Богоявление нимо черк (Чумой)
| Православи черк | |
| Богоявление нимо черк | |
|---|---|
| Церковь Богоявления Господня | |
| Кун | Россия |
| Адрес |
Эгра ёрос, Чумой черкогурт, |
| Конфессия | Православие |
| Епархия | Глазов |
| Благочиние | Игринской |
| Архитектурной стиль | одӥг престолэн пу черк |
| Кылдытэмын | Вӧсьлыко Синодлэн 1889-тӥ арын 24-тӥ тулыспалэ поттэм 651-тӥ номеро Косэтэзъя |
| Юртэз пуктэмын | 1893. Вӧсямын 1894-тӥ арын |
| Югдурез | Выльдэмын. Али ужась |
Богоявлене нимо черк (ӟуч Храм Богоявления Господня) ― одӥг престолэн пу черк. Сосновка черкогуртысь вайыса, ӝутэмын 1893-тӥ арын, прихожанъёслэн юрттэмзыя. Вӧсямын 1894-тӥ арын 9-тӥ южтолэзе, Богоявлени нуналэ. Соин калыкын Богоявленской черк шуо. Интыяськемын гуртлэн шоразгес, вырйылын. Черклэн йылыз кыдёкысен, кӧня ке иськемысен адӟиське. Эгра ёросын тужгес кема ужам черкъёс пӧлысь одӥгез[1]. Пытсамын 1961-тӥ арын.
Интыяськемез
Чумой черкогурт векчи нюлэсэн котыртэм вырйылын интыяськемын, Ватка карлэсь 320 иськемын, уезд карлэсь 120 иськемын, благочиннойлэсь 60 иськемын. Чугун сюреслэсь 65 иськемын; пароходной пристанёзь 90 иськем. Пичи гурт сюрес вылын сылэ[2]. Гурт азьпалан пичияк тыметэз вань. Матысьёсыз эмъюртъёс 18 иськемын Сосновкаын, 12 иськемын Бадӟым Пургалан но 12 иськемын Чутырын интыяськемын.
Чумой приход
Чумой черкогуртысь приход усьтэмын Вӧсьлыко Синодлэн 1889-тӥ арын 24-тӥ тулыспалэ поттэм 651№ номеро Косэтэзъя[3]. Юнматэмын Ватка губерниысь Сарапул уездысь 6 благочиннической округе. Со вакытэ солэн пушпӧлаз пыризы Бадӟым Пурга, Сосновка, Чутырь приходъёсы азьвыл пырись гуртъёс пыртэмын вал: Чумой, Верх Чумой починка, Мужбер, Зоновский, Мясниковский, Пьяностепский, Репинский, Таранки, Нижние Шорни, Средние Шорни, Узырмон, Кабаново но Кожой. Чумой черкын нырысетӥез священник вал Аркадий Никольский но псалом кырӟась Николай Васнецов.
Вятской епархилэн черкъёс но духовенство сярысь гожтэм рукописной книгаяз тазьы гожтэмын:
Приходын вордскемъёсты но кулэмъёсты метрической книгае 1894-тӥ арысен пусйылыны кутскизы.
Приходын 2 школа усьтӥськиз. Одӥгез, черкогуртысез, церковно-приходской школаен суро. Отын 80 нылпи дышетскиз но 2 дышетӥсь ужаз. Мукетыз, 3 иськемын, Нижний Шорниын , татын озьы ик земскоеныз суро, одӥг дышетӥсь но 45 дышетскисез вал. Чумой приход куинь волостьлэн пушпӧлаз пыртэмын: Чутырской, Сосновской н Б.Пургинской.
Черк музъемъёс межа катъёсъя юртъеркотыр музъемъёслы люкылэмын вал . Соос пӧлын черклэн но духовенстволэн коркаосыз улэ, итымъёс, сад-бакча улэ басьтэм музъемъёс, гыроно-кизёно муос но турнан лудъёс. Чумой черклэн 33 сотка кизёно музъемез лыдъяськылӥз ке но, духовенство сое ӧз утялтылы. Та музъемъёс вылын азьланяз но гуртысь крестьянъёс ик ужаллязы, со понна выт тырылӥзы, со уксёен ик черкез возизы, гырлыос басьтӥзы, духовенстволы улон коркаос пуктӥзы.
Черк вӧзын арнянуналэ но бадӟым праздникъёсы бадӟым базар люкаськылӥз. Матысь но сьӧрлось гуртъёсысь лыктэмъёс бакча сиёнъёсын но пудо сиёнъёсын вузкарылӥзы.
