Гришкин, Иван Георгиевич
| Иван Георгиевич Гришкин | |
|---|---|
 | |
| Вордӥськем нуналыз | 16-тӥ толшоре 1935 (91 год) |
| Вордӥськем интыез | |
| Кун | |
| Ужудысэз | педиатр, пульмонолог |
| Кузпалыз | Маргарита Владимировна Гришкина |
Ива́н Гео́ргиевич Гри́шкин (ворд. 16-тӥ толшоре 1935, Асангурт) — совето но росси педиатр, пульмонолог, эм наукаосъя доктор, профессор, Удмуртиысь но Россиысь дано эмчи, Удмурт Элькунысь Кун премилэн лауреатэз. Вань удмуртъёслэн «Удмурт Кенеш» ассоциацизылэн тӧроез (1994—1997).
Улон сюресэз
Вордӥськиз Удмурт АССР-ысь Алнаш ёросысь Асангуртысь крестьян семьяын[1]. 1942-тӥ арысен 1948-тӥ арозь школаын дышетскиз, собере Асанысь зоотехникуме пыриз. Кык ар ортчыса, Алнаш шор ёзо школаысь 10-тӥ классэ выжиз. Аттестат басьтэмез бере Ижысь медициная институтэ пыриз. Отӥяз «Педиатрия» ӧнеръя ординатураын дышетскиз. Кияз дипломен Юкаменск ёросэ ужаны мынӥз[2].
1961-тӥ арысен — Ижысь мединститутысь аспирант. 1965-тӥ арын нылпиослэн шокан ёзвиосынызы герӟаськем висёнъёслы сӥзем кандидат диссертацизэ утиз. Аспирантура бере нылпи инфекциосъя кафедраын ассистент луыса ужаны ӧдъяз, 1975-тӥ арысен — доцент. 1976-тӥ арын мединститут педиатрияя выль усьтэм факультетэ студентъёсты люказ. Факультетлы деканэ Иван Гришкинэз юнматӥзы. Та интыын со 1990-тӥ арозь ужаз[3].
1989-тӥ арын нылпиос пӧлын пуромись нимысьтыз тодмамтэ возбудителен ты висёнъёслы но соослэн тазалыкез лябӟытэмзылы сӥзем темая доктор диссертация гожтӥз. Вуоно араз тодосчилы профессор ним сётӥзы[2].
Иван Гришкин — 100-лэсь ятыр наукая ужъёслэн авторзы, соос пӧлын «Хронические и рецидивирующие бронхолёгочные заболевания у детей» монография. Бадӟым саклык висъялляз нылпиослэн шокан ёзвиосынызы герӟаськем висёнъёсты, омырен шокаса пуромем аллергозъёсты эскеронлы, озьы ик уродмем экологиен но секыт но кырсь улон-вылонэн сэрен черъёслэсь вӧлскемзэс чаклаз[3].
Иван Гришкин мерлыко уже мыло-кыдо пыриськиз. 1994-тӥ арысен 1997-тӥ арозь вань удмуртъёслэн «Удмурт Кенеш» ассоциацизылэн тӧроез вал[3].
2007-тӥ арын янгыше уськытэмын взятка басьтэмез но ужинтыяз полномочиосты мултэс кутэмез понна[4].
Пенсие потэмез бере нылыз вӧзын США-ын улэ[2].
Семьяез
Кузпалыз — Маргарита Владимировна Гришкина — историк, история наукаосъя доктор, РАЕ-ысь профессор, Удмурт АССР-ысь но Росси Федерациысь наука удысысь дано ужась. Гришкинъёс кык ныл будэтӥзы, кыксы но эмчиос луизы[5].
Валэктонъёс
- ↑ Верхнее Асаново [ӟуч] Родная Вятка (25.02.2015). Эскеремын 13.10.2025 арын
- ↑ 1 2 3 Галина Постникова (14.01.2020) Талантливый врач и учёный [ӟуч] Алнашский колхозник. Эскеремын 13.10.2025 арын
- ↑ 1 2 3 Знаменательные и памятные даты Удмуртии [ӟуч] dates.unatlib.ru. Эскеремын 13.10.2025 арын
- ↑ Профессор Ижевской медакадемии ставил пятерки за 3 тысячи рублей [ӟуч] susanin.news (10.05.2007). Эскеремын 13.10.2025 арын
- ↑ Христолюбова Л. Удмуртские женщины. XX век. — Ижевск: Удмуртский институт истории, языка и литературы УрО РАН, 2002. — С. 138—148. — 447 с. — 600 экз. — ISBN ISBN 5-7691-1149-6.
Литература
- Басков Ю. П. Асаново. Добрый след на земле. — Ижевск: Удмуртия, 2005. — С. 229—232. — 263 с.
- Христолюбова Л. С. Учёные-удмурты: биобиблиогр. справ.. — Ижевск: Удмуртия, 1997. — С. 703—705. — 858 с. — 1200 экз. — ISBN 5-7659-0645-1.