Устинов, Дмитрий Фёдорович

РАН экспертиза

Экспертизаез ортчытӥз
Россиысь Тодосъёсъя Академия

Пыр-поч лыдӟе

Экспертиза РАН

Экспертизаез ортытӥз
Россиысь Тодосъёсъя Академия

Поыр-поч лыдӟе

Материалъёс басьтэмын Б.Н. Ельцин нимо библиотекаысь

Та гожтосын Б.Н. Ельцин нимо Президент библиотекалэн фондысьтыз материалъёс кутэмын

Рос-прос учке

Рувикиын таӵе фамилиен мукет муртъёс сярысь гожтосъёс вань. Учке: Устинов.

Дмитрий Фёдорович Устинов
КПСС-лэн ЦК-езлэн Политбюроезлэн ёзчиез
1976-тӥ арын 5-тӥ южтолэзе — 1984-тӥ арын 20-тӥ толсуре
КПСС-лэн ЦК-езлэн Политбюрое ёзчие кандидат
1965-тӥ арын 26-тӥ южтолэзе — 1976-тӥ арын 5-тӥ южтолэзе
СССР-ысь ожгар ведомстволэн йырыз
1976-тӥ арын 29-тӥ оштолэзе — 1984-тӥ арын 20-тӥ толсуре
Кивалтэтлэн тӧроез	Косыгин Алексей Николаевич Тихонов Николай Александрович
Азьпалчиез	Гречко Андрей Антонович
Бӧрысьчиез	Соколов Сергей Леонидович
СССР-ысь Министръёслэн Кенешсылэн тӧроезлэн нырысетӥ воштӥсез
1963-тӥ арын 13-тӥ южтолэзе — 1965-тӥ арын 26-тӥ южтолэзе
Кивалтэтлэн тӧроез	Хрущёв Никита Сергеевич Косыгин Алексей Николаевич
Калык хозяйствоя вылӥ кенешлэн тӧроез
1963-тӥ арын 13-тӥ южтолэзе — 1965-тӥ арын 26-тӥ южтолэзе
Азьпалчиез	Должность кылдытэмын
Бӧрысьчиез	Новиков Владимир Николаевич
СССР-ысь оборонаысь промышленностья министр
1953-тӥ арын 15-тӥ южтолэзе — 1957-тӥ арын 14-тӥ толсуре
Азьпалчиез	Интыуж кылдытэмын
Бӧрысьчиез	Интыуж быдтэмын; Домрачёв, Александр Васильевич (кун ужась) СССР-ысь Министръёслэн Кенешсылэн оборонаысь техникая кун комитетлэн тӧроез интые
СССР-ысь вооружения министр
1946-тӥ арын 19-тӥ южтолэзе — 1953-тӥ арын 15-тӥ южтолэзе
Кивалтэтлэн тӧроез	Сталин Иосиф Виссарионович Маленков Георгий Максимилианович
Азьпалчиез	Интыуж быдтэмын; ачиз СССР-ысь вооружения калык комиссар интые
Бӧрысьчиез	Интыуж быдтэмын; ачиз СССР-ысь оборонаысь промышленностья министр интые
СССР-ысь вооружения калык комиссар
1941-тӥ арын 9-тӥ инвожое — 1946-тӥ арын 19-тӥ южтолэзе
Кивалтэтлэн тӧроез	Сталин, Иосиф Виссарионович
Азьпалчиез	Ванников, Борис Львович
Бӧрысьчиез	Интыуж быдтэмын; ачиз СССР-ысь вооружения министр интые
Вордӥськемын	17-тӥ коньывуонэ (30-тӥ коньывуонэ) 1908(1908-10-30) Самара, Росси империя
Кулэмын	20-тӥ толсуре 1984(1984-12-20) (76 арес) г. Муско, РСФСР, СССР
Нылпиосыз	Николай Дмитриевич Устинов[d]
Дышетскемез	Секыт промышленностья Калык комиссариатлэн ожгар механикая институтэз
Кинюртэмез
Данъетъёсыз	Мукет кунъёслэн
Военной службаез
Служить карон аръёсыз	1922—1923, 1944—1984
Кытысь луэмез	СССР СССР
Кыӵе войскоосын вал
Званиез	Совето Союзысь маршал
Командовать кариз	СССР-ысь Обороная министерство
Ожмаськонъёс	Кыкетӥ дунне ож[d]
Медиафайлъёс РувикиМедиа пушкын

Дми́трий Фёдорович Усти́нов (1908-тӥ арын 17-тӥ (30-тӥ) коньывуонэ, Самара, Росси империя — 1984-тӥ арын 20-тӥ толсуре, Муско, РСФСР, СССР) — совето военачальник но кун деятель. Совето Союзысь маршал (1976). Совето Союзысь Герой (1978). Социалистической Ужысь кык полэс Герой (1942, 1961). Ленин нимо дас одӥг орденлэн кавалерез.

