Владыкин, Владимир Емельянович

Википедиысь материал
Владыкин Владимир Емельянович
Владыкин владимир емельянович.jpg
Вордӥськем нуналыз 20-тӥ южтолэзе 1943({{padleft:1943|4|0}}-{{padleft:3|2|0}}-{{padleft:20|2|0}}) (83 года)
Вордӥськем интыез
Кунмуртлыкез СССРFlag of the Soviet Union.svg СССР
Ужудысэз кылбурчи, литературовед, фольклорист
Данъетъёсыз
Эшъяськон орден Почётный гражданин Удмуртской Республики (лента).png
Премия Правительства Российской Федерацилэн Кивалтэтэзлэн Культура удысысь премиез — 2011

Владимир Емельянович Владыкин (литературной псевдонимез — Омель Лади; ворд. 20-тӥ южтолэзе 1943, Можга, Удмурт Автономной Советской Социалистической Республика) — Россиысь тодосчи-этнограф, удмурт кылбурчи, эссе гожъясь, истори тодосъёсъя доктор, профессор, Удмурт Элькунысь наука удысысь сӥё-дано ужась, Удмурт Элькун премилэн лауреатэз, Венгер тодосъёсъя академиысь Этнографияя дэменлыклэн но Финляндиысь финн-угор дэменлыклэн член-корреспондентэз, Россиысь гожъяськисьёслэн союззылэн но Литературая финн дэменлыклэн ёзчиез. Удмурт Элькунлэн Дано муртэз (2003), Удмурт Элькунлэн тӧроезлэн йӧскалык ужпумъёсъя консультативной советэзлэн ёзчиез[1]. Кузебай Герд нимо удмурт йӧскалык премилэн лауреатэз.

Ужан но улон сюресэз

Вордскемын Можгалан 1943 арын 20-тӥ южтолэзе. 1966 арын МГУ-эз но отысь ик аспирантураез йылпумъяса, УдНИИ-ын ужаз, 1972 арысен — Удмурт кун университетын доцент луыса ужаз, 1988 арысен вашкала но шор дауръёсъя историлэн кафедраеныз кивалтüз, 1997 арысен — этнологи но улостодос кафедраен. 1974—1975 аръёсы Берлинысь Гумбольдт университететын стажировка ортчиз.

Можга педучилищеез йылпумъяса, Влади́мир Емелья́нович дышетскыны пыре Москваысь кун университетысь история факультетэ. Татысен ик 1969-тӥ арын этнографилы сӥзем кандидат диссертацизэ уте, нош 1991-тӥ арын — доктор диссертацизэ. Та вакытэ Владимир Емельянович тодматске тодмо ӟуч гожъяськисьёсын: С. Маршакен, А. Твардовскиен, Г. Свиридовен. 1969-тӥ-1972-тӥ аръёсы ужа УдНИИ-ын, 1973-тӥ арын выже Удмурт кун университетэ.

Та дышетсконниын ужакуз, кылдытӥз вашкала дуннелэн историезлы сӥзем кафедра. Соин Владыкин ог 10 ар кивалтӥз. 1974-тӥ-1975-тӥ аръёсы Берлиынсь университетын стажировка ортчиз, вуылӥз пӧртэм странаосы. Кылсярысь, Индие, Афганистанэ вуылыкуз, удмуртиысь туристъёслы кылысь кылэ берыктüсь вал. Мыло-кыдо пыриськиз этнографилы сüзем пӧртэм экспедициосы. Гижысь-пиньысь выльзэ тодыны тыршиз удмурт калыклэн улэм-вылэмез сярысь[2]. 1997-тӥ арын Удмурт кун университетын усьтӥз этнологи но улостодос нимын выль кафедра.

Владыкинлэн гожъяськон мылкыдыз пуромиз, Можгаысь педучилищеын дышетскыкуз. 1980-тӥ арын потӥз кылбуръёсыныз «Отчего поёт тюрагай?» книгаез. 1998-тӥ арын вордӥськиз мукетыз книгаез — «В народе говорят». Пусъёно: та кыкез но ужез дасямын ӟуч но удмурт кылъёсын. Огъя пуштросэз но паськыт: вордӥськем шаердэ яратон, калыклэн ортчем сюресэз но азьлань улонэз, ож, адями, тупаса улон.

Музон кылбурчиослэсь В. Владыкин висъяське мур малпаськыны быгатэменыз, философиен тунсыкъяськеменыз. Та сяна, со кылдытэ кылбуръёс-миниатюраос, кылбуръёс-метафораос но эссе жанр бордын тырше. 1992-тӥ арын удмурт литератураын нырысьсэ поттэ «Йыбыртскон» книга-эссе. Со сӥземын тодмо дас удмурт гожъяськисьёслы: К. Митрейлы, К. Гердлы, А. Окилы, Г. Красильниковлы, Ф. Васильевлы но мукет. 1993-тӥ арын сое пырто Россиысь Писательёслэн союзазы.

Удмурт фольклорлы сӥзем «Зарни крезь» 6 книгалэн Влади́мир Емелья́нович валтӥсь редакторез вал[3]. 1995-тӥ арын Будапештын радъязы В. Владыкинлы сӥзем устолыко ӝыт[3]. Таӵеез удмурт гожъяськисьёс пӧлын ӧй вал на.

