Ижысь механикая завод

Википедиысь материал
«Ижысь механикая завод» АО
Изображение логотипа
ИМЗ-лэн администрация юртэз
ИМЗ-лэн администрация юртэз
Типез Акционер огазеяськон
Кылдэм арез 1942
Кылдытӥсьёсыз Обороная кун комитет[d]
Интыяськемез Советской Социалистической Республикаослэн Союззы → Россия Ижевск, Россия
Валтӥсь адямиос Марков Николай Владимирович (кивалтӥсь директор)[1]
Удысэз Машиностроение, обороная производство, металлообработка
Поттэм вузэз (бизнес) пӧйшуран, ож но синпель (пужыятэм) тӥрлык, эмъянын кутӥськись тӥрлык
Барышез ▲ 4,5 млрд манет (2015)
Чылкыт барышез ▲ 31 млн манет (2015)[2]
Ужасьёслэн лыдзы > 7000 мурт
Кылдытӥсь компания Ростех
Данъетъёсыз Орден Ленина — 1966
Сайт www.baikalinc.ru
Логотип РУВИКИ.Медиа Медиафайлъёс РувикиМедиа пушкын

«Ижысь механикая завод» АО (ИМЗ АО) — граждан но служебной ожтӥрлык, электро инструмент, упаковкаос лэсьтонъя тӥрлык, мувӧй но газ кыскон тӥрлык, эмъян техника поттӥсь, анданэз шонер кисьтонэн вырись трос профильем промышленной предприятие. Ижкарын интыяськемын. Ыбылӥськон тӥрлык Baikal («Байкал») пус улын потэ. Производствоын валтӥсь инты басьтэ спорт но пӧйшуран пыӵалъёс но пистолетъёс. Россиын потӥсь вань ыбылӥськон пыӵалтӥрлык пӧлысь 86 процентсэ предприятиын лэсьто — арлы быдэ 750 сюрс экземпляр. Со «Ростех  [ӟуч] (удм.» госкорпорацилэн «Калашников» компаниослэн группаязы пыре.

Историез

СССР-ын

Заводлэн совето вакытысь «Иж» гадьпусэз

Ижысь механикая завод кылдытэмын Обороная кун комитетлэн (СССР-ысь ГКО) 1942-тӥ арын 20-тӥ пӧсьтолэзе юнматэм 2067 номеро пуктэтэзъя Тулаысь пыӵалтӥрлык поттон заводысь но Подольскысь механикая заводысь эвакуациен Иже вуттэм цехъёссыз вылын кылдытэмын[3]. СССР-ысь Вооружениея калык комиссарлэн 1942-тӥ арын 21-тӥ пӧсьтолэзе юнматэм лушкем приказэз вылэ пыкиськыса, 74 номеро завод кык нимаз предприятиослы люкемын вал. 74 номеро заводэ винтовкаосты, карабинъёсты но Березинлэсь пулемётъёссэ лэсьтонэз кельтӥзы, нош танкъёслы пумит ПТРД но ПТРС пыӵалъёсты, Наган системаысь револьверъёсты, пистолетъёсты но куд-ог мукет тӥрлык бичанэз нимаз ужась заводлы оскизы, солы нырысь-валысь Союзысь пыӵалтӥрлык поттон 622 номеро кун завод ним сётӥзы, калыкын сое «622 номеро завод» гинэ шуылӥзы, отӥяз «Ижысь механикая завод» луиз[4].

Эвакуациен Иже вуттэм предприятиослэн инъетсы вылын ТТ пистолетъёс, «Наган» револьверъёс, сигнал сётӥсь ракетницаос, Норденфельдлы запал гумыос но ДТ танк пулемётлы шаровой установкаос, танкъёслы пумит ужась пыӵал бичаны кутскизы. 1942-тӥ арын шуркынмонэ 622 номеро завод ас детальёсызлэсь «Наган» револьвер лэсьтыны ӧдъяз. 1942-тӥ арын толсуре завод 4000 револьвер поттӥз. Быдӟым Атыкай ож вакытэ заводын лэсьтэмын: танкъёслы пумит 190 сюрс пыӵалъёс; 900 сюрс пистолетъёс но револьверъёс; 180 сюрс югдытӥсь пистолетъёс[3]. 1944-тӥ арлэн кыкетӥ палараз заводын калык вузъёсты поттон участокъёс кылдытэмын: лопатаос, саникъёс, рычаген ужась безмен, пӧйшуран капкан. Пневматикая пыӵал но пистолет поттон, мотоцикллы ЗИП но мукет тӥрлык поттыны ӧдъязы.

