Камской (Вотка ёрос)

Черкогурт
Камской
57°01′55″ с. ш. 54°12′32″ в. д.
Кун	Россия Россия
Федерацилэн асмосэз	Удмурт Элькун
Муниципал ёрос	Вотка
Шор интыезлэн ӝуждалаез	109 м
Улӥсез
Улӥсез	496 мурт (2025)
Цифровой идентификаторъёс
Почта индекс	427427
Код ОКАТО	94208830001
Код ОКТМО	94508000296
ГКГН-ысь номерез	0518965
Камской Москва

Камской (ӟуч: Камское) — Вотка ёросысь черкогурт. Нырысь-валысь Неумоино гурт нимаськиз, 1915-тӥ арын Казанско-Богородицкой черк пуктэм бере черкогурт луиз. 1939-тӥ арозь ужкагазъёсын Неумоино (яке Неумойно) черкогурт нимын пумиське.

Камской (Неумоино) черкогурт котырысь интыос. Воткинский район

Интыяськемез

Интыяськемын элькунлэн шундыӝужан палаз, тайга подзонаын, Вотка водохранилищелэн бурпал ярдураз, Вотка карлэсь 18 иськемлы палэнын, Ижкарлэсь 73 иськемын. Тужгес вылӥ интыезлэн ӝуждалаез — 109 метр.

Куазь

Куазь шоро-куспо континентальной. Толалтэ кема кыстӥське кезьыт но трос лымыё луэ, гужем вакчи но шуныт. Ар ӵоже шорлыко температура — 1,4 °С. Пӧсьтолэзе омырлэн температураез 17,5 °C-озь ӝутске (абсолютной максимум — 34,3 °C); толшоре −15 °C-озь лэзиське (абсолютной минимум — −43 °C). Будон-пушъён вакыт 160 нунал кыстӥське. Ар ӵоже 527 мм зор-кот усе. Лымы 172 нунал ӵоже шунатэк кылле.

Часовой поясэз

Камской черкогурт, быдэс Удмурт Элькун сямен ик, МСК+1 часовой зонаын интыяськемын. UTC-ъя кутӥськись дырлэн висъяськемез +4:00 луэ.

Историез

Кылдэмын XVIII даурлэн шораз. Нырысь-валысь Неумойная шуыса нимаськиз, Кузон губерниысь Пермь провинцилэн Сивин волостезлэн пушпӧлаз пыртэмын вал. Татын Косачёв, Соколов но Пьянков фамилиен ясачной крестьянъёс улӥзы. Музъем ужен, пӧйшуранэн, чорыганэн вырылӥзы. 1757-тӥ арын граф П. И. Шувалов Вотка шур дурын завод пуктыны кутскемез бере, матысь гуртъёсысь, озьы ик Неумоиноысь вань крестьянъёсты завод борды юнматӥзы. Нюлэс погыръязы, эгыр сутыса улӥзы, солы луыса, пеньӟаськем ымныр-киоссы номырин миськыса ӧз кошкылэ, соин ик та гуртысь ужасьёсты «неумытый» шуыса исаллязы, озьы ик со ним гурт борды лякиськиз. 1939-тӥ арозь пӧртэм источникъёсын Неумоино черкогурт шуыса пумиське. Берлогес нимыз Камской нимын воштэмын вал.

Улӥсез

1762—1764-тӥ аръёсы ортчытэм III ревизилэн тодэтъёсызъя, Неумойной гуртын 170 ӟуч приписной крестьянъёс улӥзы. 1818-тӥ арын — 222 мурт. 1869-тӥ арын 85 юртъерын 501 мурт лыдъямын вал. Гуртын асьсэлэн часовнязы но нянь вузан лавказы вань шуыса пусъемын.

XIX даурлэн шораз гурт Камской волостьлэн шорсюлмыз луиз. 1878-тӥ арын татын Земской школа усьтэмын, 1882-тӥ арын толшоре волостной правлени юртын — земской училище. Отын 43 мурт дышетскиз, соос пӧлын 3 нылмурт вал.

1897-тӥ арын Ватка губерниысь Сарапул уездлэн пушпӧлаз пыртэмын. Со арын ик калыкез лыдъян-чотанъя гуртын 100 юртъер но 534 мурт улӥсез пусъемын.

1914-тӥ арын 104 юртъер но 649 мурт гожтэмын. Со вакыт гурт куать люкетлы висъямын вал: Бадӟым сюрес, Туманы, Осинник, Чикари, Верети но Семенки. Гурт калык ёрмытэк улӥз, котькуд хозяйствоын асьсэлэн валзы вал. Узыръёсызгес, кылсярысь, Степан Косачёв вузкарон лавка возиз. Семён Соколовлэн кык муш бакчаез но пичияк тыметэз вылэм. Яков Абрамов скал вордӥз. Дмитрий Пьянков вукоен кузёяськиз.

Улӥсь калыклэн лыдыз

2010	2012	2021
603	↘576	↗605

2025-тӥ арын 1-тӥ коньывуонэ басьтэм тодэтъёсъя Камской гуртын улӥсез 496 мурт. Соос пӧлысь 6 аресозь — 49 мурт, 7-ысен 17 аресозь — 59 мурт, 18-ысен 29 аресозь — 59 мурт, 30-ысен 60 аресозь — 213 мурт, 60-лэсь мӧйыезгес — 108 мурт, 80 ареслэсь кема улэмъёс — 7 мурт.

Казанско-Богородицкой черк

Нырысь гурезь вылын часовня пуктэмын вал — алтарьтэк пичи черк, вӧсяськон юрт. 1910-тӥ арын гудырикошконэ черк пуктыны кутскемын. Вӧсямын 1915-тӥ арын, Инмар Анайлэн Казанской мудорезлы сӥзьыса. Пересьёслэн верамзыя, черк из фундамент вылэ пулэсь ӝутэмын вал. Колокольняез но пулэсь лэсьтэмын, липетэз кортэн липемын. Азьпалыз вӧлэм пулэн чебермамын. Нырысь-валысь черк Воткалась Благовещенской черк бордын юнматэмын вал. Приходысь баӵко араз кӧня ке пол гинэ службаос ортчытъяны ваньмылӥз. 1918-тӥ арын южтолэзе Сарапулысь духовной правленилэн косэтэзъя ас кажаз луись приход каремын. 1937-тӥ арын пытсамын но юртэз клублы сётэмын. Быдӟым Атыкай ож бере азьвыл черк ю-тысь возён магазейлы пӧрмытэмын, собере — удобрение возён игнтылы . В 1974-тӥ арын быдэсак куашкатэмын.

Валэктонъёс