Петропавловской черк (Норъя)
| Православной черк | |
| Дун-чылкыт Пётр но Павел Первоверховной апостолъёслы черк | |
|---|---|
 | |
| 56°40′05″ с. ш. 52°42′38″ в. д.GЯO | |
| Кун | |
| Интыяськемез | Норъя |
| Конфессия | Православие |
| Епархия | Сарапул епархия |
| Юртэз пуктэмын | 1889—1893 аръёс |
| Вӧсяськон арбериос но интыос | Инмар Анайлэн Тихвинысь вӧйын бӧрдӥсь, утись мудорез |
| Инлыкез | нылкышно монастырь |
| Югдурез | Ужась |
| Сайтэз | monastir-norya.pravorg.ru |
 |
|
 Медиафайлъёс РувикиМедиа пушкын | |
Дун-чылкыт Пётр но Павел Первоверховной апостолъёслы черк (Пётр но Павел апостолъёслы черк; ӟуч: Петропавловская церковь (Норья)) — Удмурт Элькунысь Норъя черкогуртысь православной черк, Мало-Дивеевской Серафимовской монастырь котырын интыяськемын. Ижысь митрополитлэн Сарапул епархиысьтыз Пичи Пургалась благочинияз пыре.
Черк приходлэн историез
1841-тӥ арын Бадӟым Норъя черкогуртын Вӧсьлыко Синод косэмъя усьтэмын. Выль приходэ пыризы Пуже-Уча но Юсь черкогурт приходъёсы азьвыл пырись улоно интыос: Бадӟым Норъя черкогурт, Якшур-Норъя, Вуж Постол, Постол, Кулай-Норъя, Вылӥ Лудӟи гуртъёс но Шор Постол, Сӥзяшур-Норъя, Кочур-Норъя, Вишур-Норъя, Пыӵас, Вуж Женвай, Женвай но Сылешур-Норья починкаос. Пулэсь черкез пуктон ужъёс 1843-тӥ арын йылпумъяськизы, со аре ик сое Дун-чылкыт Пётр но Павел Первоверховной апостолъёслы сӥзьыса вӧсязы[1].
Ватка духовной консисторилэн указэзъя, 1889-тӥ арын излэсь черк ӝутыны кутскизы, сое Фёдор Григорьевич Чернов купечлэн барышеныз пуктӥзы. 1893-тӥ арын йылпумъямын вал, черклэн куинь престолэз[1]:
- валтӥсез — Дун-чылкыт Пётр но Павел апостолъёслы сӥземын, 1893-тӥ арын 18-тӥ шуркынмонэ вӧсямын;
- паллянысез — Пресвятой Богородицалэн Покровезлы сӥземын, 1897-тӥ арын 23-тӥ куарусёнэ вӧсямын;
- бурысез — Инмарлэн возьматӥськемезлы сӥземын[2].
1940-тӥ арын УАССР-ысь Вылӥ Кенешлэн Президиумезлэн указэзъя, Петропавловской черк пытсамын вал, юртсэ клублы сётӥзы[1]. 1990-тӥ аръёсы черкез оскисьёслы берыктӥзы[2].
Мало-Дивеевской Серафимовской нылкышно монастырь
Вӧсьлыко Синодлэн 1996-тӥ арын 10-тӥ коньывуонэ юнматэм пуктэтэзъя, Ӟуч Пыӵас черкогуртысь Дун-чылкыт Александр Невский черк бордын нылкышно монастырь усьтэмын вал. 2003-тӥ арын Ижысь но Удмуртиысь архиепископ Николай куремъя, Вӧсьлыко Синод Ӟуч Пыӵасысь Мало-Дивеевской Серафимовской нылкышно монастырез косӥз Норъя черкогуртэ выжтыны, татысь Дун-чылкыт Пётр но Павел Первоверховной апостолъёслы сӥзем приходэз нимазы Дун-чылкыт Пётр но Павел апостолъёслы черк бордысь Мало-Дивеевской Серафимовской нылкышно монастырь. Гуртысь крестьянъёслэсь черк котырысь музъемъёссэс басьтӥзы, отчы кельяосын корпус но юртъер котырез возёнъя висъетъёс пуктӥзы. 2009-тӥ арын монастырьлэн штатаз 3 баӵко, 9 монахиня но 6 послушница лыдъяськиз[3][2][4][5].
