Чернова, Татьяна Николаевна
| Татьяна Чернова | |
|---|---|
| Быдэс нимыз | Татьяна Николаевна Чернова |
| Вордӥськем дырыз | 15-тӥ толсуре 1953 (72 арес) |
| Вордӥськем интыез | Зура черкогурт, Эгра ёрос, Удмурт АССР, СССР |
| Кунмуртлыкез |
 СССР,  Россия |
| Ужудысэз | Шаблон:Поэтесса, журналист, Шаблон:Переводчик |
| Жанр | поэзия |
| Гожъяськон кылыз | удмурт, ӟуч |
| Премиосыз |
Флор Васильев нимо литература премия (1994), М. А. Кастрен нимо журналист премия (2009) |
Татьяна Николаевна Чернова (ворд. 15-тӥ толсуре 1953-тӥ арын) — удмурт кылбурчи, кылысь кылэ берыктӥсь, журналист. Флор Васильев нимо литературной премилэн (1994-тӥ ар), М. А. Кастрен нимо журналист премилэн (2009-тӥ ар) но Ашальчи Оки нимо йӧскалык премилэн (2019-тӥ ар) лауреатъёсыз [1]. Журналистъёслэн огазеяськонзылэн ёзчиез (1981-тӥ ар) но Гожъяськисьёслэн огазеяськонзылэн ёзчиез (1988-тӥ ар), Удмурт Элькунысь лулчеберет удысысь дано ужась(1998)[2][3].
XX даурлэн кыкетӥ ӝыныяз нылкышно лирикаын, Алла Кузнецоваен, Людмила Кутяноваен но Галина Романоваен артэ, огез яркытэз[1].
Улон сюресэз
Татьяна Николаевна Чернова вордӥськиз 1953-тӥ арын 15-тӥ толсуре УАССР-ысь Игра ёросысь Зура черкогуртын.
Семьяязы куать нылпи будӥз. Атайзы, Николай Ильич, Быдӟым Атыкай оже пыриськиз. Анайзы - Лидия Дмитриевна Чернова — удмурт нылпи кылбурчи, ужудысызъя библиотекарь вал. Татьяна дышетскиз Можга ёросысь тямыс классъем Пазял школаын, собере Бадӟым Уча шоръёзо школаын.
Студент аръёсаз ветлӥз литературно-творческой кружке, кудӥныз кивалтӥз кылбурчи Даниил Яшин[4].
1976-тӥ арын, Удмурт кун университетысь филологияя факультетэз йылпумъямез бере, одӥг ар ужаз Пичи Пурга ёросысь Вуж Монья шор ёзо школаын[5].
1977-тӥ арын «Советской Удмуртия» (али «Удмурт дунне») газетын корреспондентын ужаны кутскиз. 1986-тӥ арысен 1993-тӥ арозь «Удмуртия» книгапоттонниын удмурт художественной литературая редакторез вал[3]. 1993-тӥ арысен Удмурт Элькунысь лулчеберетъя министерстволэн научно-методической центраз методистын ужаз. 1996-тӥ арын, «Удмурт дунне» газетлэн редакцияз берытскыса, культурая отделэн кивалтӥз. 2001-тӥ-2004-тӥ аръёсы «Вордскем кыл» журналын редактор но Удмурт Элькунысь Гожъяськисьёслэн огазеяськоназы литературая консультант луыса тыршиз[[1]. Отӥяз, «Удмурт дунне» газетлэн редакцияз нош ик берытскыса, пенсие потытозяз, газетлэн кылкутӥсь секретарез но рекламая менеджер луыса ужаз (2004-2012-тӥ аръёс).
Творчествоез сярысь
Гожъяськонэн тунсыкъяськонэз кутскиз Лидия Чернова кылбурчи, анаез, бордысен. Аръёс ортчыса, семьяез кылдыса, Татьяна Николаевна нылъёсызлы но, Анастасиялы, Еленалы, гожъяськон мылкыд пыӵатӥз. Кыкетӥзэ тодӥськом Дарали Лели псевдонимен. 2009-тӥ арын солэн «Гур сьӧрысь суредъёс» нимо нырысетӥ бичетэз потӥз[6].
