Сарапулысь радиозавод
| «Сарапулысь радиозавод» АО, («СРЗ» АО) | |
|---|---|
 | |
 | |
| Типез | Акционер огазеяськон |
| Кылдэм арез | 1900 |
| Интыяськемез |
 Россия: Удмуртия, Сарапул, 427960, Гогольлэн ульчаез, 40-тӥ юрт |
| Валтӥсь адямиосыз | Абдрахманов Кирилл Рамильевич (валтӥсь директор) |
| Удысэз | Радиоаппаратура |
| Поттэм вузэз | Радиостанциос; командно-штабной машинаос; кунгож дорысь нарядэн служба нуон понна нуллоно универсальной техникая тӥрлыкен комплектъёс; дышетонъя классъёс но дышетон программаос; калыкын кутӥськись тӥрлык. |
| Сайт | Сайтэз |
 Медиафайлъёс РувикиМедиа пушкын | |
| Данъетъёсыз |
  |
|---|
«Сарапулысь радиозавод» АО («СРЗ» АО; ӟуч: Сарапульский радиозавод ) — Россиысь ожгар но калыкын кутӥськись герӟет тӥрлыкез кылдытӥсь но лэсьтӥсь вашкалаез предприятие.
Историез
Завод 1900-тӥ арын Санкт-Петербургын телеграф но телефон лэсьтон «К. Лоренц» завод сямен кылдытэмын[1].
1914-тӥ арын Нырысетӥ дунневыл ож кутскемен валче завод таламын но валтӥсь ожгар техникая управленилы сётэмын. Со фронтлы кулэ луись вуз — фонэн ужась ож бусыын телефон аппаратъёс, Морзе но Бодо телеграф аппаратъёс, микрофонъёслы эгыр ёзъёс но эгыр порошок но мукетсэ — поттӥз, тыложысь берытскем тӥрлыкез тупатъяз[2][1].
Революция бере Петроградысь заводэз Муское выжтӥзы, со «Ожгар но инженер ведомстволэн Петроградысь электротехникая заводэз», отӥяз — «Нырысетӥез электротехникая кун завод» луиз. Со вакытэ завод армилы герӟет тӥрлык поттӥз[1].
1922-тӥ арын, Граждан ож йылпумъяськем бере, армилы вузъёслы заказ зол кулэсмиз, таин валче предприятие ужудыссэ выльдӥз — электротехникая тӥрлык поттыны ӧдъяз. Со Мускоысь электротехникая «Мосэлектрик» завод луиз. Заводлы чугун сюресъёсъя калык комиссариатлэсь чугун сюреслы семафоръёс, семафорлэсь сигналзэ выльысь сётӥсьёс, сигнал сётӥсь езъёс, релеос лэсьтыны бадӟым заказъёс вуыны кутскизы, озьы ик «Рекорд» громкоговорительёс (дано луэм «сьӧд тэркыос») поттыны бадӟым заказ вуиз[2].
1941-тӥ арын, Бадӟым Атыкай ож кутсконын, заводэз Сарапулэ эвакуациен келязы. Со Сарапулысь Благовещение нимо азьвыл монастырь комплексын интыяськиз. Татын завод авиацилы но танкъёслы радио тӥрлык поттӥз, со транспорт но кыдёке лобӟись бомбаосын авиацилы навигацияя радиоаппаратура лэсьтонъя кунын огназ предприятие вал. Со вакытэ заводэ СССР-ысь обороная кун комитетлэн ёзчиез К. Е. Ворошилов но СССР-ысь Вылӥ Кенешлэн президиумезлэн тӧроез Н. М. Шверник вуылӥзы, СССР-ысь электропромышленностья нарком И. Г. Кабанов кӧня ке пол ветлӥз, нош производство ужпумъёсын СССР-ысь обороная кун комитетлэн кивалтӥсезлэн нырысетӥ воштӥсез В. М. Молотов но ВКП(б)-лэн ЦК-езлэн секретарез Г. М. Маленков тунсыкъяськизы. Оглом тылож аръёс ӵоже радиозавод 156 сюрслэсь ятыр пӧртэм радио тӥрлык поттӥз[1].
