Классэн кивалтӥсь
| Классэн кивалтӥсь | |
 | |
Ужан удысэз |
педагогика, воспитание но образование |
|---|---|
Классэн кивалтӥсь (ӟуч: Кла́ссный руководи́тель) — дышетӥсь, кудӥз школаын яке училищеын одӥг класслэн дышетскон но внеклассной ужъёсыныз кивалтэ. Россиын покчи классъёсын классэн кивалтэ вань предметъёсъя урокъёсты нуись дышетӥсь, бадӟым классъёсын но училищеын, дышетоннилэн администрациезлэн решениезъя, классэн кивалтон нимаз предметъёсъя урокъёсты нуись дышетӥсьлы сётӥське. Тросаз кунъёсын но озьы ик классэн кивалтон дышетӥсьёс пӧлысь бырйиське.
Историез
Россиын Классэн кивалтонъя институт кылдытэмын XIX дауре, дышетон юртъёсын комнатной надзиратель ужудыс кылдытэмен валче. 1813-тӥ арын Калыкез дышетонъя министерство пансионатъёсын комнатной надзирательёс пуктон сярысь постановление кутӥз. Со документын комнатной надзирательлэн валтӥсь ужпумез «всяческое направление нравов и свойств детей и образование истинных и полезных сынов отечества» шуыса пусъемын. Надзирательлы куронъёс туж чурытэсь вал — котыр ласянь адӟем карымон луэм сяна, одно ик кунсьӧр кылэз тодыны кулэ. Комнатной надзирательёс воспитанникъёсынызы огъя ӝӧк сьӧрын сиськылӥзы, воспитанникъёсынызы огъя комнатаын черодэн-черодэн кӧлаллязы, урокъёсазы пукылӥзы, гуртысь ужзэс лэсьтыны юрттылӥзы но чылкытлыкез чаклаллязы. Воспитанникъёсты чакланлэн ужпумез — вераськонысьтызы, сямъёсысьтызы но выросъёсысьтызы янгышъёссэс тупатъян, малы ке шуоно, со вакытэ дышетскисьёслэн асьсэды воземзы ӟуч дворянинлэн нормаосызлы тупаны кулэ вал.
1864-тӥ арын кутэм Уставъя классэн кивалтонэ воштэтъёс пыртэмын вал. Со документъя классной наставникъёслэн институтсы кылдытэмын, нылкышно гимназиосын — классной дамаос. Со дырысен классной наставникъёслэн ужзы надзорной интые меӵак воспитаниен герӟаське[1].
1930-тӥ арын СССР-ын класной групповод ужудыс кылдытэмын. Солэсь азьпал группаосын воспитательной ужез дышетӥсьёс ик быдэсъязы. Классэн кивалтӥсь ужудыс кылдытэмын 1934-тӥ арын СССР-ысь Кивалтэтлэн постановлениеныз. Берлогес классэн кивалтон сярысь постановление 1960-тӥ аръёсысь документъёсын пумиське. Собере классэн кивалтон сярысь ужкагазъёс 1975-тӥ арын Калыкез дышетонъя министерствоен поттэм Методической письмоын пусъемын, собере — 2001-тӥ арын. 1990-тӥ аръёсы, пионер но комсомол огазеяськонъёсты быдтэм бере, классэн кивалтӥсьлэн кулэлыкез быриз. Туала Россиын классэн кивалтӥсь нылпиен но пӧртэм предметъёсъя дышетӥсьёсын, школаен но анай-атайёсын, нылпиен но котырысь югдурен кусып возись луэ[2].
Европа кунъёсын классэн кивалтон институт та выллемгес ик азинскиз. Германиын (нем. Klassenlehrer), Франциын (фр. professeur principal), Скандинав кунъёсын (швед Klasslärare) классэн кивалтӥсьёс Россиын выллем ужпумъёсты быдэсъяло. США-ын классэн кивалтӥсьёс (англ. homeroom teacher) покчи классъёсын гинэ вань, бӧрысь классэн кивалтӥсь интые котькд дышетскись борды куратор юнматӥське . Соос нылпилы предметъёс, расписание но вузэ пырон пумысь визь-кенеш сётъяло[3]. Великобританииын котькуд нылпи борды дышетӥсь юнматэмын (англ. tutor), со учениклэсь дышетсконын, спортын но мукет удысъёсын азинсконъёссэ чакла[4].
Ужпумъёс
Г. М. Коджаспировалэн но А. Ю. Коджаспировлэн поттэм педагогикая кыллюкамазы, классной руководитель (воспитатель) — со педагогика удысын ужась, кудӥз нылпилэн азинсконаз но личность сямен будоназ ӟеч условиос кылдытыны, нылпилэн ас ёзъёсыз, анай-атаез дышетӥсьёс куспын кылдэм шуг-секытъёсты палэнтыны, классной коллективез огазеяны но сое воспитать карыны кулэ[5].
М. И. Рожковлэн «Классному руководителю» пособияз таӵе валатон сётӥське: классэн кивалтӥсь— школаысь педагог, кудӥз нылпилэсь школа улонзэ радъя, кусыпъёссэ тупатэ но секыт югдурын юрттэт сётэ[6].
Классэн кивалтӥсь азьын сылӥсь ужпумъёс:
- Классын коллектив кылдытон но сое азинтон;
- Котьткуд нылпилы личность сямен азинскыны ӟеч психолого-педагогической условиос кылдытон, котькуд нылпилэсь аспӧртэмлыксэ утён но быгатонлыкъёссэ усьтон но соосты азинтыны юрттон;
- Таза улон сям пыӵатон;
- Воспитание улсын кутӥськись формаос пыр классысь коллективлэсь кусыпъёссэ юнматон;
- Дышетскисьёслэсь эрикрадъёссэс но тунсыкъёссэс утён;
- Нылпиосын ужез яланлыко нуон;
- Нылпиослэсь ог-огенызы но дышетӥсьёсын кусыпъёссэс радъян но юнматон;
- Нылпиосты асьсэдыз возьыны быгатонъёссэс азинтон но нравственной но духовной ориентиръёс кылдытон;
- Нылпиослэсь кулэлыко творческой ужзэс радъян[7].
