Дурова, Надежда Андреевна

Википедиысь материал

РАН экспертиза

Logo-ran.png
Экспертиза ортчытэмын
Россиысь Тодосъёсъя Академиен
Рос-прос лыдӟе
Aprove.svg

РАН экспертиза

Arrow-Right.png
Logo-ran.png
Экспертиза ортчытэмын
Россиысь Тодосъёсъя Академиен
Рос-прос лыӟе
Learning.svg

Материалъёс басьтэмын Б.Н. Ельцин нимо библиотекаысь

Arrow-Right.png
Library.png
Та гожтосын Б.Н. Ельцин нимо Президент библиотекалэн фондысьтыз материалъёс кутэмын
Рос-прос учке
Рувикиын таӵе фамилиен мукет муртъёс сярысь гожтосъёс вань. Учке: Дурова.
Надежда Андреевна Дурова
Надежда Дурова
Надежда Дурова
Вордӥськем дырыз 17‑тӥ (28-тӥ) куарусёнэ 1783
Вордӥськем интыез

Вознесенское, Росси империя

яке Херсон[1]
Кулэм дырыз 21-тӥ южтолэзе (2-тӥ оштолэзе) 1866 (82 года)
Кулэм интыез
Кунмуртлыкез Росси империяFlag of Russia.svg Росси империя
Кыӵе войскоез кавалерия
Званиез штабс-ротмистр
Ожмаськонъёс/ожъёс Ньылетӥ коалициысь ож,
1812-тӥ арын ортчем Атыкай ож,
Куатетӥ коалициысь ож
Данъетъёсыз Военной орденлэн висъян пусэз
Логотип РУВИКИ.Медиа Медиафайлъёс РувикиМедиа пушкын

Наде́жда Андре́евна Ду́рова (озьы ик тодмо Алекса́ндр Андре́евич Алекса́ндров нимын; 1783-тӥ арын 17-тӥ (28-тӥ) куарусёнэ [2][3] — 1866-тӥ арын 21-тӥ южтолэзе (2-тӥ оштолэзе)  — ӟуч нылкышно-кавалерист, Ӟуч император армиысь офицер, 1812-тӥ арын Атыкай оже пыриськем мурт (тодмо луэ кавалерист-девица) шуыса; гожъяськись. Литератураын но газет-журналъёсын со сярысь нырысетӥ нылкышно-офицер шуыса гожъяло [К 1].

Улон сюресэз

Пинал дырыз

Вордӥськиз 1783-тӥ арын 17-тӥ (28-тӥ) куарусёнэ Вознесенское черкогуртын (куд-ог биографъёс, солэн «Запискаосыз» вылэ пыкиськыса, 1789-тӥ яке 1790-тӥ арын гожто, )[4]. Атаез — гусар ротмистр Андрей Васильевич Дуров. Анаез — Надежда Ивановна Александрович, полтавской помещиклэн нылыз[5], анай-атаезлэн пумит луэмзы шоры учкытэк, Андрей Дуровлы бызиз[6]. Семья ялан улон интызэ вошъяса, полковой улонэн улӥз. Сямызъя анаез туж шаплы но етӥз вал, кема возьмам пи интые ныл вордӥськем бере, Надеждаез адӟемпотостэм кариз. Огпол, корт уробоын мыныкузы, аресъем нуноксэ, юн кема бӧрдэ шуыса, нянезлэн киысьтыз кыскиз но укное сэрпалтӥз. Вирен паньсаськем нуныез гусаръёс шедьтӥзы. Со учыр бере, атаез нылзэ Астахов гусарлы будэтыны сётӥз. Энер — мынам нырысетӥ кӧкые; вал, пыӵал но полк крезьгур — пинал дырысь нырысетӥ шудонъёсы, шуыса берло тодаз вайылӥз ачиз Дурова[6].

Надежда Дурова егит дыръяз

1789-тӥ арын, службаысь отставкае потэмез бере, атайзэ Ватка губерниысь Сарапул карен кивалтыны юниматӥзы. Соку Дуровъёс нылзэс доразы басьтӥзы. Анаез киужлы, юртъер котырын ужаны дышетӥз ке но, нылашлэн соин вырыны мылкыдыз ӧй вал. Ӧжытак будэмез бере, атаез Надеждалы черкесс выжыысь Алкид нимо вал кузьмаз. Ӝоген вал вылын ворттылон солэн яратоно ужезлы пӧрмиз.

