Краснопёров, Сергей Леонидович

Рувикиын таӵе фамилиен мукет муртъёс сярысь гожтосъёс вань. Учке: Краснопёров.

Сергей Леонидович Краснопёров
Вордӥськем дырыз	23-тӥ пӧсьтолэзе 1923(1923-07-23)
Вордӥськем интыез	Покровка гурт Чернушка ёросын Пермь шаерын
Кулэм дырыз	24-тӥ инвожое 1944(1944-06-24) (20 арес)
Кулэм интыез	Гомель улосысь Светлогорск ёрос, Белорус ССР
Кунмуртлыкез	СССР СССР
Кыӵе войскоез	Ожгар-омыр кужымъёс
Служить карон аръёсыз	1940—1944
Званиез
Частез	502-тӥ штурмовой авиационной полк
Ожмаськонъёс/ожъёс	Быдӟым Атыкай ож
Данъетъёсыз
Медиафайлъёс РувикиМедиа пушкын

Серге́й Леони́дович Краснопёров (1923-тӥ арын 23-тӥ пӧсьтолэзе — 1944-тӥ арын 24-тӥ инвожое) — Быдӟым Атыкай оже пыриськем мурт, 502-тӥ штурмовой авиационной полклэн звеноезлэн командирез (Уйпал-Кавказ фронтысь 4-тӥ воздушной армилэн 214-тӥ штурмовой авиационной дивизиез). Старшой лейтенант. Совето Союзлэн Героез (1944).

Улон сюресэз

Вордӥськиз 1923-тӥ арын 23-тӥ пӧсьтолэзе Покровка гуртын (али Пермь шаерысь Чернушка ёросээ пыре). 1928-тӥ арын семьяез Чернушка ёросысь ик Михайловка гуртэ улыны выжиз. Шоръёзо школаез йылпумъямез бере, 1937-тӥ арын Сарапулысь кооперативной техникуме дышетскыны пыриз. 1939-тӥ арысен огдыре Сарапулысь аэроклубын дышетскиз. 1940-тӥ арын, техникумез йылпумъямез бере, Балашовоысь лётчикъёсты дасясь военной авиационной школае дышетскыны пыриз, 1942-тӥ арын шуркынмонэ лётчик-штурмовик специальностен сое йылпумъяз.

Сергей Леонидович Краснопёровлэн бюстэз Чернушка карысь Данлыко аллеяын.

Чернушка карын Сергей Леонидович Краснопёровлы синпелет

1942-тӥ арын шуркынмонысен Быдӟым Атыкай ожлэн фронтъёсаз 765-тӥ штурмовой авиационной полклын ожмаськиз. 1943-тӥ арын толшорысен — 502-тӥ штурмовой авиационной полкын.

Полклэн командирез подполковник Смирнов младшой лейтенантлэсь Сергей Краснопёровлэсь быгатонлыкъёссэ ушъяса, тужгес секыт но ответственной заданиосты командование солы оске, аслаз геройлыко подвигъёсыныз ассэ данъяз, шуыса гожъяз.

1943-тӥ арын 14-тӥ южтолэзе, Темрюк портэз штурмовать карыку, Краснопёров вис карылытэк, кык пол боевой лобанъёсы потаз. Куать «илъёсты» валтыса, со порт причал дорысь катерез пушкытӥз. Кыкетӥяз лобыкуз, тушмон снаряд самолётэзлэн мотораз кемдӥз. Лётчик зажиганизэ кысӥз, бензинзэ пытсаз но сӧриськем самолётсэ фронт линиозь вуттыны малпаз. Озьы ке но, кыдёке уз вуы шуыса, валамез бере, самолётсэ нюр-кот интые пуктоно луиз. Ӝуась машинаысь тэтчыны гинэ вуиз, самолёт пуштӥз. Асьмелэнъёс доры вуытозь, кӧня ке нунал ӵоже нюр интыостӥ но нюлэс пыр потоно луиз.

1943-тӥ арын 23-тӥ южтолэзе кык полскын Крым станци котырысь тушмон автоколоннаез пушкытӥз. Мукетъят — одӥг машинаез пушкытӥз но кык интыын тылпу гомӟытӥз.