1994-тӥ арын Владимир Владыкин поттэ тужгес бадӟым ужзэ — «Религиозно-мифологическая картина удмуртов» монографизэ. «Урал», «Арт», «Кизили», «Финно-угроведение» журналъёслэн редколлегиосаз пыриськылӥз, шаерысьтымы Нациосын ужан политикая министерствоысь экспертъёсъя но консультациосъя кенешлэн тӧроез луиз. Ужаз Удмурт Республикалэн Президентэз бордын но — нациосын герӟаськем ужпумъёсты сэрттылӥз-пертчылӥз. Тодон-валанзэ пыӵатылӥз егитъёслы — Москваысь кун университетын, Горький нимо литературая институтын, Глазовысь пединститутын, Берлинын, Лейпцигын, Будапештын, Хельсинкиын лекциос лыдӟылӥз. Россиын но кунгож сьӧрын ог 200 статьяоссэ печатлаз. Удмурт кылын ӟеч вераськем сяна, капчиен лабыртэ ӟуч, англи, немец кылъёсын. Ужъёсыз берыктэмын мадьяр, фин, эстон, пор, коми, англи, немец кылъёсы.

1989-тӥ арын Владыкинлы сётӥзы УАССР-ысь дано ужась ним. 1991-тӥ арын Фин-угор обществолэн, Фин литературая мерлэн дано кунсьӧр ёзчиез луиз. Данъямын Удмурт Республикалэн кун премиеныз, Кузебай Герд нимо премиен. 2020-тӥ арын Росси Федерацилэн Президентэзлэн Таукаронэныз данъетамын[4]

2025-тӥ арын 23-тӥ куартолэзе «П. И. Чайковскийлэн шаераз» литературалы сӥзем VI фестиваль улсын Ижкарысь Йӧскалык библиотекаыня В. Е. Владыкинлэн «Религиозно-мифологическая картина мира удмуртов» но Т. Г. Владыкиналэн «Азвесь крезь» («Серебряные гусли») выль изданиосын тодматскон ортчиз[5].

Семьяез

Кузпалыз — Татьяна Григорьевна Владыкина (1953—2024) — фольклорист, кылосбур тодосъёсъя доктор, профессор,Удмурт Элькунысь наука удысысь дано ужась[6].

Библиография

Бырйыса басьтэмын:

  • Очерки этнической и социально-экономической истории удмуртов до начала XX века: диссертация кандидата исторических наук. (576) / Моск. гос. ун-т имени М. В. Ломоносова. Ист. фак. Кафедра этнографии. — М., 1969. — 386 с.: ил.
  • Отчего поёт тюрагай: Стихи, притчи, афоризмы. / [Вступит. статья А. Шкляева]. — Ижевск: Удмуртия, 1980. — 146 с.; ил.
  • Религиозно-мифологическая картина мира удмуртов. — Ижевск: Удмуртия, 1994. — 383 с., [24] л. ил.; ISBN 5-7659-0505-6
  • В народе говорят: Стихи и рассказы. — Иллюстрации М. Гарипова. — Ижевск: Удмуртия, 1998. — 197 с.: цв ил. — ISBN 5-7659-0683-4 (Золотые гусли)
  • Мелодия небесной росы: Мифы, предания, сказки, песни, пословицы, поговорки / Редкол.: В. Е. Владыкин (гл. ред.) и др.; Иллюстрации М. Г. Гарипова]. — Ижевск: Удмуртия, 1988. — 119 с.: цв. ил. (Золотые гусли)
  • Мон: О себе и других, о народах и Человеках, и… — Ижевск: Удмуртия, 2003. — 399 с.: портр.; ISBN 5-7659-0168-9
  • Ми — удмуртъёс. Ӟечесь-а? = Мы — удмурты. Здравствуйте! = We are the Udmurts. Nice to meet you!: на удмуртском, русском и английском языках / Омель Лади. — Ижевск: Удмуртия, 2007. — 124 с.: цв. ил.; ISBN 978-5-7659-0454-1
  • Удмурты: историко-этнографический очерк / В. Е. Владыкин, Л. С. Христолюбова. — Ижевск: Удмуртия, 2008. — 247 с.: ил.; ISBN 978-5-7659-0484-8 (Bibliotheca fenno-ugrica)
  • Религиозно-мифологическая картина мира удмуртов. — 2-е изд., доп. — Ижевск: Удмуртия, 2018. — 399 с., [24] л. ил.; ISBN 978-5-7659-1031-3
  • Диалог продолжается. — Ижевск: Удмуртский федеральный исследовательский центр Уральского отд-ния Российской акад. наук, 2018. — 399 с., [24] л. портр.; ISBN 978-5-7659-1030-6

Валэктонъёс

  1. ↑ Владыкин Владимир Емельянович [ӟуч] КаЛенДарь Знаменательных и памятных дат Удмуртии. Эскеремын 9 куарусёнэ 2025 арын
  2. ↑ Мои друзья - удмуртские писатели. [ӟуч] livejournal.com. Эскеремын 9 куарусёнэ арын
  3. ↑ 1 2 Владыкин Владимир Емельянович — Ученые Удмуртии, UDM.travel. Эскеремын: 9 куарусёнэ 2025 арын.
  4. ↑ Президент России объявил благодарность историку-этнографу, финно-угроведу Владимиру Владыкину [ӟуч] Удмуртская правда. Эскеремын 9 куарусёнэ 2025 арын
  5. ↑ Владимир Емельянович Владыкин [ӟуч] Национальная библиотека УР. Эскеремын 26.09.2025 арын
  6. ↑ Творческая встреча с этнографом Владимиром Владыкиным состоялась в ДШИ Кезского района [ӟуч] Министерство культуры Удмуртской Республики. Эскеремын 9 куарусёнэ 2025 арын
«https://udm.ruwiki.ru/w/index.php?title=Владыкин,_Владимир_Емельянович&oldid=507496»-ысь басьтэмын