Ёлкин, Пётр Васильевич

Пётр Васильевич Ёлкин
Пётр Васильевич Ёлкин
Вордӥськем нуналыз	5-тӥ инвожое 1946 (80 лет)
Вордӥськем интыез	Шудья, Пероггурт гурт поселение, Дэри ёрос, Удмурт Автономной Советской Социалистической Республика, РСФСР, СССР;
Кун	СССР; Россия;
Дышетскемез	Удмурт кун университет; Академия художеств СССР[d];
Данъетъёсыз	СССР-ысь Суредаськонъя академилэн дипломез
Дано нимъёсыз	Удмуртиысь калык суредась, ; РФ-ысь дано суредась, ; Удмурт Элькунысь Дэри ёрослэн дано муртэз
Премиосыз	Удмуртиысь Комсомоллэн премиезлэн лауреатэз, ; УАССР-ысь Кун премилэн лауреатэз, ; Кузебай Герд нимо йӧскалык премилэн лауреатэз

Пётр Васи́льевич Ёлкин (ворд. 5-тӥ инвожое 1946, Шудья, Удмурт Автономной Советской Социалистической Республика) — росси живописец, график. Удмуртиысь калык суредась, Россиысь дано суредась, Удмуртиысь Комсомоллэн премиезлэн лауреатэз, Удмурт Элькунысь Кун премилэн лауреатэз. Удмурт Элькунлэн Дано кунмуртэз.

Улон сюресэз

1946-тӥ арын 5-тӥ инвожое Дэри ёросысь Шудья гуртын вордӥськиз. Анай-атаезлэн 12 пиналыз вал, улэп кылизы витез гинэ, П. В. Ёлкин покчиез вал. Лудорвай шор ёзо школаын дышетскиз, суредаськон искусствоосъя студие ветлӥз. Ӵапак та вакытэ солэн ужъёсыз «Ленинец» ёрос но «Советской Удмуртия» элькун газетын печатласькылӥзы. Аттестат басьтэмез бере, Пётр Ёлкин Ижкарысь Удмурт кун университетысь суредаськонъя но графикая факультетэ пырыны эскероно кариськиз^[1]^[2]:

Мон ӧй оскы, пыро шуыса: суредаськыны бер кутски но тросэзлы дышыса ӧй вутты. Коридорын пленэре люкаськем нырысетӥ курсысь дышетскисьёсын тодматски, бордазы итӥськыны куриськи. Соку соослэсь тросэзлы дыши но живописез ӟечгес валаны ӧдъяй ^[2].

Студент вакытаз «Советской Удмуртия» газетлэн редакцияз ужалляз. Дышетсконзэ йылпумъямез бере Совето Армиын Атыкай музъеммес утиз. Отысь 1970-тӥ арын берытскыса, выльысь редакцие суредась луыса вуиз^[1]. 1971-тӥ арысен — СССР-ысь Журналистъёслэн огазеяськонысьтызы ёзчиез^[3].

1973-тӥ арысен УАССР-ысь Суредаськисьёслэн огазеяськонзылэн суреданъя но производствоя мастерскойёсаз тыршиз. 1975-тӥ арысен — СССР-ысь Суредаськисьёслэн огазеяськонзылэн ёзчиез^[3]^[1]. 1976-тӥ арын РСФСР-ысь Суредаськисьёслэн огазеяськонзылэн И. Е. Репин нимо «Академической дача» творчествоя юртазы стажировка ортчиз (Тверь улос). Озьы ик Ткачёв академикъёс кивалтэм улсын Суредаськонъя академилэн мастерскойёсаз быгатонлыкъёссэ волятӥз. 1979-тӥ арын ГДР-ын стажировка ортчиз^[1]^[3], нош 1980-тӥ арын творчествоя командировкае Чехословакие вуылӥз. Озьы ик Правительстволэн делегациеныз Вьетнаме, Анголае, Замбие, Танзание, Сингапуре но Малайзие командировкаосы пыриськиз^[2].

1983-тӥ—1991-тӥ аръёсы Пётр Ёлкин Азиысь но Африкаысь кунъёслэн валче улонъя комитетсылэн ёзчиез вал. 1992-тӥ арысен 2003-тӥ арозь Удмуртиысь Суредаськисьёслэн огазеяськонзылы [ӟуч] (удм. тӧрое бырйиськылӥз. 1990-тӥ—1995-тӥ аръёсы Удмуртиысь Кун Кенешлэн депутатэз вал^[4]^[1].

