Сарапулысь нюлэс дасян завод

Сарапулысь нюлэс завод
Кылдэм арез	1910-тӥ арын
Интыяськемез	Россия Россия: Сарапул, Трудлэн ульчаез, 49
Удысэз	пу дасян но пулэсь арбериос лэсьтон

Сара́пулысь нюлэс дасян завод (Сарапулысь лесозавод; ӟуч: Сарапульский лесозавод) — Волго-Вятской ёросысь пу дасясь предприятиос пӧлысь огез вашкалаез.

Завод интыяськемын Сарапул карын Кам шурлэн яр дураз, Удмуртилэн лымшор но шундыӝужан палаз, Ижкарлэсь 62 иськемлы, Мусколэсь 1250 иськемлы палэнын.

Историез

В 1910-тӥ арын Удмуртиын пичи кужымен ужась Сарапулысь сик пилён предприятие (ӟуч: Сарапульская лесопилка) пуктэмын вал, со араз 40 сюрс кубометр дуско поттылӥз.

Сарапулысь сик дасясь завод, 1937-тӥ, 1947-тӥ аръёс

1930-тӥ арлы производство шӧдскымон паськытаз — басьтэмын вал 2 пилорама но пуэн ужась станокъёс, кылдӥз нырысетӥез грузовой автомобиль. Ужасьёслэн лыдзы ог 200 мурт вал. Нырысетӥ пятилеткае лесозавод 156 сюрс кубометр мында пиломатериал поттӥз, кыкетӥяз — 180 сюрс кубометр.

Кыкетӥ пятилеткалэн кутсконаз заводын таӵе цехъёс ужаллязы: нюлэс вандон, утялтон-быдтон, парен но кужымен, механикая. Дась продукциен биржа радъяллязы, вал но пудо возён гидъёс возизы, бусыосты гыризы-кизизы. Ужасьёслы столовой но улон коркаос пуктэмын вал. 3 пилорама, 105 циркулярной но 1 маятник выллем пила, пуэн выронъя 13 станокъёс, токарной но портӥсь станокъёс, коръёсты октон-ӝоктонъя но цехъёсы вуттонъя конвейерен тӥрлык ужаллязы. Заводлэн 400 м кузьда узкоколейкаез, электрогенераторез, парен ужась локомобилез, 3 электромоторез вал.

1930-тӥ аръёс пумын, Сарапулын «Волга-Волга» фильм пуктыкузы, лесозаводысь коллективлэн кужыменыз декорациос лэсьтэмын но юнматэмын вал.

Ожгар вакыт

Быдӟым Атыкай ож пуромем бере заводысь тӥрлыкен автомобильёслы но танкъёслы пулэсь ёзъёс, минаослы но снарядъёслы тараос поттонэз радъязы. Со сяна, Сарапул лесозавод кунлэн шундыпуксён улосъёсысьтыз эвакуациен вуттэмъёс понна коркаос пуктылӥз но соослы мебель лэсьтылӥз. Ож бере аръёсы завод ожгар заказъя самолётъёслы ёзъёс лэсьтылӥз.

Сарапулысь лесозавод, Быдӟым Атыкай оже пыриськемъёслы синпелет

Ож бере выльдӥськон

1948-тӥ арын производствоез быдэсак выльдӥзы: уже кутӥзы куинетӥ пилорамаез, электростанциез, механикая но корка пуктон цехъёсты, сик вандон цехез паськытатӥзы. Лесозаводлэн котыраз производствоя выль корпус пуктӥзы.

Пӧртэм пумо вузлэн лыдыз но йылӥз. Производствоя тӥрлыкен стандартэ пырем коркаосты ӝутыны ӧдъязы, соосты ӵемысь целинникъёслэсь улон условиоссэс умоятон вылысь пуктылӥзы. 1950-тӥ аръёсы ог 500 сюрс квадрат метр улон площадь лэсьтэмын вал. Целинаын тысь возён складъёсты бичан понна ёзъёсты поттон но азинскиз.

Сарапул лесозаводын поттэм шпалаос мынӥзы Байкало-Амурской магистралез лэсьтыны.

