Вуж Выль ар Россиын

Википедиысь материал
Вуж Выль ар
Ряженые.jpg

Вуж Выль ар Росси́ын — дырпусъя вуись юнматымтэ[1] светской праздник. Россиын революцилэсь азьпал ик пусйиське, 14-тӥ толшоре выжон уе[2]. Со кунлэн григориан дырпусэ выжеменыз герӟаськемын. Выль дырпусъя 1-тӥ толшор дас куинь нуналлы вазьгес вуэ[3].

Кылдэмез

Византи вапумлэсь азьпал Вашкала Русьын Выль арлэсь кутсконзэ южтолэзе пусйылӥзы. Византилэн улсатэмезъя но черке пыртэм бере, X дауре Русьын арлэсь кутсконзэ куарусёнысен лыдъяллязы.1505-тӥ арын Черк Собор выль арез 1-тӥ куарусёнэ юматэм дырысен XV даурозь огдыре кыкез ик кабез кутӥськиз. Пётр I реформаезъя, дырез «Христос вордскем дырысен» лыдъяны кутскизы (отчыозь «дунне кылдэм дырысен» лыдъяллязы). Соку ик официально выль арлэсь кутсконзэ 1-тӥ толшорысен лыдъяны кутскизы, кылдӥзы Выль ар пумитан сям-йылолъёс[3][4].

Христианстволэн малпамезъя, Выль арез Ымусьтон бере пумитан туж умой дыр, малы ке шуоно, оскись калык Ымусьтон азьын кема дыр ӵоже кӧсуте. Со вакыт шулдыръяськонъёс но кӧё-вӧё сиёнъёс алэмын. Со сяна, 1-тӥ толшоре курадӟытэм Вонифатиез буре ваё, со муотэс юонлэсь уте, соин ик оскись муртъёс Выль арез кудӟытӥсь юонъёсын пумитанлы пумит луо. Ымусьтонысен Йӧвылэсултонозь вожодыр кыстӥське. Та вакытэ ортчытӥськись Выль ар шулдыръяськонъёс христиан кабъёслы пумит уг луо[4][5].

СССР

1918-тӥ арын Совнарком юлиан дырпусысь григориан дырпусэ выжон реформа ортчытӥз. Соин сэрен 13 нуналъем пӧртэмлык кылдӥз. Совето тӧрлык черк праздникъёслы пумит луэмен, Ымусьтонэз «вуж стилья» пусйылӥзы, Выль арез 14-тӥ толшоре выжон уе выжтӥзы — юлиан дырпусъя 1-тӥ толшорлы тупа[3]. XXII даурозь эшшо одӥг уй-нунал йылоз, соин Вуж Выль арез пусъён дыр 15-тӥ толшоре выжон уйлы тупалоз[1].

1980-тӥ аръёсы экранъёс вылэ потӥз Михаил Рощинлэн пьесаезъя Наум Ардашниковлэн но Олег Ефремовлэн «Старый Новый год» сатирической комедия жанрен пуктэм совето телефильмзы.

Туала вакыт

Та праздник ужгес паськыт вӧлмиз 2000-тӥ аръёсы[6].

Россиын Вуж Выль арез тросэз семьяос кузьымъёсын но ӝӧквыл тыр сиён-юонэн пумитало. Куд-ог лулчеберет юртъёсын но музейёсын нимысьтыз адӟытонъёс дасяло[7][8][9]. Кылсярысь, Москваын Чайковскийлэн консерваторияз 14-тӥ толшоре, котьку сямен, праздниклы сӥзем концертъёс ортчыло[10].

2024-тӥ арын ВЦИОМ-ен ортчытэм юалляськон Россиын та праздникез сӥлы карисьёслэн лыдзы кулэсме шуыса возьматӥз. 15 ар талэсь азьпал, 2009-тӥ арын сое 67 % палаез пусйиз ке, 2024-тӥын— 54 % гинэ. Вуж Выль арез пумитаны чылкак пумит луисьёслэн лыдзы 27 % -сен 39 %-тозь йылӥз. Арлыдзыя учконо ке, егитиъёс пӧлын та праздникез пусйисьёс трослы ӧжытгес[2].

