Стыценко, Игорь Сергеевич

Рувикиын таӵе фамилиен мукет муртъёс сярысь гожтосъёс вань. Учке: Стыценко.

Игорь Сергеевич Стыценко
Вордӥськем нуналыз	15-тӥ толсуре 1928(1928-12-15)
Вордӥськем интыез	Самара
Кулон нуналыз	9-тӥ куартолэзе 1996(1996-05-09) (67 арес)
Кулэм интыез	Ижкар
Кунмуртлыкез	СССР СССР → Россия Россия
Ужудысэз	директор завода
Данъетъёсыз

Ижысь мотозавод борды шуккем буре ваён пул

Игорь Сергеевич Стыценко (1928-тӥ арын 15-тӥ толсуре Самараын — 1996-тӥ арын 9-тӥ куартолэзе Ижкарын) — совето но росси инженер, Ижысь мотозаводлэн валтӥсь директорез, Социалистической Ужысь Герой.

Улон сюресэз

Игорь Стыценко 1928-тӥ арын 15-тӥ толсуре Самараын вордӥськиз. 1952-тӥ арын Мускоысь механикая институтэз (али — йӧскалык исследовательской ядерной «МИФИ» университет, Мускоысь инженерно-физической институт) йылпумъяз, инженер-механиклэсь дипломзэ басьтӥз. 1953-тӥ арын Ижкаре ыстэмын, татысь мотозаводын мастер луыса ужаны кутскиз.

1953-тӥ—1991-тӥ аръёсы «Ижысь мотозавод» промышленной предприятиын со пӧртэм удысъёсын тыршиз: мастер, регулировщик, участоклэн кивалтӥсез, ёзъёсты бичан цехлэн кивалтӥсезлэн воштӥсез, ОТК-лэн кивалтӥсез, валтӥсь инженер. 1965-тӥ арысен Ижысь мотозаводлэн директорез луиз, 1978-тӥ арысен — валтӥсь директорез.

1962-тӥ арысен Ижысь мотозавод инсьӧре лобанын кутӥськись вань арбериосты поттӥсь луиз, со сяна, ожгар ракетной техникалы пӧртэм пумо тӥрлык поттон бордын тыршиз, ӵапак со вакытэ, куинь ар ортчыса, И. Стыценкоез заводлы директоре пуктӥзы. И. С. Стыценко заводэн кивалтыку, завод паськытаз, выль сямен ужаны, тужгес азьмынӥсь технологиосты производствое кутыны ӧдъяз, та ужаз зол шӧдскиз. Та дыр куспын завод производственной фондъёссэ быдэсак выльдӥз, выль сооружениос пуктӥз.

Игорь Сергеевич заводэ выль заказъёс мыло-кыдо кыскиз, производствое выль амалъёсты но пыӵатӥз. Дунне шоры паськыт учкыны но визьмын кивалтыны быгатэменыз, И.С. Стыценко предприятиез ӝутон понна тужгес азинлыко удысъёсты синйылтӥз но заводэ кыскиз, озьы инсьӧрлы, ожгар-зарезь флотлы но ракетной войскоослы нимысьтыз техника поттонэз пыӵатӥз. Ӟеч кадръёсты но заводэ лачак кыскиз.

Завод Удмуртиез азинтон но улосысь приборостроение выль шокчон сётон понна трос лэсьтӥз. Игорь Стыценко сюлмаськем улсын космической объектъёсын кивалтон системаос сериен потыны кутскизы, кылсярысь, пилотируемой корабльёс лэсьтыны ӧдъязы, соос пӧлын: «Буран» инсьӧр корабль, фоторазведкая спутник. Игорь Стыценко кивалтэм улсын микроэлектроникая корпус пуктэмын, медициная техникаез бичан корпус ӝутэмын, ОКБ кылдытэмын, предприятиысь вань тӥрлык туала куронъёслы тупамон выльдэмын. Кассетаосын ужась магнитофонъёс, одӥг пол кутӥськись шприцъёс гинэ но заводын потыны кутскизы. Ужасьёслы улоно коркаос пуктэмын.

1974-тӥ арысен Игорь Сергеевичен кивалтоно завод «Акула», «Кальмар», «Гранит» типъем подводной лодкаосын кутӥськись навигацияя но ракетаосын кивалтонъя тӥрлык поттыны кутскиз. Ву улын уясь ракетаослы тӥрлык кылдытэмез понна 1976-тӥ арын 29-тӥ южтолэзе СССР-ысь Вылӥ Советлэн Президиумезлэн Указэзъя Игорь Сергеевичлы Социалистической Ужысь Герой ним сётэмын, озьы ик Ленин нимо орденэн но «Серп и Молот» зарни медален пусъемын.

1986-тӥ арын заводын Чернобыль АЭС-ын кышкыт авариын радиациен кырсёмытэм интыосты утялтыны-сузяны ярась радиоуправляемой ачиз ветлӥсь тележкаен роботизированной манипуляторлэсь эскерон образецсэ дасязы но лэсьтӥзы. Та проектэз заводысь специалистъёс вакчи дыр куспын быдэстӥзы радиоактивной суретлэн бервылъёсыныз нюръяськон вылысь.

Промышленностез азинтэмез но производство удысын ӟеч тыршемез понна И. С. Стыценко Ленин нимо куинь орденэн, Ужысь Горд Знамя орденэн пусъемын. Озьы ик Ленин нимо премиен но СССР-ысь Министръёслэн Советсылэн премиеныз сӥлы каремын.

Игорь Сергеевич Стыценко УАССР-ысь Вылӥ Советэ кык пол депутатэ бырйиськылӥз (1980, 1985).

1990-тӥ арын Игорь Стыценко пенсие потӥз. 1996-тӥ арын 9-тӥ куартолэзе улонысь кошкиз, ватэмын Ижысь Хохряк шайвылэ.

Данъетъёсыз

• Ленин нимо премия (1984)
• СССР-ысь Министръёслэн Советсылэн премиез (1981)
• Социалистической Ужысь Герой (1976)
• Ленин нимо куинь орден
• Ужысь Горд Знамялэн орденэз (1966).

Валэктонъёс

Литература

• Удмуртская Республика : Энциклопедия / гл. ред. В. В. Туганаев. — 2-е изд., испр. и доп. — Ижевск : Издательство «Удмуртия», 2008. — 768 с. — 2200 экз. — ISBN 978-5-7659-0486-2.