Дас тямыс аресказ Дуроваез судебной заседателен Василий Степанович Черновен кузпалъязы. Ар ортчыса, Иван пизы вордӥськиз. Егит анайлэн сюлэмыз пиез борды ӧз биниськы, кузпалыныз тупатэк улӥзы. Соин, люкиськоно луизы. Пиналзэ кузпалызлы кельтыса, Надежда дораз бертиз но выльысь анаезлэсь вожзэ поттӥз. Кӧня ке дыр ортчыса, егит нылкышно казак есауллы синмаськиз. 1806-тӥ арын, казак дӥськутэн дӥсяськыса, яратоно валэз вылэ пуксиз но соин ӵош полк сьӧры кошкиз.

Кавалерист-нылкышно

Кӧня ке дыр ӵоже Дурова аслаз есаулэзлэн денщикез чотын улӥз, собере со дорысь кошконо луиз. Малы ке шуоно, со вакытэ казакъёс одно ик туш нуллыны кулэ вал, соин, лушкемлыкез шараяськоз шуыса, Дурова кавалерийской Коннопольской улан полке кошкиз (уланъёс соку туш ӧз нуллэ). Мукетыз муг, кудӥзъя Дурова казакъёс пӧлысь кошконо луиз, со — дорян выжыысь луэмез. Нош дворянъёслы одно ик регулярной армиын служить карыны кеуклэ вал. Ассэ дворянин Александр Васильевич Соколов нимаз (яке «Дуров», кызьы гожтэ ачиз «Кавалерист-девицалэн запискаосаз»). Дуроваез Коннопольской улан полке «товарищ» званиен кутӥзы (дворянъёслэн рядовой чинзы).

Н. А. Дуровалэн портретэз. 1837-тӥ ар, В. И. Гау

Со Гуттштадт, Гейльсберг, Фридланд котырысь ожмаськонъёсы пыриськиз, аслэсьтыз сэзь луэмзэ возьматӥз. Алкидэз сое трос пол быронлэсь утьылӥз, нош огпол, пудосылонниын кема сылэмез бере, со кенер вамен тэтчаны кутскиз но майыген кӧт улзэ кыриз. Яратоно валэзлэн быронэз пумысь нылкышно туж юн кайгыриз.

Тильзит тупанкыл гожтон вакытэ Дурова Тильзитын вал. Нылкышноез шараяз 1807-тӥ арын ожмаськон азьын атаезлы келям гожтэтэз. Отын со нылызлэн лушкем кошкемез пумысь вожзэ медаз потты шуыса вера (гуртысь кошкыкуз, нылаш дэремзэ ярдуре куштыса кельтӥз вал, соин атаез, нылыз шуре выйиз шуыса малпаз). Атаез нылзэ азьвыл арми юлтошъёсыз пыр утчаса шедьтӥз но соку ик гуртаз берыктыны косӥз. Шоркарын улӥсь агаез со гожтэтэз тодмо генералэзлы возьматэм. Ӝоген кавлерист-девица сярысь ивор Александр I дорозь вуиз. Сое Санкт-Петербурге, император доры ыстӥзы. Нылкышнолэн, атыкай музъемез утён понна ожгар удысын служить карон ӟырдыт мылкыдыз императорлы синмаськымон потӥз но солы армие кыльыны лэзиз.Сӧсырмем офицерез утемез понна, ас киыныз Георгиевской крест бырттӥз, корнет звание сётӥз но Александр Андреевич Александров нимын Мариупольысь элитной гусарской полке выжтӥз. («Александр» нимыз эксэй ним бордысь, фамилиез анаезлэсь басьтэмын).

Надежда Дурова

Со учыр бере Дурова кык ар пала атаез дорын Сарапулын улӥз. 1811-тӥ арын 1-тӥ оштолэзе  Литовской улан полке выжиз. Малы ке шуоно, выльзэ зарниям сӥньысэн вурем гусар мундир басьтыны содлэн уксёез ӧз тырмы. ( Со полкын 1816-тӥ арозь — отставкае потытозяз служить кариз).

Вылаз ик, «Александр Андреевичлэн» полклэн командирезлэн егит нылыз шоры учкалак карымтэез командирлы ӧз кельшы. 1811-тӥ арысен Дурова Киев губерниысь губернатор М. А. Милорадович дорын 2 толэзь ӵоже адъютант-посыльной чотын сужить кариз.

