Белов, Александр Романович (инженер-металлург)

Рувикиын таӵе фамилиен мукет муртъёс сярысь гожтосъёс вань. Учке: Белов.

Александр Романович Белов
Вордӥськем нуналыз	2-тӥ толсуре 1906(1906-12-02)
Вордӥськем интыез	Войска Донского улосысь Таганрог карын, Росси империя
Кулон нуналыз	12-тӥ шуркынмонэ 1977(1977-11-12) (70 арес)
Кулэм интыез	Муско
Кунмуртлыкез	СССР СССР
Ужудысэз	инженер-металлург, предприятилэн кивалтӥсез
Данъетъёсыз

Александр Романович Бело́в (1906-тӥ арын 2-тӥ толсуре Войска Донского улосысь Таганрог карын, Росси империя — 1977-тӥ арын 12-тӥ шуркынмонэ Мускоын) — совето инженер-металлург. 1946-тӥ—1949-тӥ аръёсы Эльктростальысь машиностроительной заводлэн валтӥсь инженерез, директорез. 1949-тӥ—1953-тӥ аръёсы Глазовысь Чепца механикая заводлэн директорез. 1953-тӥ—1960-тӥ аръёсы «815 номеро комбинатлэн» (вуоно Горно-химической комбинатлэн) директорез. 1968-тӥ—1973-тӥ аръёсы Кольской АЭС-эз лэсьтонэн кивалтӥсь, отӥяз Кольской атомной электростанцилэн нырысетӥ директорез. Куинетӥ степенё Сталин нимо премилэн куинь полэс лауреатэз.

Улон сюресэз

Александр Белов Войска Донского улосысь (али — Ростов улос) Таганрогын трос нылпиё артельщиклэн семьяяз 1906-тӥ арын 2-тӥ толсуре вордӥськиз. Со ньылетӥез пинал вал. Огыр-бугыр улонэн валче школае со 11 аресказ гинэ вамыштӥз. 1925-тӥ арын 9 классэз быдтӥз, дышетскон висказ ялан ужаны вырыса: корт арбериос но лэсьтылӥз, слесарь луыса но тыршиз, химия лабораториын но эскеронъёс ортчытъяз.

1931-тӥ арын Томскысь политехникая институтэз йылпумъямез бере, Александр Белов ужаны кутскиз Джезказганысь ыргон ӵыжатон заводын сменалэн кивалтӥсез луыса. 1933-тӥ арын Джезказган комбинатлэн директорез А. Р. Беловез металлургической заводъёсъя всесоюзной командировкае келяз. Забайкальеысь «Дарасунзолото» комбинатэ вуыса, со отчы металлургической заводысь одӥгезлэн цехлэн кивалтӥсезлэн воштӥсез луыса ужаны кылиз. Солы ньыль ар гинэ кулэ луиз комбинатлэн валтӥсь инженерез но устоез ужась луон понна — Белов кивалтон вакытэ заводын вуз поттон 65 процентлы будӥз.

1937-тӥ арысен со Мурманск улосысь «Североникель» комбинатысь металлургической цехын ужаз, 1940-тӥ—1941-тӥ арын, заводэз Норильске эвакуациен выжтытозязы, валтӥсь инженер вал. 1941-тӥ арысен валтӥсь цехен кивалтӥз, Норильскысь горно-металлургической комбинатэн кивалтӥз. Вить ар куспын А. Р. Белов кунлы кулэ луись корт поттонэз шӧдскымон вылӥе ӝутӥз. Ӟеч ужамез понна со Ужысь Горд Знамя, Горд Кизили орденъёсын но «1941-тӥ—1945-тӥ аръёсы Быдӟым Атыкай ожын Германиез вормем понна» медален пусъемын.

1946-тӥ арын 39 аресъем Беловез Электросталь карысь 12 номеро заводэ ыстӥзы, татын совето атомной проект улсын уран поттыны ӧдъязы. А. Белов «Бадӟым завод» шуонэн кивалтӥз, со 12 номеро заводын алюминь вылкӧм пушкы ватэм уран поттон понна кылкутӥз, ӵапак таос СССР-ысь нырысетӥ промышленной графит-уранлэсь «А» реактор лэсьтыны кулэ вал. Инженер-металлурглэн быгатонлыкъёсыз уран металлургиын туж яразы. Эскеронъя заводын та проект бордын немецъёс ужаллязы ик, но технологизы лябгес вал, соин ик Белов выль ӧръёсъя эскеронъёс но лэсьтылӥз, со куспын заводэз но выльдӥз, производствоез но паськытатӥз но йылтӥз. Со валтӥсь инженер но, машиностроительной заводлэн директорез но вал.