Штатъя приходын одно икпоп но псалом лыдӟись луыны кулэ вал, озьы ик причтлы казенной юртъёс; музъем: юртъеркотыр 3 десятина но 1200 сажень, гыроно-кизёноез 23 десятина; вынлыко уксё табыш: св.525р., причтлы руга бичамын ӟег 40 пуд пала, йыды 60п. но сезьы 100п.; прихожанъёс: правосл. ӟуч. 822 воргорон, 803 нылкышно, черке пыртэм вотякъёс: 567 воргорон, 539 нылкышно; приходын ог-огзылэсь 2-6 иськеме интыяськем 14 гурт вал.
Историез
Черк школа
1892-тӥ арын 120 интылы чаклам приходской школа усьтӥськиз. Отчы Мужбер, Сосновские Шорни, Верхние Шорни, Нижние Шорни, Верх Чумой, Узырмон, Кабаново, Башмаково, Кожой, Зоново, Репино, Мыявоно, Токорон гуртъёсысь пиналъёс дышетскыны ветлӥзы. Школа черк бордын интыяськемын вал. Нырысетӥ дышетӥсьёс пӧлын Аркадий Константинович Никольский, Николай Федорович Васнецов но Пётр Петрович Клюкин. Уфаысь духовной семинариын наукаосъя курсъёсты йылпумъям священник Аркадий Константинович Никольский Инмар Законэз дышетӥз но церковно-приходской школаен кивалтӥз. Озьы ик дышетӥз Сарапулысь ёрос школаын курсъёсты йылпумъям черкын псалом кырӟась Николай Фёдорович Васнецов. Пётр Петрович Клюкин дышетӥсьлэн юрттӥсез луыса ужаз. (Та лыдпусъёс Росси империын 1895-тӥ арын калыкез лыдъям-чотанысь).
Собере крестьян пиналъёсты визьноданы кутскизы. Дышетскон книгаос но тетрадьёс тырмыт ӧй вал. Школалы коньдон черк коньдэтысь висъяськылӥз, кылемзэ школае ветлӥсь нылпиослэн анай-атайёссы тырылӥзы. Школаез арлы быдэ 10-лэсь трос адями йылпумъялляз. ДышетонВӧсьлыко Синодлэн кылдытэм катрадлыкезъя радъяськиз . Берлогес Приходской школаосты Вятской консистория киултӥз. Со арлы быдэ дышетскисьёслэн лыдзы; школаын дышетэм предметъёс но дышетскисьёслэн азинлыксы сярысь отчётъёс бичалляз. Приходской духовенство, ас ужзэ быдэстэм сяна, крестьян калыкен дышетскемлэн кулэлыкез сярысь вераськылӥз. 1895-тӥ арын Приходской школаын 57 пи но 10 ныл дышетскиз. Черк бордын ик библиотека интыяськиз. Отын, 1910-тӥ арлы библиотека сярысь ивортонъёсъя, 33 книга лыдъяське вал, соос пӧлын: — литургической пуштросо; — исторической пуштросо; — дышетон книгаос; — пӧртэм пуштросъем книгаос; — журнал-газетъёс.
Приходской школаын нырысетӥ дышетскисьёс пӧлын вал Марфа Иосифовна Метелёва. Со школаез 1902-тӥ арын йылпумъяз. Та дырозь нылашлэн ӟеч дышетскмез сярысь документъёсыз утиськыса кылемын: «Сертификат» но «Сертификат похвалы». Сертификатын школалэн кивалтӥсез, священник Андрей Голубев но дышетӥсьлэн Параскева Бодалёвалэн кинюртэмъёссы пуктэмын. (Документъёс Игралась Историяя но шаертодонъя музейын утиськемын).
Революци бере
1911-тӥ арын сӥзьыл Чумойын излэсь выль черк пуктыны кутскемын вал но пумозяз вуттымтэ. Октябрь революци бере, черк ужзэ азьланьтӥз. Озьы ке но, черк йылолъёсы но солэн ужъёсаз большевикъёс воштӥськонъёс пыртӥзы: кӧняез ке вӧсяськонъёс быдтэмын вал, кылсярысь, эксэй понна вӧсяськон но со выллемъёсыз, нош метрической книгаос бордын уж азьланьтӥськиз, школаез государстволы сётӥзы.
Нырысетӥ дунневыл ож дыръя 1914-тӥ-1918-тӥ аръёсы черк духовной институт сяна, патриотической ужъёсты но быдэсъяз: фронтэ мынӥсьёс сярысь вӧсяськылӥз, солдатъёслэн кылем семьяоссы сярысь сюлмаськиз, солдатъёслы гожтэтъёс гожъяз, пӧртэм пумо сертификатъёс сётъялляз, фронтлы коньдонэн, шуныт дӥсьёсын, кузьымъёс юрттыны тыршылӥз. Озьы калыклэн, Инмарлы осконэн валче, вормонлы осконэз юнмалляз. Озьы ке но, атеистической пропаганда емышъёссэ сётыны кутскиз. Егит калык черк шоры осконтэмгес учкыны кутскиз[4].
