Можаров, Пётр Владимирович

Википедиысь материал
Рувикиын таӵе фамилиен мукет муртъёс сярысь гожтосъёс вань. Учке: Можаров.
Пётр Владимирович Можаров
Можаров Пётр Владимирович.jpg
Вордӥськем нуналыз 7-тӥ куарусёнэ 1888(1888-09-07)
Вордӥськем интыез Саюкино, Кирсановской уезд, Тамбов губерния, Росси империя
Кулон нуналыз 11-тӥ южтолэзе 1934(1934-03-11) (45 арес)
Кулэм интыез Сочи, РСФСР, СССР
Кунмуртлыкез Росси империяFlag of Russia.svg Росси империя → СССРFlag of the Soviet Union.svg СССР
Ужудысэз Инженер-конструктор
Атаез Владимир Петрович Можаров
Кузпалыз Варвара Игнатьевна Петрова
Ижысь мотозавод борды П. В. Можаровлы сӥзем пул юнматэмын.

Пётр Владимирович Можаров (1888-тӥ арын 7-тӥ (19-тӥ) куарусёнэ Саюкино черкогуртын — 1934-тӥ арын 11-тӥ южтолэзе Сочиын) — инженер, конструктор, нырысетӥ иж мотоциклъёсты кылдытӥсь.

Улон сюрэсэз

Вордӥськиз Тамбов губерниысь Кирсановской уездысь (али — Рассказовской ёрос) Саюкино черкогуртысь спирт пӧзьтон заводлэн кивалтӥсезлэн, дворянинлэн семьяяз [1][2].

1910-тӥ арын, реальной училищеез йылпумъяса, тодон-валанзэ муромытон вылысь Германие кошкиз. 1914-тӥ арын Лейпцигысь университетысь[ru] теплотехникая факультетэз йылпумъяз. Дышетскон вакытаз Лейпцигысен Хемницозь басьтэм мотоен ворттылӥз. Гиря ӝуткан амалъя спортэн выриз.

1915-тӥ арысь куарусёнысен Тамбовысь дары поттон заводын конструктор луыса ужаз[1]. 1916-тӥ арын куартолэзе Ксения Владимировна Никольскаяен граждан бракын улыны кутскиз. 1917-тӥ арын 10-тӥ тулыспалэ Василий пизы вордӥськиз. 1917-тӥ арлэн пумаз Ксения Владимировна улонысь кошкиз, Василий Хорошавка гуртысь Кольцов крестьянъёслэн семьяязы будӥз, отӥяз со Кольцовъёслэсь фамилизэс аслыз басьтӥз[3].

Тамбовысь дары поттон заводын Можаров котельнойёсты тупатъяз, кирпич поттон аналтэм заводэз выльысь ужатон вылысь выльдӥз, пуэн выронъя заводлы проект лэсьтӥз, мувӧй кыскон двигательлэн стационарезлы проект лэсьтӥз[4].

1920-тӥ арын Можаров Варвара Игнатьевна Петрова крестьян нылмуртэн кузпалъяськиз. 1922-тӥ арын Борис пизы вордӥськиз[5].

1924-тӥ арын 20-тӥ шуркынмонэ Можаров дары поттон заводысь но, Тамбовысь но кошкиз. 1924-тӥ арын 2-тӥ толсуре Пыӵалтӥрлык но пулемёт поттон трестлэн Ижысь Ижмаш но Ижсталь заводъёслэн огазеям теплотехникая службаязы уже кутскиз. 1925-тӥ арын 17-тӥ инвожое сое заводъёсты юнматонъя ёзэ старшой инженере пуктӥзы, татын со 1927-тӥ арын тулысозь кыксэ но заводъёсты выльдонэн выриз[6].

Отечественной мотоциклъёсты кылдытон

1927-тӥ арын тулыс П. В. Можаров Ижысь заводъёсын мотоцикл поттыны кутскон пумысен дэмланэн вазиськиз. Сӥзьылаз Германие кунгож сьӧрысь конструкторъёслэсь дышетскыны командировкае кошкиз. 2 толэзь ӵоже мотоцикл бичанъя 8 заводъёсы вуылӥз. Отысь берытскемез бере, араз 3500—6000 мото бичаны медло шуыса, Можаровлы мотоцикл поттон заводлы проектлэсь эскиззэ малпаны оскизы. 1928-тӥ арын 28-тӥ южтолэзе проектэз эскеризы но умоен лыдъязы[7].

1928-тӥ арын 1-тӥ оштолэзе Можаров Ижысь пыӵалтӥрлык лэсьтон заводысь мотоцикл бичан ёзаз штатэ кутэмын, военнойёслэн куронъёссыя чаклам мотолэсь проектсэ лэсьтыны кутскиз[8].

1928-тӥ арын гудырикошконэ Можаров Neander-500 мотоциклэн Муско — Тифлис — Муско маршрутъя мотоциклъёсты эскеронлы сӥзем 25 нуналъем всесоюзной пробеге пыриськиз. Ужрад СССР-е кунгож сьӧрысь вуттэм устооссэ мотоосты чаклан-быръён вылысь малпамын вал[9].

1928-тӥ арын секыт иж мотоцикллы проект йылпумъямын вал[10]. 1929-тӥ арын 1-тӥ толшоре Можаров мотоцикл бичанъя ёзэн кивалтыны юнматэмын. Штатэ 20 ужасьёс но 9 инженеръёс пыризы, соос пӧлын В. И. Владимиров, А. А. Гроссман, А. М. Лутс, С. Н. Семашко но мукетъёсыз. Тулыс ИЖ-3 мотоцикллэн нырысетӥ образецез бичамын вал[1]. Куарусёнэ ИЖ-1 мотоцикллэн образецез лэсьтэмын. Со вакытэ ик ИЖ-2, ИЖ-4 и ИЖ-5 модельёсты кылдытон бордын дэмен тыршизы. Но Ижысь пыӵалтӥрлык поттон заводын отӥяз мотоцикл бичаны умой уз луы шуыса кенешизы, ужез Массовой производствоя трестэ (ТРЕМАСС) выжтӥзы[11].

