Крезьгуръя элькун колледж
| Крезьгуръя элькун колледж (КПОУ УР «РМК») | |
|---|---|
| Удмурт Элькунысь «Крезьгуръя элькун колледж» профессиональной дышетон казна ужъюрт | |
 | |
| Кылдон арез | 1933 |
| Директорез | Перфильев Михаил Сергеевич |
| Сайтэз | rmkudm.ru |
 |
|
Крезьгуръя элькун колледж (вакч. — РМК; ӟуч: Республиканский музыкальный колледж) — Удмурт Элькунысь профессиослы дышетонъя ужъюрт. Ижкарын интыяськемын. Элькунын академической профилья зэмос крезьгурчиосты дасясь огназ ужъюрт: кырӟасьёсты но пианистъёсты, скрипачъёсты но духовикъёсты, баянистъёсты но аккордеонистъёсты, хорлы дирижёръёсты но музыковедъёсты; крезьгуро школаослы дышетӥсьёсты, крезьгуро коллективъёсын но ансамбльёсын кивалтӥсьёсты но мукет.
Историез
Крезьгуръя элькун колледж 1933-тӥ арын кылдӥз лыдъяське, ӵапак соку театръя но художествоя техникумын усьтэмын вал крезьгуръя ёзэт, 1937-тӥ арын со ас понназ ужась дышетон ужъюртлы пӧрмиз. Нырысь-валысь кык класс гинэ радъямын вал: калык но пеллян крезьгуро тӥрлыкъёс но крезьгурлы нодъян. Уноез дышетӥсьёс ленинград но муско крезьгуръя училищеосты но вузъёсты йылпумъям муртъёс вал[1].
Нырысетӥ аръёсы крезьгуръя училище кутылӥз гурез воксё валасьтэм но быгатонлыкъёстэк студентъёсты, малы ке шуоно Ижкарын одӥг но крезьгуръя школа ӧй вал. Озьы ик ссузын крезьгуро тӥрлык, методикая но нотаосъя кулэ луись литература ӧй вал[1][2]. 1930-тӥ аръёс пумын ӧнерчиосты сизьым ӧръя дасяллязы ни. Со сяна, училищеын кылдӥзы симфонияя пичи оркестр, хор но калык крезьгур тӥрлыкен шудӥсь оркестр[1].
Крезьгуръя училищее пырыны дасян вылысь Ижын нимысьтыз курсъёс усьтэмын вал, куд-огаз дышетскон вакыт 6-7 но солэсь трос ар кыстӥськылӥз. Та дыр ӵоже уноез дышетсконзэс аналтылӥзы, таин валче 1939-тӥ, 1940-тӥ но 1941-тӥ аръёсысь нырысетӥ выпускъёсын быдэн куинь адями гинэ вал[1].
Быдӟым Атыкай ож пуромемен валче училищеез пытсазы, уноез дышетӥсьёс но дышетскисьёс фронтэ кошкизы[1][2].
1945-тӥ арын куарусёнэ училище выльысь усьтӥськиз[2]. Отчы вить удысъя студентъёсты люказы: фортепиано, вокал, инструктор луон но хор, оркестр но калык крезьгуръя тӥрлык. Ваньзэ-ӧвӧлзэ 63 дышетскисез кутӥзы[1].
1969-тӥ арын училищелэн аслаз выль юртэз кылдӥз, отын концерт возьматъян но мугорез кыдатон залъёсыз вал. 1980-тӥ аръёсы дышетскисьёслэн лыдзы 400-лэсь ортчылӥз. Арлы быдэ училищеез 80-90 ӧнерчиос йылпумъяллязы[1].
1976-тӥ арысен 1980-тӥ арозь училищеын художествоя ёзэтэз вал. 1992-тӥ арын калык хор ёзэт усьтӥськиз, 2001-тӥ арын — солоен калык кырӟанъя ёзэт[1].
1985-тӥ арын Ижысь крезьгуръя училище луиз Крезьгуръя элькун училище[2].