1948-тӥ арын спортъя МЦ пистолетъёсты поттон борды басьтӥськизы. 1949-тӥ арын заводын спорт но пӧйшуран пыӵал поттонъя цехъёс кылдытэмын, 1950-тӥ арын ӵыжатэм модельёсты шонер кисьтонъя цех усьтэмын. 1952-тӥ арын Макаровлэн пистолетъёсыз но Симоновлэн самозарядной карабинэз бадӟым производствое потӥзы[3]. 1954-тӥ арын гурезьёсын но шахтаосын кутӥськись пневматикая тӥрлык поттыны ӧдъязы, 1961-тӥ арын — Иж-Юпитер мотоциклъёслы омырен сӥятӥсь 2 цилиндрен двигательёс, 1966-тӥ арын —автомобильёслы герӟетъёс, обороналы пӧртэм тӥрлык.

1965-тӥ арысен заводын «Москвич» машиналы мышказ мостъёс но кардан валъёс поттӥзы[3].

1966-тӥ арын заводлэн коллективез Ленин нимо орденэн пусъемын. Заводлы пыраклы утён вылысь Горд Знамя сётэмын.

1970-тӥ—1980-тӥ аръёсы калык хозяйстволы электро тӥрлык но мукет арбериос поттонъя производство радъямын вал[5].

Завод В. С. Чугуевский кивалтон вакытэ зол азинскиз — 1980-тӥ арысен 2002-тӥ арын 16-тӥ куарусёнэ кулытозяз. Солэн тыршеменыз трос пумо производствоос кылдытэмын, больницаос, улон юртъёс, школаос, нылпи садъёс пуктэмын.

Росси Федерациын

1990-тӥ арын заводысь ужез быдэсак выльдӥзы, озьы 1994-тӥ арын татын киын ужась электро инструментлэсь нырысетӥ партизэ поттӥзы. 1993-тӥ арысен заводын бадӟым машинаослы компрессоръёс бичаны ӧдъязы[3].

Ижысь механикая завод граждан но служебной ожтӥрлык, упаковка лэсьтон тӥрлык, мувӧй но газ кыскон тӥрлык, эм техника поттэ, анданэз шонер кисьтон бордын ужа. Вузэз калыккуспо регистрация пыр поттэм Baikal пус улын лэсьтӥське. Тужгес трос предприятие пӧйшуран но ожмаськон тӥрлык бича. Заводын 100 пӧртэм пӧйшуран пыӵалъёсты (соос пӧлын МР-27 но), 18 пумо пневматикая винтовкаосты лэсьто. Предприятиын мувӧй но музъемысь корт ваньбур поттон промышленностьлы гироскопической инклинометръёс  [ӟуч] (удм., озьы ик кардиостимуляторъёс потто.

Заводлэн цехъёсыз пӧлын: ожтӥрлыклы пулэсь люкетъёссэ лэсьтон, гумыос лэсьтон, корт ӵыжатон, бичан, эскерон, тупатъян, пулэсь арбериос лэсьтон но мукетъёсыз. Завод ассэ ачиз вань тӥрлыкен узырмытэ, цехъёсын детальёс лэсьто, отӥяз бичан цехын дась тӥрлык пӧрмыто. Заводын пуэн ужанъя туала станокъёс кутӥсько. Озьы ке но заводын 20-тӥ даурлэн кутсконысьтыз немец станокъёс ужало на, соосты Германиысь контрибуция чот вуттӥзы вал. Заводлэн аслаз ТЭС-эз вань, со газэн но мазутэн ужа. Заводлэсь кулэяськонъёссэ тырмытэм сяна, ТЭС матысь улон юртъёсы но шуныт сётэ. Ижысь механикая заводлэн тӥрлыкез быдэс Россиын вузаське, озьы ик мукет кунъёсы экспортэн потэ. Кунгож сьӧрын тужгес но тунсыко луо Леонард Васев нимо пыӵалтӥрлык поттонъя школаысь гравёръёсын лэсьтэм пыӵалтӥрлыкъёс[5][6]. Огез усточи гравёр луэ Белобородов Валентин Михайлович.

2001-тӥ арын заводын уно пумо ог 600 сюрс пыӵалтӥрлык поттэмын. Соос пӧлын — 200 сюрс пӧйшуран тӥрлык.

2012-тӥ арын 17-тӥ толсуре предприятие ФГУП-ысь ОАО луиз[7].

