И. С. Волковлэн юртэз
| И. С. Волковлэн юртэз | |
|---|---|
 | |
| Юрт сярысь ивортон | |
| Кун | |
| Лэсьтыны кутскемын | 1822 |
| Лэсьтӥськон йылпумъямын | 1837 |
| Архитектураысь стиль | классицизм |
 |
|
И. С. Волковлэн юртэз (ӟуч: Дом И. С. Волкова) — Удмурт Элькунысь Глазовысь улыно-вылыно из юрт, историысь но лулчеберетысь улосэн утёно синпелет. XIX даурлэн нырысетӥ люкетаз пуктэмын. Адресэз: Первомай ульча, 33.
Историез
Глазовысь кыкетӥ гильдиысь купечлэн Иван Волковлэн юртэз 1822-тӥ арысен 1837-тӥ арозь пуктӥськиз. Татчы 1837-тӥ арын, Росси империез котыръякузы, вуоно император, князь Александр Николаевич но сое келясь историк Константин Арсеньев но кылбурчи Василий Жуковский дугдылӥзы[1].
1842-тӥ арын Волков купеч улонысь кошкиз. 1861-тӥ арозь коркан ваньбур кутӥсьёсыз улӥзы, отӥяз сое карысь ужъюртъёслы сётӥзы. 1863-тӥ арын юртъерез Глазов уездысь земской управалы вузазы. Нырысетӥ этажаз земской аптека усьтӥзы, нош кыкетӥяз кенешонъёс ортчытъян зал лэсьтӥзы[2].
1918-тӥ арын толшоре Волковлэн юртаз ортчиз ужасьёс, крестьянъёс но солдатъёс пӧлысь быръем депутат кенешлэн IV уезд ӧтчамез. Та ӧтчам карын но уездын юнматэм совето власть сярысь ялӥз. 1921-тӥ арын азьвыл купеч юртын Вотской областьысь РКП(б)-лэн но ВЛКСМ-лэн конференциоссы радъяськизы, талы сӥзьыса, коркалэн борддораз ивортонъёсын тодэ вайытӥсь пулъёс шуккизы. Бӧрысь коркан социалистической лулчеберетъя ёрос юрт усьтӥзы. Отын ужан сюрессэс мытӥзы О. Л. Бем но Б. П. Есипов — азьланяз тодмо дышетӥсьёс, муско вузъёсысь профессоръёс[2][3].
1942-тӥ арын юртъерез 3891 номеро эвакогоспитальлы висъязы. 1946-тӥ арысен 2005-тӥ арозь татын Глаз ёросысь лулчеберетъя юрт интыяськылӥз[4].
2006-тӥ арын коркаез ужбергатӥсь басьтӥз. 2024-тӥ арысь ивортонъёсъя, юртысь куд-ог висъетъёсаз Калыккуспо Восточно-Европейской колледжлэн ёзэз интыяськемын[1].
И. С. Волковлэн коркаез историысь но лулчеберетысь улосэн утёно синпелет луэ[2].
Архитектураез
Кык этажъем из юрт классицизм стилья пуктэмын. Ивортонъёсын архитекторлэн нимыз пусъемын ӧвӧл[3].
Юртъерлэн борддоръёсыз музъем валлин поясъёслы висъямын, валтӥсь фасадаз пуктэм прямоугольник выллем укноосыз наличникъёсын чеберъямын. Кыкетӥ этажысь укноосыз кузялэс лэсьтэмын но мургес выйытэмын. Волков улэп дыръя нырысетӥ этаже ульча ласянь ӝутэм корказьысь ӧсэтӥ пыраллязы, но бератаз интызэ воштӥзы. Юртэз кирпичен кенеразы, азбараз капкаетӥз я ӟезьыетӥз сюрыны луэ[3].
Валэктонъёс
- ↑ 1 2 Дом купца Волкова [ӟуч] Глазовский краеведческий музей. Эскеремын 06-11-2025 арын
- ↑ 1 2 3 Дом купца И. С. Волкова [ӟуч] историческийбагаж.рф. Эскеремын 06-11-2025 арын
- ↑ 1 2 3 Дом купца И. С. Волкова [ӟуч] Центр развития туризма Удмуртской Республики. Эскеремын 06-11-2025 арын
- ↑ Дом купца И. С. Волкова [ӟуч] udm.travel. Эскеремын 06-11-2025 арын
Чӧлсконъёс
- Дом купца И. С. Волкова [ӟуч]