Вуж Выль ар

Википедиысь материал

Вуж Выль ар (ӟуч Ста́рый Но́вый год) — Выль ар юлиан дырпусъя (вуж стилья).

Выль ар вуж стилья вуэ 31-тӥ толсурысь (13-тӥ толшорысь) 1-тӥ толшоре (14-тӥ толшоре) выжон уе. Кылтэчет ог-огзылы пумит луись кылъёслэсь кылдэмын. Неофициальной праздник, пусйиське кунъёсын, кудъёсаз Рождествоез черк юлиан дырпусъя пусъе 25-тӥ толсуре (7-тӥ толшоре). Озьыен, «Вуж Выль арлэн» дырыз тупа юлиан дырпусъя вуись Выль арлэн дырызлы. Праздниклэн кылдэмез герӟаськемын кык муген, нырысетӥез ― дырпусъя Рождество Выль ар азьын луыны кулэ, кыкетӥез ― православной черкын григориан дырпусъя вуись Выль арлы Толсур кӧсутён вакыт тупа, кудӥз кӧё-вӧё сиськемлэсь но мултэс шулдыръяськонъёслэсь алэ.

Кытын пусйиське

Юлиан дырпусъя Выль арез пусъё азьвыл совето но куд-ог мукет кунъёсын. Кылсярысь, со Серб православной черклы улсатэм улосвылъёс — Уйпал Македония, Сербия но Черногория. Со сяна, Румыниын, Швейцарилэн ог люкетаз но Уэльсын, нош Шотландиын со 12-тӥ толшорлы тупа. Та нуналэ ик пусъё куд-ог африкан калыкъёс но[1].

Вуж Выль ар кунъёсын

Россия

Основная статья: Вуж Выль ар Россиын

30-тӥ толсуре 1699-тӥ арын — Пётр I косэтэзъя Россиын арлэн кутсконэз юлиан дырпусъя 1-тӥ куарусёнысь 1-тӥ толшоре выжтэмын вал[2]. Нош Вуж Выль арез пумитан сям кылдӥз 1918-тӥ арын, григориан дырпусэ выжем бере[3], солы луыса, юлиан дырпусъя вуись 1-тӥ толшор григориан дырпусъя 14-тӥ толшорлы тупаны кутскиз. Статистикая, Вуж Выль арез 60 % пала россиянъёс пусъё, 40 аресозь егитъёс пӧлын со процент бадӟымгес луэ[4].

Ӟуч православной черк Вуж Выль арлэн нырысетӥ нуналаз Василий Великиез буре вайылэ но Обрезание Господне праздникез пусъе. Черкын та нунал арлэн кутсконэныз уг лыдъяськы, со 1 (14) куарусёнэ пусйиське.

Азьвыл СССР

СССР куашкам бере, Россиын сяна, Вуж Выль арез пумитан сям кылемын азьвыл совето кунъёсын но: Белоруссия, Казахстан, Украина, Грузия, Молдавия, Армения, Киргизия, Азербайджан, Узбекистан (улӥсьёс пӧлысь 40 % палаез), Прибалтикаысь православной калык но азьвыл СССР-ысь дальней зарубежье кунъёсы улыны кошкемъёс.

Азьвыл Югославия

Вуж Выль арез озьы ик пумитало Сербиын но Черногориын. Сербъёс сое «Серб Выль ар» яке «Покчи Рождество» шуыса нимало, Черногориын «Шонер Выль ар» ним сётӥллям[5]. Вуж выль арез пусъён сямзы вань Уйпал Македониын но. Серб Республикаын (Босния но Герцеговина люкетъёсаз) 14-тӥ толшор шутэтскон нуналэн ялэмын[6].

Швейцария

Юлиан дырпусъя Вуж Выль арез (Вӧсьлыко Сильвестрлэн нуналыз нем. Alter Silvester) озьы ик пусъё Швейцарилэн немец кылын вераськись люкетъёсаз. Россиен ӵошатыса, татын со черклэн ӧвӧл, калыклэн григориан дырпусэ выжонлы пумит луэмезлэн пытьыез луэ (Швейцариын со выжон XVII—XVIII дауръёсы ортчиз).

Алжир, Марокко, Тунис

Берберъёс Выль арез бербер дырпусъя пумитало. Со дырпус туж матын луэ юлиан дырпуслы. Алжирын Выль арзы 12-тӥ толшорлы тупа. Алжирысь президентлэн 2017-тӥ арын 27-тӥ толсуре гожтэм Косэтэзъя, 12-тӥ толшор шутэтскон нуналэн ялэмын[7]. Мароккоысь, Алжирысь но Тунисысь берберъёслэн Вуж Выль арзы Еннаер (Yennayer) шуыса нимаське, асьме кылэ берыктыса, «марокканской Выль ар»[5].

Япония

Япон Вуж Выль ар (яп. 旧正月 кю:сё:гацу) — со «риссюн» (яп. 立春) праздник, тулыслэн кутсконэз (озьы ик китай гурт возёс дырпуслэн кутсконэз)[8].

Огъя лулчеберетын

  • Михаил Рощинлэн «Старый Новый год» пьесаез (1967).
  • Андрей Вознесенскийлэн «Старый Новый год» кылбурез (1975).
  • Олег Ефремовлэн но Наум Ардашниковлэн «Старый Новый год» художественной фильмзы (1980, СССР, Михаил Рощинлэн пьесаезъя пуктэмын).

Валэктонъёс

  1. ↑ Конюхов А. Постсоветский оксюморон: что такое старый Новый год
  2. ↑ Старый Новый год: история, традиции, приметы Старый Новый год: история, традиции, приметы
  3. Декрет СНК гласил: «Первый день после 31 января этого года считать не 1-м февраля, а 14-м февраля, второй день считать 15-м и т. д.» (О введении западно-европейского календаря // Собрание узаконений и распоряжений рабочего и крестьянского правительства. П., 1918, № 19, ст. 289).
  4. ↑ Старый Новый год: суть и традиции уникального праздника, РИА Новости (9 толшоре 2025). Дата обращения: 9 толшоре 2025.
  5. ↑ 5,0 5,1 История старого Нового года в России - ТАСС, TACC. Дата обращения: 9 толшоре 2025.
  6. ↑ 14.ЈАНУАР НЕРАДНИ ДАН
  7. ↑ Yannayer, le 12 ou le 14 janvier? Архивная копия от 20 толсуре 2014 на Wayback Machine, LA DÉPÊCHE DE KABYLIE, 2006-01-15.
  8. ↑ Делби, Лайза Крифилд, «Гейша» (Vintage, 2000, с. 124)

Чӧлсконъёс

(ӟуч)

(англи)

«https://udm.ruwiki.ru/w/index.php?title=Вуж_Выль_ар&oldid=243577»-ысь басьтэмын