СССР-ысь калык комиссар но вооруженияя министр (1941—1953), СССР-ысь оборонаысь промышленностья министр (1953—1957). СССР-ысь обороная министр (1976—1984). КПСС-лэн ЦК-лэн ёзчиез (1952—1984), КПСС-лэн ЦК-лэн секретарез (1965—1976), КПСС-лэн ЦК-езлэн Политбюроезлэн ёзчиез (1976—1984).

Устинов тылож но тылож бере ожтӥрлык поттонэз умой радъяз но валтӥз, Совето Союзлэсь обороная кужымзэ шӧдскымон будэтӥз. Быдӟым Атыкай ож аръёсы Устинов чаклам улсын СССР-ысь Ожгар тӥрлыкъя наркомат бусыын но зарезьын кутӥськись, танкъёслы пумит ужась но зенитной артиллерия, самолётъёслы но танкъёслы пушечно-пулемётной ожтӥрлык, уно пумо ыбылӥськон пыӵал, оптикая приборъёс но ожгар припасъёс понна но ваньзэ тае кылдытон, лэсьтон но эскерон понна кылкутӥз.

Устинов тыршемен, СССР-ысь быдэс ВПК-лэн ужез пайдаё радъямын вал. 1941-тӥ— 1945-тӥ аръёсы Устинов кивалтэм улсын СССР-ысь промышленность, Германиысь но оккупацие шедем кунъёсысь промышленностен ӵошатыса, 2 поллы уногес ожтӥрлык поттӥз. Артиллерилэн лыдыз война аръёсы 5 поллы йылӥз, ыбылӥськон тӥрлык — 22 поллы.

Тылож йылпумъяськем бере Устинов Ожгар кужымъёслэсь, мукет силовой ведомствоослэсь ожгар кужымзэс будэтон бордын тыршиз — наукая огазеяськонъёслэсь, конструктор бюроослэсь, промышленной предприятиослэсь ужзэс выль тӥрлык кылдытон ӧре выжтӥз но производствоез чаклалляз. Устинов кивалтэм улсын ракета но инсьӧр техникаез кылдытон но сериен поттон уж борды басьтӥськизы, озьы ик совето армиез но флотэз ракетно-ядерной ожтӥрлыкен узырмытон радъяськиз, инсьӧрез эскерон валтӥсь интые пуктэмын вал, таиз кунэз утён понна но кулэ вал.

Улон сюресэз

Егит дырыз

Дмитрий Фёдорович Устинов 1908-тӥ арын 17-тӥ (30-тӥ) коньывуонэ Самараысь ужасьёслэн семьяязы вордӥськиз. Бубиз — Фёдор Сысоевич, мумиз — Ефросинья Мартыновна. Ӟуч. Пётр агаез (21.12.1890—02.04.1938) — эсеръёслэн партизылэн ёзчиез, Граждан оже пыриськем мурт, 1918-тӥ арын 1-тӥ Симбир полклэн Г. Д. Гайлэн 24-тӥ Железной дивизиезлэн командирезлэн воштӥсез вал; бератаз Ленинградын улӥз, репрессие сюриз. Иван выныз — Граждан оже пыриськем мурт, 1918-тӥ арын тулыс быриз. Николай выныз но Граждан оже пыриськиз.

Дмитрий 10 аресысен ужаны кутскиз.

1922-тӥ арын Устинов ас мылкыдызъя Горд армие куриськиз, Самаркандысь нимысьтыз юнматэм отрядын телефонист вал. 1923-тӥ арын 12-тӥ Туркестан полке выжиз. Басмачъёслы пумит ожмаськиз.

Демобилизацие сюремез бере, 1923-тӥ арын Кострома губерниысь Макарьев карысь техникая школаын дышетскиз.

1927-тӥ арын шуркынмонэ, профтехшколаез йылпумъяса, ВКП(б)-лэн радъёсаз султӥз.

1927-тӥ—1929-тӥ аръёсы — Балахнаысь бумага поттон комбинатысь слесарь, отӥяз Иваново-Вознесенскысь Фёдор Зиновьев нимо фабрикаысь слесарь.

1929-тӥ арын сӥзьыл Иваново-Вознесенскысь политехникая институтысь инженеръёсты но механикъёсты дасянъя факультетэ пыриз. Институтысь комсомол огазеяськонлы секретаре, партбюрое ёзчие быръемын вал. Отӥяз Устинов Бауман нимо МВТУ-э выжиз. 1932-тӥ арын Устиновен ӵош дышетскем группаез быдэс составен выль усьтӥськем Военно-механической институтэ (али — Д. Ф. Устинов нимо «Военмех» БГТУ) келямын вал. 1934-тӥ арын Устинов сое умой йылпумъяз.

1934-тӥ арысен — Ленинградысь Артиллерияя наукаосъя но эскеронъя зарезь институтысь инженер-конструктор, эксплуатацияя но эскеронъя бюроен кивалтӥсь.