Кузёосыз но кивалтӥсьёсыз

2015-тӥ арысь нырысетӥ паларысь лыдпусъёсъя, «Ижысь механикая завод» АО-лэн ваньмыз акциосыз «Ростех» кун корпорацилэн лыдъясько. 2015-тӥ арын инвожое «Ростехлэн» чаклан кенешез 51 % акциосты Андрей Бокаревлэн, Искандар Махмудовлэн но Алексей Криворучколэн структураязы вузаны бакель сётӥз. Огкыл 2016-тӥ арын нырысетӥ кварталын пытсамын луыны кулэ вал[8].

2022-тӥ арысен директоръёслэн кенешсылэн тӧроез Александр Назаров луэ[9][10]

Предприятилэн директоръёсыз[3]
  • П. А. Сысоев (1942—46);
  • Н. И. Палладин (1946—73);
  • В. М. Плющиков (1973—76);
  • Б. М. Белоусов (1976—80);
  • В. С. Чугуевский (1980—2002);
  • Н. П. Парфёнов (2002—2006);
  • В. Н. Захваткин (2006—2009);
  • А. В. Наточев (2009-тӥ арын южтолэзьысен — 2010-тӥ арын оштолэзёзь);
  • В. А. Майер (2010-тӥ арын гудырикошконысен — 2013-тӥ арын толсурозь);
  • М. Ю. Дорогушин (2013-тӥ арын толсурысен — 2015-тӥ арын тулыспалозь);
  • Александр Капустин (2015-тӥ арын тулыспалысен — 2016-тӥ арын инвожоозь);
  • Александр Гвоздик (2016-тӥ арын инвожоысен — 2019-тӥ арын куарусёнозь);
  • Николай Марков (2019-тӥ арын коньывуонысен).

Ужез

Заводлэн тусыз вылӥысен

Производствоысь лыдпусъёс

2014-тӥ арын предприятилэн табышез 4,081 млрд манет люкаськиз, со дыре ик 22 млн манет чылкыт ыштон адӟиз (музъем кесэгъёсты вылысь лыдъян-дунъянэн, выльдонэн, корректировкаен герӟаськем ужпумъёсты лыдэ басьтыса, предприятилэн чылкыт ыштонэз 3,995 млрд манет луиз)[8][11].

2015-тӥ арлы йылпумъянъёсъя, ИМЗ-лэн поттэм табышез 9,2 процентлы будӥз но 4,5 млрд манет луиз, 2014-тӥ арен ӵошатыса, со 375 млн манетлы уногес. 2015-тӥ арлы йылпумъянъёсъя, чылкыт барышез 31 млн манет луиз, ар талэсь азьло 3,9 млрд манет ыштӥз вал (2014-тӥ арын ваньбурзэ выльдонэн сэрен 22 млн манет ыштонзэ лыдэ басьтытэк). 2015-тӥ арын вузпӧрлэн табышез 171 млн манетозь вуиз, ар талэсь азьвыл 40 млн манет ыштон адӟиз. EBITDA лыдпус 2015-тӥ арын 188 млн манет луиз, 2014-тӥ арысь та лыдпусэз 68 млн манетлы ортчиз. 2015-тӥ арлы йылпумъянъёсъя, ИМЗ 4,1 млрд манет тыр вуз поттӥз, 2014-тӥ арын сярысь, со шӧдскымон будӥз (+20,8 процент). Ижысь механикая завод 2015-тӥ арын 368 сюрс ыбылӥськон тӥрлык поттӥз, 2014-тӥ арен ӵошатыса, со 24,5 процентлы тросгес. 2015-тӥ арын заводын шоро-куспо уждунэз 22 процентлы йылтӥзы но со 25 сюрс манетозь вуиз. Заводын ужазинлык 28 процентлы будӥз, араз одӥг ужасьлы 643 сюрс манетозь вуыса. 2015-тӥ арын ужамзылы йылпумъянъёсъя, Ижысь механикая заводлэн чылкыт активъёсызлэн дунзы 1,8 процентлы будӥз но 1,7 млрд манет луиз.

