Тол Бабайлэн Вотчинаез (Великий Устюг)

Чеберлыко инты
Тол Бабайлэн Великий Устюгысь Вотчинаез
Тол Бабайлэн Вотчинаысь юртъерез
Кун	Россия Россия
Кар	Великий Устюг
Юртэз пуктэмын	2002-тӥ арын

Тол Бабайлэн Великий Устюгысь Вотчинаез — лулчеберт но туризм инлыкен Выль ар тематикая но «Великий Устюг — родина Деда Мороза» кун проектъя кылдытэм комплекс. Интыяськемын Великий Устюг карлэсь 12 иськеме. Комплекслэн парк зонаяз Тол Бабайлэн но ӟуч фольклорысь мукет персонажъёслэн пыриськемзыя пӧртэм экскурсиос, мастер-классъёс но театрализованной представлениос ортчыло. Арлы быдэ Тол Бабайлэн почтаяз быдэс дуннеысь нылпиослэсь 240 сюрс пала гожтэт вуэ.

Проектлэн кылдэмез но азинскемез

Туризмъя кун проект «Великий Устюг — родина Деда Мороза» кылдытэмын 1998-тӥ арын 21-тӥ толсуре Вологда улослэн губернаторезлэн В. Позгалевлэн но Мусколэн мерезлэн Ю. Лужковлэн кичӧлтэмзыя, Россилэсь истори но йӧскалык сямъёссэ азинтон вылысь. Проектлэн азинсконэзъя нырысетӥез ужпум — кузьымлы нылпи полиграфиез поттон, анимационной роликъйс кылдытон, история но география школьной но огъяросси олимпиадаосты Великий Устюгын ортчытонэз радъян, резиденциез паськытатонъя генеральной план кылдытон.

Кыкетӥ ужпум ― комплексысь планъя чаклам лэсьтосъёсты ӝутон. Соос пӧлысь нырысетӥез вал Тол Бабайлэн пуллэсь чеберъяса лэсьтэм юртэз. Сое сӥё-дано усьтон ужрад ортчиз 1999-тӥ арын 25-тӥ толсуре. 23 метръем кык этажо юртэз 1999-тӥ арын куарусён толэзе пуктыны кутскизы.

РФ Президентэзлэн В. Путинлэн 2008-тӥ арын толшоре Вотчинае вуылэмез

2002-тӥ арлэн кутсконаз «ВОТЧИНА ДЕДА МОРОЗА» ОАО ЕГРЮЛ-ын пусъемын (быдтэмын 2007-тӥ арын куартолэзе, али дыре «Вотчина» гостиничной комплекс нимаське), гостиницалы чаклам пичи коркаос но солы тупась инфраструктура ӝутӥське.

2024-тӥ арын татын куно пумитан 11 пичи корка, ресторанъёсын но кафеосын «Снежинка» вотэс, мунчо но сауна пуктэмын. Тол Бабайлэн юртъерез сяна, татын туризмъя мукет объектъёс кылдытэмын: Выжыкыл Корка но Выжыкыл Сюрес, Почта ёзэт, Лэсьтӥськон юрт но Кебит, чыры-пырыосын вузаськон лавка, Мода Юрт, Зоопарк но Йӧлюк. Быдэсак комплекс Вотчина шуыса нимаське.

2023-тӥ арын проектлы 25 ар тырмиз. Логистикаез умоятон понна, выльдӥзы Великий Устюгысь аэропортэз, нимысьтыз турпоездъёслэсь мынон-ветлонзэс усьтӥзы. Та интые ар куспын ӝыны миллион пала калык вуылэ. Вотчина азинске. Кылсярысь, 2023-тӥ арынвыль экскурси маршрутъёс но турзонаос усьтыны чакламын . 87 гектар интывылын отельёсын комплекс, спорт но шутэтскон объектъёс ӝутӥсько

Геральдикаез

Тол Бабайлэн штандартэз

Тол Бабайлэн гербез

Великий Устюгысь Тол Бабайлэн гербез Геральдикая ӟуч коллегиын 2000-тӥ арын инвожо толэзе пусъемын. Солэн валтӥсь кылдытэтъёсыз — лымыпыры тусъем щит, мереткыл, азвесь корона, кык кузя щитэз возись гондыръёс, коньы, чингыли но вож кыз вай.

Щитлэн азвесьпыръем-чагыр буёлэз ӟеч сямо но шонерлыко луэмез возьматэ, солэн йылаз корона — кузё луонлэн тодметпусэз. Лымыпыры но отысь гӧртэм тусо пужыос тол дуннеен герӟало. Коньы ужаны мыло-кыдо луэмез возьматэ, гондыръёс ― кужымлэн пусэз. Кыз ― ванё-буро луонэз но яланлыко луонэз. Лента вылын гожтэм «Лэсьты ӟеч ужъёс» мереткыл выжыкыл персонажлэсь сямзэ но калыкез гажамзэ возьматэ. Со йылысь пичильтык чингыли ӟеч ужъёсын герӟаськем малпанъёс быдэсмо шуыса оскытэ.