Мерлыко удысэз 1950-тӥ аръёсы азинтон

Лесозаводэн кивалтӥсьёс ужасьёссэс дунъяны валаллязы, соин ик мерлыко удысэз азинтон сярысь сюлмаськылӥзы. 1950-тӥ аръёс пумын предприятие карысь нырысетӥез огез бадӟымез корка возись луиз, ваньбураз 27 улон юртъёс пырылӥзы, соослэн огъя улон площадьзы 3,5 сюрс квадрат метрлэсь ятыр вал. Ӵапак лесозавод карын панель коркаосты пуктон борды нырысь ик басьтӥськиз. Улоно секторын нимаз юртъёсты лэсьтыны но юрттылӥз.

Сарапулысь лесозавод, нюлэс вандон цех

Асьсэлэсь объектъёссэ сиён-юонэн тырмытон понна заводлэн кивалтэтэз нырысетӥ нуналъёсысеныз ик подсобной хозяйстволы саклык висъяз, сое валтӥсь производство пӧлы пыртылӥз. Бусыосын ю тысь будэтӥзы, фермаосын — парсьёс но кроликъёс. Подсобной хозяйствоез азинтон сяме пыриз, солы саклык висъяськылӥз.

Ӧнерчиос мебель поттонэз азинтыны ӧдъязы. МГУ-лэсь Ленин гурезьёсысь выль юртэзлы нимысьтыз заказъя мебель лэсьтӥзы. Эшшо одӥг пумо вуз поттыны кутскизы — радио но телевизионной приёмникъёслы футляръёс. Та вузэз валтӥсь курисьёс Ижысь но Сарапулысь радиозаводъёс, соослы выль поколениысь «Урал», «Сириус», «Комета» радиоосты поттыны ёзъёс кулэ вал. Телевизоръёслы но футляръёс лэсьтонъя ӧр азинлыко луиз. Таосты «Березка» (Минск), «Крым» (Симферополь), «Чайка» (Горький) телеприёмникъёсты лэсьтыны келяллязы.

Сарапулысь лесозавод, механикая цех

витетӥ пятилетка вакытэ заводысь ужасьёслэн лыдзы 1082 мурт луиз, производствоя площадьёсыз 10664 квадрат метрозь йылӥзы. Автопаркысь техникалэн лыдыз шӧдскымон будӥз — 113 единицаозь. Заводлэн кужыменыз лэсьтэмын вал 116,6 квадрат метр пиломатериал, 103 сюрс кубометр тыр улон коркаос. Ӧс но укно блокъёс поттыны ӧдъязы. Калыкын кутӥськись вуз 274,5 сюрс манет тыр лэсьтэмын вал.

1960-тӥ аръёсысь реконструкция

1960-тӥ аръёсы предприятиын рос-прос реконструкция ортчиз. Ужасьёслэн лыдзы 2390 муртозь йылӥз. Лесозаводлэн производствоез узырмиз 41 выль единица тӥрлыкен, 3454 квадрат метр производствоя площадьёсын, 4 но 10 номеро цехъёсын, капитальной лэсьтӥськон объектъя (ОКС) базаеныз. Поттэм вуз Удмуртилэн пӧртэм ёросъёсаз вӧлмиз, СССР-ысь мукет каръёсысь СЭВ кунъёсысь заказъёс вуыны ӧдъязы.

Сарапулысь лесозавод, тарной цех

Пӧртэм пумо производствоын пуэз дасянын но арбериос лэсьтонын кылем-мылем бервылъёсыз уно люкаськылӥзы — шелеп, вандылэм люкетъёс, пу пызь. 1964-тӥ арын Сарапулысь лесозаводын пулэсь но волокнолэсь плитаос (ДВП) лэсьтыны кутскизы. Вузэз Польской Калык республикаын ӵыжатэм тӥрлыкен поттылӥзы. Производствоысь технологиез ялан умоятон асдунзэ кулэстыны, ӟечлыксэ йылтыны но та вузлы кулэяськисьёслэсь лыдзэс йылтыны юрттӥз. Пулэсь но волокнолэсь плитаосты кунгож сьӧры но ӝоктылӥзы, таин валче заводлэн «Внешторгбанкын» кылдӥз аслаз валютаен счётэз. 1966-тӥ арын поттэмын но вузамын вал ог 2321 сюрс квадрат метр ДВП.

