Заровняев, Анатолий Иванович

Википедиысь материал
Анатолий Иванович Заровняев
Заровняев Анатолий Иванович.jpg
Вордӥськем дырыз 11-тӥ толшоре 1922(1922-01-11)
Вордӥськем интыез Сюдумарь гурт али
Кулэм дырыз 13-тӥ куарусёнэ 1977(1977-09-13) (55 арес)
Кулэм интыез Ижевск, Удмурт АССР, РСФСР, СССР
Кунмуртлыкез СССРFlag of the Soviet Union.svg СССР
Кыӵе войскоез штурмовой авиация
Служить карон аръёсыз 1941—1946
Званиез гвардиысь старшой лейтенант СССР-ысь ВВС-лэн старшой лейтенантэз
Частез 76-тӥ гвардейской штурмовой авиаполк,
(1-тӥ гвардейской штурмовой авиационной дивизилэн)
Интыужез звенолэн командирез
Ожмаськонъёс/ожъёс Быдӟым Атыкай ож
Данъетъёсыз
Совето Союзлэн Героез Ленин нимо орден Горд Знамялэн орденэз Горд Знамялэн орденэз Атыкай ожлэн I степенё орденэз
Быдӟым Атыкай ожлэн II степенё орденэз

Анатолий Иванович Заровняев (1922—1977) — Быдӟым Атыкай оже пыриськем мурт, ож аръёсы — 3-тӥ Белорусс фронтысь 1-тӥ воздушной армилэн 1-тӥ гвардейской штурмовой авиационной дивизилэн 6-тӥ гвардейской штурмовой авиационной полклэн звеноезлэн командирез. 1944-тӥ арысен ВКП(б)-лэн ёзчиез. Совето Союзлэн Героез.

Улон сюресэз

Вордӥськиз 1922-тӥ арын 11-тӥ толшоре Марий Элысь Мари-Турек ёросын Сюдумарь гуртын ӟуч крестьян семьяын. 1930-тӥ арын Заровняевъёслэн семьязы Ижкаре улыны выжиз. 1937-тӥ арын сизьым классъем школаез йылпумъяса, токарьлэн дышетскисез чотын Ижысь машина лэсьтон заводэ уже интыяськиз. 1940-тӥ арысен Ижысь аэроклубын дышетскиз но азинлыко йылпумъяз.

1941-тӥ арын куартолэзе Ижысь Пастуховской райвоенкомат армие басьтӥз. Отын пилотъёсты дасясь Балашовской авиационной школае ыстӥзы. 1943-тӥ арын сое младшой лейтенант званиен йылпумъяз. Ӝыны ар ӵоже запасной учебно-тренировочной авиаполкын пилотировать карон техникаез но Ил-2 штурмовикез ожын кутыны дышетскиз.

1944-тӥ арын оштолэзьысен действующей армиын. Ожмаськыны кутскиз Украин фронтын, Крымез мозмытонэ пыриськиз. 1944-тӥ арын 7-тӥ куартолэзе 76-тӥ гвардейской штурмовой авиаполкен ӵош нырыссьэ боевой лобанэ потӥз  — Сапун-гурезь котырысь тушмонлэсь юнматэм азьпал радъёссэ штурмовать кариз. Боевой лобанъёсы вис карылытэк потаз. Немец танкез, 2 автомашинаез пушкытӥз, ньыль «фокке-вульфъёслэсь» атакаоссэс пазьгиз, ог дасо немец солдатъёсты быдтӥз.

Севастополез мозмытэм бере, Заровняевлэн полкез 3-тӥ Белорусской фронтэ выжтэмын вал. 1944-тӥ арын 23-тӥ инвожое Витебск, Оршанск но Минск палъёсы наступление потӥз. Тушмон оборонаез штурмовой авиаци пушкытъям бере, отчы асьме танкъёс но пехота вуыса, тушмонлэн эшелонировать карем оборонаез быдэсак пазьгемын вал.

Орша карез мозмытыку штурмовикъёс азетаӵе ужпум  пуктэмын вал — немецъёслы Орша заводысь обородуваниез, ожгар техникаез но мукет ванёсэз поттылын ӧвӧл лэзёно. Соку асьме шт урмовикъёс тушмон доры лушкем матэктыса, солэсь головной эшелонзэ пушкытӥзы. Чугун сюрес вылын донгаськон кылдэмен, Оршаысь одӥг состав но потыны ӧз быгаты.

3-тӥ Белорусской фронтын Заровняев 114 пол боевой лобанъёсы потаз. Огполаз но сам олётэз пушкытэмын ӧй вал.

1944-тӥ арын куарусёнэ совето штурмовикъёсШундыӝужанпал Пруссиын тушмонэн ожмаськизы. Со вакыт Заровняев гвардилэн лейтенантэз званиен парен лобаз но звеноен кивалтӥз ини. Ӵемысь со «адӟыны луонтэм» урод куазен, ас понназ цель бырйылыса, «свободной охотае» поталляз — танкъёсын но автомашинаосын колоннаосты, огазе люкаськем пехотаез, артиллери позициосты пушкытъяз.