1937-тӥ арысен — «Большевик» заводысь (али — Обуховысь завод) инженер-конструктор, валтӥсь конструкторлэн воштӥсез, заводлэн директорез.

Быдӟым Атыкай ож

1941-тӥ арын 9-тӥ инвожоысен 1946-тӥ арын 15-тӥ южтолэзёзь — СССР-ысь вооружениея нарком. Пытсэт сьӧры келям Борис Ванников интые юнматэмын. Серго Берия пусъемъя, Устиновез вооружениея наркоме Лаврентий Берия ӵектэмен пуктӥзы.

Быдӟым Атыкай ож дыръя промышленностез эвакуациен шундыӝужан пала келянэз огез радъясьёс пӧлысь огез Устинов вал.

Война вылтӥ туж бадӟым инты басьтӥз ожтӥрлык поттон. Музъем вылын, омырын но зарезьын вань войскоослэн ожмаськыны быгатэмзы, ожтӥрлыклэн лыдыз но ӟечлыкез Устиновен кивалтоно наркомат бордысь потылӥз.

Тылож вакытэ ужпумъёсты быдэстон вылысь 1941-тӥ арын 22-тӥ инвожое Обороная кун комитетэз кылдытон но юнматон понна Устинов наркоматлэсь ужзэ выль сямен радъянъя комплексной программаен тодматӥз. РФ-ысь Обороная министерстволэн туала дунъетэзъя, вооружениея Устинов нарком сюлмаськемен, отын тыршись инженеръёслы, конструкторъёслы, ожтӥрлык поттӥсь уно предприятиослы но институтъёслы луыса фашизмез вормонын трос лэсьтэмын вал. Устинов тыршемен, СССР-ысь быдэс ВПК-лэн ужез пайдаё радъямын вал.

СССР-ысь Вылӥ Кенешлэн Президиумезлэн 1942-тӥ арын 3-тӥ инвожое юнматэм «Быховской А. И., Ванников Б. Л., Гонор Л. Р., Елян А. С., Новиков но Устинов Д. Ф. товарищьёслы Социалистической Ужысь Герой ним сётон сярысь» указэзъя «производствоез быгатыса радъямез, артиллериын но ыбылӥськонын кутӥськись выль тӥрлык поттэмез, заводъёсын умой кивалтэмез понна» Социалистической ужысь Герой нимын пусъемын, Ленин нимо орденэн но «Серп и Молот» медален сӥлы каремын.

Тылож йылпумъяськем бере

1945-тӥ арын Устинов но солэн нырысетӥ воштӥсез В. М. Рябиков вормем Германиысь «Рабе» институтэ вуылӥзы. Таин валче 1946-тӥ арын совето ракета поттон удыс кылдытон сярысь малпан вордӥськиз.

Д. Ф. Устинов (пумаз паллянысез) Вьетнамысь оже пыриськемъёсты ожгар данъетъёсын пусъён ужрадын. Ханой, 1966-тӥ арын толшоре

1946-тӥ арын 15-тӥ южтолэзе — 1953-тӥ арын 15-тӥ южтолэзе Устинов СССР-ысь вооружениея министр вал. Ӵапак та удысын тыршыкуз, совето ракетаосты поттон малпанэз со улонэ пыӵатӥз, та ужпумъёсты быдэстон вылысь ЦК-лэн но СССР-ысь Министръёслэн Кенешсылэн 1946-тӥ арын 13-тӥ куартолэзе юнматэм 1017—419 номеро постановлениенызы юромо кылдытэм 2 номеро Комитетлэн тӧроезлэн воштӥсез луиз .

Министр сямен Устинов ракета лэсьтон проектэз быдэстонэ мыло-кыдо пыриськиз. СССР-ысь Обороная министерстволэн сизьыметӥ Валтӥсь управлениез кылдытэмын вал, со ракета ожтӥрлык поттон бордын быдэсак ужаз. Солы кивалтӥсе С. И. Ветошкин пуктэмын, солэн ракета техникалэн кулэлыкез пумысен ужпумъёс шоры учконъёсыз Устиновен тупаллязы.

1953-тӥ арын 19-тӥ южтолэзьысен 1957-тӥ арын 14-тӥ толсурозь — СССР-ысь оборонаысь промышленностья министр.

1955-тӥ арын СССР-ысь обороная министрлэн приказэзъя Устинов ожгар службаын ожгарчи ним сётэм дырысен пусъемен лыдъямын.

Партилы пумит ужась группае пырем Молотов, Маленков, Каганович но соос борды итӥськем Шепилов Хрущёвез палэнтон сярысь вераськыкузы, Устинов дурбасьтӥсьёс пала кариськиз.

1957-тӥ арын 21-тӥ инвожое «Муско» группае пырись КПСС-лэн ЦК-езлэн ёзчиосыныз дэмен КПСС-лэн ЦК-езлэсь Пленумзэ бичан пумысен КПСС-лэн ЦК-езлэн Президиумаз куриськон гожтӥз, отын Н. С. Хрущёвез КПСС-лэн ЦК-езлэн нырысетӥ секретарьысьтыз мозмытон пумысен ужпум ӝутэмын вал.

