Сарапулысь Благовещение нимо монастырь
| Монастырь | |
| Сарапулысь Благовещение нимо монастырь | |
|---|---|
 | |
| 56°28′26″ с. ш. 53°47′51″ в. д.GЯO | |
| Кун | |
| Епархия | Сарапул |
| Типез | нылкышно |
| Кылдытэмын | 1881 но 2015 |
| Быдтэмын | 1923 ар |
| Сайтэз | bmsarapul.pravorg.ru |
 |
|
Сарапулысь Благовещение нимо монастырь (ӟуч: Сарапульский Благовещенский монастырь) — Ӟуч православной черклэн Сарапул епархиысь нылкышно монастырь. 1881-тӥ арын кылдытэмын, но кивалтэтэн 1923-тӥ арын пытсамын. 2015-тӥ арысен мукет интыын выльысь ӝутэмын. Вужез монастырь комплекс утиськемын, но отын ужа Сарапулысь радиозавод.
Историез
1876-тӥ арын Ватка губерниысь Сарапул карын ужез гажась нылкышноос община кылдытӥзы. Отчы 30 мурт пыриз. Общинаез Ангелина (Назарова) монахиня валтӥз[1]. Сузэръёс Благовещениея из черке ветлылӥзы. Сое 1877-тӥ арын 1 гильдиысь пермь купеч Никандр Алексеевич Дедюхин коньдонэн юрттэмен пуктӥзы[2]. Вӧсьлыко Синодлэн 1881-тӥ арын 22-тӥ куарусёнэ юнматэм 3683 номеро указэныз община луиз Сарапулысь Благовещение нимо огъя улоно нылкышно монастырь. 1882-тӥ арын 27-тӥ куартолэзе монахиня Ангелина игуменья санозь ӝутэмын вал, сое сьӧд клобукен, гадьын нуллоно киросэн но посохен сӥлы каризы[1].
1882-тӥ арысен монастырьын нылъёсты грамоталы дышетонъя школа ужаз. Татын озьы ик зарни сӥньысъёсын вӧсяськон дӥсь вуронъя но обросъёс лэсьтонъя но суреданъя мастерскойёс усьтэмын вал. Устоосыз киужъёссы 1893-тӥ арын Чикагоын ортчем дуннеысь адӟытонэ поттэмын, туй медален но данъян дипломен пусъемын вал[3]. 1899-тӥ арын Николай Иванович Дедюхин купечлэн коньдонэныз вӧсяськон юрт пуктӥзы, сое курадӟыса бырем Александралы сӥзьыса вӧсязы[2].
1913-тӥ арын пӧсьтолэзе игуменья Ангелина ужъёслэсь шутэтсконо кариськиз, монастырен кивалтонзэ Херувима (Зубарева) юрттӥсезлы оскиз. 1914-тӥ арын 14-тӥ оштолэзе игуменья Ангелина улонысь кошкиз, сое монастырьлэн котыраз ватӥзы. 1918-тӥ арын кивалтэт монастырез пытсаз, монахиняосты улляз. Херувима игуменьялэн азьланяз адӟонэз тодмо ӧвӧл[1]. Монастырь официально ворсамын Сарапулысь окрисполкомлэн 1923-тӥ арын 14-тӥ коньывуонэ кутэм пуктэтэныз[2]. 1923-тӥ арысен 1941-тӥ арозь монастырьысь юртъёсын нылпи приют интыяськылӥз. 1941-тӥ арын азьвыл монастырьлэсь музъемзэ но юртъеръёссэ Мускоысь эвакуациен ваем радиозаводлы висъязы[3].
2015-тӥ арын монашеской общинаез выльысь улӟытоно кариськизы. 2016-тӥ арын 5-тӥ шуркынмонэ Сарапулысь но Можгаысь епископ Антоний Благовещенской нылкышно монашеской общиналэн архиерей юртъер бордысьтыз черкез вӧсяз Дун-чылкыт Инмар Анайлэн «Скоропослушница» нимо мудорезлы сӥзьыса[3]. Азьвыл монастырь комплексын Сарапулысь радиозавод ужзэ азинтэ[4].
Валэктонъёс
- ↑ 1 2 3 Бондарь М. В. (2013) Судьба двух настоятельниц Сарапульского Благовещенского женского монастыря [ӟуч] Электронный научный архив УрФУ. Эскеремын 05-11-2025 арын
- ↑ 1 2 3 Благовещенский общежительный женский монастырь [ӟуч] Архивная служба Удмуртской Республики. Эскеремын 05-11-2025 арын
- ↑ 1 2 3 История [ӟуч] Благовещенская женская монашеская община при Архиерейском подворье Храма в честь иконы Пресвятой Богородицы «Скоропослушница» города Сарапула. Эскеремын 05-11-2025 арын
- ↑ В Сарапульской епархии прошли торжества, посвящённые 75-летию Благовещенского монастыря [ӟуч] Синодальный отдел по монастырям и монашеству. Эскеремын 05-11-2025 арын