Творчествоез

Пётр Ёлкин живописья но графикая кӧня ке жанръёсын ужа. Уно пумо портретъёс, пейзажъёс, натюрмортъёс, пӧртэм сюжетэн но темаен картинаосты быдэстӥз. Со понна творчестволы мылкыдзэ бугыртӥсь лейтмотив адямилэн образэз луиз. Художник огшоры гуртысь но заводысь ужась калыкез, интеллигенциез картинаосаз возьматӥз^[4]^[1]. Пётр Ёлкин дэра вылэ гожтыса кельтӥз шаерысьтымы тодмо улӥсьёслэсь тусъёссэс. Татьяна Чернова кылбурчиез но трос мукет тодмо удмуртъёсты суредъёсаз возьматӥз. Ёлкинлэн уно ужъёсыз Удмурт шаерлэн инкуазь сэрегъёсызлы сӥземын.

Солэн суредъёсыз элькунысь, улосъёсысь но Россиысь таӵе адӟытонъёсын возьматэмын вал: «Бадӟым Волга» (Нижний Новгород, 1974), «Советской Россия» (Муско, 1975), «Россилэн егит вакытыз» (Муско, 1976), «Суредась графикъёс БАМ-ын» (Муско, 1976)^[1].

Аслаз нимысьтыз адӟытонъёсыз пӧртэм аръёсы Ижын, Ханойын (1984), Тампереын (2000) но Бостонын (2008–2009) радъяськылӥзы^[1]. Берло аръёсы США-е ӵемысь поталляз.

Семьяез

Пётр Ёлкин школаын ӵош дышетскем нылмуртэ кышно басьтӥз. Валентина Семёновна кузпалыз дышетскемезъя эмчи. Соос куинь пиналъёссэс будэтӥзы: Ольга (психология наукаосъя кандидат), Анна но Алексей^[1]^[2].

Данъетъёсыз

РФ-ысь Журналистъёслэн огазеяськонысьтызы ёзчиез (1971);
РФ-ысь Суредаськисьёслэн огазеяськонысьтызы ёзчиез (1975);
Удмуртиысь Комсомоллэн премиезлэн лауреатэз (1976);
СССР-ысь Суредаськонъя академилэн дипломез (1980);
УАССР-ысь Кун премилэн лауреатэз (1982);
Удмуртиысь калык суредась (1987);
РФ-ысь дано суредась (1996);
Удмурт Элькунысь Дэри ёрослэн дано муртэз (2006)^[1];
Удмурт Элькунлэн Дано кунмуртэз (2021).

Озьы ик учке

Валэктонъёс

↑ ¹ ² ³ ⁴ ⁵ ⁶ ⁷ ⁸ ⁹ ¹⁰ Ёлкин Петр Васильевич [ӟуч] Воршуд.
↑ ¹ ² ³ ⁴ Мария Галеева, Михаил Николаев. Пётр Васильевич Ёлкин: "Улон шоры кылбурчи синмын учконо..." [удм.] // Инвожо. — 2020. — № 7. — С. 39—51.
↑ ¹ ² ³ Елкин Петр Васильевич [ӟуч] Удмуртский республиканский музей изобразительных искусств.
↑ ¹ ² Анна Вардугина В Ижевске открыта выставка к 75-летию художника Петра Ёлкина Удмуртская правда.

[:0-1] ¹ ² ³ ⁴ ⁵ ⁶ ⁷ ⁸ ⁹ ¹⁰ Ёлкин Петр Васильевич [ӟуч] Воршуд.

[:2-2] ¹ ² ³ ⁴ Мария Галеева, Михаил Николаев. Пётр Васильевич Ёлкин: "Улон шоры кылбурчи синмын учконо..." [удм.] // Инвожо. — 2020. — № 7. — С. 39—51.

[:1-3] ¹ ² ³ Елкин Петр Васильевич [ӟуч] Удмуртский республиканский музей изобразительных искусств.

[:3-4] ¹ ² Анна Вардугина В Ижевске открыта выставка к 75-летию художника Петра Ёлкина Удмуртская правда.

[1]

[2]

[3]

[4]