1957-тӥ арын 14-тӥ толсуре  — 1963-тӥ арын 13-тӥ южтолэзе — СССР-ысь Министръёслэн Кенешсылэн тӧроезлэн воштӥсез, СССР-ысь Министръёслэн Кенешсылэн ожгар промышленностез ӝутон ужпумъёсъя Президиумлэн комиссиезлэн тӧроез. СССР-ысь валтӥсь университетъёс бордын физикая но математикая школаос радъян сярысь распоряжение гожтӥз. Инсьӧре нырысетӥ адямиез келяны дасямез понна (Ю. А. Гагарин, 1961-тӥ арын 12-тӥ оштолэзе) Социалистической Ужысь Герой нимын пусъемын (указ ӧз печатласькы).

1963-тӥ арын 13-тӥ южтолэзе — 1965-тӥ арын 26-тӥ южтолэзе — СССР-ысь Министръёслэн Кенешсылэн тӧроезлэн нырысетӥ воштӥсез, СССР-ысь Министръёслэн Кенешсылэн калык хозяйствоя вылӥ кенешезлэн тӧроез.

1965-тӥ арын 26-тӥ южтолэзе — 1976-тӥ арын 26-тӥ коньывуонэ — КПСС-лэн ЦК-езлэн обороная но промышленностья комплекс понна кылкутӥсь секретарез.

СССР-ысь обороная министр

Шораз Д. Ф. Устинов, Э. Хонеккер, ГДР-лэн обороная министрез Х. Гофман но СССР-ысь, ПНР-ысь, ВНА-ысь, ЧСНА-ысь Ожгар кужымъёслэн но ГДР-рысь ННА-лэн вылӥ офицеръёсыз. Берлин, 1983-тӥ ар

1976-тӥ арын 29-тӥ оштолэзе — 1984-тӥ арын 20-тӥ толсуре — СССР-ысь обороная министр.

Совето Союзлэн маршалэз Дмитрий Устинов КПСС-лэн ЦК-езлэн официальной луисьтэм «пичи» Политбюрояз шедиз, отчы СССР-лэн кивалтэтэзлэн арлыдоосыз но тужгес даноосыз ёзчиосыз пыриськизы: КПСС-лэн ЦК-езлэн валтӥсь секретарез Брежнев, СССР-ысь Министръёслэн Кенешсылэн тӧроез Косыгин (отӥяз — Тихонов), КПСС-лэн ЦК-езлэн секретарез но КПСС-лэн валтӥсь идеологез Суслов, КГБ-лэн тӧроез, нош азьланяз КПСС-лэн ЦК-езлэн секретарез Андропов, кунгожсьӧр ужъёсъя министр Громыко, КПСС-лэн ЦК-езлэн секретарез Черненко. «Пичи» Политбюроын тужгес кулэ луись решениос кутӥськизы, соосты отӥяз Политбюролэн валтӥсь составезлэн куара сётоназ формально амалэн юнматъязы, куддыръя заочно куара сётъязы. Совето войскоосты Афганистанэ пыртон сярысь пумкылэз кутыкузы, Устинов Андроповлы но Громыколы дурбасьтӥз, таин валче войскоосты Афганистанэ пыртӥзы.

1982-тӥ но 1984-тӥ аръёсы Андроповез, отӥяз Черненкоез КПСС-лэн ЦК-езлэн валтӥсь секретаряз быръён понна дурбасьтӥз.

Президиумын К. У. Черненко, Ю. В. Андропов, Д. Ф. Устинов (пумаз паллянысез). Трибуна азьын Н. Чаушеску. 1982-тӥ ар

Леонид Млечин писательлэн пусъемезъя, Андропов кулэм бере Устинов Политбюроын тужгес кужмоез ёзчи вал, таин валче Горбачёв сое КПСС-лэн ЦК-езлэн валтӥсь секретарез сямен дурбасьтыны дась луэмзэ вералляз.

1927-тӥ арын ВКП(б)-лэн—КПСС-лэн ёзчиез. 1952-тӥ—1984-тӥ аръёсы — КПСС-лэн ЦК-езлэн ёзчиез, 1976-тӥ—1984-тӥ аръёсы — КПСС-лэн ЦК-езлэн Политбюроезлэн ёзчиез (1965-тӥ—1976-тӥ аръёсы — Президиуме — КПСС-лэн ЦК-езлэн Политбюрояз ёзчие ӵектэм мурт). ВКП(б)-лэн — КПСС-лэн XVIII, XIX, XX, XXI, XXII, XXIII, XXIV, XXV но XXVI ӧтчамъёсысьтыз делегат.

