Машагатов, Василий Фомич

Википедиысь материал
Василий Фомич Машагатов
Машагатов Василий Фомич.jpg
Вордӥськем интыез Вуж Постол,
Пичи Пурга ёрос,
РСФСР, СССР, УАССР
Кулэм дырыз 22.05. 1996
Кулэм интыез Ижевскын, Россия
Кун СССРFlag of the Soviet Union.svg СССР
РоссияFlag of Russia.svg Россия
Быдэс нимыз Василий Фомич Машагатов
Ужан удысэз политик
Данъетъёсыз

Удмурт Элькунлэн дано муртэз, Тазалыкез утён удысысь отличник. 

«Знак Почёта» орден Атыкай ожлэн I степенё орденэз Октябрь Революци нимо орден
Ужысь Горд Знамя нимо орден Горд Кизили орден

Машагатов, Василий Фомич (25-тӥ толсуре 1924, УАССР Нылга (али Пичи Пурга ёрос) ёрос Вуж Постол (али Иваново-Самарское) ― 22-тӥ куартолэзе 1996 Ижкарын) ― терапевт, эмтодосъёсъя доктор (1970), профессор[1]. (1971), УАССР-ысь (1963) но РСФСР-ысь (1984) сӥё-дано эмъясь. Удмурт АССР-ысь Вылӥ Кенешлэн Тӧроез[2], Удмурт Элькунлэн дано муртэз[3]. Быдӟым Атыкай оже пыриськем мурт[4].

Улон сюресэз

Дышетскемез

Василий Машагатов вордӥськиз 1924-тӥ арын 25-тӥ толсуре УАССР-ысь Нылга (али Пичи Пурга) ёросысь Вуж Постол (али Иваново-Самарское) гуртын. Пичи Пурга черкогуртысь шоръёзо школаез йылпумъямез бере, Нылга (али Пичи Пурга) ёросысь Сизяшур гуртын В. И. Чапаев нимо колхозын счетовод луыса ужаз. 1942-тӥ арын, 18 арес дыръяз, Василиез армие басьтӥзы но Москваысь 2-тӥ пулемётной училищее ыстӥзы. 1943-тӥ арын сое 170-тӥ стрелковой дивизиысь 717-тӥ стрелковой полкысь взводлы командире юнматӥзы[5]. Орловско-Курской дугаын ожмаськонын юн сӧсырмыны шедиз (копак бур пыд пыдэстэк кылиз). 1943-тӥ арлэн пумаз демобилизовать каризы. Гуртаз берытыса, счетоводын ик ужаз.

1946-тӥ арын Ижысь Медициная кун институтэ[6] дышетскыны пыриз, со дырысен быдэс улонзэ эмудысэн герӟаз. Отын дышетскон вакытаз научно-исследовательской ужен вырыны кутскиз. Нырысетӥ тодос публикацизэ дышетсконзэ быдтэмезлэсь азьвыл ик печатлаз. Умой дышетскемез понна Ленинской стипендия басьтӥз. 1951-тӥ арын институтэз йылпумъяз. 1958-тӥ арын Москваын «Система кровообращения при некоторых заболеваниях желчных путей и печени» темая кандидат диссертацизэ утиз. 1969-тӥ арын Донецк карын «Хронические воспалительные заболевания желчных путей и их бальнеологическое лечение и профилактика» темая докторской диссертацизэ утиз[7].

Ужамез

1963-тӥ―86-тӥ аръёсы ИГМИ-ысь Ижысь Медициная кун институтысь пуш висёнъёсъя пропедевтикая кафедраен кивалтӥз[8]. 1986-тӥ―96-тӥ аръёсы консультант-профессор луыса тыршиз. Машагатовлэн тодос эскеронъёсыз интыысь инкуазь факторъёслэсь (минеральной вуослэсь но дэриослэсь) эмъясь быгатонлыкъёссэс эсекеронэн но соосты уже кутон амалъёсты утчанэн герӟаськемын. Озьы ик улӥ частотаен токъёсты но рефлектотерапилэсь пӧртэмлыкъёссэ желудочно-кишечной трактэз, мусэз но сэп сюресъёслэсь хронической висёнъёсэс йӧнатонэ кутонэн. Василий Машагатов сиён сылмытон ёзъёсты эмъян но диагностировать карон комплекс кылдытӥз. Солэн кичӧлтэменыз кар но элькун гастрологической центръёс, рефлексотерапияя кабинетъёс усьтэмын. Солэн тодос ужъёсысьтыз комплексной амалъёс «Металлург» санаторийлэн, «Варзи-Ятчи» курортлэн, Элькунысьтымы терапевтической но хирургической стационаръёслэн ужазы кутэмын.