1812-тӥ арын Дуровалы поручик чин сётӥзы но полуэскадронэн кивалтыны оскизы. Атыкай ожын Смоленск, Колоцкий монастырь, Бородино котырысь ожъёсы пыриськиз, Семёновской флешъёсты утиз, соку ик пыдыз сӧсырмыны шедиз. Арми Тарутиное выжем бере, Дурова Кутузов доры адъютантэ кутыны куриськонэн вазиськиз. Со вакытэ Кутузов кавалерист-девица сярысь трос пол кылылӥз ни вал. Озьы кык арня пала со Кутузов дорын адъютант-посыльной луыса служить кариз[7]. Контузить карем пыдыз юнгес висьыны кутскемен, Дуроваез эмъяськыны дораз бертыны лэзизы. 1813-тӥ арын куартолэзе со выльысь действующей армие вуиз но Германиез мозмытон ожъёсы пыриськиз, Модлина крепостез котретэ басьтонын но Гамбург карез мозмытонын сэзь ожмаськеменыз висъяськиз.

Отставкаын

1816-тӥ арын, атаез сюлворыса, Надежда Дурова штабс-ротмистр чинын отставкае потӥз . Я Сарапулын, я Елабугаын, покчи выныз Василий Андреевич Дуров (1799—1860) дорын улӥз. Котьку сямен пиосмурт дӥсен ветлылӥз, вань гожтэтъёсаз Александров нимын гожтӥськылӥз, солы нылкышно чотын вазьиськыкузы вожзэ поттылӥз. Ас вакытаз аспӧртэмлыко луэменыз висъяськиз[8].

Н. А. Дуровалэн туспуктэмез (1860-тӥ—1865-тӥ аръёсы)

Берло аръёссэ покчи выныз дорын Елабугаысь пичи коркан, котыраз трос люкам пуны-коӵыш пӧлын ортчытӥз. Улонысь кошкиз 1866-тӥ арын 21-тӥ южтолэзе (2-тӥ оштолэзе) Ватка губерниысь Елабуга карын, 82 аресаз. Кулон азяз чирдыкузы Александр нимын мед вералозы шуыса сӥзьыса кельтӥз вал, но вӧсьчи, черк шонеррадлэсь ӧз палэнскы. Надежда Дурова ожчи санлыкъёсын Троицкой шайвылын ватэмын.

Нылпиосыз

Дуровалэнэн венчаськемез но пизэ черке пыртэм сярысь гожтэмъёс Сарапул карысь Вознесенской соборлэн метрической книгаосаз утиськемын. Пиез, Иван Васильевич Чернов, Императорской военной нылпи юртэ дышетскыны сётэмын, тазалыкез лябен, 16 аресаз 14-тӥ класс званиен дышетсконлэсь мозмытэмын. Кышнояськон понна, Иван анаезлэсь бакель курыса гожтэт келяз вал, отысь «Маменька» кылэз адӟыса, анаез гожтэтсэ лыдӟытэк ик сутӥз. «Александр Андреевичлы» шуыса куронэн вазиськемез бере гинэ, «бакель карисько» шуыса гожтӥз.

Коллежской советник Иван Васильевич Чернов кулӥз 53 аресаз, 1856-тӥ арын — анаезлэсь дас арлы вазьгес улонысь кошкиз. Ватэмын Митрофаньевской шайвылын. Солэн кузпалыз Анна Михайловна Бельская, кулӥз 37 аресаз, 1848-тӥ арын[9].

Н. А. Дуровалэн музей-юртаз ужасьёс солэн Василий вынызлэн Франциын улӥсь ӵыжы-выжыеныз кусыпъёс тупатӥзы.

Литература удысын

А. С. Пушкинэн Дурова выныз пыр тодматскиз. Василийлэн наивной цинизмез Пушкинэз юн паймытэм, соин кӧня ке нунал ӵоже тодмоос куспын вераськонъёс ӧз чалмылэ. Берло, картаен вормемез бере, Пушкин Василиез Кавказысь Москваозь келяз. Василийлэн со вакытэ одӥг сюлмаськонэз вал — солэн одно ик сю сюрс манетэз луыны кулэ. Огпол со Пушкинлы сузэрезлэсь тодэ ваёнъёссэ келяз, Пушкин та гожтэтъёслэсь аспӧртэмлыксэс вылӥ дунъяз.

