Ярыгин, Владимир Александрович

Википедиысь материал
Рувикиын таӵе фамилиен мукет муртъёс сярысь гожтосъёс вань. Учке: Ярыгин.
Владимир Александрович Ярыгин
В.А.Ярыгин.png
Вордӥськем нуналыз 1-тӥ оштолэзе 1950(1950-04-01) (76 арес)
Вордӥськем интыез с. Алнаш, Алнаш ёрос, Удмурт АССР, РСФСР
Кунмуртлыкез СССРFlag of the Soviet Union.svg СССР→
РоссияFlag of Russia.svg Россия
Ужудысэз инженер
Данъетъёсыз
Данлыко орден — 1995
Заслуженный конструктор Российской Федерации Нагрудный знак..jpg

Влади́мир Алекса́ндрович Яры́гин (вордӥськемын 1950-тӥ арын 1-тӥ оштолэзе Удмурт АССР-ысь Алнашын) — пыӵалтӥрлык лэсьтонъя совето но росси инженер-конструктор. Ярыгинлэсь пистолетсэ (ПЯ)[1] кылдытӥсь.

СССР-ысь Обороная министерствоысь устоез конструктор (1985-тӥ ар). Удмурт Элькунысь промышленность удысысь сӥё-дано ужась (1992-тӥ ар). Росси Федерациысь сӥё-дано конструктор (1998-тӥ ар). Росси Федерациысь Оборонно-промышленной комплексысь сӥё-дано ужась (2023-тӥ ар)[2].

2024-тӥ арын быръёнъёсын Росси Федерацилы Президентлы кандидатлэн Владимир Путинлэн оскем муртэз[3].

Улон сюресэз

Егит дырыз

Владимир Ярыгин вордӥськиз 1950-тӥ арын 1-тӥ оштолэзе Удмурт АССР-ысь Алнаш черкогуртын фронтовикъёслэн семьяязы. Вуоно конструкторлэн бубиз —Быдӟым Атыкай ожысь офицер, пулемётной взводлэн командирез вал. Тылож йылпумъяськем бере, школаын физкультуралы но военной ужлы дышетӥз, бератаз пинь эмъяны дышетскиз но распределения Алнаше сюриз. Татын со вуоно кузпалзэ пумитаз, ож вакытысь радисткаез, немец кыллы дышетӥсез. 1950-тӥ арын кузпалъёслэн Владимир[4] пизы вордӥськиз.

Атаез пыӵалтӥрлыкез ӟеч вала вал. Куддыръя пиосызлы но ыбылӥськыны сётылӥз. Владимир пинал дырысеныз пыӵалъёсын тунсыкъяськыны кутскиз, бадӟым классъёсын дышетскыкуз, соосты йӧн-йӧн сэрттэ-бича ни вал[4].

Дышетскемез

1973-тӥ арын Ижысь механикая институтэз йылпумъяз, инженер-механик луиз[5].

Ужез

Институтэз йылпумъямез бере, Ижысь Механикая заводысь валтӥсь конструкторлэн ёзаз ужаны кутскиз. Егит ӧнерчи быгатонлыкъёссэ соку ик возьматӥз, спортын, огсыр улонын но ожын кутӥськись пыӵалтӥрлык лэсьтонын дэмланъёcсэ-адӟонъёссэ шараяз. Заводысь валтӥсь конструкторъёсын валче тыршыса, 5,6 мм калибръем Иж-34 и Иж-35 модель пистолетъёсты кылдытӥз. Соосты 1979-тӥ арын поттыны кутскизы[1].

1981-тӥ арын СССР-лэн сборнояз, «Динамо», ЦСКА командаосын та пыӵалъёслэсь ужамзэс эскеремзы бере, соосты выльдӥзы но ИЖ-34М и ИЖ-35М индексъёс сётӥзы[6].

М. В. Марголинлэн МЦ-1 пистолетэз вылэ пыкиськыса, Ярыгин «Марго» пистолет кылдытӥз, ӵыжатэмын 6П36, 6П37, Иж-77-8, Иж-77-7,6, Иж-78-7,6 газовой пыӵалъёс[5].