Туала вуз — пыӵалтӥрлык

Али предприятиын пото:[12]

Вольыт гумыё пыӵал

  • МР-18М кӧня ке модификациен (МР-18М-М, МР-18М-М «Юниор», «Спортинг» амалъя бичам МР-18EМ-М);
  • МР-133;
  • МР-153 (кӧня ке модификациен);
  • MP-155 (выльдэм МР-153)[13];
  • MP-156 (MP-155-лэн инъетэз вылын лэсьтэм инерциен ыбылӥськись пыӵал);
  • МР-27М кӧня ке модификациен но вариантъёсын (МР-27М, МР-27M «Юниор», «Спортинг» амалъя лэсьтэм МР-27EМ-1C, овал кадь винтэн пӧртэм пумо МР-27M);
  • МР-43 кӧня ке модификациен но вариантъёсын;
  • MP-233.

Нарезной но комбинированной пыӵал

  • MP-18МН — одӥг гумыё автомат луисьтэм винтовка (тӥяно кадь);
  • MP-94 «Экспресс» — кык гумыё автомат луисьтэм винтовка (тӥяно кадь);
  • MP-94 «Север» — кык гумыё комбинированной пыӵал (тӥяно кадь);
  • MP-94 «Тайга» — кык гумыё комбинированной пыӵал (тӥяно кадь);
  • MP-94MP — кык гумыё комбинированной пыӵал (тӥяно кадь);
  • MP-161K — полуавтомат винтовка;
  • МР-142К — одӥг гумыё автомат луисьтэм винтовка;
  • МР-143 — Мосинлэн винтовкаезлэн пӧйшуран вариантэз;
  • MP-221 «Артемида» — кык гумыё винтовка (штуцер);
  • ОП-СКС — Симоновлэн самозарядной карабинлэн пӧйшуран вариантэз.

Пистолетъёс но револьверъёс

  • Макаровлэн пистолетэз но солэн модификациосыз (экспортлы чаклам вариантэз BAIKAL-442);
  • Ярыгинлэн пистолетэз но солэн модификациосыз (МР-446 «VIKING», МР-446С «VIKING»);
  • ПСМ (но солэн экспортлы чаклам вариантэз МР-75);
  • спорт пистолетъёс МЦМ, МР-35М, МР-438;
  • револьвер MP-412.

Служебной пистолетъёс

  • MP-71 (1996-тӥ арысен 2008-тӥ арын куарусёнозь ИЖ-71 нимын потӥз) — служебной пистолет, Макаровлэн пистолетэзлэн аналогез, чакламын 9×17 мм патронлы;
  • МР-71Н (2008-тӥ арын куартолэзёзь ИЖ-71-100 нимын потӥз) — 9×17 мм патронлы чаклам служебной пистолет, MP-71 модельлэн аналогез, магазинэзлэн быдӟалаез 10 патрон;
  • МР-471 — служебной травмат пистолет, 10×23 мм Т патронлы чакламын.

Утиськыны чаклам пыӵал

  • МР-461 «Стражник» — сюбег поражениен огнестрельной пистолет (гумытэк пыӵал);
  • МР-79-9ТМ — сюбег поражениен огнестрельной пистолет;
  • МР-78-9ТМ — сюбег поражениен огнестрельной пистолет;
  • МР-80-13Т — сюбег поражениен огнестрельной пистолет;
  • МР-79-8 — газэн ужась пистолет;
  • МР-341 — кык гумыё сюбег поражениен огнестрельной пистолет;
  • МР-353 —сюбег поражениен огнестрельной пистолет.

Бадӟымесь но кужмо пистолетъёслы макетъёс

  • ММГ Р-446 «VIKING».

Пневматикая пыӵал

  • МР-573, МР-574K, МР-512, МР-512М, МР-513М, МР-532, МР-514К, МР-60, МР-61 пневматикая винтовкаос;
  • МР-562К (авт. тылын ыбылӥсь пневматикая ППШ);
  • МР-53М, МР-672, МР-46М, МР-621 пневматикая пистолетъёс;
  • газобаллон пневматикая пистолетъёс МР-651К, МР-654К (пневматикая МР-71Н), МР-655К (вылтусызъя ПЯ-лы укша), МР-656К, МР-661K «DROZD».

Азьвыл поттэм пыӵалтӥрлык

  • ИЖ-34, ИЖ-34М, ИЖ-35, ИЖ-35М — пичи калибръем спорт пистолетлэн модификациез;
  • ИЖ-49, ИЖ-54, ИЖ-58, ИЖ-26, ИЖ-12, ИЖ-81 кык гумыё пыӵалъёс;
  • MP-81 — травмат пистолет.

