Савельев, Владимир Никифорович

Владимир Никифорович Савельев
Владимир Никифорович Савельев
Вордӥськем дырыз	17-тӥ пӧсьтолэзе 1935 (91 год)
Вордӥськем интыез	Блатгурт, Блатгурт муниципал кылдытэт, Алнаш ёрос, Удмурт Автономной Советской Социалистической Республика, Киров улосвыл[d], РСФСР, СССР;
Кун	СССР → Россия
Тодос удысэз	хирургия
Ужан интыез	Завьяловоысь ЦРБ (1963—1967), ; ИГМА (1967—1975, 1990—али дырозь), ; УАССР-ысь Тазалыкез утёнъя министерство (1975—1990)
Учёной степенез	эм тодосъёсъя доктор
Учёной званиез	профессор

Владимир Никифорович Савельев (ворд. 17-тӥ пӧсьтолэзе 1935, Блатгурт, Киров улосвыл^[d]) — совето но росси тодосчи, эмчи-хирург, тазалыкез утён удысэз радъясь, дышетӥсь, мерлыко ужась. Эм наукаосъя доктор (1989), профессор (1991). Удмурт Элькунысь тазалыкез утён удысысь дано ужась (1993), Росси Федерациысь тазалыкез утён удысысь дано ужась (2003). Удмурт Элькун Кивалтэтлэн премиезлэн лауреатэз (1998), Удмурт Элькунысь Кун премилэн лауреатэз (2003)^[1].

1975—1990-тӥ аръёсы — Удмурт АССР-ысь тазалыкез утёнъя министр. УАССР-ысь Вылӥ Кенешысь 9-тӥ но 10-тӥ ӧтчамъёсысьтыз депутат.

Улон сюресэз

Егит дырыз

Владимир Никифорович Савельев 1935-тӥ арын 17-тӥ пӧсьтолэзе УАССР-ысь Алнаш ёросысь Блатгуртысь староверъёслэн крестьян семьяязы вордӥськиз, семьяын со пичиез вал, Иван но Егор кык агайёсыз, озьы ик Вера апаез вал на. Матрёна Прокопьевна анаез, алабго вузчилэн нылыз вал; начар крестьян семьяысь потэм Никифор Егорович атаез Нырысетӥ дунневыл но Граждан ожъёс пыр потӥз, вуоно кышноезлэн бубиз дӥньын батракын ужаз, нош революция бере вордскем гуртысьтыз колхозлэн тӧроез луыса тыршиз, со дыре ик гуртысь пудоез но эмъялляз^[2].

7 классъем школаез йылпумъямез бере, Владимир Савельев 15 аресказ Можгаысь фельдшер-акушер школае дышетскыны пыриз. Сое куинь ар куспын йылпумъяса, тодон-валанзэ институтын муромытэм интые, уж вылын практикаын дышетсконо кариськиз, со понна элькунысь тужгес кыдёкысь ёросэз — Пониноез (али — Глаз ёрослэн интывылыз) — бырйиз. Татын 2 толэзь ӵоже Пониноысь эпидемиологияя станциысь эпидемиологлэн юрттӥсез луыса тыршиз, отӥяз сое ВЛКСМ-лэн райкомысьтыз кадръёсъя но радъян-инструктор ужъя ёзэтлы кивалтӥсе бырйизы. 1954-тӥ арын 20-тӥ куарусёнэ Горд армие кутэмын вал^[2].

Эмъян ужез

Армиын службазэ нуэмез бере, Владимир Никифорович Ленинградысь ожгар медициная академие [ӟуч] (удм. пырыны медэ вал, но ляб синъёсыныз сэрен медкомиссия пыр ӧз поты, озьы вуоно араз Ижысь медициная кун академиысь (ИГМИ; али — Ижысь медициная кун академия, ИГМА) эмъян факультетысь студент луиз. Вузэз 1963-тӥ арын йылпумъяса, распределениен Дэри черкогуртысь больницае сюриз, ӝыны ар ортчыса, соин кивалтыны ӧдъяз. Больницаез валтон дыръяз ог дыре ик хирургияя практикаен выриз^[3].