Сям-йылолъёс

Основная статья: Вожодыр (удмурт сям-йылолъёс)

Вожодырлы тупась Вуж Выль арез пумимтан сямъёс Ымусьтон йылолъёсын огкадесьгес луо. 13-тӥ толшоре инмарлы оскисьёс Васильевской ӝытэз ортчыто, соку ӝӧк вылэ пӧртэм пумо сӥль пукто: парсь сӥль — байлыко луон понна, кролик сӥль — ужъёс азинлыко мед мынозы шуыса, нош атас сӥлез — эрико луон понна. Озьы ик нап йӧлын пӧзьтэм вӧйын ӝук —кутья ӝӧк вылэ пукто. Ӝукез азьпал улонэз тунан понна но куто, кылсярысь, ӵукна со ӝукъя учко, макем секыт лоуоз вуисез ар[1].

Куд-ог улосъёсын витьымтэ кузьымъёсын пельнянь куто. Котькуд кузьымлэн аслаз валатонэз. Кылсярысь, зундэс — кузпалъяськонлы, уксё — узырмонлы, фасолькӧжы — нылпи вордӥськонлы, сӥньыс — сюреслы[11].

Ачиз шулдыръяськон вожояськонлы тупа. Та вакытэ ульчаос кузя тодмантэм дӥсяськыса, вожоос ветло, ӝукен куноято, тунасько[4][1].

Православной черк Вуж Выль арез уг пусйы, но 14-тӥ толшоре (вуж стилья 1-тӥ толшоре) РПЦ Василий Великийез, Каппадокийской Кесариысь архиепископез, буре вае. Вӧсьлыко Василий осконтэм йӧнатыны быгатэменыз тодмо луэ, со понна сое христианъёс гинэ ӧвӧл, иудейёс но язычникъёс сӥлы карылӥзы[12].

Калык чакланъёс

14-тӥ толшоре куазья быдэс арлэсь кыӥе луонзэ тунало: тӧл лымшорысь ке пельтэ — арез пӧсь но ӟеч луоз. Шундыпуксён палась ке — йӧл но чорыг трос луоз. 13-тӥысь 14-тӥе выжон уе инмын кизилиез трос ке — ар емышо луоз[13].

Мукет кунъёсын

Основная статья: Вуж Выль ар

Вуж Выль арез, Россиын сяна, пусъё азьвыл СССР-лэн кунъёсаз, Сербиын, Черногориын, Алжирын, Тунисын, Мароккоын, Япониын, Швейцарилэн немец кылын вераськись люкетъёсаз. Но котькуд интыын та нунал ас сяменыз нимаське. Кылсярысь, Швейцариын Вӧсьлыко Сильвестрлэсь вуж нуналзэ пусъё. Маскарад костюмъёс дӥсяса, адямиос ог-огзэс Выль арен ӟечкылало. Сербиын но Черногориын та нуналэз Покчи Рождество шуо[12].

Валэктонъёс

  1. ↑ 1,0 1,1 1,2 1,3 Конюхов, «Вокруг света».
  2. ↑ 2,0 2,1 Переход года, Коммерсантъ (13 толшоре 2024). Дата обращения: 26 толшоре 2024.
  3. ↑ 3,0 3,1 3,2 Викторов В. Этот Новый год. Нешуточные страсти по календарю // ГЕО : журнал. — 2003. — Толсур (№ 12). — С. 125.
  4. ↑ 4,0 4,1 4,2 Косяков В. На встречу с чудом // ГЕО : журнал. — 2002. — Толшор (№ 1). — С. 127.
  5. РБК.
  6. ↑ Калачева Ольга. Празднование как индикатор социальных изменений: старые и новые праздники постсоветской России // Телескоп: журнал социологических и маркетинговых исследований. — 2003. — № 1.
  7. ↑ Соловьева Мария Как появилась традиция праздновать Старый Новый Год?
  8. ↑ Куда сходить на Старый Новый год в Москве 2024: 19 лучших мероприятий 13 и 14 января для детей и взрослых. Дата обращения: 26 толшоре 2024.
  9. ↑ Старый Новый год в Соборе. «Времена года. Метель. Чайковский, Рахманинов, Свиридов»
  10. ↑ Старый Новый год в Московской консерватории. Дата обращения: 26 толшоре 2024.
  11. ↑ Плешаков В. Как встречать Старый Новый год? 3 интересные традиции, которые можно взять на заметку
  12. ↑ Lenta.ru.
  13. Комсомольская правда.

Литература

«https://udm.ruwiki.ru/w/index.php?title=Вуж_Выль_ар_Россиын&oldid=243692»-ысь басьтэмын