1992-тӥ арын заводэз приватизировать каризы, со «Сарапулысь радиозавод» усьтэм акционер огазеяськон луиз. 1998-тӥ арын завод реорганизация улэ шедиз, валтӥсь предприятилы но солэсь висъяськем ёзъёсызлы пӧрмиз.
2024-тӥ арлы югдуръя, завод «Сарапулысь радиозавод» акционер огазеяськон сямен ужа[3].
"Сарапулысь радиозавод" АО-лэн Первомай ульча ласянь пыронэз
"Сарапулысь радиозавод" АО-лэн Гагаринлэн ульчаез ласянь пыронэз
Ужез
Вузъёсыз
- КВ, УКВ диапазонъёсын нуллоно радиостанциос;
- Трос каналъем УКВ диапазонэн нуллоно радиостанциос;
- КВ, УКВ диапазонъёсын нуллоно радиостанциос;
- Командно-штабной машинаос но соослы ёзъёс;
- Антеннаос, антеннаослы но мачтаослы тӥрлык;
- DRM приёмникъёс;
- Эмъянын кутӥськись техника;
- Дышетон классъёс но дышетон программаос;
- Кабель телевиденилы оптоволокноен ужась герӟетъя блокъёс;
- Кунгож дорысь нарядэн служба нуон понна нуллоно универсальной техникая тӥрлыкен комплектъёс.
«СРЗ» АО питрано но гусеничной ожгар машинаослы но мукет мынӥсь-ветлӥсь объектъёслы, озьы ик УКВ но KB «Арбалет» но «Акведук» комплексъёсын тактикая кивалтоно звенооссылы герӟетъя радиостанциослы, кык полэс кутӥськись радиостанциослы выль поколениысь ожгар герӟетъя тӥрлык поттэ[4].
Ужан амалъёсыз
- Печать платаос поттон;
- Пӧртэм электро тӥрлыкъёсты вылтӥз юнматон;
- Пластмассаез бадӟым зӥбетэн кисьтон;
- Тӥрлыкез механика ласянь воштон-тупатон;
- Химиез но гальваникаез уже кутыса вуз поттон;
- Кисьтыса вуз поттон;
- Штампен тӥрлык поттон;
- Тӥрлык поттон;
- Эскеронъя станциос лэсьтон.
Музей
1977-тӥ арын 30-тӥ толсуре Сарапулысь радиозаводлэн историезлы но ожгар данэзлы сӥзем музеез кылдӥз, со заводлэн культурая юртаз интыяськиз, нош предприятилы 100 ар тырмон вакытэ заводлэн юртаз выжтэмын вал. Музейын ялан ужась экспозициосыз вань, отын 2 сюрс экспонатъёсыз, озьы ик музейын огдырлы чаклам адӟытонъёс радъясько. Учкисьёсты татчы азьвыл гожтӥськыса пырыны лэзё[5][6][7].
Данъетъёсыз
- 1931 — Ленин нимо орден — вить арлы чаклам планэз 2,5 ар куспын быдэстэмез понна. Со аре ик заводлы промышленностья наркомлэсь Г. К. Орджоникидзелэсь нимзэ сётӥзы;
- 1945 — Ужысь Горд Знамя нимо орден — фронтлы ожгар техникаен юрттэт сётонъя Правительстволэсь куронзэ быдэстэмез но ӟеч тыршемез понна.
Вузкарон пусъёс
.jpg){kind=small}
.jpg){kind=small}
Валэктонъёс
- ↑ 1 2 3 4 История завода [ӟуч] АО "Сарапульский радиозавод".
- ↑ 1 2 СРЗ: 120 лет – это только начало, Деловая Репутация (6 пӧсьтолэзе 2020). Эскеремын: 3 пӧсьтолэзе 2025 арын.
- ↑ История
- ↑ Продукция
- ↑ Информационно-выставочный комплекс ОАО "Сарапульский радиозавод", UDM.travel. Эскеремын: 3 пӧсьтолэзе 2025 арын.
- ↑ Музей Сарапульского радиозавода, Сусанин.топ. Эскеремын: 3 пӧсьтолэзе 2025 арын.
- ↑ Музей трудовой славы радиозавода [ӟуч] АО "Сарапульский радиозавод".