Волковъёс (купеч выжы)
| Волковъёс | |
|---|---|
| Вакыт | XVIII даурлэн пумыз—1870-тӥ аръёс |
| Выжылы кутскон сётӥсь | Иван Селивёрстович Волков |
| Родинаез | Глазов, Ватка губерния |
| Кун | |
| Дворецъёсыз |
 |
| Граждан ужез | купецъёс, ӟеч уж лэсьтӥсьёс, Глазкарлэн йырыз |
Волковъёс (ӟуч: Волковы (купеческий род)) — Ватка губерниысь Глазкарысь купеч выжы. XVIII даур пумын данэ потӥз.
Тодмо муртъёс
Волков купечъёслэсь Воршудзэс кылдытӥсь но пӧлысьтызы огез тодмоез лыдъяське Ватка губерниысь Глазов уездысь Балезино волостьысь Вылӥ Люк починкаысь кун крестьян, выжыезъя вотяк но вӧсям мурт Иван Селивёрстович (1779(?)—1842). Бубиныз ӵош гуртоосын поттэм-будэтэм вузэз (нянь, етӥн, кӧй), крестьян киужъёсты (ку, писпу сул, дэра), озьы ик нюлэскысь поттэм узырлыкез (пӧйшур ку, чечы, сюсь) октон-калтон но ваньзэ сое палэнэ вузан бордын тыршиз[1].
1803-тӥ арысен Иван Селивёрстович 3-тӥ гильдиысь купеч луиз, 1806-тӥ арысен — 2-тӥ гильдиысь 8 100 манет тыр барышен купеч. Гуртоосын поттэм ваньбурен сяна, кирпичен, винаен вузкарылӥз, муртъёслы процентэн коньдон сётъяз, ростовщик вал[1]. Александр I императорлэн кивалтонэзлэн пумаз глазов купечлэн барышез 22 100 манет лыдъяськылӥз. 1826-тӥ—1831-тӥ аръёсы почта но курьер валъёсты келянъя, Сибирь тракт кузя почта станциосты возёнъя, озьы ик шуръёс кузя грузъёсты но адямиосты келянъя казённой ужъёсты быдэсъяз (1832—1836)[2].
1811-тӥ но 1831-тӥ аръёсы Иван Селивёрстович Глазовлы йыре бырйиськылӥз[2]. 1812-тӥ арын Наполеонлэн войскоосыныз нюръяськись калык ополченилы юрттон вылысь коньдон бичанэз радъяз — Глазовын улӥсьёслэсь но ужбергатӥсьёслэсь 1 сюрс 405 манет люказ, озьы ик ачиз 200 манет висъяз. 1818-тӥ арын Лукалэсь но Иоаннлэсь Евангелиосты удмурт кылэ берыктон бордын тыршиз. 1833-тӥ арын Ватка казённой палаталэн косэмезъя Иван Селивёрстович но солэн семьяез Глазов карлэн дано муртъёсыз пӧлы пыртэмын вал[3][4].
1840-тӥ аръёсы Волков Глазовысь шайвыл котыре черк пуктонъя подряд басьтэмез бере Нижний Новгородысь Лазарь Казаринов крестьянэн огкыл юнматӥз, черкез ӝутон борды «щекатуркаен ужаны быгатӥсь тужгес усто мастеръёсыз» басьтӥськозы шуыса. Но лэсьтӥськонлэн кутсконаз ик, 1842-тӥ арын 22-тӥ шуркынмонэ, Иван Селивёрстович 63 аресказ улонысь кошкиз[3].
Ужзэ азинтӥз пиез, 2-тӥ гильдиысь купеч Осип (Иосиф) Иванович (1800—1844), но ӝоген чахоткалэсь кулӥз. Бадӟым выжылэн бырон азяз династиез Осип Ивановичлэн Дарья Павловна кузпалыз (1801—1862) валтӥз, солы Михаил Осипович пиез (1825—1853) юрттылӥз[3]. Озьы ик гурт удысысь сиён-юонэн, сикысь ваньбурен но киужен вузкарыны тыршизы. Волковъёслэн Глазовын кӧня ке коркаоссы, вукооссы, хозяйствоын кутӥськись пуктӥськемъёссы, бадӟым музъемзы (763 десятина) вал. Михаил пиез кулэм бере (1853), Анна нылыз улонысь кошкем бере (1844), солэсь картсэ ватэмзы бере (1857) Екатерина нуныкайзэ утялтон-будэтон быдэсак усиз Дарья Павловна вылэ, ужъёссэ бергатыны со азьло сямен ӧз быгаты ни, соин ик удыссэ нылъёсызлы но эмеспиосызлы оскиз. 1868-тӥ арын Дарья Павловна кулэм бере ваньбурез вузамын вал, пиосмуртъёс ласянь выжызы чигиськемен, купеч династиез азинтӥсь ӧз луы ни.