1944-тӥ арын коньывуон пумын штурмовикъёсты Шталупенен котырысь гитлеровецъёслэсь артиллеризэс но танкъёссэс пушкытыны косэмын вал. Задание потэм куать штурмовикъёс пӧлын одӥгез Завровняев вал. Цель шоры берытскыкузы, асьме штурмовикъёс вылэ ньыль немец истребительёс урдскизы. Заровняев, огзэ истребителез пушкытыса, бомбаоссэ немец танкъёс вылэ куштӥз.

1945-тӥ арын толшоре Заровняев ас полкеныз ӵош Тутшен, Бруджен но Драгупенен котырын ожмаськиз. Соку со боеприпасъёсын магазеез но трос тушмон техникаез быдтӥз. Бруджен котырын кык танкез пушкытӥз, Драгупенен котырын, 50 метрозь уллане васькыса, куать полскын тушмонлэсь самоходной орудизэ но кык миномётной расчётсэ быдтӥз.

5-тӥ тулыспалэ штурмовикъёслы Крайцбург дорысь тушмонлэсь самоходной артиллеризэ быдтыны задание сётэмын вал. Цель доры вукузы, штурмовикъёс тушмонлэн туж зол ыбылэмез улэ шедизы. Соку командир Заровняевез зенитчикъёсты ас вылаз басьтыны косӥз. Сэзь лётчик, 100 метрозь уллане васькыса, зенитчикъёс шоры ыбылӥз, озьы группалы боевой заданиез азинлыко быдэстыны луонлык кылдытӥз.

17-тӥ тулыспалэ, парен лобанын валтӥсез луыса, Мельзак котырысь танкъёсты но артиллериез атаковать кариз. Цель доры вуыкуз, ватскыса ыбылӥсь куинь орудиез синйылтӥз но кык полскын соосты быдэсак пушкытӥз.

18-тӥ тулыспалэ Пинтен котырын Заровняев куинь автомашинаез но одӥг танкез пушкытӥз. Куинь нунал ортчыса, эшшо одӥг самоходной орудиез но миномётной батареяез быдтӥз.

13-тӥ южтолэзе Заровняевез звенолы командире пуктӥзы, 2-тӥ оштолэзе старшой лейтенант звание сётӥзы. Соку ик Горд Кизили орденэн пусйизы. Солэн со ньылетӥез бовой данъетэз луиз.

Оштолэзьлэн пумаз штурмовикъёслэн бадӟым группаенызы ӵош Заровняев Фишхаузенлэсь уйпал но шундыпуксён палагес интыяськем тушмон аэродром вылэ лобизы. Штурмовать карон дыръя кӧняез ке тушмон истребительёс омыре ӝутскыны турттӥзы. Соку Заровняев Протчев капитанлэн самолётэз вылэ урдскыны шӧтам тушмон самолётэз пушкытӥз.

Куинь полскын тушмон аэродром быдэсак пазьгемын вал, ньылез тушмон самолёт омырын пушкытэмын, 22-ез — музъем вылын.

4-тӥ оштолэзёзь Заровняев 120 пол боевой лобанъёсы потаз (ваньмаз ик — одӥг самолётэн).

1945-тӥ арын 4-тӥ куартолэзёзь Заровняевлэн лыдметаз 40 пушкытэм танк, 8 музъем вылын ӝуатэм самолёт 2-ез — омырын, Балти зарезьын 2 выйтэм транспорт, трос автомашинаос, артиллери орудиос но солдат-офицеръёс люкаськиз

1945-тӥ арын 24-тӥ инвожое Москваысь Горд площадьын ортчытэм Вормон Парадэ пыриськиз.

1946-тӥ арын запасэ лэземын. Ужаз авиазаводын, собере Камчаткае кошкиз, берло Ижкаре берытскиз. Татын машина поттон заводын токарь но шофёр луыса ужаз, автоколоннаен кивалтӥз.

1977-тӥ арын 13-тӥ куарусёнэ улонысь кошкиз. Ватэмын Ижкарысь Хохряки шайвылын.

Данъетъёсыз

  • «Зарни Кизили» медаль (1945-тӥ арын 29-тӥ инвожое гожтэм 7470-тӥ номеро косэт);
  • Ленин орден;
  • Горд Знамялэн кык орденэз ;
  • Атыкай ожлэн 1-тӥ степенё орденэз;
  • Атыкай ожлэн 2-тӥ степенё орденэз;
  • медальёсыз.

Литература

  • Заровняев Анатолий Иванович // Энциклопедия Республики Марий Эл / Отв. ред. Н. И. Сараева. — Йошкар-Ола, 2009. — С. 367. — 872 с. — 3505 экз. — ISBN 978-5-94950-049-1.
  • Мочаев В. А. Заровняев Анатолий Иванович // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 155. — 606 с. — 1500 экз. — ISBN 978-5-905314-35-3.
  • Заровняев Анатолий Иванович // История Марийского края в лицах. 1941—1945 гг. Великая Отечественная война. — Йошкар-Ола: МарНИИЯЛИ, 2015. — С. 88—90. — 374 с. — 500 экз. — ISBN 978-5-94950-070-5.

Чӧлсконъёс

Архивная копия от 10 куартолэзе 2012 на Wayback Machine.

«https://udm.ruwiki.ru/w/index.php?title=Заровняев,_Анатолий_Иванович&oldid=486439»-ысь басьтэмын