1949-тӥ арын нырысетӥ РДС-1 ядерной бомбаез эскеремзы бере, кунэн кивалтӥсьёс Александр Беловлэсь уран поттонъя проектэ быгатыса пыриськемзэ вылӥ дунъязы. Куинетӥ степенё Сталин нимо премилэн куинь полэс лауреатэз луиз. Со сяна, Ленин нимо орденэн пусйизы. Зэм, та данъетъёссэ со басьтӥз ни Удмурт Элькунысь Глазкарысь Чепца механикая заводэ директоре ыстэмзы бере. Та заводэн со 1953-тӥ арозь кивалтӥз. Глазовын корт уранэз рос-прос поттон ужез радъяны выриз. Электростальысь сьӧраз инженеръёс но ужасьёс лыктӥзы. Татысь цехъёсты немец технология вылэ пыкиськыса ӝутӥзы. 1948-тӥ арын 5-тӥ коньывуонэ уранлэсь нырысетӥ тетрафторидзэ басьтӥзы, нырысетӥ уран слитокъёсты кисьтӥзы. Директор выль технологиосты ялан пыӵатӥз, производствоез ӝутӥз. А. Р. Белов бадӟым саклык висъяз заводын ужасьёслэсь улон-вылонзэс ӟечомытонлы но Глазкарез выльдонлы, солэн тыршеменыз усьтэмын вал: «Звёздочка» пионерлагерь, выль школа, «Прогресс» стадион, лулчеберетъя «Россия» дворец, «Родина» кинотеатр но мукет объектъёс.

1953-тӥ—1960-тӥ аръёсы Красноярск улосысь «815 номеро комбинатлэн» (вуоно Горно-химической комбинат) кивалтӥз. Татын со кивалтэм улсын плутоний поттыны ӧдъязы.

1968-тӥ арын Александр Беловлы Кольской шормуӵын атомной электростанция лэсьтонэз валтыны оскизы. Ӵапак со сюлмаськемен, пуктӥськонэ выль амалъёсты пыӵатӥзы. 1973-тӥ арын 29-тӥ инвожое нырысетӥ энергоблокысь реакторез лэзизы: ток кошкиз. 3-тӥ пӧсьтолэзе Кольской АЭС котыре сиё-дано митинге калык лачак люкаськиз, но атом электростанцилэсь ключъёссэ нырысетӥ директорез ас кияз кутыны ӧз быгаты ни — тазалыкез куашкамен, Муское эмъяськыны дыртӥз. Ужысь кошкыса, татын ик со улӥз, нош 1977-тӥ арын 12-тӥ шуркынмонэ, секыт висемез бере кулӥз. Ватэмын Кунцевоын.

Кольской АЭС-лэн нырысетӥ директорезлы Полярные Зори город ульчалы нимыз сётэмын. Татысь 4 номеро коркан, кытын А. Белов улӥз, 1998-тӥ арын Кольской атомной электростанцилэн 1-тӥ энергоблокез лэзем дырысен 25 ар тырмонлы сӥзем шулдыръяськонъёс дыръя Александр Романовичлы мемориал пул шуккизы. 2000-тӥ арын А. Беловлы «Полярные Зори городлэн дано муртэз» ним кулэмез бере ни сётэмын.

Чепца механикая заводлэн нырысетӥ директорезлы сӥзьыса, 2002-тӥ арын 19-тӥ толсуре ЧМЗ-лэн кадръёсъя ёзэтэзлэн юртаз А. Беловлы сӥё-дано мемориал пул усьтэмын, Глазовысь огез урам но табере солэсь нимзэ нуллэ.

Данъетъёсыз

• 3-тӥ степенё Сталин нимо премия (1953) — чылкыт металлической уранэз поттыны кутскемез понна
• 3-тӥ степенё Сталин нимо премия (1951) — уранлэсь сырьевой базазэ азинтэмез но уже кутэмез, концентратъёслэсь но диацетатлэсь корт уран поттонъя технологиез юнматэмез но уран поттонъя металлургической заводъёслы проект лэсьтэмез понна
• 3-тӥ степенё Сталин нимо премия (1953) —тритий поттонъя реакторъёс кылдытэмез но эскеронъёс ортчытэмез понна
• Ленин нимо орден
• Октябрь Революцилы сӥзем орден
• Ужысь Горд Знамялэн кык орденэз
• Горд Кизили орден
• «Знак Почёта» орден
• медальёс
• Полярные Зори карлэн Дано кунмуртэз (2000).

