Азин, Владимир Мартинович

Википедиысь материал
Эскерем гожтос
Владимир Мартинович Азин
латв. Voldemārs Āziņš
Azin, Vladimir Martinovich.jpg
Вордӥськем дырыз 26-тӥ куарусёнэ 1895(1895-09-26)
Вордӥськем интыез Росси империя Витебск губерния
Полоцкий уезд
Марьяново гурт
Кулэм дырыз 18-тӥ тулыспалэ 1920(1920-02-18) (24 арес)
Кулэм интыез Кубань улос Ейск уезд Тихорецк станица
Кунмуртлыкез Росси империяFlag of Russia.svg Росси империя
РСФСРFlag of the Russian Soviet Federative Socialist Republic.svg РСФСР
Служить карон аръёсыз 1916—1920
Званиез рядовой РИА
начдив РККА
Командовать кариз 28-тӥ стрелковой дивизиен
Ожмаськонъёс/ожъёс

Нырысетӥ дунне ож

Россиысь Граждан ож
Данъетъёсыз Горд Знамялэн орденэз
Логотип РУВИКИ.Медиа Медиафайлъёс РувикиМедиа пушкын

Влади́мир (Вольдема́р) Марты́нович (Ма́ртинович, Миха́йлович) А́зин — (латв. Voldemārs Āziņš; 26 куарусёнэ 1895 — 18 тулыспалэ 1920) — совето ожгарчи, Россиысь Граждан оже пыриськем мурт, начдив.

Биографиез

Владимир Мартинович Азин вордӥськиз 26-тӥ куарусёнэ 1895-тӥ арын Витебск губерниын Полоцк уездысь Марьяново гуртын крестьян семьяын. Выжыезъя — латыш, та тодэтъёсты юнматӥз солэн ожгарчиез, берло Совето Союзлэн Маршалэз В. И. Чуйков[1]. Совето историклэн Алтер Литвинлэн малпамезъя — казак[2], Азинлэн ожъюлтошезлэн краскомлэн Ефим Федотович Колчинлэн верамезъя — крестьян но ужась калык пала дурбасьтӥсь, «помещиклэн пиез»[3][4]. Азинлэн биографезлэн В. Ладухинлэн верамезъя, солэн атаез вуриськись вылэм. Полоцкысь кар училищеез отличиен йылпумъямез бере, Азин Ригаысь мануфактурной фабрикаын счетовод луыса ужаз.

1916-тӥ ар пумын армие мобилизовать каремын. Службазэ нуиз нимазъям строительной батальонын. пыриськиз нырысетӥ дунне оже, рядовой[5].

1918-тӥ арын латыш коммунистической отрядлы командире юнматӥзы. Тулыс латышъёслэн горд отрядэнызы антисоветской ӝутӥськонъёсты зӥбломытон понна Вяткае келямын. Вяткаысь партилэн губкомез но губвоенкомат солы коммунистической рота — Вяткаысь нырысетӥзэ военной частез кылдытыны ӵектӥз. Татын Азинлэн организаторской но кивалтон быгатонлыкъёсыз шараяськизы.[6] Пӧсьтолэзьлэн кутсконаз ротаын сюрс но ӝынылэсь ятыр адями лыдъяське ни вал. Берлогес ротаез батальонлы пӧрмытӥзы, солэсь шорсюлэмзэ 19-тӥ Урал полкысь латыш коммунистъёс кылдытӥзы, батальонлы командире Азинэз юнматӥзы. 1918-тӥ арын 7-тӥ пӧсьтолэзе со коммунистической партилэн радаз султӥз.

Гудырикошконлэн нырысетӥ нуналъёсаз, Вятские поляные вуэмез бере, полкез Шундыӝужанпал фронтлэн 2-тӥ армиезлэн пушпӧлаз пыртӥзы. Полк Кузонэ мынон палан ожмаськиз. Нырысетӥ ожъёс бере Азинэз Арск группаен кивалтыны пуктӥзы. 5-тӥ армиен валчеяськыса, 10-тӥ куарусёнэ соос Кузонэз киултӥзы. 1918-тӥ арын 17-тӥ куарусёнэ Элькунысь Реввоенсоветлэн косэтэзъя, Совето Союзлы пумит ӝутӥськемъёсын Кам котырын нюръяськон понна, Арск группа 2-тӥ сводной дивизилы пӧрмытэмын вал. 2-тӥ армилэн штабаз службазэ нуись В. Н. Ладухин Азин сярысь тазьы вераз: «Он был истинным дирижером каждого боя, тонко чувствовавшим его ритм, движения и тенденции развития. Каждый новый день раскрывал всё новые потенциальные возможности Азина как талантливого военачальника, достойно руководить десятками тысяч вооруженных людей».[6] Иж понна ожмаськонын Азин кышкасьтэм луэмзэ возьматӥз: ожлэн тужгес лек вакытаз ачиз красноармеецъёсты оже ӝутӥз. Та ож понна но Ижез мозмытэм понна Азин горд комдивъёс пӧлысь нырысетӥез Горд Знамя орденэн пусъемын.