Татьяна Черновалэн нырысетӥ кылбурез печатламын вал 1967-тӥ аре «Советской Удмуртия» газетын. 1980-тӥ арын потӥз нырысетӥ кылбур бичетэз – «Тыныд тодмотэм кырӟанэ». 1986-тӥ, 1991-тӥ но 2021-тӥ аръёсы эшшо мукет книгаосыз потӥзы на: «Та шундыё дуннеямы» ("В этом солнечном мире" ), "Тӥ ӧй тодысалды…" ("Вы не узнали бы…")[7], «Туривесь» ("Купена")[8] но «Тӧдьы пужыё инкуазе» ("Узоры снежные природы"). Озьы ик, кылбуръёсыз печатласькизы элькун газет-журналъёсын но «Молодая гвардия», «Крестьянка», «Урал» но мукет журналъёсын, «Между Волгой и Уралом» книгаын, мукет огъя кылбур бичетъёсын[7].
Татьяна Черновалэн кылбуръёсыз ӟуч, бигер, пор, эрзя, коми, чуваш, эстон, венгер кылъёсы берыктэмын. Ачиз но со пӧртэм кылъёсысь удмурт кылэ берыкъя[1].
Татьяна Черновалэн тросэз кылбуръёсыз кырӟанлы пӧрмытэмын, кылсярысь, «Трос-а кулэ милемлы?», "Чеберина", "Выжыкыл дуннее", «Мон тынад тодад-а?», «Шумпотон кузьмасе»[7].
Удмурт Элькунысь йӧскалык театрын 2000-тӥ арын пуктэмын «Айна» крезьгуро драмая спектакль, пьесаез гожтӥзы Василий Ушаков режиссёрен ӵош. Финн-угор театръёслэн фестивалязы Йошкар-Олаын спектакль вылӥ дунъямын вал[1].
Кылбуретэзлэн валтӥсь темаосыз луо анай луон, выжыез гажан но азьланьтон, шаередлэн инкуазь чеберезлы паймон, адями кусыпъёс, яратонэз шӧдон-валан но дунъян[1].
Библиографиез
- «Тыныд тодмотэм кырӟанэ» (с удм. — «Тебе незнакомая песня моя») — 1980
- «Та шундыё дуннеямы» (с удм. — «В этом солнечном мире») — 1986
- «Тӥ ӧй тодысалды…» (с удм. — «Вы не узнали бы…») — 1991
- «Туривесь» (с удм. — «Купена») — 2021
- «Тӧдьы пужыё инкуазе» (с удм.— «Узоры снежные природы") — 2021
Валэктонъёс
- ↑ 1 2 3 4 5 6 Татьяна Николаевна Чернова [ӟуч] Эскеремын 2022-03-13 арын
- ↑ Туганаев, 2008, с. 714.
- ↑ 1 2 Загребин, 2012, с. 491.
- ↑ Татьяна Николаевна Чернова
- ↑ Христолюбова, 2002, с. 330.
- ↑ Чернова Татьяна
- ↑ 1 2 Христолюбова, 2002, с. 331.
Литература
- Христолюбова Л. С. Удмуртские женщины. XX век : (Биографический справочник). — Ижевск : Удмуртский институт истории, языка и литературы УрО РАН, 2002. — 448 с. — 600 экз. — ISBN 5-7691-1149-6.
- Чернова (Петрова) Татьяна Николаевна // Удмуртская Республика : Энциклопедия / гл. ред. В. В. Туганаев. — 2-е изд., испр. и доп. — Ижевск : Издательство «Удмуртия», 2008. — С. 714. — 768 с. — 2200 экз. — ISBN 978-5-7659-0486-2.
- Чернова Татьяна Николаевна // Удмуртская Республика : Культура и искусство : Энциклопедия / гл. ред. А. Е. Загребин. — Ижевск : Удмуртский институт истории, языка и литературы УрО РАН, 2012. — С. 491. — 540 с. — 300 экз. — ISBN 978-5-901304-62-4.