Литература

• Не просто имя — биография страны. — Мурманск, 1987. Кн. 1; Кульматицкий Э. Завещание первого директора // Росэнергоатом. 2003. № 5.
• Атомные директора — от плутония до кремния // Скала: Горно-химический комбинат, 1950—2010 / авт. текстов: П. В. Морозов, Б. В. Рыженков. — Железногорск и др., 2010. — С. 135—168.
• Морозов П. В. ГХК — годы развития / П. В. Морозов. — Железногорск : Горно-химический комбинат, 2007. — 104 с. : ил.
• Ордена Ленина Горно-химический комбинат // Железногорск (Красноярск-26) : статьи, очерки, отрывки из монографий / Музейно-выставочный центр; отв. за вып.: Б. Г. Беллер, В. А. Попова; науч. ред.: С. П. Кучин, А. А. Просвирин; авт. коллектив: В. А. Аференко и др. — Красноярск, 2000. — С. 100—129.
• Ширманов Ю. А. Отчизны щит / Ю. А. Ширманов. — 2-е изд., перераб. и доп. — Красноярск-26 : Музейно-выставочный центр, 1994. — 97 с. : ил. — (Городу — 40 лет).
• Зарайский А. Вспомним ушедших от нас : [Белов А. Р.] / А. Зарайский // Вестник ГХК. — 1996. — 15 нояб. (№ 25/26). — С. 1.
• Морозов П. В. Первые годы ГХК / П. В. Морозов. — Железногорск : Горно-химический комбинат, 2006. — 100 с. : ил.
• Клемёнов А. Атомная мечта Железногорска : [26 февраля Горно-химический комбинат отпраздновал своё 60-летие] / Андрей Клеменов // Комсомольская правда. — 2010. — 18-25 февр. (№ 7-т). — С. 4-5 (VIII—IX) : фот. http://www.kp.ru/daily/24444.4/608644
• Морозов П. В. Первые годы ГХК / П. Морозов // Вестник ГХК. — 1996. — 4 марта (№ 5/6). — С. 2.
• Морозов П. В. Первые годы ГХК / П. Морозов // Вестник ГХК. — 1996. — 22 июля (№ 16/17). — С. 3.
• Морозов П. В. Белов Александр Романович / П. Морозов // Вестник ГХК. — 1999. — 23 нояб. (№ 25/26). — С. 3 : фот.
• Морозов П. В. Девять генеральных : [Н. Терехов, А. Гармашев, А. Белов, С. Зайцев, А. Мешков, Е. Микерин, И. Кокорин, В. Лебедев, В. Жидков — директора Горно-химического комбината в разные годы] / Морозов П. В. ; публ. подготовила Ольга Лобзина; фот. С. Богородского // Город и горожане. — Железногорск, 2000. — 24 февр. — С. 6-7 : фот.
• Морозов П. В. ГХК и соцгород : [в апреле 1953 года директором ГХК был назначен Белов Александр Романович] / П. Морозов // Вестник ГХК. — 2000. — 29 сент. (№ 19/20). — С. 3.
• Морозов П. В. Первые шаги: в июне 1950 года была создана дирекция строящегося предприятия под условным (открытым) наименованием Восточная контора (ВК), утверждена её структура и руководители отделов / П. В. Морозов // Вестник ГХК. — 2005. — 27 янв. (№ 1). — С. 7.
• Рыженков Б. Девять ступеней : [А. Гармашев, А. Белов, С. Зайцев, А. Мешков, Е. Микерин, И. Кокорин, В. Лебедев, В. Жидков, П. Гаврилов — директора Горно-химического комбината в разные годы] / Б. Рыженков // Атом-пресса. — 2010. — Февр. (№ 7). — С. 5 : фот.
• Ширманов Ю. А. Освоение атома : [история Горно-химического комбината в г. Железногорске] / Юрий Ширманов; фот. С. Богородского // Город и горожане. — Железногорск, 1998. — 20 авг. — С. 20 : фот.

Валэктонъёс

Чӧлсконъёс

• Биографические сведения
• https://www.biblioatom.ru/persons/belov_aleksandr_romanovich/