Обязанностьёсыз
Классэн кивалтӥсь таӵе ужъёсты быдэсъяны кулэ:
- Нылпиослэсь дышетскемзэс, асьсэды воземзэс но урокъёсы ветлэмзэс чаклан но эскерыса возён;
- Анай-атайёсын кусып возён — родительской собраниос ортчытъян;
- Кылдэм шуг-секытъёсысь потыны юрттон, соосты палэнтонъя профилактика уж нуон, кулэезъя психологъёсты, мер но катчаклан удысъёсын ужасьёсты воспитаниен герӟаськем уже кыскон;
- Классной часъёс ортчытъян, асдыръем юанъёсты сэрттон-пертчон, иворъёсын тодматон но внеклассной ужъёсты радъян;
- Нылпиослы внешкольной ужрадъёсы пыриськыны юрттон — экскурсиос, театръёсы, музейёсы но мукет со выллем тунсыко интыосын тодматон;
- Документациен ужан[8].
Россиын
Россиын дышетӥсьёслы классэн кивалтэм понна толэзьлы быдэ ватсаса уждун тыриське. Росси Федерациысь Кивалтэтлэн постановлениезъя, 2024-тӥ арын 1-тӥ южтолэзьысен ватсэтлэн дуныз 10 сюрс манет тыр луэ 100 сюрслэсь ӧжыт луисьтэм улон интыосын, 5 сюрс манет — каръёсын, кудъёсаз улӥсез 100 сюрслэсь трос[9].
2020-тӥ арысен арлы быдэ ортчытъяське классэн кивалтӥсьёслэн Огъяросси форумзы. Ужрадэз радъя РФ Калыкез дышетонъя министерство, Владимир Путинлэн косэмезъя. Форумлэн программаез образовательной, дискуссионной но культурной люкетъёслы висъяське. Спикеръёс но экспертъёс чотын нимо-дано адямиос верасько. Дышетӥсьёслы та площадка ас ужан амалъёсынызы вошъяськыны ӟеч луонлык сётэ[10].
Форумлэн меморандумаз таӵе аспектъёс пыртэмын:
- Цифровой грамотность — туала дышетӥсьлэн одно луись компетенциез;
- Нылпиослэн образовательной интернет-вӧлметын кышкыттэмлыксы;
- Внеурочной уж — кужмо воспитательной резерв;
- Классной час — классэн кивалтӥсьлэсь нылпиосын кусыпъёссэс юнматӥсь асдырлыко форма;
- Классэн кивалтӥсьлэн анай-атайёсын партнёр чотын кусып воземез — нылпиез будэтонлэн пайдалыко палыз[11].
Валэктонъёс
- ↑ Е. В. Корябкина Становление и развитие института классного руководства в России [ӟуч] cyberleninka.ru. Эскеремын 22 куарусёнэ 2025 арын
- ↑ Матвиевская Т.Н. История института классного руководства [ӟуч] // Восьмое измерение : газета. — 2021. — 1 октябрь (№ 35). — С. 1.
- ↑ Система школьного образования в США [ӟуч] www.iqconsultancy.ru. Эскеремын 22 куарусёнэ 2025 арын
- ↑ Роль тьютора в организации воспитательного процесса в школах Великобритании [ӟуч] 2konferentsia.ucoz.net. Эскеремын 22 куарусёнэ 2025 арын
- ↑ Коджаспирова Г. М., Коджаспиров А.Ю. [https://irina-bateneva.ucoz.ru/books/kodzhaspirovy-pedagogicheskij_slovar.doc А.Ю. Педагогический словарь: Для студ. высш. и сред. пед. учеб. заведений.]. — М.: Издательский центр «Академия», 2000. — С. 38 с.. — 176 с. с.
- ↑ Классный руководитель [ӟуч] sh-vadinskaya-r66.gosweb.gosuslugi.ru. Эскеремын 22 куарусёнэ 2025 арын
- ↑ Об утверждении методических рекомендаций об осуществлении функций классного руководителя педагогическими работниками государственных общеобразовательных учреждений субъектов Российской Федерации и муниципальных ... (не нуждается в госрегистрации) от 03 февраля 2006 - docs.cntd.ru [ӟуч] docs.cntd.ru. Эскеремын 22 куарусёнэ 2025 арын
- ↑ Классный руководитель в школе: кто это, зачем нужен, обязанности и права, роль в образовательном процессе, Lenta.RU. Эскеремын: 22 куарусёнэ 2025 арын.
- ↑ Правительство утвердило постановления об увеличении размера выплат за классное руководство и кураторство [ӟуч] government.ru. Эскеремын 22 куарусёнэ 2025 арын
- ↑ Стартует прием заявок на V Форум классных руководителей [ӟуч] Минпросвещения России. Эскеремын 22 куарусёнэ 2025 арын
- ↑ Форум классных руководителей [ӟуч] Форум классных руководителей. Эскеремын 22 куарусёнэ 2025 арын
Литература
- Классному руководителю: учеб.-метод. пособие / ред. М. И. Рожков. — Москва: Владос, 1999. — 280 с. — ISBN 5-691-00370-4.
Дышетон процесс | |
|---|---|
| Дышетскон | |
| Школа праздникъёс | |
