Россиысь наукаосъя академилэн Урал ёзысьтыз Историяя, кылъя но литературая Удмурт институт
| Россиысь наукаосъя академилэн Урал ёзысьтыз Историяя, кылъя но литературая Удмурт институт | |
|---|---|
| УИИЯЛ УрО РАН | |
 | |
| Мукет нимыз | Историяя, кылъя но литературая Удмурт институт |
| Азьвыл нимыз | Удмурт автономной областьлы 10 ар нимо огъя научно-исследовательской институт |
| Валтӥсь организация | Россиысь наукаосъя академилэн Урал ёзэтэз |
| Кылдон арез | 1988-тӥ арын 1-тӥ тулыспалэ |
| Директорез | Поздеев Игорь Леонидович |
| Докторъёс | 10 |
| Интыяськемез | Ижевск, Удмуртия |
| Юридической адресэз | Ижкар, Ломоносовлэн ульчаез, 4-тӥ юрт |
| Сайт | udnii.ru |
 |
|
Россиысь наукаосъя академилэн Урал ёзысьтыз Историяя, кылъя но литературая Удмурт институт (Историяя, кылъя но литературая Удмурт институт, УИИЯЛ УрО РАН, УдНИИ; ӟуч: Удмуртский институт истории, языка и литературы УрО РАН) Ижкарысь Ломоносовлэн ульчаысьтыз 4-тӥ юртын интыяськемын.
Историез
1931-тӥ арын 10-тӥ южтолэзе ВКП(б)-лэн Удмурт обкомез Удмуртиысь Министръёслэн Кенешсы бордын Удмурт автономной областьлы 10 ар нимо огъя научно-исследовательской институт кылдытон сярысь пумкыл юнматӥз. Институтлэн нырысетӥ директорез Яков Ильич Ильин луиз. 1936-тӥ арын институтлэсь нимзэ воштӥзы, со Социалистической лулчеберетъя научно-исследовательской Удмурт институт луиз[1][2].
Быдӟым Атыкай ож вакытэ УдНИИ-ысь 8 ужасьёс мобилизация улэ шедизы. Фронтын историяя ёзэтысь вань ужасьёс быризы[1] Институтэз возён понна висъяськись коньдон чарак кулэстэмын вал[3].
1969-тӥ арын институтын археологияя но этнографияя ёзэт кылдытэмын вал[2]. 1982-тӥ арын институт нимаз выль юртэ выжиз. 1987-тӥ арын тулыспалэ СССР-ысь Наукаосъя академилэн Свердловске потыса ортчытэм президиумезлэн кенешаз УдНИИ-ез кылдӥсь Урал ёзэ пыртон сярысь ӵектонлы дурбасьтӥзы. 1988-тӥ арын 1-тӥ тулыспалэ СССР-ысь Наукаосъя академилэн Урал ёзэзлэн президиумезлэн постановлениеныз Историяя, кылъя но литературая Удмурт институт кылдӥз[1].1992-тӥ арын южтолэзе Россиысь наукаосъя академилэн Урал ёзысьтыз Удмурт наукая центр кылдӥз, отчы Историяя, кылъя но литературая Удмурт институт пыриз[2].
2018-тӥ арын 10-тӥ толшоре Историяя, кылъя но литературая Удмурт институт «Россиысь наукаосъя академилэн Урал ёзысьтыз Удмурт исследовательской федерал центр» ФГБУН-е ёзэз сямен пыриз.
Наукаысь валтӥсь ӧръёсыз
- Огъя историяя югдурысь вашкала дырысен туала вакытозь Кам но Ватка котырысь улосъёсысь калыклэн историезлэн но лулчеберетэзлэн азинскемез;
- Удмуртиысь калыклэн историысь но лулчеберысь вашкала узырлыкез утемез но азинтэмез но лулысь-визьмысь азинсконлэн луонлыкез[2].
