Гурт удысъя удмурт кун университет

Википедиысь материал
Гурт удысъя удмурт кун университет
(УдГАУ)
Izhevsk Agricultural Academy-1.jpg
Калыккуспо нимыз Udmurt state agricultural university
Азьвыл нимыз МЗИКК → МЗИК → ИжСХИ (УстСХИ) → ИжГСХА
Девизэз "Гурт удыслы - ӟеч кадръёс!"[1]
Кылдон арез 1931[2]
Ректорез Любимов, Александр Иванович[d], Фокин, Валентин Васильевич[d] но Ковриго, Вячеслав Павлович[d]
Интыяськемез РоссияFlag of Russia.svg Россия,
Flag of Udmurtia.svg Удмуртия, Ижкар
Юридической адресэз почта адрес: Студенческой урам, 11-тӥ юрт, Ижкар, Удмурт Элькун, Россия, 426069
Сайтэз udsau.ru

Гурт удысъя удмурт кун университет (вакчияк — ФГБОУ ВО Удмуртский ГАУ) — Россиысь Гурт удысъя министерстволы[ru] кадръёс будэтонъя но ужасьёслэсь тодон-валанзэс муромытонъя вылӥ дышетсконни, Ижын интыяськемын.

Историез

Голицыно станцилэн вокзалэз Л. Кекушевлэн[ru] проектэзъя XX даурлэн кутсконаз лэсьтэмын
Бадӟым Вязёмы каргуртысь МЗИК-лэн юртэз, али — Фитопатологияя ВНИИ.

1919-тӥ арын (мукет ивортонъёсъя, 1920-тӥ арын[3]) Мускоын Смоленской бульварысь[ru] 19-тӥ юртын зоотехнической вылӥ институт[ru] усьтӥськиз (МВЗИ). 1920-тӥ—1921-тӥ аръёсы оргкомитетлэн тӧроез (ректорез) профессор М. М. Щепкин[ru] вал. 1923-тӥ арын правленилы тӧрое но ректоре Маргарита Васильевна Фофоноваез[ru] юнматӥзы[4][5]. 1929-тӥ арын ректор Василий Николаевич Соколов[ru] луиз.

1930-тӥ арын нимыз воштӥськиз, Мускоысь зоотехнической институт (МЗИ) луиз. Вылӥ тодон-валан сётонъя управленилэн бурд улаз ужаз[6]. Смоленской бульварысь 57 номеро юртын интыяськиз[7]. Институтын бадӟымесь воштӥськонъёс ортчизы: дышетсконнилэн инъетэз вылын ньыль институтъёс кылдытэмын вал: вал вордонъя[8], сюро таза пудо вордонъя, ыж вордонъя но зооветеринарияя[9] институтъёс.

СССР-ысь Совнаркомлэн[ru] вал вордон хозяйствоосты азинтон сярысь 1931-тӥ арын кутэм постановлениезъя, 1931-тӥ—1932-тӥ дышетскон аръёсы зоотехникъёсты дасян вылысь вал вордонъя но ӟеч выжыысь валъёсты уськытонъя Мускоын но Пятигорскын кык вузъёс кылдытыны чакламын вал. Со сяна, вал вордон удыслы техникъёсты но пудо эмъясьёсты дасян вылысь дас техникумъёс усьтыны чакламын вал. Нялтас вераса, 1932-тӥ арын Пятигорскысь ипподромлэн Кабардинскысь вал вордон заводлэн юртаз тулыс вуз усьтэмын вал.

1931-тӥ арын 2-тӥ куарусёнэ СССР-ысь Совнаркомлэн 765 номеро постановлениезъя[10], Мускоысь вал вордонъя но ӟеч выжыысь вал уськытонъя зоотехнической институт (МЗИКК) кылдытэмын вал. Со аре ик институт Муско улосысь Одинцово ёросысь Голицино каргуртын но Успенское черкогуртын нырысетӥ вал вордон муско заводлэн[ru] базаяз (1 номеро КЗ, Московской КЗ, азьвыл — Опытной конзавод) студентъёсты дышетыны кутскиз. Институтлы директоре конзаводлэн кивалтӥсез А. Х. Зарин[ru][2] юнматэмын вал. Институт тодмо Морозовской замокын интыяськиз, со чебер юртлэн тусыз Левитаналэн[ru][11] суредъёсаз но возьматэмын. Дышетӥсьёс пӧлын В. О. Витт[8][12], А. А. Скворцов, П. Н. Кулешов[8], Н. А. Юрасов[8], А. А. Яковлев[8] но трос мукетъёсыз вал. Быдӟым Атыкай ож дыръя, вылды, институт но солэн архивъёсыз быдтэмын вал, оло, тылож пуромемлэсь азьвыл ик, 1937-тӥ арын, пытсамын вал — академилэн историысьтыз та люкетсэ рос-прос эскероно на.