1946-тӥ—1950-тӥ но 1954-тӥ—1984-тӥ аръёсы — СССР-ысь Вылӥ Кенешлэн депутатэз. 1967-тӥ—1984-тӥ аръёсы — РСФСР-ысь Вылӥ Кенешлэн депутатэз. Политбюроысь 1970-тӥ—1980-тӥ аръёсысь ёзчиос пӧлын 4—4,5 час кӧламеныз висъяськылӥз. Туж задор, азинлыко вал, предприятиосын кылдэм кивалтон ужпумъёсты туж ӝог сэрттылӥз-пертчылӥз.

Устиновлэн доктринаез

Совето Союзысь маршал Д. Ф. Устинов но КПСС-лэн ЦК-езлэн валтӥсь секретарез Л. И. Брежнев мавзолейлэн трибунаяз

Д. Ф. Устинов судноосты лэсьтонъя но тупатъянъя «Нерпа» заводын. 1983-тӥ арын

Устиновез СССР-ысь обороная министре юнматон 1976-тӥ арын совето армилэн азинсконаз но совето ожгар доктринаез быдэстонын шӧдскымон луиз. Азьло бадӟым саклык висъяллязы Шор Европаын но Дальний Востокын «ядерной луисьтэм керетонлэн зол бугырскеменыз валче» сценария юн бронетанковой кужымъёсты кылдытонлы.

Устинов вакытэ тактикая но оперативно-тактической ядер ожтӥрлыклы бадӟым саклык висъяськылӥз («евростратегической ӧрез юнматон» теория). Таин валче 1976-тӥ арын шоро-куспо кузьдалае лобӟись Р-12 (SS-4) но Р-14 (SS-5) моноблок ракетаосты выль РСД-10 «Пионер» (SS-20) ракетаослы воштыны ӧдъязы. Со сяна, 1983-тӥ—1984-тӥ аръёсы СССР Чехословакиын но ГДР-ын оперативно-тактической ОТР-22 но ОТР-23 «Ока» комплексъёсты пуктылӥз, соос ФРГ-ысь вань цельёсы вуыны быгато вал. Аналитикая лыдпусъёс вылэ пыкиськыса, США но НАТО огкылэ вуизы: СССР Европаын ядер конфликтэ пыриськыны дасяське.

Устиновлэн доктринаезъя РС-20 ракетаосты Чукоткае но пуктыны чакламын вал, отысен Аляска но Канадалэн уйпал но шундыӝужан палыз усьтӥськылӥзы. Ядерной ож пуромем пумысен нырысетӥ тодметъёсыз шараяськыку, НАТО ивортон-алон вылысь ядер ракетаосты СССР вылэ лэзьыны чакла вал, со понна Европаысь нимысьтыз ожгар операцилы дасяськизы. Североатлантической блоклэсь пыдлось эшелон обороназэ пазьгыны, сое фронт линия кузя 50-100 иськемлы палэнэ киргатыны ужпум пуктэмын вал. Вить фронтъёсысь ударной армейской группаосты Шундыпуксён Германие наступление лэзьыны чакламын вал. Нырысетӥ этапын Молдав ССР-ын (Приднестровьеын) интыяськем 14-тӥ армиез Турцие шуак куштыны, озьы Сьӧд зарезьысь проливъёсты киултыны, Черноморской флотлэн корабльёсызлы Средиземноморье сюрес усьтыны чакламын вал. Ожгар морякъёслэн кужыменызы Италиез киултыны ужпум пуктылӥзы. 13—15 нунал куспын совето войскоос ФРГ-лэсь, Данилэсь, Голландилэсь, Бельгилэсь музъемзэс киултыны но Франциен кунгож дорозь потыны кулэ вал. Уйпал Европаын ортчоно операцилэсь кыкетӥ люкетсэ кык выль фронтъёслэн кужыменызы нуыны малпало вал. Нырысетӥ фронтэз Нормандия (Франция) пала шуккыны, кыкетӥез со вакытэ Испанилэн кунгожъёсыз пала потыны кулэ вал. Европаысь НАТО-лэсь войскооссэ пазьгон, Европаез киултон но Франциез войнаысь поттон понна Устиновлэн планэзъя 30—35 нунал тырмыт вал. СССР-ысь Ожгар кужымъёслэн Генштабзы планлэн быдэсмемезлы оскылӥз ке но, валантэм вал, ма отӥяз ожгар вормонъёсын карыны, кызьы уно миллион калыкен киултэм музъемъёсын кивалтыны.

Висемез но кулэмез

1984-тӥ арын куарусёнэ, кунъёсысь обороная министръёсты ӧтьыса, Варшавской огкылъя ортчем «Щит-84» учениос дыръя Устинов висён кутӥз, та ик солэн быронэзлэн адӟонэз луиз. Дышетсконъёс радъям бере 1985-тӥ арын 15-тӥ толшоре, Устинов кулэм бере толэзь ортчыса, озьы ик ужрадэ пыриськем ЧССР-ысь обороная министр М. Дзур кулӥз.

