Толкач, Юрий Львович

Юрий Львович Толкач
Валтӥсь тодэтъёс
Вордскем дырыз	28-тӥ толшоре 1949({{padleft:1949|4|0}}-{{padleft:1|2|0}}-{{padleft:28|2|0}}) (77 лет)
Вордскем интыез	Вотка, Удмурт Автономной Советской Социалистической Республика, РСФСР, СССР
Кун	СССР  Россия
Ужудысэз	композитор, музыковед, педагог
Данъетъёсыз	Удмурт Элькунлэн Кун премиез

Ю́рий Льво́вич Толка́ч (ворд. 28-тӥ толшоре 1949, Вотка, Удмурт Автономной Советской Социалистической Республика) — совето но росси крезьгурчи, музыковед. Россиысь крезьгурчиослэн огазеяськонзылэн ёзчиез, Удмуртиысь крезьгурчиослэн огазеяськонзылэн тӧроезлэн воштӥсез, Удмурт Элькунысь искусство удысысь дано ужась, Удмурт Элькунысь Кун премилэн лауреатэз.

Улон сюресэз

Вордӥськиз 1949-тӥ арын 28-тӥ толшоре Удмурт АССР-ысь Воткаын, семьяез ӝоген выжиз Ижкаре. Бубиз элькунысь тодмо журналист вал, мумиз — ӟуч кылъя но литературая дышетӥсь. Улоно юртазы бускельёссы Удмуртиысь лулчеберет но искусство удысъёсын тыршисьёс вал: крезьгурчи Герман Корепанов, гожъяськисьёс Михаил Петров но Игнатий Гаврилов, Удмурт но Ӟуч драмая театръёсысь валтӥсь артистъёс, суредась Георгий Векшин. Юрий Толкач пусъемъя, бускельёсыз кыданаз шӧдскымон пытьы кельтӥзы.

Дышетскиз Ижысь 30 номеро школаын. 10 арескысеныз крезьгурен вырыны ӧдъяз, нимысьтыз урокъёс солы сётъяз крезьгуро училищеын дышетскись нылмурт. Та занятиос бере Юриез соку ик кутӥзы Ижысь крезьгуръя 2 номеро школалэн куинетӥ классаз.

1964-тӥ арын Толкач Ижысь крезьгуръя училищее соку ик кык ӧръя дышетскыны пыриз: фортепиано но крезьгуръя теория. Отӥяз Кузонысь кун консерваториын музыковед ӧнеръя (А. Юсфинлэн но Ю. Виноградовлэн классаз), озьы ик крезьгурчи ӧнеръя (А. Лупповлэн классаз) тодон-валанзэ будэтӥз.

1973-тӥ арын Иже берытскиз. Крезьгур гожъям сяна, дышетон удысын тыршиз. Удмуртиысь крезьгурлы, озьы ик крезьгур дуннеысь ужпумъёслы сӥзем уно радиопередачаос дасяз. Статьяосыз улосысь пӧртэм изданиосын, «Крезьгуро академия» (ӟуч: Музыкальная академия) центральной журналын печатласько.

1975-тӥ арын Толкач Россиысь крезьгурчиослэн огазеяськоназы пыриз. 1977-тӥ арысен Удмуртиысь крезьгурчиослэн огазеяськонзылэн кылкутӥсь секретарез вал, отӥяз огазеяськонлэн тӧроезлэн воштӥсез луиз.

Творчествоез

Юрий Толкач пӧртэм крезьгуро жанръёсын ужа. Пичиослы но, бадӟымъёслы но хорен быдэстон вылысь произведениос гожъя. Крезьгуръёсыз пӧлысь уноез герӟаськемын ӟуч но удмурт фольклоръёсын, таослэсь мылкыд кузьмась гурзэс, ритмзэс но интонацияя аспӧртэмлыксэс чакласа гожтэмын.

Крезьгурчи уно симфонияя произведениосты кылдытӥз, соос пӧлын: «Сюан гуръёс» (ӟуч: Свадебные мелодии), «Пастухъёслэн йыбырттонзы» (ӟуч: Поклонение пастухов), «Бокаччо-сюита», «Чылкыт ошмесъёслэн кырӟанъёссы» (ӟуч: Песни чистых родников), «Парижлэн липет улаз» (ӟуч: Под крышами Парижа), «Вотка сярысь тодэ ваёнъёс» (ӟуч: Воспоминание о Воткинске) но мукет.

«Утись талисман» (ӟуч: Чудесный талисман) балетлы (2004), «Огсыр улонэз бугыртӥсь» (ӟуч: Возмутитель спокойствия) мюзикллы (2005) гур гожтӥз. 20 театр постановкаослы крезьгур малпаз.

Толкач озьы ик кырӟанъёс гожъя, элькунын тужгес тодмо луо: «Зарни сяська — италмас» (ӟуч: Цветок золотой — италмас), «Нош тон монэ озьы ик яратӥськод на?» (ӟуч: А ты всё так же любишь ли меня?), «Мынам музъеме» (ӟуч: Моя земля) но «Мусо гуре» (ӟуч: Моя милая мелодия).

Библиографиез

• Ю. Л. Толкач, Г. А. Ходырев. Манят огоньки. — Ижевск: Удмуртия, 1979. — 19 с.
• Ю. Л. Толкач, А. Г. Корепанов. Песни и хоры композиторов Удмуртии. — Ижевск: Удмуртия, 1992. — 142 с. — ISBN 5-7659-0402-5.
• А. Н. Голубкова, В. Г. Седельникова. Музыка Удмуртии / ред. Ю. Л. Толкач. — Ижевск: Институт компьютерных исследований, 2016. — 182 с. — ISBN 978-5-4344-0340-5.
• Ю. Л. Толкач. Многогранность (к юбилею заслуженного деятеля науки удмуртской республики, музыковеда А. Н. Голубковой) [ӟуч] // Ежегодник финно-угорских исследований. — 2013.

Данъетъёсыз но дано нимъёсыз

• Удмуртиысь комсомоллэн премиезлэн лауреатэз (1985);
• Удмурт Элькунысь искусство удысысь дано ужась (1993);
• Удмурт Элькунысь Кун премилэн лауреатэз (2002);
• Россиысь хорен кырӟан духовной крезьгуръя конкурслэн лауреатэз (2003);
• Герман Корепанов нимо премилэн нырысетӥ лауреатэз (2024) — крезьгур искусство удысын азинсконъёсыз но Удмурт Элькунын крезьгур культураез ӝутэмез понна;
• Россиысь крезьгурчиослэн огазеяськонысьтызы дано ужась.

Валэктонъёс

Чӧлсконъёс

• Юбилейный концерт Юрия Толкача «Не привыкайте к чудесам» [ӟуч]