1918-тӥ арын шуркынмонлэн пумаз В. М. Азинлэн дивизиезлы 28-тӥ номер сётэмын но 2-тӥ армилэн пушпӧлаз пыртэмын вал. 2-тӥ армилэн командующиез В. И. Шорин Азинэз вылӥ дунъяз: «Изумительно энергичный, неутомимый, исполнительный, под его началом дивизия совершила много славных дел».[6]

1919-тӥ арлэн кутсконаз Азинлэн дивизиез («корт дивизия» нимын тодмо луиз) Шундыӝужанпал фронтын А. В. Колчаклы пумит ожмаськиз. 1919-тӥ арын 4-тӥ толшоре азинецъёс Воткаысь тӧдьыослэсь дивизизэс пазьгизы, 5-тӥ толшоре Щучье Озеро бадӟым чугун сюрес станциез киултӥзы. Наступление туж шуг ортчиз, кырын −40 градусозь кезьытскиз, жобаса сюресъёс пытсаськизы. Озьы ке но, ожгарчиос дугдылытэк азьлань мынӥзы. Озьы соос Чернушка—Сарапул мынон палась тӧдьыосты пазьгизы но Шор Уралысь валтӥсь каръёс понна ожмаськыны кутскизы. Лек ожъёсКуеда но Кунгур каргуртъёс котырын пуромизы. Жадем красноармеецъёслы пумит тӧдьыос выль кужым куштӥзы. 3-тӥ армилэн Кам сьӧры выжемез бере, секытгес луиз ке но, Азинлы басьтэм позициосты возьыны приказ сётэмын вал. Боеприпасъёс, пыӵал тӥрлык, сиён тырмымтэен но шутэтскытэк ожмаськемен, армилэн кужмыз лябомиз. Дивизилэн комиссареныз Г. Н. Пылаевен Азин уй-нунал вал вылысь васькатэк полкъёсы вуылӥз, красноармеецъёсын вераськыса, мылкыдзэс ӝутыны тыршиз. 3-тӥ тулыспалэ ожмаськон дыръя 1-тӥ бригадалэн Уинской заводэз кельтэмез сярысь тодыса, Азин соку ик бригадае вуиз. Ӟонгырам, жадем но сютэм ожгарчиос азьын Азин таӵе пӧсь кылъёс вераз: — Ленин и партия поднимают всю страну на разгром Колчака. Они надеются на нас, мы пойдем вперед и впишем новые героические страницы в историю Железной дивизии. Я знаю, вы очень устали. Но я верю, что вы смоете свой позор завтра в бою. Полкъёс начдивлэсь приказзэ быдэстӥзы, 5-тӥ толсуре отборной офицер частьёсты пазьгизы.[6]

1919-тӥ арын оштолэзе колчак армия наступление потӥз, Оханск, собере Оса каръёсты киултӥз. Соос 2-тӥ армиез котырыны тыршизы, озьы ке но 28-тӥ дивизилэн юнлыкезлы но начдивлэн быгатонлыкъёсызлы луыса, тӧдьыослэн малпанзы ӧз быдэсмы. Дивизия ожмаськыса Кунгур палась Кама но Вятка пала чигназ.

1919-тӥ арын куартолэзе Горд Армия наступление потӥз. В. М. Азинлэн 28-тӥ дивизиез валтӥсь удар сётӥз. Наступление дыръя дивизия Сарапулэз, Агрызэз но Алабгоез басьтӥз. 8-тӥ куартолэзе М. И. Калинин фронтлэн командирезлы В. И. Шоринлы тазьы гожтӥз: «Рабочийёслэн, крестьянъёслэн, Горд Армейской но казак депутатъёслэн Центральной Комитетсылэн нимынызы курисько тӥледыз сюлмысьтым салам но мур тау карон кылъёс вераны сэзь 28-тӥ дивизилы, кудӥз кышкатэк утиз Совето Россиез».[6] 15-тӥ пӧсьтолэзе 1919-тӥ арын 28-тӥ дивизия Г. И. Овчинниковлэн 21-тӥ дивизиеныз ӵош Екатеринбургез басьтӥз. Ӝоген, 1919-тӥ арын гудырикошконлэн кутсконаз, 2-тӥ армиез Деникинэн ожмаськон понна лымшор пала выжтӥзы. 28-тӥ дивизия 10-тӥ армилэн пушпӧлаз Царицын палан ожмаськиз. Та ожъёсын Азинлэн киыз зол сӧсырмыны шедиз, госпитальын быдэсак йӧнатскытэк, со выльысь дивизияз берытскиз.