1943-тӥ арын 4-тӥ оштолэзе 204,3 метръем ӝуждалаысен немец ожгарчиосты но кӧня ке огневой точкаоссэ пазьгиз. Собере Крым станци котырысь тушмон артиллериез но огнвой точкаоссэ пушкытӥз. Соку ик кык тушмон танкез, одӥг орудизэ но миномётсэ пазьгиз.

Гудырикошкон толэзёзь 74 пол боевой лобанъёсы потаз, соос пӧлысь кызь пол «илъёслэн» группазылэн валтӥсез чотын лобаз. Тушмонлэсь 6 танксэ, 70 автомашиназэ , 35 тыро повозказэ, 10 орудизэ, 3 миномётсэ, зенитной артиллерилэсь 5 точказэ, 7 пулемётсэ, 3 тягачсэ, 5 дзотсэ, боеприпасъёсын магазейзэ быдтӥз, катерзэ но самоходной баржазэ выйтӥз, Кубань шур вамен кык переправаез пушкытӥз.

1943-тӥ арын коньывуонэ лейтенантэз ВВС-лэн Вылӥ офицерской школаяз дышетскыны ыстӥзы, 1944-тӥ арын куартолэзе сое йылпумъяз.

СССР-ысь Вылӥ Кенешлэн Президиумезлэн «Горд Армилэн ожгар-омыр кужымъёсысьтыз офицер составезлы Совето Союзлэн Героез дано ним сётон сярысь» 1944-тӥ арын 4-тӥ тулыспалэ гожтэм Косэтэзъя, фронтын немец захватчикъёсын геройлыко ожмаськемез но командованилэсь боевой заданиоссэ ӟеч быдэсъямез понна, Краснопёров Сергей Совето Союзлэн Героез нимын пусъемын, Ленин орденэн но «Зарни Кизили» медален данъетамын (3250-тӥ номер).

Вылӥ офицерской школаез йылпумъямез бере, Краснопёровез 1-тӥ Белорус фронтэ 874-тӥ штурмовой авиационной полке ыстӥзы.

1944-тӥ арын 24-тӥ инвожое, «Багратион» операция мынон дыръя, заданиез азинлыко быдэстэмзы бере, берлань лобыкузы, Краснопёровлэсь самолётсэ тушмон пушкытӥз. Экипажлэн командирез старшой лейтенант С. Л. Краснопёров но стрелок инженер-капитан Бевзюков бырыны шедизы.

Сергей Краснопёров ватэмын Чернин гуртысь Вынлыко шайгуын.

Данъетъёсыз

• Совето Союзлэн Героезлэн «Зарни Кизили» медалез (04.02.1944, 3250-тӥ номер).
• Ленин орден (04.02.1944).
• Горд Знамялэн орденэз.
• Атыкай ожлэн 2-тӥ степенё орденэз.
• Горд Кизили орден.

Буре ваён

• 1984-тӥ арын 10-тӥ инвожое Чернушка карын Ленин урамысь «Фортуна» клуб азьын С. Л. Краснопёровлы синпелет усьтэмын. (Синпелетлэн авторез— Пермьысь скульптор А. А. Уральский).
• С. Л. Краснопёровлэн бюстэз Чернушка ёросысь 12 Совето Союзлэн Геройёсызлы но Слава орденлэн 2 полной кавалеръёсызлы сӥзем Данлыко аллеяе интыямын. Аллея Чернушка карын 2010-тӥ арын 9-тӥ куартолэзе усьтэмын.
• Сарапул карын солэн нимыныз одӥгез ульча нимамын.
• Сарапулысь кооперативной техникумлэн азьвыл юртаз буре ваён пул юнматэмын.
• Белоруссиысь Гомель улосысь Светлогорск карын одӥгезлы ульчалы Геройлэн нимыз сётэмын. Озьы ик С. Л. Краснопёровлэн нимыз татысь 10-тӥ номеро шоръёзо школалы сётэмын.

Валэктонъёс

Чӧлсконъёс

• Сергей Леонидович Краснопёров [ӟуч] «Герои страны» сайт.

• Сарапул. Энциклопедия Победителей. Красноперов Сергей Леонидович Герой Советского Союза
• Н. А. Козлова. История Чернушинского района: Материалы к урокам по историческому краеведению / под общ. ред. к.и.н. Н. Д. Волошина. — Пермь: Пермское книжное издательство, 2006. — 1000 экз.