Арлы быдэ 200—250 сюрс кубометр деловой пу поттон ас производствоезлы тырмымон гинэ ӟечлыко пиломатериал лэсьтыны луонлык ӧз сёты — сое дась вузэз сямен но ӝоктыны луонлык но кылдытӥз.

Сарапул лесозаводысь производствоез ялан рос-прос ужатон вылысь валтӥсь поставщикъёс луизы Пермь улосвыл, Шундыпуксён Сибирь, Свердловск улос, Дальний Восток, Закавказье, Киров улос. Юрттӥсь материалъёсты Ижкарысь, Ригаысь, Пермьысь вайылӥзы. Сырьёез ву но чугун сюрес вылтӥ ветлӥсь транспортэн вуттылӥзы.

Лесозаводэн поттэн мебельлэн данэз йылӥз. Киын быдэстоно производствоя процессъёсты быдэсак автоматизировать каризы. Туала тӥрлыкен сериен поттыны ӧдъязы дуно пулэсь полированной мебель.

Пӧртэм пумо мебель тужгес тэргаськись басьяськисьлэсь но куронъёссэ быдэстыны быгатӥз. Лачак лэсьтӥськизы ӝӧкъёс — гожъяськон, сиськон, ӝӧк-книга, журнал ӝӧкъёс. Сарапулысь лесозаводын поттэм вузъёс пӧлысь тросгес вузаськылӥзы стенкаос, гурезьёс, сервантъёс, буфетъёс, диван-валесъёс, нылпиослы мебель, матрасъёс. Сериен бичаны ӧдъязы гарнитуръёс — гостинойёслы, изён висъетъёслы, ужан кабинетъёслы.

Арбериосты вылӥ юнлыко материалъёсын буяллязы-биняллязы, соос мебелез учкымон карылӥзы, нюромонлэсь, гужамлэсь, пилиськонлэсь утьылӥзы. Поттэм вуз пӧлысь куиньмос люкетэз Удмуртиысь вуз карон сеть пыр вӧлмылӥз, мукет люкетсэ Татарстанэ но Пермь улосэ келяллязы.

Мерлыко но лулчеберет удысысь объектъёсты азинтон

Мерлыко но лулчеберет удысысь объектъёс ӝутӥськизы — нылпи комбинат, пионер лагерь. 1970-тӥ аръёслэн шоразы лесозаводын тыршисьёс понна пуктэмын вал лулчеберетъя юрт, татын кылдӥз быдэс кун тыр данэ потэм Вокалъя но крезьгур тӥрлыкъя ансамбль (ВИА), бадӟымъёслы но пичиослы пӧртэм пумо кружокъёс — крезьгуро, хореографияя, вокалъя. Кар сьӧры пуктӥськиз шутэтскон база. Заводын тыршисьёслэн тазалыксылы бадӟым саклык висъяськылӥз. 1980-тӥ аръёсы комбинатын ужасьёслэсь но соослэн семьяоссылэсь тазалыксэс юнматон вылысь профилакторий, озьы ик нылпи комбинат ӝутэмын вал.

Сарапулысь лесозавод, 1970-тӥ ар

Сарапулысь лесозаводын тыршисьёслэсь тодон-валанзэс будэтонлы но бадӟымгес саклык висъяськиз. Ужась егитъёслэн школаязы 92 мурт дышетскиз, техникумъёсын — 132 адями, вылӥ образование басьтӥз 41 мурт. Эксплуатацие кутэмын 4 благоустроить карем коркаос, котькудаз 32 квартира, озьы ик — ужасьёслы общежитие. Подсобной хозяйство но азинскиз.

Производствоез паськытатон но импорт тӥрлыкез пыӵатон

Лесозаводын поттэм вуз кунысь но солэн палэнысьтыз 100-лэсь ятыр потребительёслы келямын вал. Вузлы кулэяськисьёслэн лыдзы йылэмен, кивалтэт производствоез паськытатоно луэ, таин валче ӧнерчиос ассортиментэз выльдон, технологиосты умоятон, вузлэсь ӟечлыксэ йылтон бордын ялан выризы.

Производствоын ӵемысь импортной тӥрлык кутӥськиз, сое экспортэн келям вуз понна поттэм валютаен басьтӥзы. «Шпуль» фирмалэсь австрийской тӥрлык кутӥськиз небыт мебельлы ярась пружинаосын блокъёсты лэсьтонын, фанералэсь пумъёссэ вандылон понна пуктэмын болгарской линия.