Генерал-лейтенант Иван Устинов тодаз вайылӥз: «Берпуметӥ учениын ми солэн резиденцияз 9 часысен 3 часозь пукимы, бератаз сое, черлам муртэ, самолётэн келязы. Со ваньмыныз тунсыкъяськиз: ужъёсын но, нимысьтыз планэн но... Ӧй чида, верай: „Дмитрий Фёдорович, шутэтскыны но дыр вуиз, угось планъя 9 часын ӵукна дышетон ужрадъёс кутскозы“. — „Иван Лаврентьевич, эн сюлмаське, мон сталин вакытэ кыдам мурт“. Ма, тани адӟиськоды...».

Устиновлэн секыт висеменыз сэрен 1984-тӥ арын 7-тӥ шуркынмонэ парадын интызэ солэн воштӥсез С. Л. Соколов басьтӥз, сое ик отӥяз СССР-ысь обороная министре юнматӥзы.

Д. Ф. Устинов «Запад-81» ожгар учениосын

1984-тӥ арын 20-тӥ толсуре, тыосыз висьыны кутскемен, улонысь кошкиз. Горд площадьын ватэмын: мугорыз сутэмын, прахеныз урна Кремль борддорын ватэмын. Тазьы ватон амал берпуметӥез вал.

Семьяез

Таисия Алексеевна Брыкалова-Устинова кышноез (1908-тӥ арын 12-тӥ оштолэзе — 1975-тӥ арын 30-тӥ шуркынмонэ) — Шуяын куиськись но ужась семьяын вордӥськемын, Иваново-Вознесенскысь политехникая институтэз йылпумъямын, химик-технолог луиз, Н. Э. Бауман нимо МВТУ-ын дышетӥсь луыса ужаз.

Николай пиез (пинал дыръяз Рэм нимыз) (1931—1992) — валтӥсь конструктор, лазерез ожгар удысын кутонъя ӧнерчи, СССР-ысь Наукаосъя академилэн член-корреспондентэз.

Вера нылыз (1940—1989) — РСФСР-ысь дано артистка (1977), А. В. Свешников нимо академической ӟуч кун хорысь хористка, Мускоысь консерваториын кырӟаны дышетӥз.

Малпанъёс но дунъетъёс

Дмитрий Фёдорович тужгес вылӥ пуконын но дышетскыны ӧз возьдаськылы, ужасьёссэ тодон-валанзэс будэтыны косылӥз. Обороная министр дыръяз но со мыным оскиз солы но министерстволэн коллегиезлы стратегияя кутэм секытос ивортодэт сӧзнэтъёсты лэсьтон принципъёс, стратегияя иворъёслэсь зэмлыксэс возьматон амалъёс, та сӧзнэтъёслы туала но азьпалан кулэ луись техника амалъёсты кылдытон, соослы алгоритм но программаос гожтон сярысь. Со та лекциосты тужгес мыло-кыдо кылзӥсь вал, кошкеме бере ни матысь ужасьёсызлы экзамен выллем радъяз.

— 1970-тӥ—1987-тӥ аръёсы СПРН-ысь но СККП-ысь валтӥсь конструктор В. Г. Репинлэн тодэ ваёнъёсысьтыз .

... мынам тужгес но <...> тодам кылиз ожтӥрлыкъя егит (1941-тӥ арын солы 33 арес гинэ вал) нарком Дмитрий Фёдорович Устинов... Уг тодӥськы, ку со изьылӥз, но малпан кылдылӥз, Дмитрий Фёдорович котьку пыд йылаз вал шуыса. Со котьку задор но сэзь луэменыз, калыклы ӟеч кариськеменыз висъяськылӥз. Ожтӥрлыкъя нарком луыса тыршыкуз, Д. Ф. Устинов йӧно инженер, производствоез мур тодӥсь но усто радъясь луэменыз паймытӥз. Шаплы но дӥсьтыса котькуд решениосты кутылӥз, техникая секыт ужпумъёсты рос-прос валалляз. Одӥг минутлы но адямилыко сямъёссэ ӧз ышты.

— Артиллериысь маршал Н. Д. Яковлев.

Буре ваён

Почта марка СССР, 1988,  [ЦФА [АО «Марка» АО] № Скотт]