«Запискаослэн» нырысетӥ изданиез. Титульной лист

1836-тӥ арын «Современник» журналлэн 2-тӥ номераз Дуровалэн мемуаръёсыз печатламын вал, берлогес соосты «Записки» пушкы ватсазы. Пушкин мур тунсыкъяськиз Дуроваен, журнал бамъёсаз, сое данъяса, мыло-кыдо рецензиос гожъяз но солы рос-прос гожъяськыны дэмлалляз. Со аре ик «Записки» «Кавалерист-Девица» нимын кык люкетэн потӥз. 1839-тӥ арын со борды «Записки» нимо ватсэт поттэмын вал. Со ужъёсты вылӥ дунъямзы Дуровалэсь повестьёс но романъёс гожъян борды басьтӥськон мылкыдзэ ӝутӥз. 1840-тӥ арысен «Современник[8], «Библиотека для чтения», «Домашние заметки» но мукет журналъёсын печатласькыны кутскиз; берлогес соосты нимаз поттылӥзы («Гудишки», «Повести и рассказы», ​​«Угол», «Клад»). 1840-тӥ арын люкам произведениосыз ньыль томен потӥзы.

Библиография

  • Надежда Дурова. Записки кавалерист-девицы. 1836. первое издание.
  • Надежда Дурова. Записки Александрова (Дуровой). — М.: В типографии Николая Степанова, 1839.
  • Дурова Н. А. Записки кавалерист-девицы / Подготовка текста и примеч. Б. В. Смиренского. — Каз.: Татарское книжное издательство, 1966.
  • Дурова Н. А. Записки кавалерист-девицы / Переиздание. Подготовка текста и примеч. Б. В. Смиренского. — Каз.: Татарское книжное издательство, 1979. — 200 с. — 350000 экз.
  • Дурова Н. А. Избранные сочинения кавалерист-девицы / Сост., вступит. ст. и примеч. Вл. Муравьева. — М.: Московский рабочий, 1983.
  • Дурова Н. А. Избранное / Сост., вступ. ст. и примеч. В. В. Афанасьева. — М.: Сов. Россия, 1984.
  • Дурова Н. А. Избранные сочинения кавалерист-девицы / Сост., вступит. ст. и примеч. Вл. Б. Муравьева. — М.: Московский рабочий, 1988 (Библиотека «Московского рабочего»).
  • Дурова Н. А. Русская амазонка. Записки. — М.: Захаров, 2002. — 384 с. 5 000 экз.
  • Дурова Н. А. Записки кавалерист-девицы. Серия: Знак судьбы. — М.: Аст-Пресс Книга, 2005 — 5000 экз.
  • Дурова Н. А. Избранные сочинения / Сост. О. Айкашева. — Елабуга: ЕлТИК, 2013. — 480 с. — 1000 экз.
  • Nadezhda Durova. Cavalry Maiden. Journals of a Russian Officer in the Napoleonic Wars. / Translated by Mary Fleming Zirin. — Bloomington & Indianapolis: Indiana University Press, 1988.
  • Nadeschda Durowa. Die Offizierin. Das ungewöhnliche Leben der Kavalleristin Nadeschda Durowa, erzählt von ihr selbst. Aus dem Russischen von Rainer Schwarz. Mit einer biographischen Notiz von Viktor Afanasjew, übersetzt von Hannelore Umbreit. Leipzig: Gustav Kiepenheuer-Verlag,
  • Записки кавалерист-девицы [Текст] / Н. А. Дурова; [Н. А. Дурова; [идея проекта В. С. Ерастов; вступ. ст. О. Г. Лукас; редкол. : Г. Р. Ахтямова и др.]. — Сарапул: МУП «Сарапульская типография», 2006. — 344 с.: ил. — (Проект «Память Сарапула»). — 1500 экз.. — ISBN 5-901304-18-7.
  • В уездном городе «С» / Сборник произведений А. Вештомова, Н. Дуровой, Н. Блинова, И. Воронцова, С. Миловского, Н. Ончукова, Д. Зеленина. Идея проекта — В. С. Ерастов; Сост. — Т. Б. Пеганова; дизайн — Т. А. Кустова; Редакционная коллегия: Г. Р. Ахтамянова, Л. Ю. Быкова, С. В. Креклина, О. Г. Лукас, В. Л. Мурашкина, Т. Б. Пеганова, Н. Л. Решетников;. — Сарапул: [б.и.], 2008 (МУП «Сарапульская типография»). — 290 с.: ил. — (Проект «Память Сарапула»). ISBN 978-5-901304-23-5.