Тодос ужез

Эмъян практика борды кутскемез дырысен ик Владимир Никифорович наукая но эскерон ужъёсын тунсыкъяськылӥз. Дэриысь ЦРБ-лэн валтӥсь врачез луыса ужакуз ик, со экономикая расчётъёс пыр валэктыны быгатӥз гуртъёсысь участковой больницаослэн инъетсы вылын реабилитацияя ёзэтъёсты радъянлэсь социально-экономической пайдалыксэ. 1967-тӥ арын со больницаысь кошкиз но ИГМИ-лэн факультет хирургияя кафедраысь аспирантурае пыриз. Савельев лы но ёзви висёнъёсты, эмъянын кутӥськись но радъям ужпумъёсын сэрен кылдэм шуг-секытъёсты но сӧсырмон учыръёсты эскерон борды басьтӥськиз, бадӟым саклык висъяз магнитобиологиез [ӟуч] (удм. эмъянын кутонэз азинтонлы. Аспирантураез йылпумъяса но «Коксартроз дыръя макес выжы суставъёсын артродез» темая кандидат диссертацизэ утьыса, Владимир Никифорович институтысь факультет хирургияя кафедрае ассистентэ юнматэмын вал; со аре ик быдэс Союзысь травматологъёслэн но ортопедъёслэн огазеяськонзылэн ёзчиез луиз^[3].

1980-тӥ арын Савельев тазалыкез утёнэз радъясьёсын но социал-гигиенистъёсын кылдытэм Ижысь наукая но медициная огазеяськонлэн ёзчиез луиз, озьы ик «Советской медицина» журналлэн редколлегияз пыриз. 1985-тӥ арын тулыспалэ Владимир Иванович Евсеев, Михаил Геннадьевич Корепанов но Владимир Никифорович Савельев кивалтэм улсын кылдытэм «Остеосинтезлы тӥрлык» понна авторъёслэн коллективзылы СССР-ысь изобретениосъя но усьтонъёсъя кун комитет [ӟуч] (удм. сётӥз автор свидетельство (№ 1158190)^[2].

1989-тӥ арын Владимир Никифорович «Ки тӥяськон секыт учыръёсты клиникаын эмъянэз оглом радъян но умоятон (радъянъя но эмъянъя эскерон)» темая доктор диссертацизэ утиз; солы эм тодосъя доктор ним сётӥзы^[2].

1990-тӥ арын Савельевез ИГМИ-лы эмъян ужпумъёсъя проректоре юнматӥзы, нош бератаз институтысь социальной гигиеная но тазалыкез утён ужпумъёсты радъянъя кафедраен кивалтыны оскизы (али — огъя тазалыкъя но тазалыкез утёнъя кафедра). Кафедраысь наукая но эскеронъя ужпумъёс выльдӥськизы, коллектив басьтӥськиз «Удмурт Элькунын рыноке выжонлэн калыклэн тазалыкез вылын шӧдскемез но эмъян-профилактикая юрттэт радъян амалъёслэсь пайдалыксэс эскерон» тема борды^[3].

Мерлыко но политика ужез

УАССР-ысь Вылӥ Кенешлэн 1975-тӥ арын 2-тӥ пӧсьтолэзе юнматэм пуктэтэзъя, Владимир Никифорович УАССР-ысь тазалыкез утёнъя министерствоез валтӥсе юнматэмын вал, соин со 15 ар ӵоже кивалтӥз. Министре пуксьытозяз, Савельев практикая медициналэсь кулэяськонъёссэ ӟеч тодэ ни вал. Кивалтыны кутскемез дырысен нырысетӥ нуналъёсысеныз ик участковой службалы но ӝог эм юрттэт сётонлы бадӟым саклык висъяз, нырысь ик — гуртъёсын^[3].