1920-тӥ арын тулыспал толэзе 28-тӥ дивизия Маныч шур вамен потӥз. 17 тулыспалэ В. М. Азин дивизилэн комиссареныз Стельмахен но разведчикъёслэн группаенызы ӵош югдурез чаклан понна (разведка) азьпал позициосы вуылӥзы. Татын соос тӧдьы казакъёс улэ шедизы. Уиськемлэсь пегӟыкузы, Азинлэн валэзлэн энер еэз чигыса, нюк вамен тэтчыкуз, Азин усиз, соку сое пленэ басьтӥзы; Революционной Военной Советлэн 10-тӥ армиезлэн нимысьтыз приказаз тазьы гожтэмын: «Герой Азин революцилэн нырысетӥ нуналысеныз ик рабочийёслэн но крестьянъёслэн Горд Армизылэн азьпал радъёсаз ожмаськиз, солэн сэзь 28-тӥ дивизиенн кивалтэмез улсын шундыӝужан палан чехословакъёсты, Сибирьын Колчакез но асьме фронтын Деникинлэсь бандаоссэ пазьгиз. Кышкасьтэм луэмез но Революц понна ӟырдыт нюръяськемез понна пусъемын Горд Знамя орденэн». Та приказэз дивизионной частьёсын лыдӟизы. Ожгарчиос яратоно начдивзылэн быремез понна пунэмзэ берыктыны кыл сётӥзы.[6]

Быремез сярысь

Горд Армилэн командованиез комдивез кӧня ке пленной генералъёсын воштыны ӵектыса, 10-тӥ армилэн командармез А. В. Павлов радио пыр таӵе алон ивор сётӥз: «Азинэн мар ке луиз ке, пленэ басьтэм вылӥ званиен 10 офицеръёс но полковникъёс репресси улэ келямын луозы». Тӧдьыослэн штабазы Азинлы добровольческой армиысь генерал чин ӵектӥзы. Со пумит луиз, озьы ик пумит луиз Горд Армие вазиськон гожтонлы. Нош пленэ басьтэмзы берегес ик Дон но Кубань котырын интыяськем Горд Армилэн частьёсаз граждан ожез йылпумъян но казакъёсын тупаса улон сярысь ӧтёнэн Азинлэн нимыныз гожтэм вазиськонъёс вӧлмытэмын вал (та вазиськонлэн пуштросэз Г. Н. Раковскийлэн «В стане белых» книгаяз возьматэмын[7]).

В. М. Азинлэн улонысь кошкем дырыз, интыез но югдуръёсыз оскымон юнматэмын ӧвӧл. Официальной версияя[5] — начдив Азин курадӟытыса виемын вал (одӥг верамъя, кык вал борды думыса кесямын, мукетызъя — кык някырам писпуос борды думыса кесямын, куинетӥезъя — ошемын, ньылетӥезъя — ыбемын) но Тихорецкая гурт котырысь шайвылэ ватэмын (али Фастовецкая). Генерал Голубинцевлэн тодэ ваёнъёсызъя, пленын Азин, Дон армилэн командирезлэн Сидорин генераллэн матэ интыяськеменыз пайдаяськыса, пегӟыны турттыкуз, «штаб охранаысь казакъёс кытын ке вагонъёс вискын сое ыбиллям». Ваньмыз та учыръёс сярысь А. Алдан-Семёнов «Красные и белые» аслаз тужгес бадӟымаз романаз (1973) возьматэ, кудӥз зэмзэ но Азинлэн беллетризованной биографиез луэ. Книгае пыртон материал люкан бордын гожъяськись 1965-тӥ арысен ужаны кутскиз.

Данъетъёсыз

Полоцкын В. М. Азинлэн бюстэз (1979; скульпторез С. Вакар, архитекторез Ю. Казаков)
Чернушкаын В. М. Азинлэн бюстэз, усьтэмын 1979-тӥ арын 22-тӥ куарусёнэ, авторез Ю. П. Клещевников
  • Горд Знамя орден (Приказ РВСР № 12: 10-тӥ южтолэзь 1919-тӥ ар)

