Ижысь ТЭЦ-1
| Ижысь ТЭЦ-1 | |
|---|---|
 | |
| Кун |
 Россия |
| Интыяськемез |
 Удмуртия Ижкар,Дерябинлэн проездэз, 7 |
| Кузёез | Т Плюс[d] |
| Статусэз | Ужась |
| Эксплуатацие лэзён ар | 1934 |
| Эксплуатацие кутӥсь огазеяськон | Т Плюс[d] |
| Валтӥсь тодметъёсыз | |
| Электро кужымез, МВт | 278,6 |
| Шуныт сётӥсь кужымез | 385,8 Гкал/час |
| Тӥрлыклэн тодметъёсыз | |
| Валтӥсь шуныт | инкуазьысь газ |
| Резервысь шуныт | мазут |
| Валтӥсь сооружениос | |
| Распределитель тӥрлык | КРУЭ 110 кВ |
| Карта | |
|
|
|
 |
|
 Медиафайлъёс РувикиМедиа пушкын | |
Ижысь ТЭЦ-1 (ӟуч: Ижевская ТЭЦ-1) — Удмурт Элькунысь Ижысь Ленин ёросын интыяськем теплоэлектроцентраль. «Т Плюс» ПАО-лэн Удмурт ёзаз пыре.
Ижкарысь ТЭЦ-1 электро энергиез но кужымез келя электро энергиен но кужымен оптовой рыноке. Ижез централизованной амалэн шунтонъя валтӥсь кужым луэ, озьы ик карысь бадӟымесь промышленной предприятиосы но улоно коркаосы шуныт сётэ. Юнматэм электро кужымез — 233,9 МВт, шуныт сётон кужымез — 385,8 Гкал/час[1].
Историез
1930-тӥ арын Ижсталь заводлэсь кулэяськонъёссэ быдэстон но пыӵалтӥрлык поттон производствоез азинтон вылысь Россиысь электрофикацияя кун комиссия (ГОЭЛРО) чакламъя Иже ТЭЦ ӝутыны кутскизы. Иж тымет котыре инты бырйизы. Топливо тырмымтэен, лэсьтӥськон куинь арлы кынтэмын-дугдытэмын вал. Пуктӥськонэз киын, механизированной тӥрлыктэк, быдэстӥзы. Нырысетӥез 24 МВт кужымен ужась энергоблок 1934-тӥ арын эксплуатацие лэземын вал[2].
Станцилэн нырысетӥ люкетэз пу шелепен эстыны чакламын вал, 1936-тӥ арысен станциез эгырен эстон вылысь ужатыны ӧдъязы. Быдӟым Атыкай ож вакытэ станцие оккупацие шедем улосъёсысь эгыр вуттыны секыт луиз, таин валче Сибирьысь ваем пуэн но эгырен эстӥськылӥзы. 1944-тӥ арын Удмурт шаерын поттэм гыбед (торф) вылын ужась котёлэз эксплуатацие лэзизы[2].
Ож ортчем бере ТЭЦ-ез выльдӥзы, Уралысь ОЭС-ен валче ужанэ выжтэмын вал, каре шуныт сётонэз ас вылаз басьтӥз[2]. 1961-тӥ арын Ижысь корт ӵыжатон заводысь поттэмын но Удмуртэнергое сётэмын[3]. Россиысь РАО ЕЭС компаниын реформа ортчемен, ТЭЦ-1 пыриз ТГК-5 компание, бӧрысь со «Волжская ТГК» ОАО-ен огазеямын вал. 2015-тӥ арын огазеям компанилэн нимыз воштӥськиз, со «Т Плюс» ПАО луиз.
2014-тӥ арын 230,6 МВт кужымен ужась ПГУ энергоблок лэземын[1].