1998-тӥ арын, выль пыӵалъёс но соослы тӥрлыкъёс лэсьтонъя «ГРАЧ» нимо конкурсэ пыриськыса, эшшо одӥг бадӟым уж борды басьтӥськиз. 2003-тӥ арын «9-мм Ярыгинлэн пистолетэз» (ПЯ) ним улсын пыӵалэз серийной производствое келямын но Росси Федерацилэн вооруженияз кутэмын, индексэз — 6П35. Отӥяз, та пыӵалэз вылэ пыкиськыса, Ярыгин кивалтэм улсын кунгож сьӧры келян вылысь кылдытэмын МР-446 «Викинг» пистолет[7].

2022-тӥ арысен Ижысь механикая заводын ужаз, Практической ыбылӥськонъя федерацилы спортъя пистолетъёсты умоятон бордын тыршиз, солэсь боевой кужымзэ юнматиз[6].

Ялан пыриськылэ Ижысь Техникая университетын ортчылӥсь пыӵалтӥрлыклы сӥзем наукая конференциосы. Трос ужа студентъёсын. 20 изобретениезлы , 4 промышленной образецъёслы авторской свидетельствоосыз но патентъёсыз вань. Озьы ик ӟечен пусъемын 40-лэсь ятыр дэмланъёсыз. Трос публикациосыз пӧртэм газет-журналъёсын печатламын.

Ижкарлэн Дано кунмуртэз (2017-тӥ ар), Удмурт Элькунлэн Дано кунмуртэз (2019-тӥ ар)[1].

2023-тӥ арын Владимир Ярыгинлы Оборонно-промышленной комплексысь сӥё-дано ужась ним сётэмын[2]. 2023-тӥ арын тулыспалэ со «Пистолеты ижевских оружейников» книга гожтӥз, соин тодматон Удмуртиысь Йӧскалык библиотекаын ортчиз[8].

Семьяез

Владимир Ярыгинлэн кык пиналыз. Марина нылыз эмъян удысын тырше, Дмитрий пиез военнослужащий луэ, майор[7].

Данъетъёсыз

  • Росси Федерациысь сӥё-дано конструктор (1998-тӥ ар);
  • Удмурт Элькунысь промышленность удысысь сӥё-дано ужась (1992-тӥ ар);
  • СССР-ысь Обороная министерствоысь устоез конструктор (1985-тӥ ар);
  • Пусъемын Почётъя орденэн (2002-тӥ ар);
  • Ижкарлэн Дано кунмуртэз (2017-тӥ ар);
  • Удмурт Элькунлэн Дано кунмуртэз (2019-тӥ ар)[7][6][4].

Озьы ик учке

Валэктонъёс

  1. ↑ 1 2 3 Сила ижевского оружия: о конструкторе пистолета Ярыгина Ростех.
  2. ↑ 1 2 Владимиру Ярыгину присвоено звание «Заслуженный работник оборонно-промышленного комплекса Российской Федерации» Концерн «Калашников.
  3. ↑ Доверенные лица Putin2024.ru.
  4. ↑ 1 2 3 Ярыгин Владимир Александрович Алнашский историко-литературный музей муниципального образования «Алнашский район».
  5. ↑ 1 2 Олег Корякин Человек и пистолет: Владимир Ярыгин рассказал о своем главном детище Российская газета.
  6. ↑ 1 2 3 Ярыгин Владимир Александрович Официальный сайт администрации города Ижевска.
  7. ↑ 1 2 3 Ярыгин - оружейник современности Союз оружейников России.
  8. ↑ Конструктор Владимир Ярыгин презентует книгу «Пистолеты ижевских оружейников» Редакция газеты «Известия Удмуртской Республики».

Чӧлсконъёс

«https://udm.ruwiki.ru/w/index.php?title=Ярыгин,_Владимир_Александрович&oldid=488179»-ысь басьтэмын