1943-тӥ арын, С. М. Буденный[ru] сюлмаськемен, быдтэм институт выльысь ужаны ӧдъяз, таяз рад Мускоысь вал вордонъя зоотехнической институт (МЗИК) сямен. СССР-ысь СНК-лэн но ЦК ВКП(б)-лэн[ru] та пумысен 1943-тӥ арысь 12-тӥ куартолэзе юнматэм 510 номеро постановленизы но утиськемын. Институтлы дышетӥсьёсты быдэс кунысь утчазы, эвакуациосысь но вайылӥзы. Мукет каръёсысь вуэм дышетӥсьёслы наука но искусство удысысь (РАНИС) ужасьёслэн каргуртазы, Николина Гора нимо каргуртын, коркаосты но дачаосты арендае кутылӥзы.

Институтлэн аслаз дышетсконъя опытной хозяйствоез но вал. Отын скал гид, 300 тонна силос возён гуэз вал, ӟеч выжыысь 30 йыр валъёсты вордӥзы, пӧлазы рысакъёс но, ворттылыны но ужаны ярась валъёс но сюрылӥзы. Занятиос ортчытъян но ворттылон вылысь манеж ужалляз. Озьы ик занятиос Московской конзаводлэн базаяз ортчылӥзы[13][14]. Быдэс Совето Союзын МЗИК гинэ вал вордон удысысь ӧнерчиосты дасялляз. Ас вакытаз отын М. Я. Лемешев ( Кун Думаысь депутат, экологияя комитетлэн тӧроез), В. П. Шамборант[15], Б. Д. Камбегов, М. Н. Эфрос, М. Н. Ширяев, Е. Е. Готлиб, А. З. Саламов но мукетъёсыз дышетскизы[16]. 1955-тӥ арын МЗИК пытсаськем бере, солэн бервылаз мукет вуз усьтӥськиз — Иван Федоров нимо Мускоысь печатья кун университет[ru] (МГУП имени Ивана Федорова), бератаз — Фитопатологияя ВНИИ.

Мускоысь вал вордонъя зоотехнической институт (МЗИК) егит лыдъяськылӥз, но тодосчиос кужмоесь вал, соослэсь нимъёссэс кунгож сьӧрын но тодылӥзы — вал вордон удысэз азинтӥсьёс Владимир Оскарович Витт, Виктор Иванович Калинин, Иван Иванович Лакоза, Петр Федорович но Вадим Петрович Добрынинъёс. Паймод, но лекциоссэс гожъяны куддыр воксё ум вуттӥське вал. Ыммес усьтыса ик кылзылӥм. Со лекциос пӧлысь котькудӥз сямен али но тодэ лыктэ. Тодосчиос шуыса, дышетӥсьёс гадязы ноку ӧз мыжгаллялэ, но эскеронъёстэк, ужатэк басьтэм тодон-валанъёслэн толыксы бадӟым уг луы шуыса, вераллязы, ваньзэ рос-прос валэктылӥзы. «Театр дӥсь ошонысен» кутске ке, МЗИК тодон-валанэз юнматонъя ӟеч лабораториысен кутскылӥз, нош лабораторимы гидын интыяськылӥз, татысь 60 спорт валъёс котырын ужаны дышетским. Отын ик верблюдъёсты, мулаосты но одӥг осёлэз возизы.

— «Дело жизни»[17]

Институтлэн журналэз — «Известия Московского зоотехнического института коневодства».

Бадӟым Вязёмы каргуртын но Успенской черкогуртын ужатозяз (1929—1941, 1943—1954), институт 4000-лэсь ятыр ӧнерчиосты будэтӥз[18].