Cамараысь Устинов нимо скверын Д. Ф. Устиновлы сӥзем туй бюст юнматэмын

Д. Ф. Устиновлы бюст Ижысь К. Герд нимо йӧскалык музейын утиське

Устинов Кремль борддоре ватэмын

• Устинов улонысь кошкемен валче кайгырон нунал ялӥзы, сое ватонэз шор телевидение пыр возьматӥзы — партилэн но правительстволэн кивалтӥсьёссы луисьтэм муртъёс понна та туж шер вал. Кремль борддоре ватэмъёс пӧлысь берпуметӥез луиз (кык но ӝыны толэзь солэсь азьло К. У. Черненкоез ватӥзы):
• 1984-тӥ арын Ижкарез Устинов нимазы; автономной республикалэн шоркарезлы таӵе ним сётон туж аспӧртэмлыко вал (азьвыл Брежневез но Андроповез сӥлы карыса, ёрос центръёсты гинэ нималляло вал — Набережные Челны но Рыбинск). Талы карын улӥсьёс чутрак пумит луизы, 1987-тӥ арын 19-тӥ инвожое Ижлы азьвыл нимыз берыктэмын вал ини. Отӥяз Д. Ф. Устиновлэсь нимзэ Ижысь выль кылдэм ёрослы сётоно кариськизы, та УАССР-ысь Вылӥ Кенешлэн Президиумезлэн 1987-тӥ арын 13-тӥ инвожое кутэм постановлениеныз но РСФСР-ысь Вылӥ Кенешлэн Президиумезлэн 1987-тӥ арын 22-тӥ инвожое кутэм указэныз юнматэмын — Устинов ёрос. 1987-тӥ арын 1-тӥ пӧсьтолэзе Устинов ёрос кенешысь калык депутатъёслэн нырысетӥ сессизы ортчиз. Та нуналэз ёрослэн кылдэм нуналыныз лыдъяло. Карын Устиновлы сӥзем бюст пуктэмын;
• Озьы ик Совето Союзысь маршаллэсь Д. Ф. Устиновлэсь нимзэ Ленинградысь механикая институтлы сётӥзы. Та дыре вузлэн (Д. Ф. Устинов нимо «Военмех» Балтийской техникая кун университет), нимыз воштӥськиз, со Д. Ф. Устиновлэсь ик нимзэ нуллэ, но ожгар званиез пусъемын ӧвӧл ни;
• 1985-тӥ арын Устиновлы сӥзьыса, Мускоысь Сӥзьыл бульварлэсь нимзэ воштӥзы, со Устинов маршаллэн ульчаез луиз, но 1990-тӥ арын солы азьвыл нимыз берыктэмын;
• Совето вакытэ Ульяновскысь авиацияя но промышленностья комплекс (УАПК) Д. Ф. Устиновлэсь нимзэ нуллӥз. 1992-тӥ арын Д. Ф. Устинов нимо УАПК «Авиастар» акционер огазеяськонлы (АО) пӧрмиз;
• Ульяновскысь Заволжской ёросын Устиновлы сӥзем проспект вань;
• Самараын, Устиновлэн вордскем палаз, карлэн историысь люкетатаз солы сӥзем сквер вань, отчы ик Устиновлэн бюстэз пуктэмын;
• Санкт-Петербургысь Рыбацкое микрорайонын Д. Ф. Устиновлы сӥзем ульча вань;
• Уйпал флотэ «Маршал Устинов» ракета крейсер пыре;
• 2012-тӥ арын Ковровын выль кылдэм микрорайонлы Устиновлэсь нимзэ но отчы бюстсэ пуктон пумысен огкылысь кенешизы;
• 2014-тӥ арын Самараысь Крутые Ключи микрорайонысь ульчалы солэсь нимзэ сётэмын ( Маршал Устиновлэн ульчаез);
• Ивановскысь политехникая университетлэн валтӥсь корпусаз (азьвыл политехникая институт) мемориал пул усьтэмын, ӵапак татын Д. Ф. Устинов дышетскиз;
• 1992-тӥ арозь «Прогресс» ракетая но инсьӧръя центр солэсь нимзэ нуллӥз.

Ожгар нимъёсыз

• 1944-тӥ арын 24-тӥ толшоре — инженерияя но артиллерияя службаысь генерал-лейтенант;
• 1944-тӥ арын 18-тӥ шуркынмонэ — инженерияя но артиллерияя службаысь генерал-полковник;
• 1976-тӥ арын 29-тӥ оштолэзе — армиысь генерал;
• 1976-тӥ арын 30-тӥ пӧсьтолэзе — Совето Союзысь маршал.

Дмитрий Устинов сярысь документ киноос

• Николай Сванидзеен историысь хроникаос. 78-тӥ серия. «1976 год — Дмитрий Устинов»;
• «Кремлёвские дети. Дмитрий Устинов. Оборона превыше всего» — «Кремлёвские дети» циклысь документальной кино, НТВ;
• «Самарские судьбы. Дмитрий Устинов», 2008. Автор Виталий Добрусин — «Самарские судьбы» циклысь биографи кино.

Киноосын возьматэмын

• Андрей Попов «Укрощение огня» художествоя киноын, СССР, 1972;
• Борис Гусаков «Битва за Москву» киноэпопеяын (чеш. Boj o Moskvu; нем. Schlacht um Moskau; вьетн. Cuộc chiến ở Moskva), СССР, 1985;
• Юрий Стосков «Серые волки» художествоя киноын, Россия, 1993;
• Алексей Михайлов «Красная площадь» сериалын, 2004;
• Владимир Меньшов «Брежнев» сериалын, Россия, 2005;
• Олег Треповский «„Кедр“ пронзает небо» сериалын, Россия, 2011;
• Андрей Лебедев «Петля Нестерова» сериалын, Россия, 2015;
• Александр Кузнецов «Главный» сериалын, Россия, 2015;
• Пётр Журавлёв «Обгоняя время» сериалын, Россия, 2019.

