Попов, Анатолий Архипович

Рувикиын таӵе фамилиен мукет муртъёс сярысь гожтосъёс вань. Учке: Попов.

Анатолий Архипович Попов
Вордӥськем дырыз	12-тӥ толшоре 1925(1925-01-12)
Вордӥськем интыез	Митрошата гурт, Вотской автономой область (Удмуртия), РСФСР, СССР
Кулэм дырыз	14-тӥ шуркынмонэ 1958(1958-11-14) (33 арес)
Кулэм интыез	Ижкарын, Удмурт АССР, РСФСР, СССР
Кунмуртлыкез	СССР СССР
Кыӵе войскоез	артиллерия
Служить карон аръёсыз	1943—1946
Званиез	сержант
Частез	• Степной фронт  • 16-тӥ артиллерийской дивизилэн 1429-тӥ капчиятэм артиллерийской полкез
Ожмаськонъёс/ожъёс	Быдӟым Атыкай ож
Данъетъёсыз

Анатолий Архипович Попов (1925-тӥ арын 12-тӥ толшоре Митрошата гуртын—1958-тӥ арын 14-тӥ шуркынмонэ Ижкарын) — совето ожгаруж быдэсъясь. Быдӟым Атыкай оже пыриськем мурт. Совето Союзлэн Героез (1945). Сержант.

Улон сюресэз

Вордӥськиз 1925-тӥ арын 12-тӥ толшоре Глаз уездысь Митрошата гуртын (Вотской автономной область, РСФСР СССР, али дыре Удмурт Элькунысь Юкаменск ёросысь гурт) удмурт крестьян семьяын. Юкаменскысь ньыль классъем школаез йылпумъямез бере, Глазысь фабрично-заводской дышетонъя школаын дышетскиз. Собере кӧня ке Глазысь чугун сюрес станциын ужаз но вордӥськем гуртаз берытскиз. Армие басьтытозязы колхозын ужаз.

1943-тӥ арын, Юкаменск ёрос военкомат ыстэмъя, Горд Армие кошкиз. Отын ик вакчи дыр куспын артиллерийской курсъёсты ортчиз, артиллери орудилэн наводчикез луиз. 17-тӥ гудырикошконысен Степной фронтын миномётчик луыса ожмаськиз. Белгородско-Харьковской но Полтавско-Кременчугской операциосы пыриськиз. Сӧсырмыса но ож лудысь ӧз кошкы. Днепродзержинсклэсь уйпалангес плацдарм понна ожъёсын кыкетсэ сӧсырмыны шедиз. Госпитальын йӧнатскемез бере 2-тӥ Украин фронтысь Вылӥ Главнокомандованилэн прорывъя Резервезлэн 16-тӥ артиллерийской дивизиезлэн 49-тӥ капчиятэм бригадаезлэн 1429-тӥ капчиятэм артиллерийской полказ выжтӥзы. Со полк Резина кар котырын Днестр шур ласянь оборонаез возиз. Артиллерийской расчёт, кудаз наводчик луыса ожмаськиз младший сержант А. А. Попов, Бузэу кар котырын Ясско-Кишинёвской операциын висъяськиз. 1944-тӥ арын 28-тӥ гудырикошконэ прямой наводкаен 2 тушмон бронетранспортёрез, 18 тыро повозкаез пушкытӥз но 19 солдат-офицерез быдтӥз, 5-сэ пленэ басьтӥз.

Румыниез мозмытэм бере, 6-тӥ коньывуонэ 2-тӥ Украин фронтысь ожгарчиос Дебреценской операциез кутскизы, соин валче "Юг" группаысь армиосты пазьгизы, Румыниен но Венгриен висгожез ортчыса, ожъёсын Тиса шурез выжизы. Озьы солэн шундыпуксёнпал ярдураз плацдармъёсты киултыса, асьме войскоослы шонерак Будапешт вылэ потыны луонлык кылдытӥзы. 27-тӥ коньывуонэ 16-тӥ артиллерийской дивизилэн 1429-й артиллерийской полкез Караеней венгер черкогурт палтӥ Тиса шурез выжиз (али дыре Тисайенё (Tiszajeno) шуыса нимаське) но отысь плацдармез киултӥз. Совето войскоосты венгер интывылысь пазьгыны турттыса, немец командование контрударъёс вылэ выжиз. Броня вылаз интыяськем десантникъёсын 5 танк но 2 бронетранспортёр меӵак А. А. Поповлэн орудиез вылэ вырӟиз. Кык час пала кыстӥськись лек ожмаськонын асьме артиллеристъёс 3 шоро-куспо танкез, 1 бронетранспортёрез, 1 противотанковой орудиез но 40 пала солдат-офицерез быдтӥзы, озьы тушмонэз берлань чигнатӥзы. 28-тӥ коньывуонэ немец выльысь атакае ӝутскиз. Соку но, 1 самоходной артиллерийской установказэ, 2 противотанковой орудизэ, 2 пулемётсэ но ог дасо солдатъёссэ ыштыса, выльысь чигнано луиз.