1938-тӥ арын Чумой черк пумысен споръяськон кылдӥз: «Черкын ужасьёс пӧлын поп ӧвӧлэн, черк ужаны уг быгаты», малы ке шуоно, Чумой черкысь священникез Гусев Иннокентий Александровичез 1938-тӥ арын 29-тӥ коньывуонэ 5 арлы пытсэт сьӧры пуктӥзы.
Черкез пытсам бере
1941-тӥ арын 3-тӥ куартолэзе УАССР-ысь Вылӥ Кенешлэн Президиумезлэн поттэм Косэтэзъя Чумой черкогуртысь Богоявленской черк пытсамын вал. Черклэн юртэз школалы сётэмын.
Удмурт Элькунысь Кун архивын «УАССР-ысь Зура ёросысь Чумой черкогуртысь черкез пытсан сярысь 659/8 номеро уж» кылемын (Ф. Р. — 620. Оп. 1. Д. 1235). Отын 1941-тӥ арын тулыспалэ: Мужбер, Узырмон, Кабаново, В. Чумой, Н. .Шорни, В. Шорни, ср. Шорни, Удм. Кожее, Зоново, Мясники, Пьяностеп, Быстрово, Репино но Сьӧдкыль гуртъёсын ортчытэм огъя кенешъёслэн протоколын люкаськем 522 мурт пӧлысь 407 мурт «Черкез пытсан понна» куаразэ сётӥз, «Пумит» 24 мурт куаразэ сётӥз, но «номыр вератэк» — 31 адями кылиз.
Быдӟым Атыкай ож аръёсы
Быдӟым Атыкай ож кутскемен, совето кивалтӥсьёслэн черк пумысен политиказы воштӥськиз. Сталинлэн 1943-тӥ арын 4-тӥ куарусёнэ Кремльын ӟуч православи черклэн кивалтӥсьёсыныз пумиськылэмез бере, кун но черк кусыпъёслэн историязы выль вапум кутскиз. Антирелигиозной пропагандаез дугдытыса, пытсам черкъёсты выльысь усььязы. Кылдытэмын вал СССР-ысь Калык комиссаръёслэн кенешсы улсын Ӟуч православи черклэн ужъёсызъя кенеш но отысь огмуртъёслэн аппаратсы кылдытэмын вал. 1943-тӥ арын 28-тӥ инвожое СССР-ысь Калык комиссаръёслэн кенешсылэн «Черкъёсты усьтон радлык сярысь» 1325-тӥ номеро лушкем Косэтэз кутэмын. Та дыр ӵоже 1949-тӥ арозь Ижысь епархиын 20 черкъёс выльысь усьтэмын вал. Сизьым но ӝыны ар ворсаськыса улэмез бере, 1947-тӥ арын 13-тӥ инвожое, Чумойысь черкез выльысь ужась шуыса пусйизы, нош официально усьтэмын 1949-тӥ арын 17-тӥ толсуре, "Чумой гуртысь оскисьёслэн куремзыя, черк юрт но черк ваньбур оскисьёслы берыктэмын вал.
Выльысь усьтэм бере
Чумой черкез выльысь усьтэм бере, нырысетӥ священнике Диомид Григорьевич Батуринэз юнматӥзы. Но 1948-тӥ арын оштолэзьлэн кутсконозяз черкын службаос ӧз мынылэ, малы ке шуоно, солэн юртэз ю тысен тырмытэмын вал ай. (Черкез пытсам бере, сое склад пӧрмытӥзы вал). Поп оскисьёслэн ӧтемзыя соослэн юртъёсазы службаос ортчытъяз (УАССР-ысь Министръёслэн Кенешсы улсын ужась Ӟуч православи черк ужъёсъя кенешлэн 1948-тӥ арын 1-тӥ кварталлы лэсьтэм докладысьтыз, ЦГА УР. Ф. Р-551. Оп. 1. Д. 74). 1949-тӥ арын 21-тӥ южтолэзе Казаньысь Инмар Анайлэн мудорезлы сӥзем праздник дыръя черкез вӧсязы но нырысетӥ литургия ортчытӥзы. Соку ик настоятеле Александр Васильевич Коковинэз юнматӥзы.