СССР-ысь Министръёслэн Кенешсылэн[ru] 1954-тӥ арын 5-тӥ гудырикошконэ кутэм постановлениезъя[19], озьы ик СССР-ысь Вылӥ образованиея министерстволэн 1954-тӥ арысь 18-тӥ гудырикошконэ приказэзъя[19], Мускоысь вал вордонъя зоотехнической институт (МЗИК) УАССР-ез азинтон вылысь Ижкаре выжтэмын вал. 1954-тӥ арын 1-тӥ куарусёнэ со Ижысь гурт удысъя институт (ИжСХИ) луиз. Со дырысен Удмурт АССР-ын гурт удысысь вылӥ тодон-валан сётонлы кутскон понэмын вал. МЗИК-ысь Иже зоотехниклы дышетскыны 2-тӥ но 3-тӥ курсъёсысь студентъёсты но выжтӥзы, нош 4-тӥ но 5-тӥ курсъёс Мускоысь пудо эмъянъя академие выжтэмын вал. Со сяна, Ижысь институтын агрономъёсты дасяны ӧдъязы. Аудиториос тырмымтэен, дышетскон Ижысь механикая институтлэн но аудиториосаз сменаосын радъямын вал. Таин валче Удмурт Элькун Кивалтэт гурт удысъя институтлы Постышев нимо гурт удысъя вылӥ коммунистической школалэсь юртсэ висъяз, со Свердлов ульчаысь 30 номеро юртын интыяськылӥз (али татын экономикая факультет). Со сяна, техучилищелы шуыса пуктэм Киров улосысь 16 номеро юртэз институтлы сётӥз на (али татын дышетонъя 2 номеро корпус).

Бератаз институт ньыль дышетон факультетъёсын кадръёсты дасяз: агрономияя, зооинженерияя, механизацияя но электрификацияя[19]. Со сяна, вуз бордын военной кафедра ужаз. Институт СССР-ысь Вылӥ образованиея министерстволэн валтӥсь управлениезлэн бурд улаз ужаз, нош 1956-тӥ арысен — СССР-ысь Гурт удысъя министерстволэн бурд улаз(та пумысен 1956-тӥ арын 22-тӥ инвожое поттэм приказэз но утиськемын)[19].

Ижысь гурт удысъя школа бордын ужазы:

  • Колхозъёслы но совхозъёсты кивалтӥсьёсты будэтон удмурт школа (одӥг аръем);
  • УАССР-ысь колхозъёслы но совхозъёслы кивалтӥсьёсты дасянъя курсъёс (куать толэзьем)[19].

1984-тӥ арын 27-тӥ толсурысен 1987-тӥ арын 19-тӥ инвожоысен Устиновысь гурт удысъя институт (УстСХИ) нимаськиз, бератаз Иж нимзэ берыктӥзы. 1995-тӥ арын институт Ижысь гурт удысъя кун академия (ИжГСХА) луиз. Россиысь законъёс воштӥськемен, академилэн нимыз но воштӥськиз: 2003-тӥ арысен ФГ БОУ ВПО «Ижысь гурт удысъя кун академия». Нош 2011-тӥ арын 1-тӥ пӧсьтолэзьысен академилэн Уставез воштӥськиз, таин валче туннэ нуналозь со бюджет чотын ужась ФГБОУ ВПО «Ижысь гурт удысъя кун академия» луэ.

Институтлэн аслаз студенческой газетэз потэ — «Моя академия» нимаське. Гурт удысъя министерстволэн дышетсконниосаз потӥсь устоез издание Россиысь конкурсын «Наукаын утчаськон» номинациын вормиз.

2001-тӥ арын вузъёс пӧлын ИжГСХА гурт удысъя категориын 19—20 инты басьтӥз[20].

2012-тӥ арын Россиысь Дышетонъя но наукая министерство вылӥ тодон-валан сётӥсь дышетсконниослэсь ужамзэс эскериз, соку академия ӟечен пусъемын вал[21].

Дышетон но наука удысысь надзоръя федерал службалэн приказэзъя ИжГСХА-лы бакалавриатын[ru], специалитетын[ru] но магистратураын[ru] чаклам 28 дышетон программая кун аккредитациез ортчиз, со пумысен 2021-тӥ арозь свидетельство сётэмын.

Россиысь Гурт удысъя министерстволэн 2022-тӥ арын 11-тӥ коньывуонэ поттэм приказэзъя, Ижысь гурт удысъя академия Гурт удысъя удмурт кун университет (УдГАУ)[22] луиз.

Кивалтӥсьёс

Ректор (директор) но ужам аръёссы:

Факультетъёс но кылдэм арзы

  • Агрономъёсты дасян (1954);
  • Зооинженеръёсты дасян (1931);
  • Энергетикъёсты но электрикъёсты дасян;
  • Инженеръёсты дасян;
  • Экономикая;
  • Нюлэс хозяйствоя;
  • Пудо эмъясьёсты дасян;
  • Заочной;
  • Подготовительной;
  • Переподготовкая;
  • ИжГСХА бордысь военной кафедра (1931), али студентъёсты уг дышето ни.

