Ганьков, Геннадий Николаевич
| Геннадий Николаевич Ганьков | |
|---|---|
 | |
| Вордӥськем нуналыз | 1-тӥ куартолэзе 1962 (64 года) |
| Вордӥськем интыез | |
| Кунмуртлыкез | |
| Ужудысэз | кырӟась, композитор |
Генна́дий Никола́евич Ганько́в (ворд. 1-тӥ куартолэзе 1962, Ӟуння, Удмурт Автономной Советской Социалистической Республика) — совето но росси крезьгурчи, удмурт кылын кырӟанъёс гожъясь но быдэстӥсь. Удмурт Элькунысь калык артист, Айво Иви нимо литературая премилэн лауреатэз.
Улон сюресэз
Вордӥськиз 1962-тӥ арын 1-тӥ куартолэзе Удмурт АССР-ысь Алнаш ёросысь Ӟуння (ӟуч: Старая Юмья) гуртын[1]. Ньыль пиналъёс пӧлысь бадӟымез вал[2][3]. Дышетскиз Байтэрек шор ёзо школаын. 4-тӥ классын дыръяз ас понназ арганэн шудыны йӧндыриз[4]. 8-тӥ классэз йылпумъямез бере Можгаысь заводын тыршиз, отӥяз армиын службазэ нуиз[5].
Удмуртие берытскыса, Лулчеберетъя элькун училищеысь хорен дирижировать карон ёзэтэ дышетскыны пыриз. Сое йылпумъямез бере Можга ёросысь Вуж Березняк СДК-е калык хоре чеберлыкъя кивалтӥсь сямен ыстэмын вал[6], 1984-тӥ арысен 1991-тӥ арозь гурт клубен кивалтӥз. Татын ик Геннадий Ганьков кылдытӥз вокалъя но крезьгуро тӥрлыкен шудонъя ансамбль, вокалъя нылкышно но пиосмурт коллективъёс[7]. Солэн кивалтэмез улсын хор быдэс элькунлы тодмо луиз, нош ассэ Ганьковез Айво Иви нимо литературая премиен сӥлы каризы[1].
Отӥяз со Ижкаре выжыяськиз но «Октябрь» лулчеберетъя двореце администраторе уже интыяськиз[5]. 1992-тӥ арын 1-тӥ коньывуонысен профессиональной сцена вылын кырӟа. Огаз интервьюаз вералляз:
Анатолий Ушаков коллективаз ӧтиз. Шуиз: али ик дасяськы гастрольёсы потыны, сьӧрад кут пинь миськон паста, щётка, ӵушкон, ӵаша но пуньы. Со нуналэ ик «Шулдыр ӝытэн» ӵош Балезино ёросэ концертэн потӥ[7].
Собере Геннадий Ганьков «Лулгур» ансамбле выжиз, со куашкам бере Удмурт кун филармоние ужаны куриськиз, татын аслэсьтыз концерт группазэ кылдытӥз[6]. Удмуртиетӥ гастрольёсы ӵемысь пота, огназ но концертъёс сётъя[4].
«Котьмалэсь мусогес» нырысетӥ кырӟанзэ Ганьков Вуж Березняк СДК-ен кивалтон вакытаз гожтӥз[3]. 1997-тӥ арын со аслаз кырӟанъёсыныз «Чебере мынам, мусое» диск поттӥз. Гурзэ ачиз ик ӵемысь пуктэ но гожтэ, нош кырӟанлы кылбуръёсты удмурт бичетъёсысь утча-шедьтэ. 2022-тӥ арын ивортонъёсъя, со сю пала кырӟан малпаз ни[4].
Семьяез
Геннадий Ганьков студент вакытаз ик кышнояськиз. Светлана кузпалыз но Лулчеберетъя элькун училищеез йылпумъямын.
Нылыз — Анастасия, Удмурт кун университетысь кунгож кылъёсъя факультетэз йылпумъяз, англи кыллы дышетэ[5].
Данъетъёсыз но дано нимъёсыз
- Удмурт Элькунысь калык артист;
- Айво Иви нимо литературая премилэн лауреатэз[1].
Валэктонъёс
- ↑ 1 2 3 Ганьков Геннадий Николаевич [ӟуч] services.unatlib.ru. Эскеремын 08.10.2025 арын
- ↑ Светлана Кибардина Геннадий Ганьков в кругу семьи (2015 год) [удм.] Rutube. Эскеремын 08.10.2025 арын
- ↑ 1 2 Ольга Никитина (16.07.2004) Ганьков Геннадий Николаевич [удм.] Воршуд. Эскеремын 08.10.2025 арын
- ↑ 1 2 3 Ю. Шмелёва (01.08.2022) Геннадий Ганьков: «Себя считаю юношей в годах» [ӟуч] Вперёд. Эскеремын 08.10.2025 арын
- ↑ 1 2 3 50 аресэлы — 50 кырӟан [удм.] Удмурт дунне (27.04.2012). Эскеремын 08.10.2025 арын
- ↑ 1 2 Нина Пузанова (10.04.2007) Тёплый ветер с Алнашей [ӟуч] finugor.ru. Эскеремын 08.10.2025 арын
- ↑ 1 2 Валентина Богатырёва (02.11.2017) Геннадий Ганьков [ӟуч] Авангард. Эскеремын 08.10.2025 арын
Литература
- Удмуртская Республика. Культура и искусство: энциклопедия / А. Е. Загребин. — Ижевск: Удмуртский институт истории, языка и литературы УрО РАН, 2014. — С. 126. — 583 с. — ISBN 978-5-498-00266-8.
- Алнаши – сердцу добрый свет/Шунды яркыт пиштэ Алнаш вадьсын / Иванов И. З.. — Ижевск: Удмуртия, 2004. — С. 259. — 300 с. — 3000 экз. — ISBN ISBN 5-7659-0228-6.
Чӧлсконъёс
