Горький нимо шутэтскон парк
| Горький нимо шутэтскон парк | |
|---|---|
 Парке пырон | |
| Огъя тодэтъёс | |
| Тип | шутэтскон парк |
| Кылдытэмын | 1857 |
| Интыяськемез | |
| 56°50′49″ с. ш. 53°11′55″ в. д.GЯO | |
| Кун | |
| Улон инты | Ижкар |
| Ёрос | Октябрь ёрос |
 | |
 Медиафайлъёс РувикиМедиа пушкын | |
Горький нимо шутэтскон парк (ӟуч: Ле́тний сад имени М. Го́рького, нырысь нимыз Генерал сад) — Ижкарысь тужгес вашкалаез парк[1]. Отын улӥсьёслэн яратоно шутэтскон интыоссы пӧлысь одӥгез[2]. Интыяськемын Ижкарлэн шораз, Иж тымет дурын, Милиционной но Максим Горьткий нимо ульчаос вискын.
Историез
Нырысь-валысь парк интыын кыр инты вал, котырак радтэм будӥзы кызьпуос но пипуос. Нырысьсэ тымет дур кортырез утялтыны кутскизы XIX дауре, Береговой (али Милиционной) но Базарной (али М. Горький нимо) урамъёсы улон коркаос пуктыны кутскемен. Нош садлэн кылдэмез меӵак «Генерал юртэн» герӟаськемын (Ижкарлэн историезлы но лулчеберетэзлы сӥзем синпелет). 1857-тӥ арын сое пуктӥз архитектор Иван Коковихин. Калыкын дворец яке «15-тӥ номеро казённой юрт» нималлязы. Юрт котырез утялтӥзы, радэн-радэн писпуос, клумбаосы сяськаос мерттылӥзы, аллеяос лэсьтӥзы. Озьы кылдӥз гужем сад. Огшоры улӥсьёс понна со сад ворсамын вал. Татын ортчылӥсь ужрадъёсы заводысь офицеръёс но кар интеллигенция гинэ пыриськылӥзы. Заводысь мастеровойёсты асьсэлэн зарни галунъёсын чебермам кафтанъёсынызы гинэ лыктылыны лэземын вал. Генерал садэзлэсь кенерзэ ачиз император Николай I юнматэм[3].
Генрал юртын Ижысь пыӵалтӥрлык поттон заводлэн командиръёсыз но кивалтӥсьёсыз улӥзы. Иж заводэ ветлыкуз татчы дугдылӥз император Александр I.
Генерал сад огшоры калыклы 1917-тӥ арын инвожо толэзе усьтӥськиз, со арын ик татын нырысетӥез трос калыко ужрад ортчиз. Ӝытъёсы садын шудылӥз духовой оркестр, пичияк самодеятельной концертъёс возььматъяллязы. Садлэн со вакытэ аслаз пристанез но вал.
1920-тӥ арын Генерал садын Гужем театр пуктэмын. Со — Ижкарысь театрлэн нырысетӥ юртэз вал. Со юртын ик арня вискын кино возьматъязы.
1923-тӥ арын 1- 8-тӥ инвожое садын Удмурт автономной республикалэн нырысетӥ гурт возёс адӟытонэз ортчиз. Отысь куд-ог экспонатъёс Москваын ортчем Нырысетӥ огъяросси гурт удысъя адӟытонэ келямын вал.
Быдӟым ӟуч гожъяськисьлэн Максим Горькийлэн вордскемез дырысен 60 ар тырмонлы сӥзьыса, 1928-тӥ арын 30-тӥ куартолэзе Гужем садын «Горькийлы сӥзем нуналъёс» усьтӥськизы. Та ужрад улсын Ижысь Гужем театрын сюрсэтӥ ползэ возьматэмын Горькийлэн «На дне» пьесаез. 1928-тӥ арын 23-тӥ инвожое театрлэн кивалтӥсьёсызлы гожъяськисьлэн портретэныз Москваысь посылка вуиз, со бордын таӵе сӥзёнэз гожтэмын вал: «Ижкарчиослы салам. Котьку мыло-кыдо луэлэ. Москва. Максим Горький, 16.VI.28».