Озьы ик учке

Валэктонъёсыз

  1. ↑ Источник: Ижевский сельскохозяйственный институт, Ижевск, Издательство «Удмуртия», 1974 год, 124 страницы с иллюстрациями;
  2. ↑ 1 2 Сайт Коневодство и коннозаводство, Создание института коневодства.
  3. ↑ Животноводство // Евклид — Ибсен. — М. : Советская энциклопедия, 1972. — С. 190. — (Большая советская энциклопедия#Третье издание / гл. ред. А. М. Прохоров ; 1969—1978, т. 9).
  4. ↑ Сайт А. Яковлева, Ходатайство ячейки РКП(б) Московского зоотехнического института в Наркомпрос об откомандировании М. М. Щепкина в распоряжение Института.
  5. ↑ Вся Москва — 1923 год, стр. 241.
  6. ↑ Вся Москва — 1929 год.
  7. ↑ Справочник Вся Москва на 1929 год.
  8. ↑ 1 2 3 4 5 К 90 летию кафедры коневодства Московской ветеринарной академии. Эскеремын 2013-03-05 арын
  9. ↑ Постановлением ЦИК и СНК СССР № 40/237 «О реорганизации вузов, техникумов и рабфаков», от 23 июля 1930 года.
  10. ↑ История зооинженерного факультета. Архивная копия от 21 куарусёнэ 2013 на Wayback Machine
  11. ↑ История кафедры зоологии Нижегородского государственного университета, 1918—1921 гг..
  12. ↑ Владимир Оскарович Витт Архивная копия от 9 оштолэзе 2014 на Wayback Machine
  13. ↑ Источник: Ижевский сельскохозяйственный институт., Ижевск, Издательство «Удмуртия», 1974 год, 124 страницы с иллюстрациями;
  14. ↑ «Коневодство и конный спорт»
  15. ↑ В. П. Шамборант Архивная копия от 4 южтолэзе 2016 на Wayback Machine
  16. ↑ Кремлёвская школа верховой езды Эскеремын 2011-06-29 арын
  17. ↑ «Дело жизни»
  18. ↑ Сайт одиневс. ру, Валера Шабля, «Владимир Витт — конная легенда нашего времени».
  19. ↑ 1 2 3 4 5 Краткий справочник по фондам ГУ «ГАСПД УР»
  20. ↑ Масленникова М. В российском рейтинге фигурирует только один ижевский вуз : [на 19 — 20 месте Ижев. с.-х. акад.] // АиФ Удмуртии. — 2003. — 5 июня. — С. 9.
  21. ↑ Итоги мониторинга деятельности федеральных образовательных учреждений высшего профессионального образования, Министерство образования и науки Российской Федерации, 2012 год.
  22. ↑ Ижевская сельхозакадемия официально сменила статус на университет [ӟуч] Эскеремын 2023-01-01 арын

Литература

  • Постановлением ЦИК и СНК СССР № 40/237 «О реорганизации вузов, техникумов и рабфаков», от 23 июля 1930 года;
  • Постановление ЦИК и СНК СССР от 22.11.1934 об утверждении: Положения о НКО СССР и Положения о Военном совете при НКО СССР;
  • Ижевский сельскохозяйственный институт., Ижевск, Издательство «Удмуртия», 1974 год, 124 страницы с иллюстрациями;
  • Удмуртская Республика: Энциклопедия., Ижевск, Издательство «Удмуртия», 2000 год, 800 страниц с иллюстрациями, стр. 357;
  • Удмуртская Республика : Энциклопедия / гл. ред. В. В. Туганаев. — 2-е изд., испр. и доп. — Ижевск : Издательство «Удмуртия», 2008. — 768 с. — 2200 экз. — ISBN 978-5-7659-0486-2.
  • Масленникова М. В российском рейтинге фигурирует только один ижевский вуз : [на 19-20 месте Ижев. с.-х. акад.] / М. Масленникова // АИФ Удмуртии. — 2003. — 5 июня. — С. 9.;
  • И. Ш. Фатыхов, Международные связи академии / И. Ш. Фатыхов, С. Е. Ценева // Вестник Ижевской государственной сельскохозяйственной академии. — 2005. — № 1. — С. 3 : табл.;
  • Федеральное государственное образовательное учреждение высшего профессионального образования Ижевская государственная сельскохозяйственная академия. Факультет повышения квалификации и переподготовки. 25 лет. — Ижевск, 2006. — 11 с. : ил.;
  • Музейная деятельность Ижевской государственной сельскохозяйственной академии: история и современное состояние // Вестник Ижевской государственной сельскохозяйственной академии., 2007 год, № 2, стр. 68-74;

Чӧлсконъёс

«https://udm.ruwiki.ru/w/index.php?title=Гурт_удысъя_удмурт_кун_университет&oldid=457764»-ысь басьтэмын