Буре ваён

Н. А. Дуровалэн музей-юртэз
Сарапулын синпелет
Синпелетъёс
  • Сарапулын синпелет[11].
  • Елабугаын синпелет (пуктэмын 1993-тӥ арын; скульпторез Федор Лях[12], архитекторез Сергей Бурицкий) Троицкой площадьын, Троицкой шайвыл азьын.
Музейёс
  • Елабугаын — Нылкышно-кавалеристлэн Надежда Дуровалэн музей-юртэз.[13]
Опера
  • Анатолий Богатырёвлэн «Надежда Дурова» операез (1946) .
Фильмография
  • Надежда Дурова Шурочка Азаровалэн прототипеныз лыдъяське — Александр Гладковлэн «Давным-давно» пьесаезлэн Эльдар Рязановлэн «Гусарская баллада» фильмезлэн героиняез. Озьы ке но, ачиз автор таин соглаш уг луы (учке «Давным-давно»).
  • Фильм «То мужчина, то женщина» (режиссёрез Александр Наговицын), СССР, Свердловск к/ст Гостелерадиолэн куремезъя 1989-тӥ ар, 2 сериез.
Нумизматика
  • 2012-тӥ арын Росси Федерациысь Шор банк «1812-тӥ арын Атыкай ожлэн полкйыръёсыз но геройёс» сериысь кык манетъем коньдон поттӥз (2манет, сталь никелевой гальванической покрытиен), солэн огпалаз штабс-ротмистрлэн Н. А. Дуровалэн туспуктэмез.

Озьы ик учке

Мукет со выллем нылкышноос

  • Дуроваен огдыре аслаз бырем агаезлэн нимыныз 15 ар служить кариз но ожмаськиз Александра Тихомирова. Лушкемлыкез шараяськиз Фридланд ожмаськонын артиллерийской роталэн командирезлэн геройлыко кулэмез бере (со оже Дурова но пыриськиз). Александралэн азьвыл ик дасям завещанияз асваньбурзэ со «гажано ӵош служить карем эшъёсылы сӥзисько» шуыса гожтэмын вал.
  • Со вакытэ француз армиын трос нылкышноос служить каризы, соослэн нылкышно луэмзы сярысь эшъёссылы тодмо вал. Тужгес тодмоез соос пӧлысь Тереза ​​Фигер (1774 —1861), 1793-тӥ —1815-тӥ аръёсы со Наполеонлэн отрядаз служить кариз, со дыре Наполеон ачиз капитан чинын вал. Дуровалэн литературной вормонъёсызлы синмаськыса, 1842-тӥ арын Тереза но тодэ ваёнъёссэ печатлаз[14].
  • Австри армиын служить кариз итальян нылкышно Франческа Сканагатта .
  • Прус кавалериын — Элеонора Прохазка. Озьы ик эксэй выжыослэн — принц Вильгельмлэн но солэн кузпалызлэн дурбасьтэмзыя, прус армиын куатетӥ коалици палан ожмаськиз Луиза Кессених.
  • XX даурлэн кутсконаз Надежда Дуровалэсь адӟем кариз Георгиевской крестлэн вуоно кавалерез Ольга Николаевна Кабанова, аслэсьтыз нылкышно луэмзэ ватыса, Нырысетӥ дунне ож кутскыку, со Ӟуч армие Олег нимын вуиз, берло — Граждан ожын тӧдьыослэн Добровольческой армиязы вольноопределяющийся чотын ожмаськиз. Ольга Николаевна аслэсьтыз нылкышно луэмзэ эмиграциын дыръяз но ватыса возиз — 1920-тӥ арлэн шорозяз. Соку аслэсьтыз лушкемлыксэ ӵош ожмаськем эшезлы усьтыса, соос Белградын кузпалъяськизы.
  • Виктория Савс (1899—1979) — Нырысетӥ дунне ожын кык австри нылкышно-фронтовикъёс пӧлысь тужгес тодмоез.
  • XX дауре Надежда Дуроваез Александра Митрофановна Ращупкинан ӵошато, кудӥз Быдӟым Атыкай ож дыръя Т-34 танкын механик-водительлэсь ужзэ быдэсъяно луиз но куинь арлэсь кема нылкышно луэмзэ ватыса возиз[15][16][17].
  • VI дауре Уйпал Китайлэн «Песнь о Мулань» калык кырӟанэз кылдытэмын вал. Отын нылашлэн кема аръёс ӵоже пересь атаез интыын воргорон дӥсен китай армиын ожмаськемез сярысь вераське[18].