Хрущёв вакытэ
Сталин кулэм бере, черкез ултӥян «хрущевской» тулкым ӝутскиз. Черк ужасьёсты быдтон понна пӧртэм мугъёс шедьтылӥзы, сельпоосын нянь но пызь ӧз вузаллялэ, басьтэмзэ талаллязы. Кылсярысь, Зура райпотребсоюзлэн кивалтӥсез Шкляев поплэсь Александр Коковинлэсь басьтэм пызьзэ талам (ЦГА УР. Ф.Р-551. Оп.1. Д.124. Л.5). А. Халевин комиссарлэн юрттэмъя, талам котыр берыктэмын вал[5].
1958-тӥ арын черке ветлӥсьёслэн лыдзы синӥз. Пиналъёсты черке ветлонлэсь палэнтыны кутскизы. Озьы, кӧня ке коть коньдон поттон понна, Коковин поплы сьӧрлось гуртъёстӥ ветлыса службаос ортчытъяно луылӥз. 1960-тӥ арысен, черкъёсты быдтон вылысь, кивалтӥсьёс «духовенстволэн культъёсыз сярысь совето законъёсты быдэсъямзэс чакланъя комиссиос» кылдытӥзы. Озьы, Игра райисполкомлэн 1961-тӥ арын 20-тӥ южтолэзе ортчем кенешоназ 134 номеро протоколъя Богоявление черкез пытсан сярысь ужпум эскеремын, отын «Черклэн юртэз куашкан калэ вуэмын, бадӟым тупатъянъёстэк, азьланяз кутыны ярантэм лыдъяське» шуыса гожтэмын. 1961-тӥ арын Чумой черкогуртысь Богоявление нимо черк пытсамын вал.
Черк пытсаськем бере, юртэз куашкатэмын ӧй вал, 1967-тӥ арын Чумой школалы спортзал интые сётэмын вал. Со сярысь гожтэмыни Эгра сельсоветлэн «О работе по контролю за соблюдением законодательства о культах за 1967 год» 1968-тӥ арын 10-тӥ толшоре сётэм ивортоназ. Нош кык одӥг квартираем юртъёсты дышетӥсьёслы улон интылы чакламын. Культъёс сярысь катрадлыкъя инъет арбериос (мудоръёс, сюсьтылъёс, евангелиос, литература, дӥськут, мебель но мукет ваньбур) коньдон ёзэсъёсы, улосысь потребсоюзлы, Чумой школалы сётэмын, оглюкетэз быдтэмын.
Али дыре
Али дыре черклэн вылтусыз ог 100 ар талэсь азьло кадь ик кылемын. Йылыз гинэ ӧвӧл. Укноосаз вашкала наличникъёс, борддор нашивкаез но даур талэсь азьвыл лэсьтэмез ик возиське на. Шундыӝужан палась педпал борддоръёсаз пулэсь вандэм букваосын татын служить карем попъёслэн инициалъёссы шуккемын.
2014-тӥ арын 8-тӥ инвожое Чумой черкын выльысь сюсьтылъёс ӝуатскизы. Черкез «улӟытон» ужъёс "Духовный круг «Неугасимая Чумойская лампада» ужрад бордысен кутскизы. Арлы быдэ гужем татчы Чутырысь Вознесение нимо черк дорысен Крестной ход радъяське, бадӟым праздникъёсы службаос ортчыло.
Чумой черкын ужамъёс но священнослужительёс
Приходлэн историезъя Чумой черклэн духовенствоезлэсь лыдметсэ шедьтыны туж секыт. Нырысь ик, черкез усьтэм бере, татын ужазы священник Аркадий Константинович Никольский но псалом лыдӟись Николай Федорович Васнецов. Та лыдмет тупатъямез кулэ каре на:
- Мальгинов Василий, священник — 1906-тӥ арысен коньывуонысен 1907-тӥ арозь шуркынмонозь (ЦГА УР. Ф.245. Оп.1. Д.4327).
- Алексеев Константин Ефимович, священник.
- Никольский Аркадий Константинович (1865—1901 гг.), священник ― 1898-тӥ ― 1899-тӥ аръёсы, ватэмын Бадӟым Пургалась Покровской черк музъем вылын.
- Никольский Николай Аркадьевич, священник — 1908-тӥ арын толшорысен 1910-тӥ арын толшорозь (ЦГА УР. Ф.245. Оп.1. Д.4334. Д.4855).
- Никольский Леонид Константинович, (09.04.1876), священник 1920-тӥ арын 2-тӥ толшорысен.
- Никольский Константин Васильевич, священник ― 1919-тӥ арын.
- Голубев Андрей, священник ― 1900-тӥ арысен 1903-тӥ арын тулыспалозь.