Со арын ик Ижкар Кенешлэн косэтэзъя Гужем театрез Максим Горький нимо каризы. 1930-тӥ аръёсы садын Максим Горькийлы синпелет пуктэмын. Али со Гужем садлэн шор аллеяяз интыямын[1]. 1936-тӥ арын, Горький улонысь кошкем бере, садлы но Максим Горькийлэсь нимзэ сётӥзы.
Дыр ортчемъя садлэн интывлыз паськытаз. Со борды пыртӥзы тымет палась бамалэз но азьвыл Ижкар базар площадез, куд-ог купец юртъёссэс но М. Горький нимо пулэсь лэсьтэм гужем театрлэсь юртсэ куашкатӥзы. Чылкытатэм интые выль туала аттракционъёс пуктӥзы.
1938-тӥ арын паркысь гужем ротонда шоры Сталинлы синпелет пуктӥзы[4].
1940-тӥ аръёсы Гужем садэ нырысетӥез аттракцион пуктэмын. Со — пулэсь лэсьтэм ӟечыран вал.
1951-тӥ арын садэз колоннаосын юнматэм кенерен котыртӥзы, военной геральдикаен чеберъям капкаос но кассаос пуктӥзы (архитекторез В. С. Масаевич)[5].
1960-тӥ аръёсы нырысетӥ карусельёс пуктӥзы, калыклы уката юн кельшизы: «Вихрь», «Орбита» но «Ромашка». 1970-тӥ аръёсысен чех «Луна паркъёс» вуизы. 1987-тӥ арын кылдӥз нырысетӥез 25 метръем бадӟым учкон питран (Колесо обозрения).
Парклэн аспӧртэмлыкез
Интыяськемын
Парк интыяськемын карлэн исторической люкетаз, шораз, отысен Ижкар тыметлэн ярдур урамаз потыны луэ.
Гужем садлэн пушказ ик интыяськемын Ижысь музей (азьвыл Генерал юртын) но туала драматургияя но режиссурая центр, отын туала сценической искусство азинтӥське. Поръян-шутэтскон инты но аттракционъёс сяна, татын вань на сиён-юонъёсын вузаськон сэрегъёс, шулдыр кафеос. Толалтэ паркын каток ужа[6].
Гужем садлэн историен герӟась люкетъёсыз пӧлысь одӥгез — ротонда, калыкын сое «беседка» нимало. Отысен быдэсак Ижкар тымет, сопал ярдураз интыяськем ужъюртъёс (Ижмаш, ЭМЗ, ТЭЦ-1), карлэн вашкала люкетэз — Зарека (Ленин ёросысь улон интыос), пужым нюлэс адӟиське. Генерал садын нырысетӥез беседка революцилэсь азьвыл пуктэмын вал[3].
Гужем садысь аттракционъёс нылпиослы но бадӟымъёслы чакламын, ваньмыз сямен, соос экстремальной луисьтэмесь шуыса лыдъясько. Тужгес кельышлыосыз пӧлын: «Падающая звезда», «Морское сокровище», «Луна», «Орбита», «Brucomela», «Ракушки» но ворсам кабинкаосын «Колесо обозрения»[7].
Паркын озьы ик вань бамперной пыжъёс, автодром, ву шаръёс, батутъёс, лабиринт, ыбылӥськон тир. Татын быдэс семьяен шутэтскыны но дырез шулдыр ортчытыны луэ. 2017-тӥ арын 30-тӥ оштолэзе татын 50 метръем выль учкон питран пуктэмын, со азьвылэзлэсь кык поллы ӝужытгес луэ. Удмурт Элькунысь тужгес ӝужытэз аттракцион лыдъяське. Со йылысен Иж тымет но карлэн быдэсак шор люкетэз адӟиське. Со питран типовой проектъя лэсьтэмын. Сыӵе ик аттракционъёс пуктэмын Екатеринбургын, Уфаын но Владимирын[8].
