ӵапак со заводлы ужасьёсты дасялляз, озьыен, заводэн кивалтӥсьлэн чакламез улсын но дышетон радъяськылӥзы^[4].

Турмаршрутлэн программаяз черкогуртысь тунсыко но учкымон интыосын тодматскон пыртэмын. Ӟуч православной культураысь йылолъёсты верало-адӟыто, озьы ик старообрядецъёслэн улэм-вылэменызы тодмато. Турмаршрутъя Кузё-Инмарлэн Ӝутӥськонэзлы сӥзем черкен, Успенской нылкышно монастырен но Тихвинысь Инмар Анайлэн мудорезлы сӥзем воргорон монастырен тодмато. Проект улсын 18-тӥ даурысь Базуев купечлэсь мануфактура лавказэ тупатъяны-выльдыны но калыклы учкымон карыны медо: татын адӟытон но ӟуч чай юон сямъёслы сӥзем залъёс ужалозы^[4].

2010-тӥ арын турмаршрут «П. И. Чайковскийлэн вордскем палъёсысьтыз паймымон Перевозное черкогурт» ним улсын рос-прос ужаны ӧдъяз. Туннэ котькуд мылкыд карись улӥын пусъем вӧсьлыко интыостӥ ортчыны быгатэ.

Дун-чылкыт Успенской нылкышно монастырь но вӧсьлыко мудоръёс

Дун-чылкыт Успенской нылкышно монастырь 1994-тӥ арын Кузё-Инмарлэн Ӝутӥськонэзлы сӥзем черк бордын усьтэмын. Интыяськемын Воткалэсь 25 иськемын. Сюрес асфальтэн шобыртэмын. Монастыре пыро: 1910-тӥ арын пуктэм Кузё-Инмарлэн Ӝутӥськонэзлы сӥзем черк, 2007-тӥ арын лэсьтэм пулэсь Успенской черк, кирпичъёслэсь пуктэм кельяосын корпусъёс, черкын но монастырьын ужасьёслы, паломникъёслы чаклам коркаос, котырез возён но подсобной юртъёс^[5].

Успенской нылкышно монастырьлэн тужгес быдӟымез но дуноез вӧсьлыкез — со вашкала обросъёс — кортӵогам Утисьлы но солэн Инмар Анаезлы но Иоанн Богослов апостоллы сӥзем пулэсь вӧлэм скульптурая суредъёссы. Соос пермь пу скульптуралэн образецъёсыз луо. Ӵапак та вӧсьлыкъёсты оскисьёс сӥлы каро, эмъяны-юрттыны быгатэмзы, чудотворной луэмзы сярысь пусъё. Мадёсъёслы осконо ке, мудоръёс 19-тӥ дауре Кам шур кузя тулкымъёслы пумит уяса Пермь кемысь та палъёсы вуизы. Чорыгасьёс нырысь-валысь уясь коръёсты котырысьтыз ялан палэнто вал, нош соос выльысь доразы лыкто. Уйин котырысьтызы пиштӥсь югытлы паймыса ӝуто но — отын мудоръёс, эшшо ке — кӧсэсь. Соин ик мудоръёсты «улэпесь» нимазы, бератаз ни соосты вашкала обросъёс шуизы. Абдрам чорыгасьёс соосты пу часовняе пыртӥзы. Тужгес паймымонэз: пулэсь часовня тылпуын пеньлы пӧрмиз, нош вашкала обросъёс тылысь воксё но сутскытэк потӥзы, соосты Паздеры черкогуртысь Тихвинысь Инмар Анайлэн мудорезлы сӥзьыса вӧсям черке сётӥзы. Нош 20-тӥ даурлэн 50-тӥ аръёсаз, Тихвинской черкез пытсамзы бере, Тихвинысь Инмар Анайлэн мудорезлы сӥзем престолэз но вӧсьлыко мудоръёсты Перевозноеысь Кузё-Инмарлэн Ӝутӥськонэзлы сӥзем черке выжтӥзы. Со татысь тужгес быдӟым вӧсьлыкъёс пӧлы пыриз. Табере солы йыбырттыны быдэс Россиысь вуыло^[5].

Дун-чылкыт Андрониклы сӥзем ошмес

Дун-чылкыт Андрониклы вӧсям ошмес Перевозное черкогурт сьӧрын, Андрон нимо возьвылын, Успенской монастырьлэсь 2 иськемын интыяськемын. Калыкын сое вӧсьлыко ошмес нимазы, юрттыны быгатэмзэ шӧдыса. Котырзэ ӝикыт возё. Ошмес вылэ купель но пуктэмын, гужем солэн вуосаз пырыны калык вуылэ^[6]. Ошмес доры толалтэ но сюресэз сузяса возё Воткаысен татчыозь нуналаз куинь пол автобус но вуылэ.

Тихвинысь Инмар Анайлэн мудорезлы сӥзем воргорон монастырь

Перевозноелэсь кыдёкын ик ӧвӧл, бырем Паздеры гуртын, вашкала мудоръёсты шедьтэм Кам шур дурын, Тихвинысь Инмар Анайлэн мудорезлы сӥзем воргорон монастырь пуктэмын. Монастырь кык люкетлэсь чакламын: огаз монахъёслы, мукетаз оскисьёслы кельяос лэсьтэмын. Татын нырысетӥез черк 1795-тӥ арын ик усьтэмын вал. Пулэсь ӝутэм черкез собере уно пол выльдылӥзы, вужмем интыяз выльзэ но вол-вӧлзэгес но пуктылӥзы. 1923-тӥ арын ӝуаны но шедиз. Сельсовет гуртысь огзэ юртэз но арендае, часовнялы шуыса, кутыны лэзиз вал. 1939-тӥ арын сое но пытсазы. Озьы ке но оскисьёс та палъёсы ветлэмысь ӧз дугдылэ. 2012-тӥ арын выль черк пуктӥзы. 2021-тӥ арын татын монастырь усьтӥськиз^[7].

Монастырь котырын толалтэ но кынмисьтэм куинь ошмесъёс пӧзё, вуэз эмъясь, шуо. Огез ошмес Тихвинысь Инмар Анайлэн мудорезлы сӥзьыса вӧсямын.