29-тӥ коньывуонэ 2-тӥ Украин фронтысь ожгарчиос Будапешт операци улсын наступление потӥзы. Асода карез басьтыку, А. А. Поповлэн расчётэз сэзь ожмаськеменыз висъяськиз. Аслаз подразделениез куспын со ваньмызлэсь азьпал каре вуиз но урам ожмаськонын тушмонлэсь 75-миллиметровой орудизэ, прислугаеныз валче, 3 пулемётной точкаоссэ, 2 миномётсэ но ог куамыно солдат-офицерзэ быдтӥз. Немецко-венгерской войскоос, ыштэм позициоссэс берыктыны турттыса, контрнаступление потӥзы. Соку асьмелэнъёс берпум снарядзы бырытозь тушмон шоры ыбылӥзы. Боезапасъёссы бырем бере, сержант Попов расчётсэ киын ожмаськонэ ӝутӥз. Лек ожъёсын валче, тушмон чигнатэмын вал. Анатолий Попов со ожын ачиз 4 немец солдатэз вииз но кыксэ пленэ басьтӥз. Совето стрелковой подразделениослэн азьнапал наступлениосазы, Дунай шурез ожъёсын потыку, 1429-тӥ капчиятэм артиллерийской полкысь артиллеристъёс зол юрттӥзы. 1945-тӥ арын 17-тӥ толсуре сержант А. А. Попов секыт сӧсырмыны шедиз. 28-тӥ оштолэзе, командованилэсь боевой заданиоссэ ӟеч быдэсъямез но геройлыко ожмаськемез понна, сержант Попов Анатолий Архипович, СССР-ысь Вылӥ Кенешлэн Президиумезлэнн Косэтэзъя, Совето Союзлэн Героез дано нимын пусъемын.

1946-тӥ арын, демобилизовать карем бере, А. А. Попов вордӥськем палъёсаз берытскиз. Огдыр ӵоже Митрошата гуртаз улӥз, собере Ижкаре улыны выжиз. Фронтын тазалыкез лябӟемен, 33 аресказ, 1958-тӥ арын 14-тӥ шуркынмонэ улонысь кошкиз. Ватэмын Ижкарысь нагорной шайвылын.

Данъетъёсыз

• «Зарни Кизили» медаль (28.04.1945);
• Ленин орден (28.04.1945);
• 3-тӥ степенё Слава орден (06.11.1944);
• Горд Кизили орден (18.09.1944);
• медальёсыз.

Буре ваён

• Удмурт Элькунысь Юкаменское черкогуртын Совето Союзлэн Героезлы сӥзьыса, Мемориал пул пуктэмын.
• Совето Союзлэн Героезлэн нимыз Ижкарысь Ялан ӝуась тыл азьысь Мемориал стелаын гожтэмын.
• Юкаменск ёросысь Жувам гуртын Геройлэн бюстэз пуктэмын.

Валэктонъёс

Литература

• Герои Советского Союза: Краткий биографический словарь / Пред. ред. коллегии И. Н. Шкадов. — М.: Воениздат, 1988. — Т. 2 /Любов — Ящук/. — 863 с. — 100 000 экз. — ISBN 5-203-00536-2.
• И. Г. Кулёмин, Л. Ф. Сентемова, Р. А. Ислентьева. Герои Советского Союза — наши земляки. — Устинов: Удмуртия, 1985. — С. 122—123. — 212 с.
• Кулёмин И. Г. , Сентемова Л. Ф. , Ислентьева Р. А. Герои Советского Союза, Герои Российской Федерации, полные кавалеры Ордена Славы — наши земляки. — Ижевск: Удмуртия, 2005. — 272 с. — ISBN 5-7659-0639-7.
• Бушмелев Н. С. Память огненных лет : к 60-летию победы совет. народа в Великой Отечеств. войне 1941-45 годов. — Глазов, 2005. — 163 с.

Ужкагазъёс

• Общедоступный электронный банк документов «Подвиг Народа в Великой Отечественной войне 1941—1945 гг.» Эскеремын 2012-11-09 арын

Представление к званию Героя Советского Союза Эскеремын 2012-11-09 арын

Справка о числе представленных к награждению по 2-му Украинскому фронту Эскеремын 2012-11-09 арын

Указ Президиума Верховного Совета СССР о присвоении звания Героя Советского Союза Эскеремын 2012-11-09 арын

Орден Красной Звезды (наградной лист и приказ о награждении) Эскеремын 2012-11-09 арын

Орден Славы 3-й степени (наградной лист и приказ о награждении) Эскеремын 2012-11-09 арын

Чӧлсконъёс

• Попов Анатолий Архипович на www.az-libr.ru Эскеремын 2012-11-09 арын