Семакин, Афанасий Иванович

Рувикиын таӵе фамилиен мукет муртъёс сярысь гожтосъёс вань. Учке: Семакин.

Афанасий Иванович Семакин
Вордӥськем дырыз	25-тӥ гудырикошконэ 1907(1907-08-25)
Вордӥськем интыез	Балян гурт, Малмыж уезд, Ватка губерния, Росси империя
Кулэм дырыз	28-тӥ куарусёнэ 1945(1945-09-28) (38 арес)
Кулэм интыез	Польша
Кунмуртлыкез	СССР СССР
Кыӵе войскоез	пехота
Служить карон аръёсыз	1929—1945
Званиез
Ожмаськонъёс/ожъёс	Быдӟым Атыкай ож
Данъетъёсыз

Афанасий Иванович Семакин (вордӥськиз 1907-тӥ арын 25-тӥ гудырикошконэ Вавож ёросысь Баляны гуртын —1945-тӥ арын 28-тӥ куарусёнэ Польшаын) — Рабоче-крестьянской Горд Армиысь капитан, Быдӟым Атыкай оже пыриськем мурт, Совето Союзлэн Героез (1946).

Улон сюресэз

Афанасий Семакин вордӥськиз 1907-тӥ арын 25-тӥ гудырикошконэ Ватка губерниын Малмыж уездын Балян гуртын (али Удмуртиысь Вавож ёрослэн интывылыз, со гурт быремын). Пинал дырысеныз нырысь Владивостокын, собере Алтай шаерын улӥз. Школаысь 7 классэз йылпумъяз. 1929-тӥ арын Горд Армие басьтӥзы. Отын полковой школаын дышетскиз но сверхсрочной службае кылиз. 1934-тӥ арысен Батуми карын служить кариз. Татын ик младшой лейтенантъёсты дасянъя курсъёсты йылпумъяз. Тылож кутскыку, Семакин Кавказын служить кариз. 1942-тӥ арын куартолэзьысен Быдӟым Атыкай ожлэн фронтъёсаз шедиз.Соку ик снайперской роталы командире пуктӥзы. Куинь пол сӧсырмылӥз.

1945-тӥ арын оштолэзёзь гвардилэн капитанэз Афанасий Семакин 1-тӥ Белорус фронтысь 8-тӥ гвардейской армилэн 88-тӥ гвардейской стрелковой дивизилэн 269-тӥ гвардейской стрелковой полклэн батальонэныз командовать кариз. Германиын ожъёс мыныку, геройлыко луэменыз висъяськиз. 1945-тӥ арын 16-тӥ оштолэзе Семакинлэн батальонэз Франкфурт-на-Одере кар палась тушмон оборонаез пазьгиз но Подельциг нимо улон интыез киултӥз. 18-тӥ оштолэзе Заксендорф котырысь кулэлыко вырйылъёсты штурмен басьтӥз . 22-тӥ оштолэзе Семакин аслаз батальонэныз, канал пыр потыса, Венденшлосс каре пыриз. 3 тушмон БТР-ез быдтӥз но ог сю пала солдат-офицерез пленэ басьтӥз. 23-тӥ оштолэзе батальон Даме шур вамен потӥз но Берлин пала азьланьскиз. 26-тӥ оштолэзе Тельтов канал вамен потӥсь выжез киултӥз.

Кадровой офицер, трос ожмаськонъёсы пыриськем мурт, Берлин доры матэктыку но аслэсьтыз ӟеч командир сямъёссэ возьматӥз: боевой заданиосты быдэсъякуз сэзь, чидась но амаллыко луэменыз висъяськиз. Семакинлэн батальонэз, бадӟым сюрес вылысь кожыса, Берлин пала тэль пыр потоно луиз. Ӧжытак мыныса, тушмонлэн оборонительной рубежез вылэ ӝимизы. Батальонлэн орудиез но, миномётъёсыз но ӧй вал. Семакин ожтӥрлык вуттэмез ӧз возьма: тушмонэз шуге-леке вуттыны малпаз. Нюлэскысь пӧртэм ласянь потыса, ротаос тушмон вылэ ожалскизы, мазэ-созэ валаны вуымтэ немец пумит ӝутӥськыны ик ӧз вуы. Вакчи дыр куспын батальон ог сю пала тушмон солдатэз пленэ басьтӥз, 3 бронетранспортёрзэ быдтӥз.
Берлогес, со Шпрее шур дуре потонэз утись могӟет вылэм шуыса тодмо луиз. Эшшо кӧня ке азьланьскыса, батальон шур дуре потӥз. Ожгарчиос, кин уяса, кин маин быгатэм, командирзы сьӧры шурлэн сопал ярдураз потӥзы но витёнтэм шорысь вуэменызы, татчы интыяськем тушмонэз нош ик шуге-леке вуттӥзы
Со ик кулэ вал Семакинлы. Ӝытпал батальон Даме шур дуре потӥз. Уйин шурез азинлыко выжизы.

— Маршал Советского Союза Чуйков В. И. Конец третьего рейха. — М.: Издательство «Советская Россия», 1973. — С. 200—201.

1945-тӥ арын 16-тӥ оштолэзьысен 26-тӥ оштолэзёзь Семакинлэн батальонэз 500 пала тушмон солдат-офицерез быдтӥз, 600-зэ пленэ басьтӥз, аэродромъёсысь 8 самолётэз киултӥз но 3 концлагерысь асьме пленнойёсты мозмытӥз. 2-тӥ куартолэзе Берлинлэн шор люкетаз ожъёс мыныку, секыт сӧсырмыны шедиз. 28-тӥ куарусёнэ басьтэм яраослэсь кулӥз. Ватэмын Гожув-Велькопольский карысь Вынлыко шайгуын.

СССР-ысь Вылӥ Кенешлэн Президиумезлэн 1946-тӥ арын 15-тӥ куартолэзе гожтэм Косэтэзъя, «командованилэсь боевой заданиоссэ ӟеч быдэсъямез но немец захватчикъёсын сэзь, геройлыко ожмаськемез понна» гвардилэн капитанэз Афанасий Семакин кулэмез бере Совето Союзлэн Героез дано нимын пусъемын. Ленин орденэн но Зарни Кизили медален данъетамын.

Озьы ик пусъемын Горд Знамялэн, Кутузовлэн 3-тӥ степенё, Александр Невскийлэн но Атыкай ожлэн 2-тӥ степенё орденъёсыныз но медальёсын.

Буре ваён

А. Семакинлэн нимыз Ижкарын Ялан ӝуась тыл азьысь Мемориал стелаын гожтэмын. Вавож ёросысь тыложын быремъёслы сӥзем синпелет вӧзын буре ваён пул юнматэмын.

Валэктонъёс

Литература

• Герои Советского Союза: Краткий биографический словарь / Пред. ред. коллегии И. Н. Шкадов. — М.: Воениздат, 1988. — Т. 2 /Любов — Ящук/. — 863 с. — 100 000 экз. — ISBN 5-203-00536-2.
• Боевая слава Алтая. — Барнаул: Алтайское кн. изд., 1978.
• ГСС, ГРФ, ПКОС — наши земляки. — Ижевск, 1995.
• Кузнецов И. И., Джога И. М. Золотые Звёзды Алтая. — Барнаул, 1982.