Тодметъёсыз
Удмурт энергосистема но Ижысь ТЭЦ-1 пыро Уралысь огазеям энергосистемае. Ижысь ТЭЦ-1 но ТЭЦ-2 — карысь энерго герӟетысь валтӥсь кужым сётӥсьёс. 2015-тӥ ар пумын ивортонъёсъя, ТЭЦ-1 предприятилэн юнматэм электро кужымез 290,6 МВт луэ, со улосысь электростанцилэн огъя кужымезлэн 36 процентэз. 2014-тӥ арын поттэм электроэнергилэн быдӟалаез 1342 млн кВт⋅ч люкаськиз[4].
ТЭЦ-1 пӧртэм сямен шуныт но, югыт но сётэ. Карез централизованно шунтон амалъя шуныт сётонъя валтӥсь кужым луэ. Станцилэн юнматэм шуныт сётӥсь кужымез — 643,8 Гкал/ч (кема консервациын улэм вакытсэ санэ басьтыса — 100 Гкал/ч)[5].
Югыт но шуныт сётон кужымезъя ТЭЦ-1 келя Ижысь ТЭЦ-2 предприятилы но быдӟалаезъя улосысь кыкетӥез электростанция луэ[4].
Станциын блок луисьтэм люкетыз, выль ПГУ блок но ортчыт ву шунтон котельной ужало. Блок луисьтэм люкетаз вить энерго котёлъёс пыро, озьы ик 12 МВт кужымен ужась вить паросиловой турбогенераторъёс (1971-тӥ—1989-тӥ аръёсы эксплуатацие лэземын, соос пӧлын ньыль ПТ-12/15-35/10М но одӥг Р-12-35/5М). Парен но газэн ужась установкалэн юнматэм кужымез 230,6 МВт, сое 2014-тӥ арын эксплуатацие кутӥзы. ПГУ блокысь валтӥсь тӥрлык пӧлы пыро: 172,6 МВт кужымен ужась газотурбинной ГТЭ-160 установка, музъем валлин юнматэм Е-236/40.5-9.3/1.5 кык давлениен котёл-утилизатор но 58 МВт кужымен ужась теплофикационной одӥг цилиндръем Т-63/76-8,8 паровой турбина. Ву шунтӥсь котельное пыро ПТВМ-100 котёл но консервацие пуктэм кык ПТВМ-50 котёлъёс[4][5].
Валтӥсь эстӥськон (топливо) чот кутӥське магистралетӥ кошкись инкуазь газ, резерв чот эстӥськонлы дасямын мазут (парен ужась черодэн кужым поттон понна) но инкуазь газ (парен но газэн ужась установкаос понна)[4].
Галерея
Ижысь ТЭЦ-1 предприятилэн тусыз
Ижысь ТЭЦ-1
Ижысь ТЭЦ-1
Ижысь ТЭЦ-1
Ижысь водохранилище
Валэктонъёс
- ↑ 1 2 Ижевская ТЭЦ-1 [ӟуч] ПАО «Т Плюс». Эскеремын 16-11-2025 арын
- ↑ 1 2 3 Светлана Сырыгина (06-02-2014) ТЭЦ-1 — 80 лет! Как строили — за один год вместо четырёх [ӟуч] izhlife.ru. Эскеремын 16-11-2025 арын
- ↑ Удмуртская Республика: Энциклопедия / гл. ред. В. В. Туганаев. — Ижевск: Удмуртия, 2008. — С. 353. — 768 с. — 2200 экз. — ISBN 978-5-7659-0486-2.
- ↑ 1 2 3 4 Распоряжение № 147-РГ [ӟуч] Официальный сайт Главы Удмуртской Республики и Правительства Удмуртской Республики (5-04-2016). Эскеремын 16-11-2025 арын
- ↑ 1 2 Схема теплоснабжения города Ижевска на период до 2031 г. [ӟуч] Администрация города Ижевска. Эскеремын 16-11-2025 арын
Литература
- Удмуртская Республика: Энциклопедия / гл. ред. В. В. Туганаев. — Ижевск: Удмуртия, 2008. — С. 353. — 768 с. — 2200 экз. — ISBN 978-5-7659-0486-2.
Чӧлсконъёс
- Ижевская ТЭЦ-1 [ӟуч]