Савельев кивалтэм улсын пуктэмын вал 120 койкалы чаклам нылпи ваён юртэн 1 сюрс койкалы элькун клиникая больница, нылпи элькун больницалэн корпусэз, кардиодиспансер, паласькись висёнъёсын нюръяськонъя, син эмъянъя но психиатрияя эмъяськонниос, Воткаысь машзаводлэн медсанчастез, озьы ик Ижкарысь тазалыкез утёнъя база паськытаз но юнмаз. Гуртъёсын шӧдскымон юнматэмын тазалыкез утёнъя система — Алнаш, Дэри, Красногорск, Сьӧлта, Вавож, Дэбес, Камбарка, Кияса, Балезино, Якшур-Бӧдья но Можга ёросъёсын ёрос больницаослэн выль корпусъёссы пуктэмын вал^[3].

Савельевъёслэн выжызы

Владимир Никифорович Савельев эмъясьёслэн бадӟым династизылы кутскон сётӥз^[2]:

Римма Аверьяновна кузпалыз — эмчи-невропатолог;
Вера Владимировна бадӟымез нылыз — психиатр, солэн кузпалыз Латушкин Юрий Витальевич — реаниматолог-анестезиолог;
Нина Владимировна шоретӥ нылыз — окулист, солэн кузпалыз Малых Константин Валерьевич — хирург;
Александр Владимирович пиез — хирург-кардиолог, солэн кузпалыз Савельева Екатерина — вуоно врач;
Иван Никифорович бадӟым агаезлэн нылыз — стоматолог, пиосыз — педиатр но стоматолог;
Егор Никифорович шоретӥ агаезлэн нуныкайёсыз — эмсузэръёс;
Вера Никифоровна апаезлэн пиез — хирург.

Дано нимъёсыз но данъетъёсыз

Эм наукаосъя доктор;
Удмурт Элькунысь тазалыкез утён удысысь дано ужась;
Росси Федерациысь тазалыкез утён удысысь дано ужась;
Удмурт Элькун Кивалтэтлэн премиезлэн лауреатэз;
Удмурт Элькунысь Кун премилэн лауреатэз;
Ужысь Горд Знамя орденлэн кавалерез;
Трокай Борисов нимо премилэн лауреатэз^[4].

Валэктонъёс

↑ Туганаев, 2008.
↑ ¹ ² ³ ⁴ ⁵ Савельев Владимир Никифорович [ӟуч] Фондовый каталог УР. Эскеремын 25.09.2025 арын
↑ ¹ ² ³ ⁴ ⁵ Н. С. Стрелков, А. Д. Чуршин, Н. М. Попова, В. К. Гасников. Врач, организатор, учёный и общественный деятель (к 80-летию профессора В. Н. Савельева) [ӟуч] // Ижевская государственная медицинская академия. — 2016.
↑ Попова Н. М., Шубин Л. Л., Шабардин А. М. Профессору Владимиру Никифоровичу Савельеву — 85 лет [ӟуч] // Пермский медицинский журнал. — 2020. — Т. XXXVII, № 5. — С. 105—111. — doi:10.17816/pmj375105-111.

Литература

Савельев Владимир Никифорович // Удмуртская Республика : Энциклопедия / гл. ред. В. В. Туганаев. — 2-е изд., испр. и доп. — Ижевск : Издательство «Удмуртия», 2008. — С. 586. — 768 с. — 2200 экз. — ISBN 978-5-7659-0486-2.

Чӧлсконъёс

Иди своим путём [ӟуч]

[_a37f378030d51db6-1] Туганаев, 2008.

[gasur-2] ¹ ² ³ ⁴ ⁵ Савельев Владимир Никифорович [ӟуч] Фондовый каталог УР. Эскеремын 25.09.2025 арын

[igma-3] ¹ ² ³ ⁴ ⁵ Н. С. Стрелков, А. Д. Чуршин, Н. М. Попова, В. К. Гасников. Врач, организатор, учёный и общественный деятель (к 80-летию профессора В. Н. Савельева) [ӟуч] // Ижевская государственная медицинская академия. — 2016.

[4] Попова Н. М., Шубин Л. Л., Шабардин А. М. Профессору Владимиру Никифоровичу Савельеву — 85 лет [ӟуч] // Пермский медицинский журнал. — 2020. — Т. XXXVII, № 5. — С. 105—111. — doi:10.17816/pmj375105-111.

[1]

[2]

[3]

[4]