Тол Бабайлэн почтаезлэн флагез

Тол Бабйлэн кык флагез: синпӧртмасьлэн асмос штандартэз но почта флагез.

Чагыралэс-вож буёло штандартлэн шораз куать сэрего лымыпыры пушкын герблэн пичиятэм тусъетэз пуктэмын. Кыкна палтӥз кузёезлэн нимтулызлэн нырысь букваосыз суредамын.

Россилэн куинь буёло флагез тусъем почта флаглэн шораз сюр середамын — азьвыл дауръёсысь ӝоглыко почта каретаослэн тужгес кулэ луись тӥрлыксы. Кык суредам лымыпырыос возьмато гожтэтэз басьтӥсез, нош Великий Устюглэн гербез выжыкыл Вотчинаез огшоры улонэн герӟа

Геральдика пусъёсты кылдытӥзы но соосты карлы кузьмазы Геральдикая Огъяросси Дэменлыклэн ёзчиосыз Ефим но Елена Комаровскийёс

Мадёс

Великий Устюг карлэн гербаз Вукисьтась суредамын (альтернативной исторической версияя — Нептун ). Кияз возись кык кувшинъёсысь ву кисьтамез со интыостӥ бызись кык шуръёслэсь огазеяськемзэс возьматэ, соослэн огазеяськыса быземзы Северная Двина шурлы кутскон сётэ.

Вотчинаысь ӟечкылан пул, 2017-тӥ ар

Со мадёслэн авторез Ольга Кульневская. Солэн верамезъя, Вукисьтась Морозлэн бадӟым агаез вылэм. Соос Великий Устюглы матэ интыяськем Гледен гурезь котырын улӥллям. Синпӧртмась вынъёс котырысь вань шуръёсын но тыосын сяна, куазен, зорен но лымыен кивалтылӥллям. Вукисьтась арлэн шуныт вакытаз кузёяськем, нош Мороз сое толсур толэзьысен воштылэм. Огпол вынъёс керетӥллям но Мороз дуннеез котыръяны потэм. Уйпал полушариез, Япониысен кутскыса, Англилэн Уйпал пумозяз быдэсак ортчем. Кык ар куспын дуннез котыръянназ пурысьтаса но ас палъёсызлэсь мӧзмыса, Великий Устюгаз берытскем. Агаез но солэсь мӧзмем, Морозэз ӟыгыртыса, карлы матэ интыяськыны, тол куазен кузёяськыны но ӟеч ужъёс лэсьтыны ӵектэм

Тол Бабайлэсь вордӥськем нуналзэ 18-тӥ шуркынмонэ пусъё, малы ке шуоно, ӵапак со дырысен Вологда улосэ нырысь кезьытъёс вуо.

Тулысэз пумитан праздник

Вотчинаысь экскурсиос

Нуналлы быдэ экскурсиослы чаклам программаос:

• Выжыкыл Сюрес. Кукрибабалэн тунсыко шудон-ӵошатскон ужъёсыз но Паук Пауковичлэн лабиринтэз. Татын спортлы но выжыкылъёслы сӥзем темая ужрад но тэльын эктыны дышетон урок ортче.
• Кебит ― дуриськон уж но солэн аспӧртэмлыкъёсыз сярысь пичияк лекция.
• Выжыкыл Корка. Пинал следопытъёслы визьбуро квест. Выль арез мозмытон понна, коркась потон ӧсэз шедьтоно.
• Зоосад ― пуны кыткетъёсын нылпиосты ворттылытон (арлэн тупась вакытэзъя).
• Лэсьтӥськон юрт. Кыз шудонъёс лэсьтонъя мастер-классъёс.
• Тол Бабайлэн юртъерез. 12 висъетъёсъя экскурсия но Тронной залын валтӥсь выжыкыл персонажен синмысь синме вераськон.
• Почта ёзэт. Гожтэтъёсты возён интыен тодматон но нылпиослэсь Тол Бабайлы вуэм кузьымъёсты возьматон.

Тол Бабайлы гожтэтъёсты таӵе интыпусъя келяно — 162390, Вологда улос, Великий Устюг, Октябрь нимо пролка., 1А номеро юрт, Ӟуч Тол Бабайлы. Озьы ик луэ вакчиятэм интыпусъя келяны: «Великий Устюг, Тол Бабайлы».

Валэктонъёс