Юськи (санаторий)
| Юськи | |
|---|---|
| Удмуртия | |
 | |
| Кун | Россия |
| Матысез кар | Ижкар |
| Кылдытэмын | 1950 |
| Тэронлыкез | 100 интылы |
| Ужан дырыз | быдэс ар ӵоже |
| Матысез аэропорт | Ижевск аэропорт |
| Матысез вокзал | Ижевск станция |
| Ватсам тодэтъёс | |
| Профиль | туберкулёзлэсь эмъян |
| Адресэз | Пичи Пурга ёрос, Постол Починка, Юськи санаторий нимо урам |
 |
|
| sanatoriy-yuscki18.ru | |
«Ю́ськи» — Удмурт Элькунысь Пичи Пурга ёросысь туберкулёзэн черлам нылпиослы кун санаторий. Усьтэмын 1950-тӥ арын.
Историез
1938-тӥ арын Ижлэсь 35 иськемын, Юсь черкогурт котырын, Удмурт АССР-ысь Министръёслэн Кенешазы ужасьёслы шутэтскон юрт усьтэмын вал. Берлогес со борды кык этажъем кык юрт пуктӥзы. Быдӟым Атыкай ож аръёсы та корпусъёсын Горд Армилэн дышетон юртэз интыяськылӥз. Отын солдатъёсты дасяллязы[1].
1950-тӥ арын 27-тӥ куартолэзе тупатъям-выльдэм юртъёсын 150 муртлы чаклам туберкулёзэз эмъянъя нырысетӥ нылпи санаторий усьтӥзы. Валтӥсь эмчие Фридрих Яковлевич Киперманэз юнматӥзы[1][2].
Санаторийын 3—14 аресъем пиналъёслы кык корпус ужаз: туберкулёзэн висисьёслы, лябӟем тазалыко нылпиослы, ляб адӟись нылпиослы но Пертес висёнэн курадӟисьёслы. Нырысетӥ корпусын сиськонни интыямын вал. Кыкетӥ корпуслэн нырысетӥ этажаз туберкулёзлэн кужмо ортчись формаеныз курадӟись пиналъёсты эмъязы. Та корпусъёсын ик улӥзы санаторийын ужасьёс но, малы ке шуоно, со вакытэ эмъюрт котырын улон коркаос ӧй вал на[2].
1950-тӥ аръёсы ик санаторий котыртӥ кенеразы но сад мерттӥзы. Солэн бакчаяз ик бакча сиёнъёс будэтӥзы[2].
Санаторий быдэс ар ӵоже вис карылытэк ужаз. 1960-тӥ арозь со пуэн шунтӥськылӥз, собере эгырен эстыны кутскизы. Отын ужасьёслэн одӥг Ветерок нимо валзы гинэ вал. Пулы но, Иже кулэ луись вузъёс дуре но соин ик ветлылӥзы[2].
1976-тӥ—1980-тӥ аръёсы выль эмъян корпус пуктӥзы, со школае ветлӥсьтэм 7—8 аресозь 100 нылпилы чакламын вал[1].
2007-тӥ арын 100 интылы чаклам выль корпус пуктыны кутскизы. Со 2010-тӥ арын ужаны кутскиз[3].
Туала вакытэ
Санаторийын физиотерапияя, пинь эмъянъя, ЛОР, массаж, эмъян физкультурая кабинетъёс ужало, вань асьсэлэн клинической но бактериологической лабораториоссы[2].
«Юськи» — со Удмуртиысь медицина но дышетон удысъёслы лицензиен одӥг гинэ санаторий[3], соин ик пиналъёс, отын эмъяськыкузы, огдыре дышетско но. Озьы ик пациентъёс кружокъёсы, дискотекаосы, караоке ветлыны быгато. Соос понна утренникъёс, именинникъёслэн нуналъёссы но спорт ужрадъёс ортчыло: тематической прогулкаос, эстафетаос[4].
2017-тӥ арын шуркынмонысен «Юськи» санаторий «Бережливый санаторий» федерал ӵектосэ пыриськиз, со улсын Удмуртиысь санаторийын Россиысь мукет улосвылъёсысь пиналъёс но эмъяськыны быгатӥзы[5][6].
2024-тӥ арын толсуре басьтэм тодэтъёсъя, ужъюртын 109 адями тырше, соос пӧлын 9 эмчи, 22 эмсузэр, 12 дышетӥсь но 5 воспитатель[1].
Инфраструктураез
«Юськи» санаторийын интыяськемын:
- кык этажъем улон корпус (куинь блокъёслы люкемын: дошкольной, покчи классъёсын дышетскисьёс понна но 4—7 классъёсын дышетскисьёслы);
- административной блок;
- пищеблок-сиськонни;
- школа;
- библиотека;
- спортивно-актовой зал;
- биохимической но клиническойя лабораториос;
- ЛФК но массаж кабинетъёс;
- ингаляторий;
- парикмахерской;
- прачечной;
- котельной;
- стадион[4].
Валтӥсь эмчиос
- Фридрих Яковлевич Киперман;
- Галина Дмитриевна Маслова;
- Иван Фёдорович Минаев;
- Мухамед Гильмутдинович Гильмутдинов;
- Иван Андреевич Загорских;
- Николай Степанович Бабурин;
- Евгений Витальевич Шаимов (2002—2018);
- Ильсияр Мухаметнуровна Богданова (и. о.; 2018—2020);
- Вячеслав Геннадьевич Зорин (2020-тӥ арысен)[1].
Данъетъёсыз
- 2018 — «Здравница-2018» Огъяросси форумын «Нылпиослэсь тазалыксэс котыр ласянь юнматонъя тужгес устоез эмъюрт» номинациын зарни медаль (Кисловодск)[6];
- 2019 — «Здравница-2019» Огъяросси форумын[2] «Тужгес устоез нимазъям нылпи эмъюрт» номинациын зарни медаль (Алушта).
Валэктонъёс
- ↑ 1 2 3 4 5 Историческая справка [ӟуч] Республиканский санаторий для детей "Юськи".
- ↑ 1 2 3 4 5 6 Н. Городилова Санаторию "Юськи" - 70 лет Маяк.
- ↑ 1 2 Марина Цветухина Детский санаторий «Юськи» из Удмуртии готов стать межрегиональным Известия Удмуртской Республики.
- ↑ 1 2 Республиканский детский санаторий Юськи [ӟуч] Центр развития туризма Удмуртской Республики.
- ↑ Диана Филимонова. В удмуртском санатории «Юськи» будут принимать детей из других регионов, Ижлайф (13.04.2018). Эскеремын: 9 пӧсьтолэзе 2025 арын.
- ↑ 1 2 Дмитрий Стрелков. Санаторий «Юськи» из Удмуртии получил золотую медаль на всероссийском форуме, ИА «Сусанин» (4 инвожое 2018). Эскеремын: 9 пӧсьтолэзе 2025 арын.