Рыков, Леонид Васильевич

Рувикиын таӵе фамилиен мукет муртъёс сярысь гожтосъёс вань. Учке: Рыков.

Леонид Васильевич Рыков
Вордӥськем дырыз	15-тӥ тулыспалэ 1921(1921-02-15)
Вордӥськем интыез	Удмуртия
Кулэм дырыз	30-тӥ толсуре 1988(1988-12-30) (67 арес)
Кулэм интыез	Тула
Кунмуртлыкез	СССР СССР
Званиез
Ожмаськонъёс/ожъёс	Быдӟым Атыкай ож
Данъетъёсыз	Богдан Хмельницкийлэн 3-тӥ степенё орденэз

Леонид Васильевич Рыков (1921-тӥ арын 15-тӥ тулыспалэ Дэбес ёросысь Князево гуртын —1988-тӥ арын 30-тӥ толсуре Тулаын) — Быдӟым Атыкай оже пыриськем мурт. 1-тӥ Белорус фронтысь 16-тӥ воздушной армилэн 9-тӥ гвардейской уйин лобась бомбардировочной авиационной дивизилэн 44-тӥ гвардейской бомбардировочной авиационной полклэн эскадрильяезлэн командирез, гвардиысь старшой лейтенант. Совето Союзлэн Героез (1946).

Улон сюресэз

Вордӥськиз 1921-тӥ арын 15-тӥ тулыспалэ Вотской автономной областьын Сарапул уездын Тыловай волостьысь Князево гуртын (али Дэбес ёросэ пыре) ӟуч крестьян семьяын. 1932-тӥ арын Рыковъёслэн семьязы Ижкаре улыны выжиз. 33-тӥ номеро школаысь 7 классэз йылпумъяса, Ижысь машина лэсьтон заводэ ужаны интыяськиз. Отын слесарь луыса тыршиз, огдыре ик аэроклубын дышетскиз. 1937-тӥ арын комсомол радэ пыриз. 1939-тӥ арын, Ижысь кар военкомат ыстэмъя, Пермьысь пилотъёсты дасянъя военно-авиационной школае дышетскыны пыриз. 1940-тӥ арын сое йылпумъяз но Киевысь Нимысьтыз военной округысь авиачастьёсын служить кариз. 1941-тӥ арын инвожо толэзьысен Быдӟым Атыкай оже пыриськиз. 1942-тӥ арын тулыспалэ Лымшор-Ӝытшор фронтын Харьков вадьсы уйин лобась бомбардировщикъёслэн 598-тӥ авиполкенызы ӵош нырысетӥ боевой лобанэ потӥз. Собере Сталинград, Дон, Степной, Шор но 1-тӥ Белорус фронтъёсын ожмаськиз.Сталинградэз утёнэ, Курской дугаысь но Днепр понна ожъёсы, Белоруссиез, Польшаез мозмытонэ пыриськиз. Тыложлэсь быронзэ 1945-тӥ арын Берлинын пумитаз. Рядовой лётчикысен кутскыса, 9-тӥ гвардейской уйин лобась бомбардировочной авиадивизилэн 44-тӥ гвардейской бомбардировочной авиаполклэн эскадрильяезлэн командирезлэн воштӥсёзяз вуиз. 1943-тӥ арысен Коммунист партилэн ёзчиез.

Подвигез

1945-тӥ арын куартолэзёзь старшой лейтенант Рыков 930 пол боевой лобанъёсы потаз. Соос пӧлысь 16 пол партизанъёс доры лобаз. Одӥг полаз огназ штурмантэк одӥг уйскын кык пол тушмон мышкы агентурной разведчикъёсты поттаз. 37 пол Варшаваысь партизанъёслы кулэ луись грузъёс вуттылӥз. Полкын ваньмызлэсь азьпал уйин туспуктыны дышиз но со быгатонлыксэ уже кутӥз. Ог 300 пол фронт лини котыртӥ лобаз, разведкае, тушмонлэсь огазе люкам техниказэ но луло кужымзэ переправаосты, аэродромъёсты, чугун сюрес герӟетъёсты, магазейёсты пушкытъянэ потаз.

СССР-ысь Вылӥ Кенешлэн 1946-тӥ арын 15-тӥ куартолэзе гожтэм Косэтэзъя командованилэсь боевой заданиоссэ ӟеч быдэсъямез но немец захватчикъёсын геройлыко ожмаськемез понна, гвардилэн старшой лейтенантэзлы Леонид Васильевич Рыковлы Совето Союзлэн Героез дано ним сётэмын но Ленин орденэн но «Зарни Кизили» медален пусъемын.

Тылож йылпумъяськем бере службазэ Ожгар-омыр кужымъёсын азьланьтӥз. 1958-тӥ арысен полковник Л. В. Рыков запасэ лэземын. Улӥз Тулаын. Улонысь кошкиз 1988-тӥ арын 30-тӥ толсуре.

Данъетъёсыз

• Ленин орден;
• Горд Знамялэн кык орденэз;
• Богдан Хмельницкийлэн 3-тӥ степенё орденэз;
• Быдӟым Атыкай ожлэн 1-тӥ степенё орденэз;
• Горд Кизили орден;
• медальёс.

Буре ваён

• Л. В. Рыковлэн нимыз Ижкарысь машина лэсьтон заводлэн буре ваён пул вылаз пыртэмын.
• Дэбес черкогуртын одӥгез ульча улосчизылэсь, Совето Созлэсь Героезлэсь нимзэ нуллэ.
• Л. В. Рыковлэн нимыз Ижкарын Ялан ӝуась тыл азьысь Совето Союзлэн Геройёсызлы сӥзем мемориал стелаын гожтэмын.

Валэктонъёс

Литература

• Бессменные часовые. Москва, 1983.
• Герои Советского Союза: Краткий биографический словарь / Пред. ред. коллегии И. Н. Шкадов. — М.: Воениздат, 1988. — Т. 2 /Любов — Ящук/. — 863 с. — 100 000 экз. — ISBN 5-203-00536-2.
• Елькин А. А. Приобщение к подвигу. Тула, 1975.
• Кулёмин И. Г. и др. Герои Советского Союза — наши земляки. Устинов, 1985.
• Белов А. Г. 930 боевых вылетов Леонида Рыкова: (документальная хроника жизни и деятельности) / Об-ние «Историко-краевед. и худож. музей», Музей воен. истории Тул. края. — 2-е изд., доп. и перераб. — Тула: Гриф и К, 2013. — 261 с. — (Тульские асы — герои войны). — 100 экз.

Чӧлсконъёс

Леонид Васильевич Рыков [ӟуч] «Герои страны» сайт. Эскеремын 2014-06-13 арын