- Ергин Константин, священник ― 1903-тӥ арысен 1906-тӥ арын коньывуонозь.
- Замятин Димитрий, священник ― 1910-тӥ арысен 1910-тӥ арын тулыспалозь.
- Князев Азарий Васильевич, священник ― 1910-тӥ ― 1915-тӥ аръёсы, ӟуч, дьяконлэн пиез.
- Гусев Иннокентий Александрович, ӟуч, ворд.1891-тӥ арын Киров карын, образованиез духовной, священник 1940-тӥ аръёсысен ― ….
- Батурин Деомид Григорьевич, священник ― 1947-тӥ ар.
- Коковин Александр Васильевич, священник, ӟуч, ворд.1895-тӥ арын, образованиез шоръёзо, ― 1920-тӥ ар, 1949-тӥ арын.
- Леконцев Петр, (1883—1937), священник.
- Васнецов Николай Федорович, псалом лыдӟись ― 1894-тӥ арысен 1907-тӥ арозь куартолэзёзь.
- Никольский Димитрий Васильевич, псалом лыдӟись ― 1909-тӥ арысен южтолэзьысен 1917-тӥ арозь.
- Филиппов Федор, (1924—1925) ― псалом лыдӟисьлэсь ужзэ быдэсъясь, 1925-тӥ ― 1927-тӥ аръёсы ― диакон.
- Капачинский Виталий Петрович, псалом лыдӟись ― 1918-тӥ ―1919-тӥ аръёсы.
- Утробин Александр, псалом лыдӟись ― 1907-тӥ арын инвожоысен 1909-тӥ арын толшорозь.
- Трубицын Пётр Прокофьевич, черк староста.
- Метелев Захарий Антонович, черк староста.
- Распопин Гавриил Илларионович, ӟуч, черк староста 1909-тӥ арын 15-тӥ гудырикошконысен.
- Капачинская Лариса Ивановна, просфорница.
- Бердова Ефросинья Ивановна, просфорница 1902-тӥ арын 6-тӥ толсурысен.
- Гусева Парасковья Архиповна, ӟуч, ворд. 189-тӥ арын, черкын кырӟась 1929-тӥ арысен 1961-тӥ арозь.
- Кузнецова Феодосья Павловна, ворд. 1910-тӥ арын, черкын кырӟась.
- Кощеев Павел Степанович, ӟуч, ворд. 1829-тӥ арын, черк староста.
- Аверкиева Евдокия Григорьевна, ворд.1910-тӥ арын, черкын утялскись.
Валэктонъёс
- ↑ Православные храмы Удмуртии
- ↑ Вятская епархия: Историко-географическое и статистическое описание
- ↑ [http://hram.igralib.ru/khramy-igrinskogo/home/uteryannye-svyatyni-ischeznuvshie-i-nedejstvuyushchie-khramy/tserkov-bogoyavleniya-gospodnya-s-chumoj Храмы Игринского района Виртуальный библиографический путеводитель. ЦЕРКОВЬ БОГОЯВЛЕНИЯ ГОСПОДНЯ С. ЧУМОЙ]
- ↑ А.Малых. История Ижевской и Удмуртской епархии в ХХ веке
- ↑ А. Малых. История Ижевской и Удмуртской епархии в ХХ веке
Литература
- Дубовцева, Н., Церковь Богоявления Господня села Чумой. Игринская центральная районная библиотека им. Кедра Митрея. Игра, 2015.
- Дубовцева, Н., Селиверстова, А. Неугасимая Чумойская лампада. — Светлый путь. — 2014. — 11 июля. — С.2.
- Корепанов, М. Люди нуждаются в вере: [Отзывы о «Чумойской лампаде»]. — Светлый путь. — 2014. — 25 июля. — С.3.
- Лекомцева, И. Чумойысь черклэн юртэз: [О Чумой. церкви]. — Вакыт.- 2010. — 26 март. — С.4.
- Перевощикова, Н. О Чюмое, Чумое, «Чумое»… — Светлый путь. — 2013. — 31 мая. — С.3.
Чӧлсконъёс
- Отчетно-информационный доклад уполномоченного Совета по делам русской православной церкви при Совете Министров УАССР за 2 полугодие 1955 г.
- Справка о Богоявленской церкви в с. Чумой. (Справку составил бывший секретарь исполкома Игринского райсовета К. С. Кондратьев 18.10.2000 года).
- Информация Игринского сельсовета от 10. 01. 1968 г. «О работе по контролю за соблюдением законодательства о культах за 1967 год». (ЦГА УР. Ф.Р-551. Оп.1. Д.181. Л.46).