Волков купечлэн юртэз
1822-тӥ арысен 1837-тӥ аръёсы Глазовысь Кругловознесенской ульчае (али — Первомай) Иван Волков купеч классицизм стилья улыно-вылыно из юрт пуктӥз. 1837-тӥ арын 20-тӥ куартолэзьысен 21 куартолэзе выжон уе ӵапак татчы шутэтскыны дугдылӥз кунэтӥ котыръяськись престоллэн наследникез, вуоно император Александр II, сьӧраз вал историк Константин Арсеньев но кылбурчи Василий Жуковский. Кошкон азяз цесаревич косӥз Иван Селивёрстовичлы дуно перстень кузьманы, нош карысь начар улӥсь муртъёслы 300 манет висъяны[2][3].
1861-тӥ арын Волков купечлэн ваньбур кутӥсьёсыз (ӟуч: наследники) усадьбаез уездысь ужъюртъёслы сётӥзы. 1863-тӥ арын юртъерез Глазов уездысь земской управалы вузазы. Нырысетӥ этажаз земской аптека усьтӥзы, нош кыкетӥяз кенешонъёс ортчытъян зал лэсьтӥзы[5].
Карын совето власть юнмам бере коркан социалистической лулчеберетъя ёрос юрт усьтӥзы. 1942-тӥ арысен 1946-тӥ арозь юртъерын эвакогоспитальлэн ёзэз интыяськылӥз, нош ож ортчем бере татын Глаз ёросысь лулчеберетъя юрт ужаз. 2006-тӥ арын инвожое коркаез ужбергатӥсь басьтӥз[5][6].
1979-тӥ арын 5-тӥ куартолэзе Удмурт АССР-ысь Министръёслэн Кенешсылэн 362 номеро пуктэтэзъя Волков купечлэн юртэз историысь но лулчеберетысь синпелетъёс пӧлы пыртэмын. Интыысь утёно синпелетэз кунэн чакласа возьыны тупатэмын[5].
Валэктонъёс
- ↑ 1 2 Первые купцы города Глазова [ӟуч] Вятка:наследие… (28-08-2023). Эскеремын 06-11-2025 арын
- ↑ 1 2 3 Дом купца Волкова [ӟуч] Глазовский краеведческий музей. Эскеремын 06-11-2025 арын
- ↑ 1 2 3 4 Глеб Кочин (23-10-2023) Купец из починка Верх-Люк [ӟуч] Вперёд. Эскеремын 06-11-2025 арын
- ↑ Евгений Шумилов (09-12-2022) Глазовские древности [ӟуч] Удмуртская правда. Эскеремын 06-11-2025 арын
- ↑ 1 2 3 Дом купца И. С. Волкова [ӟуч] историческийбагаж.рф. Эскеремын 06-11-2025 арын
- ↑ Дом купца И. С. Волкова [ӟуч] udm.travel. Эскеремын 06-11-2025 арын
Литература
- Удмуртская Республика: Энциклопедия / гл. ред. В. В. Туганаев. — Ижевск: Удмуртия, 2000. — С. 236—237. — 797 с. — 20 000 экз. — ISBN 5-7659-0732-6.
- Русские писатели об Удмуртии: XVIII в. — начало XX в. / П. К. Поздеев. — Ижевск: Удмуртия, 1978. — С. 146. — 160 с. — 3000 экз.
- Столетие Вятской губернии, 1780–1880: сборник материалов к истории Вятского края. — Вятка: Издание Вятского Губернского Статистического Комитета, 1881. — Т. 2. — С. 842—843. — 389–852 с.
- Игорь Марков. Дом, который построил Волков // Калина Красная. — 2008. — 26 апреля (№ 16). — С. 7.
- Глеб Кочин. Рождение и смерть Покровской церкви // Красное знамя. — 2010. — 4 августа.
Чӧлсконъёс
- Дом купца И. С. Волкова [ӟуч]