Предприятилэн мукет вузэз

«Baikal» электрокардиостимулятор имплантацилы дасямын

Калыкын кутӥськись но нимысьтыз вуз:[14]

Киын ужан электроинструмент

  • Перфораторъёс, кужмо дрельёс, маятник выллем лобзикъёс, дискен ужась пилаос, цепен ужась пилаос;
  • Вуштӥсь сэрго машинаос, лентаен ужась вуштӥсь машинаос, рубанокъёс, рубанокъёслы подставкаос.

Упаковка лэсьтон тӥрлык

  • Упаковкалы автоматъёс: АО-111, АО-144;
  • Юрттӥсь тӥрлык: АФ 121.05.00.000, АФ 121.20.00.000, АФ 121.40.00.000;
  • Сериен поттонэ пырисьтэм тӥрлык: ФЛ1, ФЛ2.

Эмъян тӥрлык

  • Электрокардиостимуляторъёс: БАЙКАЛ-332, БАЙКАЛ-SC, БАЙКАЛ-SR, БАЙКАЛ-DDD, БАЙКАЛ-DC, БАЙКАЛ-DR;
  • Программаторъёс: ПРОГРЭКС-05-ИМЗ;
  • Электродъёс: БИП-01-ИМЗ, БИП-02-ИМЗ.

Микроэлектроника

  • Гибрид (зӧк пленкалэсь но векчи пленкалэсь) но полупроводник КМОП-технологиос вылын лэсьтэм микроэлектро арбериос.

Кисьтэм амалъя лэсьтэм вуз

  • Шоро-куспо углеродистой анданэз ӵыжатэ-кисьтэ;
  • Тӥрлыклы ярась анданэз ӵыжатэ-кисьтэ;
  • Легированной но вылӥ легированной луись анданэз ӵыжатэ;
  • Аспӧртэм свойствоосын сплавъёс поттэ.

Геофизикаын кутӥськись тӥрлык

  • ИГМ-73-120/60 М но ИГМ-42-85/60 модельёслы гироскопической инклинометръёс.

Компрессоръёс

  • Автомобильлы 53205-3509015, 53205-3509015-01 компрессоръёс, соос «КАМАЗ» автомобильёслы но ЯМЗ-8000 двигателен ужась транспортлы тормоз сӧзнэтъёсызлы чакламын;
  • 1994-тӥ арысен завод «КАМАЗ» ОАО-лы 53205-3509015 компрессоръёс сериен вуттэ.

Валэктонъёс

  1. ↑ Назначен новый управляющий директор «Ижевского механического завода»
  2. ↑ Ижевский механический завод вышел на чистую прибыль, увеличив выручку на 9,2 %
  3. ↑ 1 2 3 4 5 6 Ижевский механический завод / Перевощиков Л. А. // Удмуртская Республика : Энциклопедия / гл. ред. В. В. Туганаев. — 2-е изд., испр. и доп. — Ижевск : Издательство «Удмуртия», 2008. — С. 355—356. — 768 с. — 2200 экз. — ISBN 978-5-7659-0486-2.
  4. ↑ Выписка из Приказа Народного комиссара вооружения СССР № 375 сс от 21 июля 1942 года
  5. ↑ 1 2 История создания и ход развития завода Эскеремын 2012-04-24 арын
  6. ↑ История создания и ход развития завода часть II Архивная копия от 5 куартолэзе 2012 на Wayback Machine
  7. ↑ Раскрытие информации — официальный сайт завода Эскеремын 2013-04-18 арын
  8. ↑ 1 2 Егор Попов, Иван Сафронов. «Ростех» сдает табельное оружие Архивная копия от 11 пӧсьтолэзе 2015 на Wayback Machine // Коммерсантъ, № 120 (5630), 09 июля 2015
  9. ↑ Назаров Александр Юрьевич - Заместитель директора - Биография [ӟуч]
  10. ↑ Александр Назаров: биография топ-менеджера Ростеха
  11. ↑ «Ижмех» в 2014 году сократил чистый убыток почти в 9 раз Архивная копия от 11 пӧсьтолэзе 2015 на Wayback Machine // Udm-Info (Удмуртия), 07 апреля 2015
  12. ↑ Перечень выпускаемого оружия на сайте производителя Эскеремын 2011-02-23 арын
  13. ↑ Описание самозарядного охотничьего ружья МР-155 Эскеремын 2011-09-28 арын
  14. ↑ Гражданская и узкопрофильная продукция предприятия Архивная копия от 22 оштолэзе 2012 на Wayback Machine

Литература

Чӧлсконъёс

«https://udm.ruwiki.ru/w/index.php?title=Ижысь_механикая_завод&oldid=507598»-ысь басьтэмын