Вӧсьлыкъёс
Монастырьысь Петропавловской черкын вӧсьлыкъёс утисько, татчы соос Николай митрополитлы луыса сюризы[6][4][5]:
- Инмар Анайлэн вӧйын бӧрдӥсь, утись «Тихвинской» мудорез;
- Преподобной Серафим Саровскийлэн лысьӧмъёсызлэн оглюкетэныз мудорезлэн копиез;
- Муско Кремльлэн соборысьтыз «Кремлёвской» нимо мудор;
- Инмарлэн Кирос пуэзлэн оглюкетэз;
- Голгофысь излэн оглюкетэз;
- Спиридон Тримифунтскийлэн мантиезлэн оглюкетэз;
- Максим Сербскийлэн лысьӧмъёсызлэн оглюкетэз;
- Тихон Задонскийлэн коросэзлэн оглюкетэз;
- Афанасий Афонскийлэн дӥсезлэн оглюкетэз;
- Святитель Гермоген Московскийлэн коросэзлэн оглюкетэз;
- Святитель Григорий Богословлэн лысьӧмъёсызлэн оглюкетэз;
- Курадӟытыса быдтэм Орестлэн лысьӧмъёсызлэн оглюкетэз;
- Курадӟытыса быдтэм Варваралэн лысьӧмъёсызлэн оглюкетэз;
- Иоанн Тобольскийлэн лысьӧмъёсызлэн оглюкетэз;
- Саввалэн Освященныйлэн лысьӧмъёсызлэн оглюкетэз;
- Курадӟытыса быдтэм Пантелеймон целительлэн лысьӧмъёсызлэн оглюкетэз;
- Дун-чылкыт праведной Феодор Ушаков Росси флотысь адмираллэн лысьӧмъёсызлэн оглюкетэз;
- Феодор Санаксарскийлэн лысьӧмъёсызлэн оглюкетэз;
- Киево-Печерской лавраысь святойёслэн лысьӧмъёссылэн оглюкетсы: Преп. Афанасий, преп. Лука, преп. Сисой, преп. Лаврентий, преп. Иссакай, преп. Павел, преп. Меркурий, преп. Тит, преп. Ахилла, преп. Феодор, преп. Лонгин, преп. Евфимий.
Мало-Серафимовской Дивеевской монастырь
Монастырьлэн азбараз
Мало-Серафимовской Дивеевской монастыре пырон азьыз
Петропавловской черк (Норъя)
.jpeg)
Валэктонъёс
- ↑ 1 2 3 Составители: И. Н. Зайцева, Г. И. Самарцева. Православные храмы Удмуртии: Справочник-указатель / Науч. ред. А. А. Тронин. — Ижевск: Удмуртия, 2000. — С. 57-58. — 480 с. — 1100 экз. — ISBN 5-7659-0011-9.
- ↑ 1 2 3 Мало-Дивеевский Серафимовский женский монастырь [ӟуч] udm.travel. Эскеремын 26.09.2025 арын
- ↑ Мало-Дивеевский Серафимовский женский монастырь [ӟуч] ortho-rus.ru. Эскеремын 26.09.2025 арын
- ↑ 1 2 История [ӟуч] monasterium.ru. Эскеремын 26.09.2025 арын
- ↑ 1 2 Монастырь в селе Большая Норья [ӟуч] diveevo-monastyr.ru. Эскеремын 26.09.2025 арын
- ↑ Ижевская епархия Престольные торжества в Мало-Дивеевском Серафимовском женском монастыре села Норья [ӟуч] sarapul.bezformata.com. Эскеремын 26.09.2025 арын