Ураськин, Андрей Иванович
| Андрей Иванович Ураськин | |
|---|---|
 | |
|
| |
|
Удмурт Элькунысь Кун Кенешысь лулчеберетъя, туризмъя но йӧскалык политикая комиссилэн тӧроез
|
|
| 2022-тӥ арысен — али дырозь | |
|
|
|
| Вордӥськемын |
2-тӥ пӧсьтолэзе 1960 (66 лет) |
| Дышетскемез | |
| Данъетъёсыз | |
Андре́й Ива́нович Ура́ськин (ворд. 2-тӥ пӧсьтолэзе 1960, Вуж Бӧдья, Удмурт Автономной Советской Социалистической Республика) — росси кун но мерлыко ужась. Удмурт Элькунысь Кун Кенешысь лулчеберетъя, туризмъя но йӧскалык политикая комиссилэн тӧроез. Вань удмуртъёслэн «Удмурт Кенеш» ассоциацизылэн тӧроез. Удмуртиысь дано артист, Россиысь лулчеберет удысысь дано ужась.
Улон сюресэз
Вордӥськиз 1960-тӥ арын 2-тӥ пӧсьтолэзе Удмурт АССР-ысь Кизнер ёросысь Вуж Бӧдья гуртын[1][2][3][4]. Школаын дышетскыкуз ик, гуртысь мунё театрын шудӥз, артысь ёросъёсы постановкаосын потаз. Школаез йылпумъян араз газетысь ялон адӟиз: Уфаысь искусствоосъя кун институт абитуриентъёсты вите. Конкурс пыр потӥз. Йӧскалык студиын драмая театрысь но киноысь актёрлы дышетскиз[4][5].
Ужез
Дышетсконзэ йылпумъямез бере 1981-тӥ арын кутӥзы Удмурт драмая театрлэн труппаяз. 1982-тӥ арысен Казах ССР-ысь Семипалатинскын ожгар службазэ нуиз[4][1].
1983-тӥ арын Удмуртие бертыса, Вуж Бӧдья гуртысь клубе чеберлыкъя кивалтӥсь луыса ужаны кутскиз, но кӧня ке толэзь ортчем бере Удмурт драмтеатре берытскиз[3][6].
1989-тӥ арын Геннадий Бекманов, Александр Баймурзин, Евгений Андреев но Леонид Баженов ужъюлтошъёсыныз но эшъёсыныз «Катанчи» театр кылдытӥз. Нырысетӥ адӟытонзы Дэри ёросысь Шабердӥ гуртын ортчиз. Ар ӵоже Ураськин кык театръёсын ужаз, отӥяз быдэсак «Катанчие» выжиз — солэн кивалтӥсез но, артистэз но вал[4][1].
2002-тӥ арын Андрей Ураськин Кун службая Урал академиын «Кун но муниципал кивалтон» ӧнеръя кыкетӥ вылӥ образование басьтӥз[1][7][5].
2004-тӥ арын Удмурт Элькунысь йӧскалык кун театрлы (азьвыл Удмурт драмая театр) директоре юнматӥзы[1].
Кизнер ёросысь депутатъёслэн кенешсылэн витетӥ ӧтчамаз[5], озьы ик Удмуртиысь Кун Кенешлэн витетӥ но куатетӥ ӧтчамъёсаз депутатэ бырйиськылӥз[2].
2022-тӥ арын Удмуртиысь Кун Кенешысь лулчеберетъя, туризмъя но йӧскалык политикая комиссилэн тӧроез луиз[8][6], таин валче театрлэн директорез ужинтызэ мозмытӥз[2][3].
«Единая Россия» партилэн ёзчиез[6].
