Смагин-Тимофеев купечъёслэн юртсы
| Смагин-Тимофеев купечъёслэн юртсы | |
|---|---|
 | |
| Юрт сярысь ивортон | |
| Интыяськемез | Глаз |
| Кун | |
| Архитекторез | тодмотэм |
| Заказчикез | 3-тӥ гильдиысь купеч Павел Смагин |
| Архитектураысь стиль | классицизм |
| Этажъёслэн лыдзы | 3 |
 |
|
Смагин-Тимофеев купечъёслэн юртсы (озьы ик Смагин купечлэн юртэз, Тимофеев купечлэн юртэз; ӟуч: Дом купцов Смагиных-Тимофеевых) — Удмуртиысь Глазов шорысь куинь этажъем из юрт. Карен утёно историысь но лулчеберетысь синпелетъёс пӧлы пыртэмын. XIX даурлэн нырысетӥ люкетаз пуктэмын.
Историез
3-тӥ гильдиысь купеч Павел Смагин 1830-тӥ—1840-тӥ аръёсы Глазов шоры аслыз улон вылысь корка пуктӥз, куинь этажъем из юртъёс пӧлысь со огез нырысетӥез луиз. Та интыын XIX даурлэн кутсконаз П. И. Чайковскийлэн песятаезлэн П. Ф. Чайковский городничийлэн юртъерез сылӥз[1].
Смагин улонысь кошкем бере коркаез нылпиосызлы кылиз. Куд-ог ивортонъёсъя, 1870-тӥ арын юртлэн кузёез «нянь вылын пукетэм винаен» вузкарись 2-тӥ гильдиысь глазов купеч Николай Смагин вал[2].
XIX даурлэн пумаз юртъер 2-тӥ гильдиысь купечлэн Александр Тимофеевлэн лыдъяськылӥз, со коркаез муртъёслы улон вылысь арендае сётъялляз, озьы ик вузкаронэн вырись пӧртэм огазеяськонъёслы висъялляз. Кылсярысь, 1901-тӥ арын юртлэн огаз висъетаз вуриськон машинаосын вузаськись «Зингер» компания ужалляз, кыкетӥ но куинетӥ этажъёсын сазь улон понна нюръяськонъя общество (Общество трезвости) интыяськылӥз. Нырысетӥ этажын Тимофеев курытэныз вузкарон инты (ӟуч: рейнский погреб) лэсьтӥз, нош подвалзэ пряник пыжисьёслы висъяз. Излэсь ӝутэм флигельын арендаторъёс улӥзы. 1910-тӥ арын юртъерлэн оглюкетаз Глазовысь нылкышно гимназия пыриз[1][3].
Революция бере юртэз национализировать каризы. 1927-тӥ арын сое Глазов карысь потребительской обществолы ваньбур чот сётӥзы, таиз коркаез пӧртэм ужъюртъёслы висъяз: школаослы, удмурт клублы, библиотекалы, лыдӟиськон юртлы, шаертодонъя музейлы но мукет. 1934-тӥ арысен юртъерез арендае Облсовпартшкола басьтӥз[4].
Быдӟым Атыкай ож вакытэ юртын Глазове эвакуациен ваем Ленинградысь Кыкетӥ ожгаръя но пехотая училищелэн столовоез ужалляз[1].
Ож бере коркан ӧсъёссэ усьтӥз интыысь ресторан но калыкез сюдон инты. 2024-тӥ арын ивортонъёсъя, рос-прос тупатъямзы бере купечъёслэн юртазы кафе ужа[1].
Юрт вылын таӵе ивортонэн пул шуккемын: «Та интыысь азьвыл юртъерын 1796-тӥ—1818-тӥ аръёсы быдӟым композиторлэн П. И. Чайковскийлэн песятаез, Глазовлэн йырыз П. Ф. Чайковский улӥз»[4].
Смагин-Тимофеев купечъёслэн юртсы карен утёно историысь но лулчеберетысь синпелетъёс пӧлы пыртэмын[2].
Архитектураез
Павел Смагин классицизм стилья корка пуктӥз, чурыт геометриез но чеберлыкез чакласа. Ульча ласянь валтӥсь 7 укноос вадьсы 5 укноем излэсь мезонин ӝутэмын, соос лякылэм кунпусэн но пинё фризэн чеберъямын, треугольник выллем быдэстэмын. Озьы ик фасадэз ӝыныё колоннаосын ӝутэмын. Кыкетӥ этажысь укноос вадьсын куинь сэрго сандрикъёс лэсьтэмын[5].
Корка пушлэн оглюкетэз утиськемын[4].
Валэктонъёс
- ↑ 1 2 3 4 Дом купцов Смагиных-Тимофеевых [ӟуч] Историческийбагаж.рф. Эскеремын 07-11-2025 арын
- ↑ 1 2 «Дом Смагиных (Тимофеевых)» [ӟуч] Глазовский краеведческий музей. Эскеремын 07-11-2025 арын
- ↑ Дарья Гордеева Легенды атомных городов: упавший спутник, туннели и пряники в подвале [ӟуч] goroda.media. Эскеремын 07-11-2025 арын
- ↑ 1 2 3 Дом купца П. Смагина [ӟуч] UDM.travel. Эскеремын 07-11-2025 арын
- ↑ Дом купца Тимофеева [ӟуч] proudm.ru. Эскеремын 07-11-2025 арын
Чӧлсконъёс