Валэктонъёс

  1. ↑ Дурова Архивная копия от 18 пӧсьтолэзе 2021 на Wayback Machine Настольный энциклопедический словарь
  2. ↑ Надежда Дурова. Дополнение к "Кавалерист-девице" // Записки Александрова (Дуровой). — М.: В типографии Николая Степанова, 1839.
  3. ↑ Семнадцатаго былъ день моихъ именинъ, и день, въ который судьбою-ли, стеченіемъ-ли обстоятельствъ, или непреодолимою наклонностію, но только опредѣлено было мнѣ оставить домъ отцовскій и начать совсѣмъ новый родъ жизни. Дурова Н. А. Кавалеристъ-дѣвица. — СПб.: Иванъ Бутовскій, 1836. — Т. I. — С. 1—47
  4. ↑ Дурова // Энциклопедический словарь Брокгауза и Ефрона : в 86 т. (82 т. и 4 доп.). — СПб., 1890—1907.
  5. ↑ Плюснин С. Отец знаменитой Надежды // Комсомолец Удмуртии : газета. — 1983. — № за 18 октября.
  6. ↑ 1 2 Дурова Н. А. Записки кавалерист-девицы. — Л.: Лениздат, 1985.
  7. ↑ Российский энциклопедический словарь. Кн. 1. / глав. ред. А. М. Прохоров. — М.: Большая Российская энциклопедия, 2000. — С. 488. — ISBN 5-85270-324-9; 5-85270-292-7.
  8. ↑ 1 2 Елена Сенявская. Психология войны в XX веке: исторический опыт России. Гл. 4. Женщины на войне — феномен XX века. Дореволюционная ситуация: исключение из правил Эскеремын 2020-01-07 арын
  9. ↑ Поиски увенчались успехом Эскеремын 2018-01-21 арын
  10. ↑ В Удмуртии законодательно установили 14 праздников и 19 памятных дат Эскеремын 2020-11-24 арын
  11. ↑ Отреставрированный памятник Надежде Дуровой открыли в Сарапуле, Сайт газеты «Известия Удмуртской Республики» (20 куартолэзе 2013). Архивировано 22 коньывуонэ 2017 года. Эскеремын: 21 толшоре 2018 арын.
  12. ↑ Фёдор Фёдорович Лях. Штрихи к портрету elabuga-foto.ru. Эскеремын 2020-05-30 арын
  13. ↑ Вахитова Ф. Х. Музей-усадьба Н. А. Дуровой. // Военно-исторический журнал. — 2013. — № 9. — С.44-47.
  14. ↑ Фигёр, Тереза. Воспоминания кавалерист-девицы армии Наполеона. — М.: Эксмо, 2007. — 190 с. — ISBN 978-5-699-20784-8, 5-699-20784-8.
  15. ↑ Ася Кандаурова Три года танкист скрывал, что он - женщина Комсомольская правда. Эскеремын 2014-09-13 арын
  16. ↑ Вадим Кожуховский Танкист, да Вы — девица! Красная Звезда. Эскеремын 2014-09-13 арын
  17. ↑ Антон Тимофеев Крепкий орешек Экспресс газета. Эскеремын 2014-09-13 арын
  18. ↑ Федоренко Н. Китайская поэзия // Антология китайской поэзии / Перевод с китайского под общей редакцией Го Мо-Жо и Н. Т. Федоренко. — М.: Государственное издательство художественной литературы, 1957. — Т. 1. — С. 32.
Комментарийёс
  1. ↑ Солэн азьвылчиез вал Татьяна Маркина Архивная копия от 23 толшоре 2018 на Wayback Machine озьы ик Амазонской ротаын служить карем нылкышноосты, роталэн аслаз офицерской корпусэз вал. Озьы ик ӟуч службае кутылӥзы кунсьор нылъёсты, кылсярысь Ласкарина Бубулина Росси император флотлэн адмиралэз луиз. Со сяна, ӟуч император кышноослэн офицер званиоссы вал — кылсярысь Преображенской полкысь «полковницаос».

Литература

Чӧлсконъёс

«https://udm.ruwiki.ru/w/index.php?title=Дурова,_Надежда_Андреевна&oldid=491894»-ысь басьтэмын