Султанов, Закир

Закир Султанов
Закир Султанов
Вордӥськем дырыз	29-тӥ инвожое 1923
Вордӥськем интыез	Абдульменево, Пичи Пурга гурт поселение[d], Пичи Пурга ёрос, Удмурт Автономной Советской Социалистической Республика, СССР;
Кулэм дырыз	6-тӥ оштолэзе 1983 (59 арес)
Кулэм интыез	Херсон[d], Украин ССР, СССР;
Кунмуртлыкез	СССР
Ожмаськонъёс/ожъёс	Быдӟым Атыкай ож

Закир Султанов (29.06.1923 — 06.04.1983) — 498-тӥ стрелковой полкысь противотанковой взводлэн командирез, лейтенант. Совето Союзысь Герой.

Улон сюресэз

Вордскиз 1923-тӥ арын 29-тӥ инвожое (мукет ивортодэтъя — 29-тӥ пӧсьтолэзе^[1]) Абдульменево гуртын (али Пичи Пурга ёросын) бигер крестьян семьяын. 1937-тӥ арын Пичи Пурга школаысь 6 классэз йылпумъяз, нош собере — Агрызысь фабрично-заводской школаез. 1940-тӥ арысен Ижысь машина лэсьтон заводын слесарь луыса тыршиз^[2].

1949-тӥ арысен большевик партилэн, собере — Коммунистической партилэн ёзчиез.

1942-тӥ арын шуркынмонэ фронтэ куриське. Армиын — 1943-тӥ арын толшорысен. Ожмаськиз Шор, 1-тӥ Украин но 1-тӥ Белорус фронтъёсын. Нырысь ожез вал Орёл дорын, отчы пыриськиз автоматчикъёслэн куасэн (лыжной) нимаз бригадаязы. Взводлэн командирез чотын ожмаськиз Орёл-Курск ожын. Ковель дорын ож понна нырысетӥ данъетсэ — «За боевые заслуги» медальзэ — басьтӥз^[2]^[1].

1944-тӥ арын покчи лейтенантъёслэсь курсъёссэс йылпумъям Закир Султановез 132-тӥ стрелковой дивизиысь 498-тӥ стрелковой полкысь противотанковой стрелковой взводэ командире юнматӥзы^[2].

Висъяськиз со Вислаез выжон дыръя. 1945-тӥ арын толшоре дивизилэн азьмынӥсь ёзъёсыз Висла доры вуизы. 15-тӥ толшоре лейтенант Султанов но солэн взводэз Яблонна-Легионово черкогуртлэн уйпалаз тушмонлэсь обороназэ тӥяны мынӥз. 15-тӥ-16-тӥ толшоре уйин Султанов кык солдатъёсын ӵош йӧ вылтӥ Чонсткув гурт вӧзтӥ шурлэн шундыпуксён ярдураз потӥз. Тушмонлэн ез кенераз пась лэсьтыса, соос лушкем тушмонлэсь интыяськемзэ эскеризы но частязы берытскизы. Бӧрысь со уе ик Султанов лэсьтэм пасьсы пыр штурмовой группаез но 1319-тӥ стрелковой полкысь автоматчикъёсыз поттӥз. Штурмовикъёс шуак урдскизы тушмонлэн утиськон позициез вылэ, нырысетӥ траншеязэ киултӥзы но оборонительной позициосы султӥзы. Соослэн ужпумзы вал басьтэм музъемез возьыны но валтӥсь частьёслэсь шур вамен выжонзэс тушмонлэсь ватыны^[2]^[3]^[1].

Десантникъёсыз артиллеристъёс но миномётчикъёс ыбылӥзы, сьоразы пехотаен бронетранспортеръёс потӥзы. Совето ожгарчиос машинаосыз противотанковой ружьёысь, автоматъёсысь, пулемётъёсысь но винтовкаосысь ыбылӥзы. Собере танкъёс вуизы. Султанов, тушмон окопысь «фаустпатронъёс» шедьтыса, соосын кык танкъёсты быдтӥз. Кыкетӥез танк туж матэ вуиз вал, соин пуштэмезлэсь лейтенант окопе усиз, вылаз музъем усиз но согиз сое. Султановез шур вамен потэм батальонысь солдатъёс поттӥзы. Ӝыт со нош ик ожмаськыны мынӥз^[2].

СССР-ысь Вылӥ Кенешлэн президиумезлэн 1945-тӥ арын 24-тӥ южтолэзе поттэм косэтэзъя ожгар заданиосты адӟем карымон быдэстэмез но ассэ геройлыко возьматэмез понна лейтенант Закир Султанов Ленин орденэн, «Зарни Кизили» медален но Совето Союзысь Герой нимын пусъемын^[2]^[3]^[1].

Вормон нуналэз Берлинын пумитаз^[2]^[3]^[1]. Демобилизовать каремын 1946-тӥ арын пӧсьтолэзе^[1].

Быдӟым ож йылпумъяськем бере дышетскиз Куйбышевысь МВД-лэн офицеръёсты дасянъя школаяз. Басьтэм ӧнерезъя тыршиз Свердловскын но Свердловск улосын. 1953-тӥ арын капитан званиен запасэ потӥз. Улӥз Херсон карын, ужаз сиён-юонэн вуз каронъя ёрос управлениын^[2].

Улонысь кошкиз 1983-тӥ арын 6-тӥ оштолэзе^[2], ватэмын Херсонын^[3].

Данъетъёсыз

Совето Союзысь Герой
«Зарни Кизили» медаль
Ленин орден
«За боевые заслуги» медаль
«За победу над Германией в Великой Отечественной войне 1941—1945 гг.» медаль^[1]

Буре ваён

З. Султановлэн нимыз Ижысь машина поттон заводын ужасьёслы сӥзем буре ваён пул вылын пусъемын. Озьы ик солэсь нимзэ нулло Пичи Пургалась но Ижысь Ленин ёросысь «Чекерил» микрорайонысь урамъёс.

Валэктонъёс

↑ ¹ ² ³ ⁴ ⁵ ⁶ ⁷ Султанов Закир Фронтовики Удмуртии
↑ ¹ ² ³ ⁴ ⁵ ⁶ ⁷ ⁸ ⁹ В память о Герое Советского Союза Закире Султанове ГУ МВД России по Нижегородской области
↑ ¹ ² ³ ⁴ Закир Султанов — наш Герой! Малопургинская межпоселенческая централизованная библиотечная система

Литература

Герои Советского Союза: Краткий биографический словарь / Пред. ред. коллегии И. Н. Шкадов. — М.: Воениздат, 1988. — Т. 2 /Любов — Ящук/. — 863 с. — 100 000 экз. — ISBN 5-203-00536-2.
Герои твои, Херсонщина. — Симферополь, 1980.
ГСС, ГРФ, ПКОС — наши земляки. — Ижевск, 1995.
Кулёмин И. Г. Героев наших имена. — Ижевск, 1975.

Чӧлсконъёс

Закир Султанов [ӟуч] «Герои страны» сайт. Эскеремын 2014-07-09 арын

[:1-1] ¹ ² ³ ⁴ ⁵ ⁶ ⁷ Султанов Закир Фронтовики Удмуртии

[:0-2] ¹ ² ³ ⁴ ⁵ ⁶ ⁷ ⁸ ⁹ В память о Герое Советского Союза Закире Султанове ГУ МВД России по Нижегородской области

[:2-3] ¹ ² ³ ⁴ Закир Султанов — наш Герой! Малопургинская межпоселенческая централизованная библиотечная система

[1]

[2]

[3]