2018-тӥ арын 16-тӥ южтолэзьысен Гужем садэн кивалтэ Сергей Буторин. Парк быдэсак Ижкар администрацилы улсатэмын. «Горький нимо гужем сад» акционер огазеяськонэ озьы ик С. М. Киров нимо парк но пыртэмын[3].
2019-тӥ арысен «ИжГЭТ» муниципал предприятилэн теплоходъёсыз но причалъёс Горький нимо гужем садлы сётэмын. Кивалтӥсьлэн верамезъя, ижкарчиос теплоходъёсты кемалась транспорт интые уг ни куто, соос шутэтскон амаллы пӧрмизы ини[3].
Кызьы отчы вуоно
Парклы матын интыяськемын карысь вань ёросъёсты герӟась транспорт герӟет. Матысез дугдылонни «Горький нимо гужем сад» шуыса нимаське. Со пыр ортчо 36-тӥ, 56-тӥ номеро автобусъёс но 6-тӥ, 6d но 9-тӥ троллейбусъёс. Таӵе ик маршрутъёс «ДК Аксион» дугдылонни пыр ортчо. Ижысь чугун сюрес вокзалысен 12-тӥ номеро трамваен мыныса, «Центр» дугдылонние васьконо. Ижысь Шор автовокзалысен Гужем садэ 20 минут куспын пыдын вуыны луэ. Озьы ик Гужем садэ карлэн пӧртэм сэрегъёсысьтыз такси ветлэ («Яндекс. Такси», Maxim, Gett, «Везёт»).
Галерея
Садысь ротонда
Иж тыметлэн мукет ярдурысьтыз учкыса, ярдур урам но парк адӟиське
Вужез учкон питран
Вужез учкон питран йылысен парк шоры учкыса
Вужез учкон питран йылысен учкыса
Парк шоры вылысен учкыса
Гужем садын М. Горькийлы синпелет
Генерал Василий Новиков аслаз семьяеныз Генерал садын ротонда азьын, 1890-тӥ ар
._%D0%A0%D0%BE%D1%82%D0%BE%D0%BD%D0%B4%D0%B0.jpg)
.jpg)
.jpg)
-5.jpg)
Валэктонъёс
- ↑ 1 2 Летний сад им. М. Горького ("Генеральский сад") [ӟуч] Официальный сайт Ижевска. Эскеремын 31.07.2025 арын
- ↑ Туганаев, 2008, с. 587.
- ↑ 1 2 3 4 Летний сад имени М.Горького. Ижевск [ӟуч] IZ-article. Эскеремын 31.07.2025 арын
- ↑ Селивановский С. Н. Старый Ижевск. События и люди в объективе фотографов / рецензент И. И. Кобзев. — 3-е издание, исправленное. — Ижевск: КнигоГрад, 2015. — С. 153. — 292 с. — 100 экз. — ISBN 978-5-9631-0309-8.
- ↑ Туганаев, 2008, с. 466.
- ↑ Парк Горького [ӟуч] Парки Ижевска. Эскеремын 31.07.2025 арын
- ↑ Летний сад им. М. Горького [ӟуч] Центр развития туризма Удмуртской Республики. Эскеремын 31.07.2025 арын
- ↑ Колесо обозрения в Ижевске [ӟуч] Туристер (9 февраля 2024). Эскеремын 31.07.2025 арын
Литература
- Удмуртская Республика : Энциклопедия / гл. ред. В. В. Туганаев. — 2-е изд., испр. и доп. — Ижевск : Издательство «Удмуртия», 2008. — 768 с. — 2200 экз. — ISBN 978-5-7659-0486-2.
Чӧлсконъёс
- Елена Кардопольцева От Генеральского до Горького: как менялся главный сад Ижевска Izhlife.ru. Эскеремын 2025-07-31 арын
.svg){kind=small} Ижкарысь паркъёс  | |
|---|---|
| Аттракционъёсын паркъёс | |
| Шутэтскон-эмшан интыос | |
| Виртуальной паркъёс | |
| Покчиослы шутэтскон интыос | |
| Активной шутэтсконлы чаклам интыос | |
Та гожтос вылэ Рувики проектысь мукет гожтосъёс уг чӧлско. |
.svg){kind=link}