Лесозаводын берло дыре тужгес дано луэм сериен поттэм мебельлэн образецъёсыныз лаборатория кылдытэмын, отын дача коркаосы кутӥськись образецъёсыз но адӟыны луэ. Вылӥ художествоя мебель котырез оген-оген экземпляръёсын лэсьтыны куронъёс но вуыны кутскизы. Мебельщикъёслэн бадӟым данъяськонзы луиз XIV даур пумысь—XVII даур кутсконысь амалъя зэмос пулэсь быдэстэм мебель гарнитур. Авторъёслэн ужазы вашкала даурысь йылолъёс но туала технологиос герӟаськизы.

ВДНХ адӟытонъёсы пыриськон

Со аръёсы котькыӵе предприятилэсь ужамзэ вылӥ дунъязы быдэс Союзысь вормонъёсын адӟытон площадкаосы пыриськемезъя. Отчы сарапул кибашлыослэн аспӧртэм ужъёссы но поттэмын вал. Пуын зэматэм творческой малпанъёссы ВДНХ-ысь адӟытон залъёсын ярамон интыос басьтӥзы. «Мебель-90» салонын ӧнерчиослы вылӥ дунъет сётӥзы пужыятыса вӧлэм шахматэн шудон ӝӧк но фигураос понна, со лэсьтэмын вал допетровской вакытысь стилен. ВДНХ-ысь шахмат наборез калык сиён-юонъёсын вуз каронъя «Экспо-91» коммерциен герӟаськем «Экспо-91» залэ вуттӥзы, отын но со люкаськемъёсты паймытъяз.

1990-тӥ аръёслэн кутсконзы

1990-тӥ аръёслэн кутсконазы производствоя база выль тӥрлыкен гинэ ӧз юнма — производствоя площадьёсыз но зол паськытазы. Сарапул лесозаводлэн интывылаз ӝог ӝутӥськиз паркетъя но переработкая цех, солэн огъя быдӟалаез 10800 квадрат метр, нуналаз планъя чаклам кужымез 600 м² паркет. Со дыре ик пуктӥськиз мебель лэсьтонъя цехлы кык этажъем корпус, быдӟалаез ог 7 сюрс квадрат метр.

Сарапул лесозаводлэн ужамез вылын, кунысь вань мукет предприятиос вылын сямен ик, шӧдӥськиз выльдӥськон вакыт. Партилэн демократизация, рыночной реформа но экономикаысь либерализация пала учкись политикаеныз валче, Сарапулысь лесозавод пыриз нюлэс промышленностья «Континенталь-Менеджмент» компание, солэн портфелья инвесторез луэ «Сибирский алюминий» группа (2001-тӥ арын нимыз «Базовый элементлы» воштӥськиз). Ужасьёслэн лыдзы 3000-сен 600 адямиозь кулэсмиз.

XXI даур

2000-тӥ аръёсы выль тӥрлык басьтэмын. Предприятилэн структураяз кылдӥз 7 камераослы куасьтон комплекс, мебель щитэз, мебель заготовкаосты но тубатъёслы ёзъёсты лэсьтонъя цех, буяськонъя цех.

2004-тӥ арын производствоез выльдон борды басьтӥськизы. Лэземын вал сикез вандон цех, пуэз дасян участок но корка пуктонын кутӥськись стандартэ пырем ёзъёсты лэсьтонъя.

2010-тӥ арын завод цельной пулэсь вуз потыны кутскиз — тубатъёс, мебель щитъёс, мебельлы заготовкаос но заказъя мебель ёзъёс.

2020-тӥ арысь югдуръя, завод арендае сётэмын вал. 2025-тӥ арын оштолэзе югдуръя, компанилэн регистрацияя адресэзъя пуэн вырись эшшо кык предприятиос пусйиськемын. Чекко порталлэн ивортэмезъя, «Сарапул лесозавод» ООО быдтэмын.

Валэктонъёс

Чӧлсконъёс

• Евгения Чабак. Сарапульский лесозавод. Больше века в деревообработке [ӟуч] // ЛесПромИнформ : журнал. — 2012. — № 8 (90).