Институт академияя центръёс пӧлысь огез кужмоез луэ, финно-угроведение удысысь эскеронъёсыз Россиын но кунгож сьӧрын вылӥ дунъет басьтӥзы. Удмурт институтысь тодосчиослы луыса Волга но Кам котырысь улосъёсын вашкала но шор вакытъёсы культурогенезен герӟаськем ужпумъёсты сэрттон, шундыӝужан палась финн калыкъёслэсь кунзэс йӧскалык йылолъёс вылэ пыкиськыса лэсьтэмзэс эскерон, крестьянъёслэсь улэм-вылэмзэс, кылдэм юанъёссэс чаклан, кылъёсты ӵошатон, нимъёслэсь потэмзэс утчан-шараян, выжы калыклэсь кырӟанъёссэс-гуръёссэс пертчон-тодон, этноархеологиез азинтон, вордскем егит литературалэсь аспӧртэмлыксэ валан ужпумъёс султӥзы, унозэ асьсэос тодосчиос эскеризы.
Институтлэн валтӥсь ужпумъёсыз пӧлын: история, лингвистика удысъёсын бадӟымесь, инъет луись эскеронъёс радъян, энциклопедияя изданиосты поттон, Урал но Волга котырысь калыкъёслэсь котыр ласянь узырлыксэс тодон-шараян, туала этнополитикая но этнокультурая азинсконъёслы дунъет сётон. Озьы ик вашкала но шор дауръёсысь лулчеберетлэсь но генетикалэсь азинскемзэ чаклан, вашкала узырлыкез утёнъя методикаосты но технологиосты кылдытон.
1970-тӥ арысен институт шоретӥ даурысь Иднакар вашкала городищеез эскеронэн выре[2].
Структураез
1994-тӥ арысен институтын таӵе удысъёсъя аспирантура ужа: этнография, этнология но антропология, археология, атыкай история, фольклористика, литературоведение. 2001-тӥ арысен удысъёсъя кандидат диссертациосты утёнъя кенеш ужа[2].
Институтлэн наукая библиотекаяз улослэн историезъя но культураезъя фондъёс утисько (60 602 экз., соос пӧлын 10 880 экз. периодической изданиос). Наукаысь удысъёсъя архивын наукая но кивалтонъя ужкагазъёс (2608 утёно единица) но туспуктэм-ужкагазъёс (4999 утёно единица) весяклы утён вылысь интыямын.
Валэктонъёс
- ↑ 1 2 3 А. Е. Загербин, К. К. Куликов. УдНИИ - УИИЯЛ УрО РАН: время синтеза и анализа [ӟуч], i.uran.ru. Эскеремын: 30 пӧсьтолэзе 2025 арын.
- ↑ 1 2 3 4 5 6 В. В. Туганаев. Удмуртская Республика. Энциклопедия [ӟуч], vivaldi.nlr.ru. Эскеремын: 30 пӧсьтолэзе 2025 арын.
- ↑ Н. В. Пислегин. Удмуртский институт истории в годы Великой Отечественной войны [ӟуч], cyberleninka.ru. Эскеремын: 30 пӧсьтолэзе 2025 арын.
Литература
- Пислегин Н. В. Удмуртский институт истории в годы Великой Отечественной войны // Иднакар: методы историко-культурной реконструкции. — 2015. — № 2 (27). — С. 175—213.
- УдНИИ-УИИЯЛ УрО РАН: время синтеза и анализа / А. Е. Загребин, Куликов К. И. // Урал в модернизационной динамике России ХХ века : Профессорский сборник научных статей / гл. ред. В. В. Алексеев. — Екатеринбург : Сократ, 2015. — С. 116—130. — 440 с. — 50 экз. — ISBN 978-5-906350-36-7.
- Удмуртская Республика : Энциклопедия / гл. ред. В. В. Туганаев. — 2-е изд., испр. и доп. — Ижевск : Издательство «Удмуртия», 2008. — 768 с. — 2200 экз. — ISBN 978-5-7659-0486-2.
 |
| |||
|---|---|---|---|---|