Мерлыко ужез
Удмурт драмая театрын Андрей Ураськин комсомол огазеяськонлэн секретарез вал. Собере райком но обком бюроосын ужаз. Удмурт егитъёсын «Шунды» мерлыко огазеяськонэз кылдытонэ но солэн ужаз пыриськиз. 2000-тӥ арысен удмурт лулчеберетъя «Дэмен» oгазеяськoнлэн правлениезлэн ёзчиез вал, отӥяз кӧня ке ар ӵоже огазеяськонэн кивалтӥз[4][9]. Со вакытэ ик УР-ысь Мерлыко палаталэн ёзчиез вал[10].
2022-тӥ арын толсуре вань удмуртъёслэн «Удмурт Кенеш» ассоциацизылэн азьвыл чакламтэ йылпумъянъёсъя но быръёнъёсъя конференциязы Андрей Ураськинэз огазеяськонлы тӧрое юнматӥзы[3][7][5].
Семьяез
Кузпалыз — Надежда Ураськина, Удмурт Элькунысь Дышетон удысысь йӧскалык ужпумъёсты эскеронъя тодос институтлэн директорез[4].
Нылыз — Анастасия, нуныкаез вань[4][9].
Данъетъёсыз
- Удмуртиысь дано артист;
- Россиысь лулчеберет удысысь дано ужась (2012)[11];
- «Удмурт Элькунысь Кун Кенешлы 20 ар» синпель медаль;
- Удмурт Элькунысь Кун Кенешлэн Данъян грамотаез;
- Удмурт Элькунлэн Президентэзлэн А. А. Волковлэн Таукаронэз;
- Росси Федерациысь Президентлэн таукарон гожтэтэз;
- Ижысь но Удмуртиысь митрополитлэн архиерей грамотаез;
- Удмурт Элькунлэн Тӧроезлэн А. В. Соловьёвлэн таукарон гожтэтэз[2][6].
Валэктонъёс
- ↑ 1 2 3 4 5 Ураськин Андрей Иванович [ӟуч] Государственный Национальный театр Удмуртской Республики. Эскеремын 06.10.2025 арын
- ↑ 1 2 3 4 Ураськин Андрей Иванович [ӟуч] Государственный Совет УР (14.10.2012). Эскеремын 06.10.2025 арын
- ↑ 1 2 3 4 София Хохрякова (07.12.2022) Новым председателем «Удмурт Кенеш» стал Андрей Ураськин [ӟуч] udmurt.media. Эскеремын 06.10.2025 арын
- ↑ 1 2 3 4 5 6 7 Валентина Емельянова (28.02.2003) Ураськин Андрей Иванович [удм.] Воршуд. Эскеремын 06.10.2025 арын
- ↑ 1 2 3 4 Андрей Ураськин избран председателем Всеудмуртской ассоциации «Удмурт Кенеш» [ӟуч] Деловой квадрат (08.12.2022). Эскеремын 06.10.2025 арын
- ↑ 1 2 3 4 Ураськин Андрей Иванович [ӟуч] Единая Россия. Эскеремын 06.10.2025 арын
- ↑ 1 2 Ирина Вайтукова (8.12.2022) Андрей Ураськин стал новым президентом ассоциации «Удмурт Кенеш» [ӟуч] udm-info.ru. Эскеремын 06.10.2025 арын
- ↑ Элина Кумачёва (07.10.2022) Кун Кенешын ялан ужась комиссиослэсь лыдзэс 10-озь вуттӥзы [удм.] Удмурт дунне. Эскеремын 06.10.2025 арын
- ↑ 1 2 Елена Миннигараева (02.07.2022) Будэмез возьматэ... театр. Удмуртиысь дано артистлы Андрей Ураськинлы — 60 арес [удм.] Удмурт дунне. Эскеремын 06.10.2025 арын
- ↑ Обращение членов Общественной палаты Удмуртской Республики [ӟуч] susanin.news (12.04.2007). Эскеремын 06.10.2025 арын
- ↑ Элина Кумачёва (30.10.2012) Тыршись муртэ адӟытэк уг кельто [удм.] Удмурт дунне. Эскеремын 06.10.2025 арын
Чӧлсконъёс
- Ураськин Андрей Иванович [ӟуч]