Данъетъёсыз

Учконо

СССР-лэн данъетъёсыз

• Совето Союзысь Герой (27.10.1978);
• Социалистической Ужысь кык полэс Герой (03.06.1942, 17.06.1961);
• Ленин нимо дас одӥг орден (08.02.1939, 03.06.1942, 05.08.1944, 08.12.1951, 20.04.1956, 21.12.1957, 29.10.1958, 29.10.1968, 02.12.1971, 27.10.1978, 28.10.1983);
• Суворов нимо I степенё орден (16.09.1945);
• Кутузов нимо I степенё орден (18.11.1944);
• СССР-ысь дас сизьым медаль;
• Ленин нимо премилэн лауреатэз (20.04.1982);
• Сталин нимо I степенё премилэн лауреатэз (16.12.1953);
• СССР-ысь кун премилэн лауреатэз (05.02.1983).

Монгол Калык Республикалэн данъетъёсыз

• Монгол Калык Республикалэн Героез (6.08.1981);
• Сухэ-Батор нимо куинь орден (1975, 1978, 1981);
• Горд Знамя нимо орден (Монголия) (1983);
• МНР-лэн куать медалез

Чехословакиысь Социалистической Республикалэн данъетъёсыз

• Чехословакиысь Социалистической Республикалэн Героез (30.09.1982);
• Клемент Готвальд нимо кык орден (1978, 1982);
• Тӧдьы арыслан нимо I степенё орден (1977);
• ЧССР-лэн кык медалез.

Вьетнамлэн данъентъёсыз

• Хо Ши Мин нимо орден (1983).

НРБ-лэн данъетъёсыз

• «Георгий Димитров» нимо кык орден (1976, 1983);
• НРБ-лэн сизьым медалез.

ПНР-лэн данъетъёсыз

• «Крест Грюнвальда» нимо I степенё орден (1976).

Перулэн данъетъёсыз

• «За заслуги перед ВВС» орден.

ВНР-лэн данъетъёсыз

• Знамя нимо рубинъёсын кык орден (ВНР) (1978, 1983);
• ВНР-лэн медалез.

ДРА-лэн данъетъёсыз

• «Эрико Шунды» нимо орден (1982).

ГДР-лэн данъетъёсыз

• Карл Маркс нимо кык орден (1978, 1983);
• Шарнхорстлэн орденэз (1977);
• ГДР-лэн медалез.

Финляндилэн данъетъёсыз

• Тӧдьы роза нимо I степенё орден (1978).

Куба Республикалэн данъетъёсыз

• «Плайя-Хирон» нимо йӧскалык орден (1983);
• Кубалэн кык медалез.

Источникъёс

• Устинов Д. Ф. // Куценко А. Маршалы и Адмиралы флота Советского Союза. — Киев: Полиграфкнига, 2007. — С. 335—343.
• Устинов Д. Ф. // Маршалы Советского Союза. Личные дела рассказывают / Институт военных историко-патриотических проблем и исследований. — М.: Любимая книга, 1996. — С. 73—74. — ISBN 5-7656-0012-3
• Устинов Д. Ф. // Герои Советского Союза: Краткий биографический словарь / Пред. ред. коллегии И. Н. Шкадов. — М.: Воениздат, 1988. — Т. 2 /Любов — Ящук/. — С. 631. — 863 с. — 100 000 экз. — ISBN 5-203-00536-2.

Ватсам литература

• Устинов Ю. С. Нарком. Министр. Маршал: [О Д. Ф. Устинове] / Ю. С. Устинов; [Федер. целевая программа «Культура России»]. — М.: Патриот, 2002. — 461 с., [52] л. ил. — (Отчизны верные сыны). — ISBN 5-7030-0875-1.
• Маршалы Советского Союза. Личные дела рассказывают / Гл. ред. Алёшин А.; Институт военных и историко-патриотических проблем и исследований. — М.: Любимая книга, 1996. — 96 с, ил.
• Ивашов Л. Наработками Устинова мы пользуемся до сих пор [ӟуч] // Новый оборонный заказ : журнал. — 2008. — № 10. — С. 38—40.

Валэктонъёс

Чӧлсконъёс

• Устинов Д. Ф.
• Сталинской министр.
• Инженер-министр: Маршал Устиновлы 100 ар.
• Ракета лэсьтӥсьёс Дмитрий Фёдорович Устинов земляксэс буре ваё.
• Дмитрий Фёдорович Устинов. Адямилэн кунлэн обороная историяз интыез: видеозапись. — Санкт-Петербург: Президентская библиотека, 2018.