Буре ваён

  • Крестьян но ужась калыклэн Горд Армиезлэн 28-тӥ стрелковой дивизиезлы В. М. Азинлэн нимыз сётэмын.
  • 1924 арын солы сӥзьыса Волжской пароходствоысь одӥгез пароход «Память Азина» шуыса нимамын.
  • Песковка каргуртын, № 4 номеро школа дорын «Героям азинцам» синпелет пуктэмын.
  • Сарапулысь Азин нимо урамын В. М. Азинлы синпелет пуктэмын.
  • Полоцкын В. М. Азинлэн бюстэз пуктэмын.
  • Белоруссиысь Витебск улосысь Полоцк ёросын 1975-тӥ арын Белое каргуртлэн нимыз Азино каремын[8].
  • Полоцкын одӥгезлы урамлы Азин ним сётэмын.
  • Полоцкын № 10 номеро шоръёзо школа Азинлэсь нимзэ нуллэ, отын ик В. Азинлы сӥзем музей кылдытэмын.
  • Кузонын солы сӥзьыса одӥгез урам нимамын. Озьы ик карлэн одӥгез кыдёкысезгес ёросэз Азино шуса нимамын.
  • Ижын В. М. Азинлы сӥземын Ленин ёросысь тужгес бадӟымез урам (азьвыл Казанской шуыса нимаське вал).
  • Алабгоын В. М. Азинлы сӥземын одӥгез урам, военкоматлэн юртаз буре ваён пус юнматэмын.
  • Чернушка карын В. М. Азинлэн нимыныз нимамын одӥгез каргурт[9].
  • Озьы ик солэн нимыз Витебскысь, Воткинскысь, Екатеринбургысь, Кировысь, Мамадышысь, Цимлянскысь, Чайковскийысь, Саратовысь, Янаулысь урамъёслы сётэмын.
  • Татарстанысь Сабин ёросысь Шемордан гуртын одӥгез урам Азинлэсь нимзэ нуллэ.

2015-тӥ арын коньывуон толэзе Азин Йӧскалык буре ваёнъя украин институтлэн декоммунизация сярысь катэ шедем муртъёслэн лыдметаз пыртэмын[10].

Валэктонъёс

  1. ↑ Встреча юнкоров телестудии «Орленок». Маршал В.Чуйков (1977) [рус.]
  2. ↑ Казанский федеральный университет — новости подробно [недоступная ссылка]
  3. ↑ Ф. ВИНОГРАДСКИЙ. ВОЛЯ И СЕРДЦЕ ВОЕННОГО КОММУНИЗМА. Ч. 4 (бонусная): uncle_ho — LiveJournal
  4. ↑ 1930-тӥ аръёсы совето печатьын «В. М. Азинлэн послужной списокез» печатламын вал. Со ивортодэтъя Азин вордӥськиз 1887-тӥ арын Ростов-на-Дону карын, дышетскиз Елисаветградской военной училищеын но нырысетӥ дунне ожын есаул чинын ожмаськиз. Берло та ужкагаз трос пол печатласькылӥз, со вылэ 1950-тӥ аръёслэн пумозяз пӧртэм публикациослэн авторъёссы чӧлскылӥзы. Прессаын кылдэм ченгешонъёс ӝутскем бере уж судозь вуттэмын вал. 1964-тӥ арын Свердловск улос судысь Граждан ужъёсъя коллегия В. М. Азинлэн послужной списокез малпамын шуыса йылпумъяз. Со сярысь рос-прос тодэтъёс: Ладухин В. В. М. Азин (К 70-летию со дня рождения). // Военно-исторический журнал. — 1965. — № 9. — С. 124—126.
  5. ↑ 1 2 Гражданская война и военная интервенция в СССР: Энциклопедия / Гл. ред. С. С. Хромов; Ред. кол.: Н. Н. Азовцев, Е. Г. Гимпельсон, П. А. Голуб и др. — М.: Советская энциклопедия, 1983. — С. 27. — 704 с. — 150 000 экз.
  6. ↑ 1 2 3 4 5 6 Коскова Н.В. Вся жизнь — народу. Сборник / сост. Л.Г. Дворсон, С.В. Серова. — Пермь: Пермское кн. изд-во, 1981. — С. 13—16. — 246 с.
  7. ↑ Раковский Г. Н. В стане Белых. От Днепра до Босфора. (Вырождение, агония и ликвидация.)
  8. ↑ NPIKMZ Клоков С.А., полоцкий краевед, заслуженный учитель БССР Эскеремын 2019-04-20 арын
  9. ↑ WebCite query result www.webcitation.org. Эскеремын 2016-10-12 арын
  10. ↑ СПИСОК ОСІБ, ЯКІ ПІДПАДАЮТЬ ПІД ЗАКОН ПРО ДЕКОМУНІЗАЦІЮ

Литература

Чӧлсконъёс

«https://udm.ruwiki.ru/w/index.php?title=Азин,_Владимир_Мартинович&oldid=424379»-ысь басьтэмын