1929-тӥ арын куарусёнэ нырысетӥ иж мотоос Нижний Новгород — Муско — Ленинград — Муско маршрутъя кунамы бичам мотоциклъёсты эскерон вылысь всесоюзной пробеге потӥзы [12].

1929-тӥ арлэн пумазы Можаров Ленинградэ выжиз, татысь Массой производствоя трестэ ужаны кутскиз. 1930-тӥ арын П. В. Можаров чаклам улсын «Тремасс-300»[ru] маркаем нырысетӥ отечественной мотоциклъёсты бичаны кутскизы[13].

1931-тӥ арын Муское выжиз, татысь Автотракторной институтын[ru] (НАТИ) ужаны кутскиз. 1932-тӥ арын Можаров нырысетӥ НАТИ-А-750 армейской мотоцикллы проект лэсьтӥз[1][14].

1932-тӥ арын куартолэзе НАТИ-ысь конструкторъёслэн бюроязы ужасьёсын ӵош Ижысь мотоцикл бичанъя заводэ[ru] опытной образецъёсты лэсьтыны юрттон вылысь ыстэмын[1][15].

1933-тӥ арын Москвае берытскиз. Подольскысь механикая заводэ армейской мотоциклъёсты поттыны юрттон вылысь ыстэмын [16].

Кулэмез

1934-тӥ арлэн кутсконаз отпуске потӥз, Сочиысь ЦК ВКП(б)-лэн санаторияз путёвка басьтӥз. 11-тӥ южтолэзе ӵыжы-выжыосызлы телеграмма ыстӥзы, П. В. Можаров улонысь ас мылкыдызъя кошкиз шуыса[17]. Сочиысь Завокзальной шайвылэ ватэмын. 2015-тӥ арын толшоре Сочиын улӥсь нылкышно Можаровлэсь гузэ шараяз — кема дыр ӵоже кытынзэ ӧз тодылэ[18].

Пётр Можаровлы сӥзем буре ваён пул.

Буре ваён

  • 1988-тӥ арын «Ижмаш» заводын П. В. Можаровлэн вордӥськемез дырысен 100 ар тырмонэзлы сӥзем медаль ӵыжатэмын.
  • 1989-тӥ арын 19-тӥ толшоре Ижкарысь огез ульчалы (Ждановлэсь ульчаез, азьвыл — Горькой) Можаровлэсь нимзэ сётӥзы[19][20]. Огаз улоно коркаос борды мемориал пул юнматэмын, гожтэмын: «Пётр Владимирович Можаров нимо ульча (1888—1934), иж мотоциклъёсты кылдытӥсь».
  • 2018-тӥ арын 9-тӥ инвожое Пётр Можаров конструкторлы 130 ар тырмонэныз валче Ижын синпелет усьтӥзы[21].
  • 2024-тӥ арын 9-тӥ куартолэзе Сочиысь Завокзальной мемориал комплексын буре ваён гранит синпелет пул юнматэмын[22].

Валэктонъёс

  1. ↑ 1 2 3 4 5 Петр Можаров – главный мотоциклист Ижевска [ӟуч] Агентство печати и массовых коммуникаций Удмуртской Республики. Эскеремын 2020-06-22 арын
  2. ↑ Курихин, 2004, с. 17.
  3. ↑ Курихин, 2004, с. 19—22.
  4. ↑ Курихин, 2004, с. 23—24.
  5. ↑ Курихин, 2004, с. 24.
  6. ↑ Курихин, 2004, с. 27—30.
  7. ↑ Курихин, 2004, с. 31—41.
  8. ↑ Курихин, 2004, с. 41.
  9. ↑ Курихин, 2004, с. 44—46.
  10. ↑ Туганаев, 2008, с. 486.
  11. ↑ Курихин, 2004, с. 48—51, 57.
  12. ↑ Курихин, 2004, с. 54—55.
  13. ↑ Курихин, 2004, с. 63—67.
  14. ↑ Курихин, 2004, с. 73—78.
  15. ↑ Курихин, 2004, с. 79—80.
  16. ↑ Курихин, 2004, с. 84—85.
  17. ↑ Курихин, 2004, с. 86—87.
  18. ↑ В Сочи обнаружили могилу Петра Можарова (5 тулыспалэ 2015). Архивировано 23 южтолэзе 2018 года. Эскеремын: 23 южтолэзе 2018 арын.
  19. ↑ Туганаев, 2008, с. 346.
  20. ↑ Можарова ул. // Ижысь ульчаос : Сведения о названиях, переименовании улиц, переулков и площадей города. 1918—1991 : Справочник / Сост. Р. А. Ислентьева, А. Л. Рублёва. Рецензенты А. А. Тронин, Е. Ф. Шумилов. — Ижкар : Удмуртия, 1992. — С. 47. — 96 с. — 10 000 экз. — ISBN 5-7659-0375-4.
  21. ↑ Памятник установили в Ижевске к 130-летию конструктора мотоциклов Петра Можарова [ӟуч] Эскеремын 2020-08-19 арын
  22. ↑ В Сочи напротив мемориального комплекса появился 19-метровый мурал «Воина-освободителя»

Литература

Чӧлсконъёс

«https://udm.ruwiki.ru/w/index.php?title=Можаров,_Пётр_Владимирович&oldid=488479»-ысь басьтэмын