2024-тӥ арын куарусёнэ ивортонъёсъя, дышетонъя ужъюртын тодон-валанзэс муромыто 250-лэсь ятыр студентъёс. Соос пӧлын: вуоно кырӟасьёс, пианистъёс, дирижёръёс, музыковедъёс, крезьгуръя школаосысь дышетӥсьёс, крезьгуро коллективъёсын но ансамбльёсын кивалтӥсьёс но мукет ӧнерчиос[3].
Колледжез йылпумъямъёс пӧлысь уноез ужало Удмуртиысь творчествоя но крезьгуръя таӵе тодмо коллективъёсын: кырӟанъя но эктонъя «Италмас» кун ансамбль, фольклор кырӟанъя «Айкай» кун театр, калык кырӟанъя, крезьгуръя но эктонъя «Танок» ансамбль, УР-ысь «Арсенал-бэнд» духовой кун оркестр, УР-ысь симфонияя кун оркестр, УР-ысь операя но балетъя театрысь оркестр но хор, академической кун капелла Avis Cantu, П. И. Чайковский нимо муниципал камерной хор но мукетыз[4].
Дасян ӧръёс
2024-тӥ арысь ивортонъёсъя, Крезьгуръя элькун колледж таӵе удысъёсъя ӧнерчиосты дася:
- Крезьгуро тӥрлыкен шудон;
- Вокал искусство;
- Солоен но калык хорен кырӟан;
- Хорен дирижировать карон;
- Крезьгуръя теория;
- Крезьгурез кылдытонъя-радъянъя оператор[3].
Дано дышетскисьёсыз
- Г. А. Корепанов — удмурт крезьгурчи, артист, дирижёр, Удмуртиысь искусство удысысь дано ужась;
- Г. М. Корепанов-Камский — удмурт крезьгурчи, кырӟась, дышетӥсь, Удмурт АССР-ысь Искусство удысысь дано ужась, Удмурт АССР-ысь Калык артист, Удмурт Элькунлэн дано муртэз;
- Ю. Л. Толкач — совето но росси крезьгурчи, музыковед, Удмуртиысь искусство удысысь дано ужась;
- А. Г. Корепанов — крезьгурчи, крезьгуръя дышетӥсь, Удмурт Элькунысь искусство удысысь дано ужась;
- С. А. Корепанов — кырӟась, артист, СВО ортчон интыосын концерт бригадаосы пыриськись;
- Н. М. Шабалин — операя росси кырӟась, Россиысь Бадӟым кун театрысь солист[1];
- К. Шушаков — операя росси кырӟась, Россиысь Бадӟым кун театрысь солист[5];
- В. Н. Михайлов — совето но росси крезьгурчи, хормейстер, дирижёр, Удмурт Элькунысь П. И. Чайковский нимо Иж муниципал камерной хорез кылдытӥсь, солэн чеберлыко кивалтӥсез, директорез, Росси Федерациысь дано артист, Удмурт Элькунысь искусство удысысь дано ужась.
Валэктонъёс
- ↑ 1 2 3 4 5 6 7 8 9 История колледжа [ӟуч] Республиканский музыкальный колледж. Эскеремын 07.10.2025 арын
- ↑ 1 2 3 4 Республиканское музыкальное училище Министерства культуры Удмуртской Республики [ӟуч] Архивная служба Удмуртской Республики. Эскеремын 07.10.2025 арын
- ↑ 1 2 Абитуриенту [ӟуч] Республиканский музыкальный колледж. Эскеремын 07.10.2025 арын
- ↑ Ханнанова Е. (21.01.2014) Воспитание востребованных профессионалов [ӟуч] gazetaigraem.ru. Эскеремын 07.10.2025 арын
- ↑ Константин Шушаков — воспитанник «Орфея», ныне солист Большого театра России. [ӟуч] Редакция газеты «Знамя» (23.04.2022). Эскеремын 07.10.2025 арын
Чӧлсконъёс
 |
|---|