Машагатов 120-лэсь ятыр научной публикациослэн, 5 выль изобретениослэн, гастроэнтерологияя но рефлексотерапияя 17 рациональной пуктонъёслэн авторзы луэ. Удмурт Элькунысь терапевтъёслэн огазеяськонзылэн, Курортъёсын кивалтонъя элькунысь профсоюзъёслэн кенешсылэн научно-методической ӧриезлэн ёзчиез. Быдӟым Атыкай Оже пыриськем мурт. 1971-тӥ-80-тӥ аръёсы УАССР-ысь Вылӥ Кенешлэн тӧроез но 8-тӥ но 9-тӥ ӧтчамъёсысь депутат вал. КПСС-лэн 24-тӥ съездаз делегат луыса пыриськиз. Удмуртилэн дано кунмуртэз. Василий Машагатов 40 арлэсь кема медицина но тодос удысъёсты валтӥз, мыло-кыдо пыриськылӥз мерлыко ужъёсы.

Василий Машагатов улӥз Ижкарын, Советской урамысь, 21А номеро юртын. Калыкын сое «Марисовский дом» шуыса нимало. (1963-тӥ―1985-тӥ аръёсы Марисов Валерий Константинович КПСС-лэн удмурт обкомезлэн нырысетӥ секретарез вал). Улонысь кошкиз 1996-тӥ арын 22-тӥ куартолэзе[9].

Семьяез

Атаез — Фома Яковлевич Машагатов, Пичи Пурга ёросысь Посьтол гуртысь.

Анаез — Марина, Сизяшурысь.

Нырысетӥ кышноез — Александра, соин кык нылпи вордӥзы: Геннадий но Юрий. Геннадий вож нуныен кулӥз (5 толэзь). Юрий Светлана кузпалэныз Елена нимо ныл будэтӥзы.

Кыкетӥ кузпалыз — Лощинина Нонна Гавриловна. «Металлург» санаториын врач-терапевт луыса ужаз. Валера пизэс будэтӥзы.

Пиез — Валерий Васильевич Машагатов, солэн кузпалыз Людмила. Кык ныл будэтӥзы: Елена но Ольга. Елена анай-атаезлэн пытьыезъя мынӥз, али 2-тӥ карбольницаын терапевт луыса ужа. Ольга ― бухгалтер.

Буре ваён

Ижкарысь И. Б. Однопозов нимо 8-тӥ номеро кар клинической больницалэн одӥгаз юртаз, Василий Машагатовез сӥлы карыса буре ваён пул юнматэмын. Сое усьтон ужрад 2004-тӥ арын 27-тӥ толсуре ортчиз.

Данъетъёсыз

  • Быдӟым Атыкай ожлэн I степенё орденэз
  • Горд Кизили орден (1943-тӥ арын)
  • «Знак Почёта» орден (1966-тӥ арын),
  • Трудовой Горд Знамялэн орденэз (1971-тӥ арын),
  • Октябрь Революци нимо орден (1976-тӥ арын)
  • медальёсыз
  • Тазалыкез утён удысысь отличник (1964-тӥ арын).
  • Удмурт Элькунлэн дано муртэз
  • Солэн нимыз УАССР-лэн Ужан данъя но героизмъя книгаяз пыртэмын.

Ужъёсыз

  • Влияние лечения минеральной водой Ново-Ижевского источника на некоторые показатели функционального состояния печени // Труды Ижевского мед. института . Т. 18. Ижевск, 1958; Опыт применения минеральной воды источника «Машиностроитель» при хронических заболеваниях желчевыводящих путей и печени // Материалы республиканской конференции терапевтов УАССР. Донецк, 1966.

Валэктонъёс

  1. ↑ Юбилейные даты Малопургинского района на 2019 год mpurga-lib.udm.muzkult.ru.
  2. ↑ Почётные граждане УР. Звание "Почётный гражданин Удмуртии". iz-article.ru.
  3. ↑ В Госсовете прошёл торжественный приём, посвящённый 80-летию законодательной власти в Удмуртии ijevsk.bezformata.com.
  4. ↑ Машагатов Василий Фомич
  5. ↑ Машагатов Василий Фомич
  6. ↑ 20 КАФЕДРА ПРОПЕДЕВТИКИ ВНУТРЕННИХ БОЛЕЗНЕЙ С КУРСОМ СЕСТРИНСКОГО ДЕЛА
  7. ↑ Машагатов Василий Фомич
  8. ↑ 20 кафедра пропедевтики внутренних болезней с курсом сестринского дела www.igma.ru.
  9. ↑ Малопургинская земля — моя родина

Чӧлсконъёс

«https://udm.ruwiki.ru/w/index.php?title=Машагатов,_Василий_Фомич&oldid=485614»-ысь басьтэмын